ដោយ ស៊ីវ ម៉េង
ភ្នំពេញ៖ គំរោង Food Palace ដែលជាបណ្តុំទីកន្លែងលក់អាហារចម្រុះនៅក្នុងទីក្រុងរណបជ្រោយចង្វារបានបើកដំណើរការហើយ ដើម្បីស្វាគមន៍អ្នកស្វែងរកអាហារចម្រុះ និងសម្បូរបែប។
Food Palace ចាប់ផ្តើមបើកដំណើរការនៅទីក្រុងរណបជ្រោយចង្វារ
ប្រធានផ្នែកប្រតិបត្តិនៃគំរោង Food Palace និងជួលនៃក្រុមហ៊ុន OCIC លោក រិន រ៉ី បានមានប្រសាសន៍ឲ្យដឹងតាមទូរស័ព្ទ នាព្រឹកថ្ងៃទី៥ មេសានេះថា Food Palace បានបើកដំណើរការតាំងពីថ្ងៃទី១១ ខែមិនាកន្លងមកនេះ ប៉ុន្តែមិនទាន់បើកសម្ភោធជាផ្លូវការនៅឡើយទេ តែយ៉ាងណាបន្ទាប់ពីបើកដំណើរការ យើងទទួលបានការគាំទ្រពីអទិថិជនកាន់តែច្រើនឡើងពីមួយថ្ងៃទៅមួយថ្ងៃ ដោយជាមធ្យមយើងទទួលបានភ្ញៀវប្រមាណ៣០០នាក់ក្នុងមួយថ្ងៃៗ។
លោកបន្តថា “Food Palace មានអាហារបួនប្រភេទ គឺអាហារអឺរ៉ុប ជប៉ុន កូរ៉េ និងអាហារបែបខ្មែរ ចិន ដែលអតិថិជនអាចជ្រើសរើសបានតាមចំណង់ចំណូលចិត្ត”។ លោកបន្តថា “តាមគំរោងការបើកសម្ភោធដំណើរការជាផ្លូវការនៃគំរោងនេះ នឹងធ្វើឡើងក្រោយពិធីបុណ្យចូលឆ្នាំប្រពៃណីជាតិខ្មែរនាពេលខាងមុខនេះ”។
លោក រិន រ៉ី បានមានប្រសាសន៍ឲ្យដឹងទៀតថា គំរោងនេះគ្រោងចំណាយទុនវិនិយោគ ៣លានដុល្លារអាមេរិក ប៉ុន្តែការចំណាយជាក់ស្តែងអស់ប្រមាណ ១,៧លានដុល្លារអាមេរិកប៉ុណ្ណោះ សំរាប់គំរោងស្ថិតនៅលើផ្ទៃដីជិត២ហិកតា។
ទីក្រុងរណបជ្រោយចង្វារស្ថិតនៅលើផ្ទៃដីជាង ១០០ហិកតា ស្ថិតនៅស្របនឹងផ្លូវជាតិលេខ៦អា ស្ថិតក្នុងសង្កាត់ជ្រោយចង្វារ ខ័ណ្ឌជ្រោយចង្វារ រាជធានីភ្នំពេញ។
លោក ទូច សំណាង អគ្គនាយករងក្រុមហ៊ុន OCIC បានមានប្រសាសន៍ឲ្យដឹងថា ទីក្រុងរណបជ្រោយចង្វារបាននិងកំពុងរៀបចំជាទីក្រុងបែប Smart City ដើម្បីជំរុញការអភិវឌ្ឍតំបន់នេះ ឲ្យក្លាយជាទីក្រុងមួយប្រកបដោយផាសុខភាព ពិសេសក្រុមហ៊ុនគ្រោងរៀបចំទីក្រុងនេះជាតំបន់ពាណិជ្ជកម្មចម្រុះ ដែលមានភាពស្រដៀងគ្នានឹងផ្លូវមុនីវង្សនាពេលបច្ចុប្បន្ននេះ៕
