ដោយ គង់ សូរិយា
ភ្នំពេញ៖ ទីផ្សារអចលនទ្រព្យនៅប្រទេសឡាវ បានបង្ហាញសញ្ញារីកចម្រើនហើយ ខណៈអ្នកវិនិយោគជាច្រើន បានសម្លឹងទៅកាន់ទីផ្សារប្រទេសមួយនេះ ដែលការវិនិយោគរបស់ពួកគេបានផ្តោតលើប្រជាជន មានជីវភាពថ្នាក់កណ្តាលច្រើនជាងគេ។
លោក James Whitehead អគ្គនាយកនៃគេហទំព័រ Yula.la,Lao ប្រចាំប្រទេសឡាវបានមានប្រសាសន៍ឲ្យដឹង តាមប្រព័ន្ឋតេឡេក្រាមកាលពីរសៀលថ្ងៃទី៥ មេសាកន្លងមកថា វិស័យលំនៅដ្ឋានសំរាប់ប្រជាជនថ្នាក់កណ្តាល ការឌីសាញគំរោងអចលនទ្រព្យនានាកំពុងមានតម្រូវការខ្ពស់។ លោកបន្តថា អ្នកវិនិយោគភាគច្រើនដែលកំពុងវិនិយោគនៅប្រទេសឡាវ មានជនជាតិវៀតណាម ថៃ ចិន ជប៉ុន កូរ៉េ និងអ្នកវិនិយោគមកពីប្រទេសសឹង្ហបុរី។
លោកបន្តថា “អ្នកវិនិយោគចិននឹងក្លាយជាអ្នកវិនិយោគនាំមុខគេ នាពេលខាងមុខនៅប្រទេសឡាវ ដែលពួកគេផ្តោតការវិនិយោគលើវិស័យលំនៅដ្ឋាន ផ្សារលក់រាយ និងមជ្ឈមណ្ឌលពាណិជ្ជកម្ម”។ លោកបន្តថា “មានការព្យាករណ៍ថាការវិនិយោគពីប្រទេសចិននឹងកើនឡើងខ្លាំង បន្ទាប់ពីការបញ្ចប់ការសាងសង់ផ្លូវរថភ្លើងល្បឿនលឿន ពីប្រទេសចិន មកកាន់ទីក្រុងវៀងច័ន្ទ ប្រទេសឡាវបញ្ចប់នៅឆ្នាំ២០២១ខាងមុខ”។
លោក James Whitehead បានបន្តថា ទីផ្សារនៃសេវាកម្មបដិសណ្ឋារកិច្ច ទេសចរណ៍ និងអចលនទ្រព្យកំពុងមានភាពរីកចម្រើនខ្លាំងនៅទីក្រុងវៀងច័ន្ទ ហ្លួងប្រាបាង និងទីក្រុងវាន់វៀង ដែលជាទីក្រុងមានភាពលេចធ្លោជាងគេនៅប្រទេសឡាវ។ លោកបន្តថា តម្លៃដីឡូត៍ និងលំនៅដ្ឋាននៅប្រទេសឡាវ មានតម្លៃជាមធ្យម ៦០០០ដល់ ៦០,០០០ ដុល្លារអាមេរិក៕
