ភ្ជាប់ទំនាក់ទំនងដើម្បីទទួលបានព័ត៌មានទាន់ហេតុការណ៍ ៖ @propertyarea_asia
ដោយ: គង់ លាងហួរ
អន្តរជាតិ: យោងតាមក្រុមអ្នកវិភាគ និងអ្នកជំនាញបានឱ្យដឹងថា កម្ពុជាមិនគួរព្រួយបារម្ភខ្លាំងពេកអំពីសេចក្តីប្រកាសរបស់ប្រធានាធិបតីអាមេរិក លោក ដូណាល់ ត្រាំ ក្នុងការយកពន្ធចំនួន៤៩ភាគរយលើការនាំចូលទំនិញរបស់កម្ពុជាទៅកាន់សហរដ្ឋអាមេរិកឡើយ។
ទន្ទឹមនឹងនេះ រដ្ឋាភិបាលកម្ពុជាអាចនឹងចូលរួមក្នុងការចរចាជាមួយរដ្ឋាភិបាលសហរដ្ឋអាមេរិក សំដៅដើម្បីកាត់បន្ថយផលប៉ះពាល់នៃកាតព្វកិច្ចពន្ធថ្មីខាងលើ។
លោក ប៉ែន សុវិជាតិ អ្នកនាំពាក្យក្រសួងពាណិជ្ជកម្មបានអះអាងថា “ទំនាក់ទំនងពាណិជ្ជកម្មរវាងសហរដ្ឋអាមេរិក និងកម្ពុជាមានលក្ខណៈធម្មតា ដោយសារសហរដ្ឋអាមេរិកជាប្រទេសមហាអំណាចសេដ្ឋកិច្ចដ៏ធំមួយ ដែលមានតម្រូវការច្រើនសម្រាប់ទំនិញដែលផលិតនៅកម្ពុជា”។
លោកបន្តថា អតុល្យភាពពាណិជ្ជកម្មនេះក៏ជះផលប៉ះពាល់ដល់បណ្តាប្រទេសជាច្រើនទៀតផងដែរ ដូចជាប្រទេសកាណាដា និងបណ្តាប្រទេសអឺរ៉ុបមួយចំនួន។
លោកបានមានប្រសាសន៍ឱ្យដឹងថា “រដ្ឋាភិបាល និងក្រសួងពាណិជ្ជកម្មនឹងខិតខំប្រឹងប្រែងដើម្បីការពារផលប្រយោជន៍សម្រាប់ឧស្សាហកម្មនាំចេញ ក៏ដូចជាផលប្រយោជន៍របស់កម្មករនៅក្នុងប្រទេសកម្ពុជា”។
មន្ត្រីជាន់ខ្ពស់រូបនេះបន្ថែមថា “ក្រសួងកំពុងសហការជាមួយស្ថាប័នពាក់ព័ន្ធទាំងអស់ ដើម្បីធ្វើការសិក្សា និងវាយតម្លៃពីផលប៉ះពាល់មកលើឧស្សាហកម្មនាំចេញរបស់កម្ពុជា។ ការសិក្សានេះនឹងផ្តល់ទិន្នន័យជាក់ស្តែងសម្រាប់ការពិភាក្សា និងការចរចាទ្វេរភាគី ដោយសារកម្ពុជាជាសមាជិកអាស៊ាន ហើយសហរដ្ឋអាមេរិកធ្វើពាណិជ្ជកម្មជាមួយបណ្តាប្រទេសអាស៊ាន”។
អ្នកឧកញ៉ា លី ឃុនថៃ ប្រធានសហព័ន្ធសមាគមអ្នកវិនិយោគកម្ពុជា និងជាប្រធានសមាគមស្បែកជើងកម្ពុជាបានលើកឡើងថា បើទោះបីជាមានការព្រួយបារម្ភកាន់តែខ្លាំងឡើង និងការពិភាក្សាយ៉ាងផុសផុលអំពីការដំឡើងពន្ធយ៉ាងណាក្តី ក៏លោកមិនមានការព្រួយបារម្ភខ្លាំងពេកនោះទេ។
អ្នកជំនាញរូបនេះជឿជាក់ថា បញ្ហានេះនឹងត្រូវដោះស្រាយតាមរយៈការចរចារវាងរដ្ឋាភិបាលកម្ពុជា និងសហរដ្ឋអាមេរិក ហើយបច្ចុប្បន្ន កម្ពុជាកំពុងព្យាយាមជំរុញការនាំចេញផលិតផលកាត់ដេររបស់ខ្លួនទៅកាន់បណ្តាប្រទេសនៅអឺរ៉ុប កាណាដា អង់គ្លេស និងតំបន់អាស៊ាន។
ដោយឡែក លោក មាស សុខសេនសាន អ្នកនាំពាក្យក្រសួងសេដ្ឋកិច្ច និងហិរញ្ញវត្ថុបានគូសបញ្ជាក់ថា “ក្រុមការងាររបស់ក្រសួងបានពិនិត្យលើផលប៉ះពាល់នៃការដំឡើងពន្ធនេះ។ យើងនឹងចាត់វិធានការជាក់ស្តែង និងហ្មត់ចត់ ដើម្បីធានាថា សេដ្ឋកិច្ចរបស់យើងនៅតែមានការប្រកួតប្រជែង និងបន្តរីកចម្រើន ដើម្បីផ្តល់ផលប្រយោជន៍ និងឱកាសការងាររបស់ប្រជាពលរដ្ឋ”៕ប្រភព: The Nation៕
