ដោយ ស៊ីវ ម៉េង
ភ្នំពេញ៖ ភាពអំណោយផលនៃទីតាំងភូមិសាស្រ្ត ការតភ្ជាប់ហេដ្ឋារចនាសម្ព័ន្ឋ និងគោលនយោបាយអភិវឌ្ឍន៍វិស័យឧស្សាហកម្មរបស់រដ្ឋាភិបាល បាននិងកំពុងជំរុញឲ្យក្រុងបាវិតក្លាយជាទីក្រុងពាណិជ្ជកម្មដ៏ធំមួយនាពេលអនាគត។
ការប្រកាសសាងសង់ផ្លូវល្បឿនលឿនភ្នំពេញ បាវិតរបស់ប្រមុខរដ្ឋាភិបាលកាលពីពេលថ្មីៗនេះ កំពុងពេលសម្តេចអញ្ជើញបើកការដ្ឋានសាងសង់ ផ្លូវល្បឿនលឿនភ្នំពេញ ក្រុងព្រះសីហនុកាលពីថ្ងៃទី២២ មិនាកន្លងមកនេះ ជាសញ្ញានៃការចាប់ផ្តើមអនុវត្តន៍គោលនយោបាយកសាងព្រំដែនសន្តិភាព មិត្តភាព និងអភិវឌ្ឍន៍របស់រដ្ឋាភិបាលកាន់តែពេញលេញ។
នាយកក្រុមហ៊ុនអចលនទ្រព្យ Century21 Fortuna Investment លោក វ៉ា វីរៈ បានប្រាប់ឱ្យដឹងកាលពីពេលថ្មីៗនេះថា ក្រុងបាវិត ខេត្តស្វាយរៀង គឺជាផ្នែកមួយដែលស្ថិតនៅក្នុងក្រសែភ្នែក របស់អ្នកវិនិយោគជនជាតិចិន បន្ទាប់ពីខេត្តជាប់តំបន់សមុទ្រដូចជាក្រុងព្រះសីហនុ កំពត កែប និងកោះកុង ព្រោះខេត្តមួយនេះគឺជាច្រកព្រំដែនអន្តរជាតិ ដែលសរសៃឈាមសេដ្ឋកិច្ចយ៉ាងសំខាន់។
លោកបន្តថា “ក្រុងបាវិតពេលនេះ កំពុងតែកែប្រែមុខមាត់យ៉ាងល្អប្រសើរជាមួយនឹងសកម្មភាពដ៏រស់រវើកនៃ វិស័យពាណិជ្ជកម្ម និងសំណង់ដើម្បីឆ្លើយតបទៅនឹងកំណើនមនុស្សដែលចូលទៅរស់នៅ និងវិនិយោគលើវិស័យផ្សេងៗដូចជាឧស្សហកម្ម រោងចក្រ និងកាស៊ីណូនៅក្នុងក្រុងមួយនេះ”។
លោកវីរៈបានបន្តថា “ដោយសារតែវិស័យពាណិជ្ជកម្មក្នុងតំបន់កើនឡើង បានជំរុញឱ្យតម្រូវការនៃវិស័យអចលនទ្រព្យ នៅទីក្រុងនេះមានភាពពុះកញ្ច្រោលខ្លាំង ដោយសារតែអ្នកវិនិយោគបានចំណាយទុនសាងសង់ជាផ្ទះល្វែង ជាបុរី ឬជាសណ្ឋាគារជាដើម ដើម្បីផ្គត់ផ្គង់តម្រូវការស្នាក់នៅបណ្តាបុគ្គលិក ដែលបម្រើការងារ ក៏ដូចជាចំនួននៃកំណើនភ្ញៀវទេសចរផងដែរ។
លោកបន្តថា “សកម្មភាពទាំងនេះហើយ ដែលធ្វើឱ្យតម្លៃដីធ្លីនៅក្នុងក្រុងបាវិត ក៏ដូចជាតំបន់ដែលស្ថិតនៅជាប់ជាយក្រុងមានការកើនឡើងខ្លាំង”។
រដ្ឋាភិបាលបានដាក់ក្រុងបាវិត ជាទីក្រុងសម្រាប់អភិវឌ្ឍន៍វិស័យឧស្សាហកម្មពិសេសមួយ ក្នុងគោលនយោបាយអភិវឌ្ឍន៍វិស័យឧស្សាហកម្មឆ្នាំ២០១៥ ២០២៥។
ប្រធានសមាគមអ្នកជំនាញអចលនទ្រព្យកម្ពុជា លោកឃាង ពុទ្ធី បានលើកឡើងថា បាវិតពេលនេះក៏ដូចជាថ្ងៃខាងមុខ គឺនៅតែមានសក្ដានុពលលើវិស័យពាណិជ្ជកម្មមិនចាញ់ក្រុងប៉ោយប៉ែតនោះទេ ។ លោកថា ក្រុងបាវិត ខេត្តស្វាយរៀង មានភាពល្អប្រសើរច្រើន និងអំណោយផលដល់វិស័យពាណិជ្ជកម្ម ឧស្សាហកម្ម ក៏ដូចជាវិស័យអចលនទ្រព្យផងដែរ ព្រោះខេត្តនេះជាច្រកទ្វារអន្តរជាតិ មានសារសំខាន់លើផ្នែកសេដ្ឋកិច្ច ហើយក៏មានដង់ស៊ីតេប្រជាជនរសនៅខ្ពស់។
លោកបន្តថា ទីផ្សារអចលនទ្រព្យនៅទីនោះ មានភាពខុសប្លែកពីគ្នាដែលវាអាស្រ័យទៅលើទីតាំងនៃតំបន់ ស្ថានភាពផ្លូវ និងតំបន់ប្រជាសាស្ត្ររស់នៅ”។ លោកបានបញ្ជាក់ថា “តម្លៃដីដែលស្ថិតនៅតំបន់ទីប្រជុំជនក្នុងក្រុងជាប់នឹងផ្លូវធំ ឬនៅក្បែរកាស៊ីណូ អាចមានតម្លៃក្នុងចន្លោះ១០០០ទៅ២០០០ ដុល្លារក្នុងមួយម៉ែត្រការ៉េ ឬអាចលើសពីនេះនៅតំបន់ខ្លះ។ ប៉ុន្តែបើនៅផ្លូវអាចមានតម្លៃក្នុងចន្លោះ៤០០ ទៅ៥០០ដុល្លារក្នុងមួយម៉ែត្រ ហើយបើចុះពីផ្លូវជាតិ ឬឆ្ងាយពីផ្លូវធំប្រមាន១គីឡូម៉ែត្រ អាចមានតម្លៃ១០០-២០០ដុល្លារក្នុងមួយម៉ែត្រការ៉េ ហើយបើឆ្ងាយជាងនេះ តម្លៃក៏កាន់តែចុះទៅតាមស្ថានភាពនៃទីតាំងដី។
លោកបន្តថា “ក្រុងបាវិត ខេត្តស្វាយរៀង ជាតំបន់មួយដែលមានភាពល្អប្រសើរ និងសមស្របទៅលើការអភិវឌ្ឍវិស័យលំនៅដ្ឋាន ព្រោះតំបន់មានកំណើនប្រជាជនច្រើន ជាប់ជាប្រចាំ”។
ក្នុងជំនួបជាមួយសម្តេចតេជោកាលពីពេលថ្មីៗនេះ អគ្គនាយកក្រុមហ៊ុនស្ពានថ្នល់ប្រទេសចិន បានសន្យានឹងសាងសង់ផ្លូវល្បឿនលឿនភ្នំពេញ បាវិតនាពេលខាងមុខនេះ ខណៈផ្លូវនេះបានសិក្សារួចហើយដោយអ្នកជំនាញ នៃទីភ្នាក់ងារសហប្រតិបត្តិការអន្តរជាតិជប៉ុន (JICA) ដែលការសាងសង់ផ្លូវនេះ គ្រោងចំណាយថវិការហូតដល់៣៨០០លានដុល្លារអាមេរិក៕
