ដោយ រ៉ាណេត
ភ្នំពេញ៖ មានមនុស្សជាច្រើនតែងលើកឡើងថា បើចង់ធ្វើជំនួញឬរកស៊ីធំដំត្រូវតែ មានដើមទុនច្រើន ធ្វើជាបង្អែកទើបអាចដំណើរការបាន។ ប៉ុន្តែសម្រាប់គំនិតរបស់លោកបណ្ឌិតគួយ ធាវី ដែលជាសាស្ត្រាចារ្យផ្នែកវិទ្យាសាស្ត្រនិយោបាយបានអះអាងថា ទោះជាមានដើមទុនតិច ឬគ្មានដើមទុនក៏ដោយ ប្រសើនបើចង់ធ្វើជំនួញធំ ឬរកស៊ីធំ គឺនៅតែអាចធ្វើទៅបានឱ្យតែមានគំនិត និងការព្យាយាម។
លោកបណ្ឌិត គួយ ធាវី បានមានប្រសាសន៍ថា គំនិត និងការគិតប្រកបដោយត្រឹមត្រូវ និងវិជ្ជមាន គឺជាប្រភពដើមទុនដ៏ធំ និងសំខាន់បំផុតក្នុងការធ្វើជាខ្នងបង្អែកដ៏រឹងមាំនៅក្នុងការប្រកមមុខជំនួញ។
-->
លោកបានបញ្ជាក់ថា ឧទាហរណ៍ ប្រសិនបើខ្ញុំមានលុយត្រឹមតែ១,០០០ដុល្លារ ប៉ុន្តែខ្ញុំចង់ធ្វើការវិនិយោគទៅលើដី ដែលមានតម្លៃរហូតដល់ ១០,០០០ដុល្លារ នឹងធ្វើឱ្យកើតចេញជាសំណួរថា តើខ្ញុំគួរធ្វើយ៉ាងណាទើបអាចទិញដីនោះបាន? គ្មានអ្វីដែលយើងមិនអាចសម្រេចបាននោះឡើយ។ ប៉ុន្តែយើងត្រូវរិះរកមធ្យោបាយ ដោយបំបែកចេញពីដើមទុនចម្បងរបស់យើង។ ហេតុនេះយើងត្រូវស្វែងរកដៃគូវិនិយោគរួមគ្នាឱ្យបានច្រើនដើម្បីសម្រេចផែនការ។
លោកបន្តថា “នៅពេលខ្ញុំមានដៃគូ១០នាក់ ដោយម្នាក់បោះទុន ១,០០០ដុល្លារ ដូច្នេះចំនួនទុនសរុបបានឡើងរហូតដល់ចំនួន ១០,០០០ដុល្លារ ដែលអាចសម្រេចផែនការវិនិយោគដីបានជាស្ថាពរ”។ លោកបន្តថា “ក្រោយពេលទិញដីបាន លក់ចេញទៅវិញបានចំណេញ នឹងធ្វើឲ្យទុនរបស់ខ្ញុំបានកើន ហើយខ្ញុំអាចអនុវត្តនូវវិធីនេះដដែលជាដដែល រហូតមានទុនសរុបចំនួនច្រើន ដែលអាចធ្វើការវិនិយោគឯកជនតែម្នាក់ឯងបាន»។
លោកបណ្ឌិតបានបន្តទៀតថា ខ្ញុំសុំលើកវិធីសាស្ត្រមួយទៀតមកបង្ហាញ ដែលវាជាក្បួនបង្កើនទុនពីតិចទៅច្រើន ធ្វើពីតូចទៅធំ ដែលមនុស្សស្ទើរតែគ្រប់គ្នាសុទ្ធតែអាចមានលទ្ធភាពធ្វើបាន។ សព្វថ្ងៃនេះមានកំពូលមហាសេដ្ឋីប្រចាំកម្ពុជាមួយរូប ដែលបានអភិវឌ្ឍន៍ខ្លួនពីក្មេងដើរលក់កាសែតនៅតាមតុគុយទាវ (អ្នកឧកញ៉ា គិត ម៉េង) ហើយម្នាក់ទៀតជាកំពូលអ្នកសម្បូរទ្រព្យប្រចាំនៅរាជធានីភ្នំពេញ ដែលអភិវឌ្ឍខ្លួនចេញពីការចិញ្ចឹមជ្រូកតែមួយក្បាល (ឧកញ៉ា លី ហួរ)។ និយាយត្រឹមតែការចិញ្ចឹកជ្រូក សព្វថ្ងៃនេះតម្រូវការសាច់ជ្រូកនៅលើទីផ្សារមានវិសាលភាពធំទូលាយ ដែលត្រូវនាំចូលមកពីប្រទេសជិតខាងដើម្បីផ្គត់ផ្គង់តម្រូវការ។
លោកបន្តថា “ចង់ធ្វើមុខជំនួញធំ យើងត្រូវព្យាយាមចាប់ផ្តើមពីតូចឡើងទៅរហូតដល់បានសម្រេចគោលដៅធំ ថ្វីត្បិតតែវាត្រូវការចំណាយពេលយូរ ប៉ុន្តែវាមិនសូវជួបហានីភ័យនោះទេ”។ លោកបន្តថា “នេះគ្រាន់តែជាការលើកឧទាហរណ៍តែប៉ុណ្ណោះ ប៉ុន្តែគោលគំនិតចម្បងគឺការដែលចេះអត់ធ្មត់ ព្យាយាមស្វែងរកដំណោះស្រាយដោយផ្តើមចេញពីការគិត ការចាប់ផ្តើមអនុវត្ត ប្រកបដោយភាពច្នៃប្រឌិត និងអត់ធ្មត់ជាសំខាន់”។
លោកបណ្ឌិត គួយ ធាវី បានបន្តថា នៅលើសាកលលោកក្នុងសង្គមអ្នកជំនួញគ្មានអ្នកណាម្នាក់ដែលនិយាយថា មិនស្គាល់លោក Donald J Trump នោះទេ ។ គាត់ក៏ផ្តើមចេញពីអ្នកជំនួញតូចឡើងទៅដែរ ដោយដំបូងគាត់ខ្វះទុន ហើយទៅខ្ចីបុលធនាគារ គឺគ្មានធនាគារណាមួយផ្តល់កម្ចីដល់គាត់នោះទេ ដោយសារតែធនាគារសម្លឹងឃើញមុខជំនួញរបស់ ត្រាំតូចតាច ។ ប៉ុន្តែក្រោយពេល ត្រាំ ជោគជ័យលើមុខជំនួញរបស់គាត់ជាបន្តបន្ទាប់ គឺមានធនាគារជាច្រើនព្យាយាមសុំផ្តល់កម្ចីទៅឱ្យត្រាំវិញ ។
លោកបន្ថែមថា “នេះចង់មានន័យថា ភាពជោគជ័យនៃមុខជំនួញ គឺសុទ្ធតែតម្រូវឱ្យមានការចាប់ផ្តើមអនុវត្តចាប់ពីតូចឡើងទៅ និងប្រកបដោយការយកចិត្តទុកដាក់ទាំងអស់”៕
