ដោយ គង់ សូរិយា
ភ្នំពេញ៖ ស្រុកចំនួន៦ ក្នុខេត្តកណ្តាលកំពុងទាក់ទាញការវិនិយោគ ខណៈមន្រ្តីជំនាញបាននិងកំពុងចាប់ផ្តើមរៀបចំប្លង់គោល ដើម្បីជំរុញការអភិវឌ្ឍប្រកបដោយនិរន្តរភាព។
ស្រុកចំនួន៦ ក្នុងខេត្តកណ្តាលកំពុងទាក់ទាញការវិនិយោគ
ស្រុកចំនួន៦ នោះរួមមានស្រុកកៀនស្វាយ ស្រុកល្វាឯម ស្រុកពញ្ញាឮ និងស្រុកអង្គស្នូល និងស្រុកមុខកំពូល ជាបណ្តាស្រុកស្ថិតនៅជុំវិញរាជធានីភ្នំពេញ។
ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាលោក ច្រឹក សុខនីម បានមានប្រសាសន៍ឲ្យដឹងកាលពីពេលថ្មីៗនេះថា សម្រាប់ដីនៅតាមបណ្តាស្រុកទាំងនោះកំពុងមានភាពទាក់ទាញខ្លាំង ដែលអាចផ្តល់ឱកាសយ៉ាងល្អប្រសើរទៅដល់បណ្តាអ្នកវិនិយោគនានា ទាំងការទិញ-លក់ ក៏ដូចជាអ្នកអភិវឌ្ឍលើគម្រោងសំណង់លំនៅដ្ឋាន។ ដ្បិតដីនៅតំបន់នេះ មានវិសាលភាពធំទូលាយ តម្លៃនៅមានកម្រិត ជាពិសេសមានអំណោយផលពីធម្មជាតិ ដូចជា មានដងទន្លេនៅអមជាមួយដែលផ្តល់បរិយាកាសរស់នៅយ៉ាងគាប់ប្រសើរ មានស្ពានដែលនឹងតភ្ជាប់ពីតំបន់ក្តីតាកុយទៅអរិយក្សត្រ ។
លោកបន្តថា តំបន់នៃស្រុកទាំងនោះ មានសក្តានុពលដោយសារតំបន់នេះមានតំបន់សេដ្ឋកិច្ចពិសេស គម្រោងផ្លូវក្រវ៉ាត់ក្រុងទី៣ ដែលជាផ្លូវសេដ្ឋកិច្ចដ៏ធំ កំពង់ផែលំដាប់អន្តរជាតិ និងមានសក្តានុពលផ្នែកភូមិសាស្រ្តខុសៗគ្នាជាច្រើនទៀត”។
ទាក់ទងតម្លៃដីធ្លីវិញ លោកសុខនីមបានឲ្យដឹងថា ចំពោះតម្លៃដីវិញ បច្ចុប្បន្ននេះវាអាស្រ័យទៅតាមទីតំបន់ និងទំហំធំ ឬតូច។ ចំពោះដីដែលមានទំហំតូច និងស្ថិតនៅទីប្រជុំជន ឬតំបន់លំនៅដ្ឋានក្បែរផ្លូវជាតិ១ គឺអាចមានតម្លៃចាប់៣00ដុល្លារឡើងទៅក្នុងមួយម៉ែត្រការ៉េ ដោយឡែកចំពោះដីដែលមានទំហំធំចាប់ពី5ហិកតាឡើងទៅ អាចមានតម្លៃប្រមាណ៧០ទៅ១០០ដុល្លារក្នុងមួយម៉ែត្រការ៉េ ។
អនុប្រធានក្រុមប្រឹក្សាភិបាលនៃសមាគមអ្នកជំនាញអចលនទ្រព្យកម្ពុជា លោកយិន លាងគង់បានមានប្រសាសន៍ថា បណ្តាស្រុកនានាស្ថិតនៅជុំវិញរាជធានីភ្នំពេញ ជាស្វ័យប្រវត្តិនឹងទទួលឥទ្ឋិពលនៃការវិនិយោគ និងការរីកចម្រើនពីរាជធានីជារឿងធម្មតា ជាក់ស្តែងបច្ចុប្បន្ននៅតាមបណ្តោយផ្លូវជាតិលេខ៤ គឺការអភិវឌ្ឍបានតភ្ជាប់រវាងរាជធានីភ្នំពេញ និងខេត្តកំពង់ស្ពឺ ផ្លូវជាតិលេខ៥ នឹងរីកចម្រើនដល់តំបន់ស្ពានព្រែកក្តាម ផ្លូវជាតិលេខ១ នឹងមានការអភិវឌ្ឍរោងចក្រ ឧស្សាហកម្ម និងលំនៅដ្ឋានដល់តំបន់អ្នកលឿង ផ្លូវជាតិលេខ៣ នឹងរីកចម្រើនដល់តំបន់អង្គតាសោមនាពេលអនាគត។
លោកបន្តថា “ដរាបណាប្រទេសកម្ពុជានៅតែមានសុខសន្តិភាព ស្ថេរភាពនយោបាយ និងកំនើនសេដ្ឋកិច្ចល្អបែបនេះ រដ្ឋាភិបាលនឹងមានលទ្ឋភាពវិនិយោគលើហេដ្ឋារចនាសម្ព័ន្ឋ ហើយប្រាក់ចំណូលរបស់ប្រជាពលរដ្ឋនឹងបន្តកើនឡើង”។
លោកបន្តថា “នៅពេលណាប្រាក់ចំណូលប្រជាពលរដ្ឋកើឡើង គួបផ្សំនឹងលំហូរទុនវិនិយោគផ្ទាល់ពីបរទេស នឹងធ្វើឲ្យវិស័យនេះមានតម្រូវការកើនឡើងជាស្វ័យប្រវត្តិ”។
លោកបណ្ឌិតវ៉ាន់ វ៉ាតអនុប្រធានមន្ទីររៀបចំដែនដី នគរូបនីយកម្មនិងសំណង់ខេត្តកណ្តាលបានមានប្រសាសន៍ថា តាមរយៈគោលនយោបាយរបស់រដ្ឋាភិបាល និងការដឹកនាំរបស់ថ្នាក់ដឹកនាំខេត្ត បច្ចុប្បន្នមន្ទីរជំនាញបាននិងកំពុងរៀបចំប្លង់គោលនៅតាមបណ្តាស្រុកទាំងអស់ក្នុងខេត្តកណ្តាល ដើម្បីឆ្លើយតបនឹងល្បឿននៃការអភិវឌ្ឍយ៉ាងឆាប់រហ័ស ក៏ដូចជាឆ្លើយតបនឹងបញ្ហាស្មុគ្រស្មាញផ្នែកនគរូបនីយកម្ម។
លោកបន្តថា “ការរៀបចំប្លង់គោលប្រើប្រាស់ដីធ្លីលំអិត ជាការធានានូវការអភិវឌ្ឍប្រកបដោយនិរន្តរភាពភាព ពិសេសជាការបែងចែកតំបន់ប្រើប្រាស់ដីធ្លីឲ្យបានត្រឹមត្រូវ និងហេដ្ឋារចនាសម្ព័ន្ឋច្បាស់លាស់”៕
