ដោយ គង់ សូរិយា
ភ្នំពេញ៖ ស្របពេលកំនើនប្រជាសាស្រ្តក្នុងទីក្រុង កំនើនយានយន្តនិងមធ្យោបាយដឹកជញ្ជូននានាសាលារាជធានីភ្នំពេញកំពុងរៀបចំផែនការថ្មី សម្រាប់អភិវឌ្ឍន៍រាជធានីភ្នំពេញក្នុងរយៈពេលវែងខាងមុខ ដើម្បីឲ្យរាជធានីនេះមានការអភិវឌ្ឍប្រកបដោយនិរន្តរភាព។
អភិបាលរាជធានីភ្នំពេញ លោក ឃួង ស្រេង កាលពីឆ្នាំមុនបានដាក់ចេញនូវផែនការថ្មីមួយនៅពេលថ្មីៗនេះដើម្បីឆ្លើយតបទៅនឹងលំហូរចរាចរណ៍ ទេសចរណ៍ សោភ័ណភាព និងការអភិវឌ្ឍន៍រីកចំរើនលើវិស័យនៅរាជធានីភ្នំពេញ ពិសេសវិស័យហេដ្ឋារចនាសម្ព័ន្ធ សេវាកម្មសាធារណៈ សំណង់គ្រឹះស្ថាន អគារនានាក្នុងរាជធានីនេះ។ គំរោងនេះធ្វើឡើងក្រោមកិច្ចសហប្រតិបត្តិការរវាងរដ្ឋបាលរាជធានីភ្នំពេញជាមួយ និងសាលាក្រុងប៉ារីសលើវិស័យនគរូបនីយកម្មក្នុងរាជធានីភ្នំពេញ។
-->
លោកបន្តថា “តំបន់ស្ថិតនៅភាគខាងត្បូងរាជធានីភ្នំពេញ គឺជាទំហំនៃការអភិវឌ្ឍធំមួយ ដូច្នេះហើយទើបសាលាក្រុងប៉ារីស ដែលជាទីក្រុងមានបទពិសោធន៍ នៃការរៀបចំទីក្រុងឲ្យមានភាពស្រស់បំព្រងចង់ឲ្យតំបន់នោះ ក្លាយជាតំបន់បៃតង ដែលមានបរិស្ថានល្អ”។
អភិបាលរាជធានីភ្នំពេញបានបង្ហាញឲ្យមានការអភិវឌ្ឍគ្រប់វិស័យ ពិសេសវិស័យហេដ្ឋារចនាសម្ព័ន្ធ សេវាកម្មសាធារណៈ សំណង់គ្រឹះស្ថាន អគារនានា ក្នុងរាជធានីភ្នំពេញ បានចាប់ផ្តើមមានការអភិវឌ្ឍឆ្លើយតប នឹងកំណើនប្រជាជនទីក្រុង ដែលកើនឡើងយ៉ាងឆាប់រហ័សរហូតដល់៣,២៥ភាគរយក្នុង១ឆ្នាំៗ។
យោងតាមទិន្នន័យរបស់សាលារាជធានីភ្នំពេញបានឲ្យដឹងថា បច្ចុប្បន្នចំនួនប្រជាពលរដ្ឋរស់នៅទីក្រុងភ្នំពេញ បានកើនឡើងរហូតដល់១,៧លាននាក់ គឺប្រមាណជា៥៦ភាគរយនៃប្រជាពលរដ្ឋទីក្រុង ដែលជាអ្នកចំណាកស្រុក ចូលមកសិក្សានិងធ្វើការនៅទីក្រុងភ្នំពេញ។
តំណាងសាលាក្រុងប៉ារីសនៃសាធារណរដ្ឋបារាំង លោកស្រី អេឡូឌី គុយអង់កាបានថ្លែងថា ដើម្បីឆ្លើយតបនឹងស្ថានភាពនៃការអភិវឌ្ឍទីក្រុង ដែលទីក្រុងភ្នំពេញបាននិងកំពុងជួបប្រទះ គឺមានការងារអាទិភាពចំនួនពីរត្រូវបានដាក់ឲ្យសិក្សា ដូចជាទី១ ការរៀបចំផែនការអភិវឌ្ឍតំបន់ភាគខាងត្បូងក្រុងភ្នំពេញ ដែលសព្វថ្ងៃកំពុងមានការអភិវឌ្ឍយ៉ាងខ្លាំង និងទី២ ការពង្រឹងការរំដោះនិងការគ្រប់គ្រងច្រាំងមាត់ទន្លេសាប ព្រមជាមួយនឹងពង្រីកទៅភាគខាងជើងនៃតិរវិថីព្រះស៊ីសុវត្ថិ។
លោកបណ្ឌិតវ៉ាន់ វ៉ាតអ្នកជំនាញផ្នែកនគរូបនីយកម្ម និងអនុប្រធានមន្ទីររៀបចំដែនដី នគរូបនីយកម្មនិងសំណង់ខេត្តកណ្តាលបានថ្លែងថា នៅក្នុងប្លង់គោលប្រើប្រាស់ដីក្នុងខេត្តកណ្តាល និងរាជធានីភ្នំពេញ មានភាពប្រហាក់ប្រហែលគ្នា ព្រោះប្លង់គោលផ្តោតសំខាន់លើបញ្ហាផ្លូវ និងផែនការប្រើប្រាស់ដី ប៉ុន្តែផែនការលំអិតមិនទាន់បានធ្វើនៅឡើយទេ ហេតុនេះវាទាមទារឲ្យមានការសិក្សាលំអិតបន្ថែមទៀត នៅតាមបណ្តាស្រុក ឬក្រុងនិមួយៗ ទៅតាមដំណាក់កាលនៃការអភិវឌ្ឍ។
លោកបន្តថា “អ្វីសំខាន់តើដីនិមួយៗមានការចុះបញ្ជីរ ប្រើប្រាស់ដីធ្លីបានត្រឹមត្រូវឬយ៉ាងណា និងចុះជាប្រព័ន្ឋយ៉ាងដូចម្តេច ដើម្បីយើងដឹងប្រាកដថាតំបន់នោះគួរប្រើប្រាស់ក្នុងលក្ខខ័ណ្ឌអ្វី និងគួររៀបចំទំហំផ្លូវបែបណា ដើម្បីមានភាពសមស្របនឹងកំនើនប្រជាសាស្រ្ត និងយានយន្ត”។
លោកម៉េត មាសភក្តីអ្នកនាំពាក្យរដ្ឋបាលរាជធានីភ្នំពេញបានមានប្រសាសន៍ថា ការអភិវឌ្ឍរាជធានីភ្នំពេញកំពុងដើរតាមផែនការមេ នៃប្លង់គោលអភិវឌ្ឍន៍ក្រុងឆ្នាំ២០១៥ ២០៣០ ដែលរាជរដ្ឋាភិបាលបានអនុម័ត ហេតុនេះគំរោងវិនិយោគនានាទាំងរបស់រដ្ឋាភិបាល និងរបស់វិស័យឯកជនត្រូវតែដើរតាមផែនការមេ ដែលបានដាក់ចេញ ជាក់ស្តែងនៅភាគខាងត្បូងរាជធានី គឺបច្ចុប្បន្នរដ្ឋបាលរាជធានីភ្នំពេញ កំពុងធ្វើការសហការជាមួយអ្នកជំនាញបារាំង ដើម្បីសិក្សាពីលំហូរចរាចរណ៍ ពីការរៀបចំហេដ្ឋារចនាសម្ព័ន្ឋនានា ដើម្បីជំរុញឲ្យការអភិវឌ្ឍតំបន់នេះធ្វើឡើងប្រកបដោយចីរភាព និងឆ្លើយតបកំនើនរីកចម្រើនយ៉ាងឆាប់រហ័សនៅតំបន់នេះ។
កាលពីពេលថ្មីៗនេះ រដ្ឋាភិបាលកម្ពុជាក៏បានទទួលជំនួយឥតសំណងពីរដ្ឋាភិបាលជប៉ុន២៥លានដុល្លារ ដើម្បីធ្វើអាងប្រព្រឹត្តកម្មទឹកកខ្វក់នៅតំបន់ភាគខាងត្បូងរាជធានី ដើម្បីធ្វើឲ្យតំបន់នេះមានភាពបៃតង និងជៀងវាងបានពីការបំពុលដោយទឹកកខ្វក់នាពេលអនាគត៕
