ដោយ គង់ សូរិយា
ភ្នំពេញ៖ គំរោងលំនៅដ្ឋានប្រណីត ដែលផ្តោតលើការគិតគូដល់បរិស្ថាន និងការរស់នៅប្រកបដោយផាសុខភាព បុរីអង្គរលែនដ៏ម៉ាក្ស បាននិងកំពុងទទួលការចាប់អារម្មណ៍ពីអតិថិជន។
ជាមួយនឹងគំរោងស្ថិតនៅភូមិ សណ្តាយ ឃុំខ្នារសណ្តាយ ស្រុកបន្ទាយស្រី ខេត្តសៀមរាបបុរីអង្គរលែនដ៏ម៉ាក្ស បាននិងកំពុងចាប់ផ្តើមលក់ផ្ទះក្នុងដំណាក់កាលទី១ ដែលមានផ្ទះចំនួន២២០ផ្ទះ និងកំពុងចាប់ផ្តើមទទួលការបញ្ជាទិញពីអតិថិជនយ៉ាងច្រើនកុះករ។
សហភាគហ៊ុនិកនៃបុរីអង្គរលែនដ៏ម៉ាក្ស និងជាស្ថាបត្យករអាស៊ាន លោកសាស្រ្តាចារ្យ ទួស សាភឿន បានមានប្រសាសន៍ឲ្យដឹងតាមទូរស័ព្ទនាព្រឹកថ្ងៃទី២៩ មេសានេះថា រហូតមកទល់ពេលនេះ ការសាងសង់លំនៅដ្ឋានក្នុងបុរីនេះបាននិងកំពុងសាងសង់ និងកំពុងទទួលបានការចាប់អារម្មណ៍ច្រើនពីអតិថិជន។
លោកបន្តថា គំរោងនេះផ្តោតលើគោលគំនិត បៃតង និងខៀវ ដែលមានន័យថា បៃតងជាផ្ទៃសួន ខៀវជាផ្ទៃទឹក ជាអ្វីដែលក្រុមហ៊ុនបានផ្តោតដើម្បីឲ្យគំរោងនេះគឺធម្មជាតិ ដែលរក្សាធាតុត្រជាក់សម្រាប់អ្នករស់នៅទាំងមូល និងចង់អោយក្លាយជាគំរោងគំរូគេនៅខេត្តសៀមរាប និងផ្តល់ឲ្យអ្នករស់នៅមានអារម្មណ៍ ល្អ ត្រជាក់ត្រជុំ និងប្រកបដោយផាសុខភាពខ្ពស់។
លំនៅដ្ឋានក្នុងគំរោងនេះ លក់ក្នុងតម្លៃចន្លោះពី ៤៨,៨៨៨ដុល្លារ (ផ្ទៃដី១០គុណ៣០ម៉ែត្រ) ដល់១៤៨,៨៨៨ម៉ឺនដុល្លារអាមេរិក (មានផ្ទៃដី៣៥គុណ៤០ម៉ែត្រ) ដែលតម្លៃនេះអាស្រ័យលើទំហំដី និងទំហំផ្ទះនិមួយៗដែលមានភាពជាក់ស្តែងនៅក្នុងបុរី មានទុកផ្ទៃដីអោយដាំដំណាំនិងសួនបាន។ ការរចនាប្លង់ខាងក្នុងបន្ទប់ គឺជារបៀបសណ្ឋាគារប៊ូទិកកំរិតផ្កាយបួន។
លោកសាស្រ្តាចារ្យទួស សាភឿនបានបន្តថា គំរោងបុរីអង្គរលែនដ៏ម៉ាក្ស មានផ្ទៃដីទំហំជាង២០០ហិកតា ក្នុងនោះដំណាក់កាលទី១មានទំហំ៤៥ហិកតា និងដំណាក់កាលបន្តបន្ទាប់ទៀតមានទំហំដីខុសៗគ្នា សរុបចំនួន៥ដំណាក់កាល ដែលគំរោងទាំងមូលនឹងបញ្ចប់ការសាងសង់រយៈពេលបីឆ្នាំ ដើម្បីឆ្លើយតបនឹងផែនការមេរបស់គំរោង ក៏ដូចជាឆ្លើយតបនឹងតម្រូវការជាក់ស្តែងរបស់អតិថិជន ដែលកំពុងតែមានការកើនឡើង និងតម្រូវការខ្ពស់។
ដោយប្រើប្រាស់ជំនាញរបស់ខ្លួន និងគិតគូពីសុខមាលភាពសង្គម លោកសាស្រ្តាចារ្យ ទួស សាភឿន បានឌីសាញលំនៅដ្ឋានក្នុងគំរោងនេះតាមរចនាបថខ្មែរទំនើប និងជាលំនៅដ្ឋានបែបថ្មីដែលឆ្លើយតបនឹងការប្រែប្រួលបរិយាកាសរបស់ផែនដី ដែលចេះតែកើនកំដៅពីមួយឆ្នាំទៅមួយឆ្នាំ។
ហេតុនេះ ភាពបៃតងជាផ្ទៃសួន និងខៀវជាផ្ទៃទឹក អាចកាត់បន្ថយកំដៅបាន គឺជាអ្វីដែលអ្នករចនាប្លង់មេ វិនិយោគកំពុងផ្តោត និងយកចិត្តទុកដាក់ជាសំខាន់ ដើម្បីធ្វើឲ្យការអភិវឌ្ឍ គម្រោងនេះ អោយមាននិរន្តរភាពជាមួយនិងការរស់នៅ និងធម្មជាតិ។
អតិថិជនចាប់អារម្មណ៍វិនិយោគលើគំរោងនេះ ឬទិញសំរាប់រស់នៅអាចទាក់ទងតាមរយៈលេខទូរស័ព្ទ 097 204 6789, 092/16 91 6789៕
