ដោយ រ៉ាណេត
ភ្នំពេញ៖ ពោធិ៍សែនជ័យ គឺជាខណ្ឌមួយដែលស្ថិតនៅតំបន់ជាយក្រុង និងទទួលបានភាពទាក់ទាញយ៉ាងខ្លាំង ពីសំណាក់អ្នកវិនិយោគ ក៏ដូចជាអ្នកអភិវឌ្ឍន៍នានា ជាពិសេសលើវិស័យលំនៅដ្ឋានដែលអ្នកជំនាញក្នុងវិស័យនេះបានហៅខ័ណ្ឌនេះប្រៀបដូចជាកូនក្រមុំមួយ។
ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោក ច្រឹក សុខនីម បានមានប្រសាសន៍កាលពីចុងសប្តាហ៍មុនថា ខណ្ឌពោធិសែនជ័យ ជាតំបន់អភិវឌ្ឍន៍ថ្មី ដែលមានសក្តានុពលក្នុងការវិនិយោគ ដោយសារខណ្ឌនេះមានសណ្ឋានដីល្អ មានទីតាំងនៅជិតកណ្តាលក្រុង ហើយតម្លៃដីនៅធូរថ្លៃ ដែលងាយស្រួលក្នុងការអភិវឌ្ឍន៍ និងរកប្រាក់ចំណេញបាន។ លោកបន្តថា បច្ចុប្បន្នគម្រោងលំនៅដ្ឋាន ខុនដូ មជ្ឈមណ្ឌលពាណិជ្ជកម្មជាច្រើន បានរីកចម្រើននៅតំបន់នេះ ដែលពង្រីកសក្តានុពលក្នុងខណ្ឌនេះកាន់តែខ្លាំងនាពេលអនាគត។
លោកបន្តថា តម្លៃដីនៅតំបន់ពាណិជ្ជកម្ម មានតម្លៃចន្លោះពី៨០០ទៅ១៥០០ដុល្លារ និងដីនៅតាមផ្លូវតូចៗ មានតម្លៃចន្លោះពី៤០០ទៅ៨០០ដុល្លារ តំបន់មិនទាន់សូវមានការអភិវឌ្ឍន៍មានតម្លៃក្រោម២០០ដុល្លារ ក្នុងមួយម៉ែត្រការ៉េ។
-->
លោកច្រឹក សុខនីមបានបន្តថា ខណ្ឌពោធិសែនជ័យ សមស្របសម្រាប់គំរោងអភិវឌ្ឈន៍លំនៅដ្ឋាន និងមជ្ឈមណ្ឌលពាណិជ្ជកម្ម។ ការរីកចម្រើននៃខណ្ឌពោធិសែនជ័យ ពិតជាលឿនធៀបនឹងបណ្តាខណ្ឌជាយក្រុងដទៃទៀតដែលមានការរីកចម្រើនយ៉ាងលឿនផងដែរ។
ជាមួយគ្នានេះលោកឧកញ៉ា តេង រឹទ្ធី អគ្គនាយកក្រុមហ៊ុន R Investment Group បានមានប្រសាសន៍ប្រាប់ឱ្យដឹងផងដែរថា បច្ចុប្បន្ននេះ ខណ្ឌពោធិ៍សែនជ័យ មានលក្ខណៈល្អប្រសើរ និងការអភិវឌ្ឍន៍មិនខុសពីពីខណ្ឌដង្កោនោះទេ ដោយសារតែនៅក្នុងខណ្ឌមួយនេះមានលំហូរ នៃចំនួនប្រជាជនចំណាកស្រុកចូលមករស់នៅច្រើន ដែលជំរុញឱ្យមានតម្រូវការលើការលើការស្នាក់នៅច្រើន។
លោកឧកញ៉ាបន្តថា “ការកើនឡើងនៃចំនួនប្រជាជន មិនមែនមានតែនៅក្នុងខណ្ឌនេះមួយនោះទេ គឺវាមានការកើនឡើងស្ទើរតែគ្រប់ខណ្ឌ ប៉ុន្តែអ្វីដែលធ្វើឱ្យខណ្ឌនេះ មានតម្រូវការស្នាក់នៅច្រើន រហូតមានការចូលខ្លួនមកអភិវឌ្ឍន៍ ពីសំណាក់អ្នកអភិវឌ្ឍ សំណង់បុរីជាដើមនោះ ក៏ព្រោះតែខណ្ឌមួយនេះ មានវិសាលភាពធំទូលាយងាយស្រួលក្នុងការអភិវឌ្ឍន៍ ជាពិសេសតម្លៃដីធ្លីនៅមានកម្រិតនៅឡើយ ដែលវាជាការផ្តល់ឱកាសសម្រាប់បណ្តាអ្នកវិនិយោគទាំងនោះ”។
លោកឧកញ៉ា តេង រិទ្ឋី បានបញ្ជាក់ថា បច្ចុប្បន្ននេះ បើនិយាយពីតម្លៃដីធ្លីនៅក្នុងខណ្ឌពោធិ៍សែនជ័យ គឺបានកើនឡើងមួយកម្រិតធំរួចទៅហើយ ជាពិសេសកន្លែងដែលជាទីប្រជុំជន និងមានការអភិវឌ្ឍន៍ ៕
