ដោយៈ គង់ សូរិយា
ភ្នំពេញៈ រដ្ឋាភិបាល តាមរយៈក្រុមប្រឹក្សាអភិវឌ្ឍន៍កម្ពុជា (CDC) គម្រោងវិនិយោគចំនួន៥៧៥ នៅក្នុងរយៈពេល១០ខែនៃឆ្នាំ២០២៥ កើនជិត៧០ភាគរយ បើធៀបនឹងរយៈពេលដូចគ្នាក្នុងឆ្នាំ២០២៤។
ចំនួនភាគច្រើន នៃគម្រោងវិនិយោគទាំងនោះ ស្ថិតក្នុងខេត្តកំពង់ស្ពឺ និងស្វាយរៀង។
យោងតាមសេចក្តីប្រកាសព័ត៌មានរបស់CDC ដែលបានចេញផ្សាយកាលពីសប្តាហ៍មុនបានឱ្យដឹងថា ចន្លោះពីខែមករា-តុលា ឆ្នាំ២០២៥ ក្រុមប្រឹក្សាអភិវឌ្ឍន៍កម្ពុជា បានអនុម័តលើគម្រោងវិនិយោគសរុប៥៧៥គម្រោង (ក្នុងតំបន់សេដ្ឋកិច្ចពិសេស២១៨ និងក្រៅតំបន់សេដ្ឋកិច្ចពិសេស៣៥៧) ក្នុងទំហំទុនវិនិយោគសរុប៩,២ ពាន់លានដុល្លារ គឺចំនួនគម្រោងវិនិយោគបានកើនឡើង២២៩គម្រោង ស្មើ ៦៦% ខណៈទុនវិនិយោគ កើនជិត៣,៧ពាន់លានដុល្លារ ឬស្មើ ៦៧% បើធៀបនឹងរយៈពេលដូចគ្នាក្នុងឆ្នាំ២០២៤ ដែលមានគម្រោងវិនិយោគ៣៤៦គម្រោង ក្នុងទំហំទុនវិនិយោគ៥,៥ ពាន់លានដុល្លារ។
ភាគច្រើននៃគម្រោងទាំងនោះ ស្ថិតក្នុងខេត្តកំពង់ស្ពឺ ដោយមានចំនួន១៣០ ស្វាយរៀង១២៩ រាជធានីភ្នំពេញ៦៨ ខេត្តតាកែវ៥៩ កោះកុង៥០ កណ្តាល៤៧ ព្រះសីហនុ៤៥ និងខេត្តផ្សេងៗទៀត។
CDC បញ្ជាក់ថា៖«ជាការកត់សម្គាល់ត្រឹមតែរយៈពេល ១០ខែ CDC បានចុះបញ្ជីគម្រោងវិនិយោគ លើសការចុះបញ្ជីគម្រោងវិនិយោគពេញមួយឆ្នាំ២០២៤ រហូតដល់ទៅ១៦១គម្រោង។
របាយការណ៍បានឲ្យដឹងទៀតថា ក្នុងចំណោមទុនវិនិយោគទាំង ៩,២ពាន់លានដុល្លារ បានវិនិយោគលើវិស័យឧស្សាហកម្ម មានចំនួន ៥,៥ ពាន់លានដុល្លារ វិស័យកសិកម្ម និងកសិ-ឧស្សាហកម្ម៤០៥ លានដុល្លារ វិស័យទេសចរណ៍១៧៥លានដុល្លារ និងវិស័យហេដ្ឋារចនាសម្ព័ន្ធ និងផ្សេងៗ៣,១ ពាន់លានដុល្លារ។ គម្រោងទាំង៥៧៥ អាចបង្កើតការងារបានប្រហែល៤០ម៉ឺនកន្លែង។
សម្រាប់ប្រភពទុនវិនិយោគដែលឈានមុខគេ គឺប្រទេសចិនមានចំណែក៥២,៣៨% កម្ពុជា៣២,៨៩% សិង្ហបុរី៥,៩៧% វៀតណាម ៤,៤២%, ក្រៅពីនោះ មានកោះ British Virgin, ចក្រភពអង់គ្លេស សហរដ្ឋអាមេរិក កោះCayman និងកោះSamoa ជាដើម។
អ្នកវិភាគសេដ្ឋកិច្ចនៃរាជបណ្ឌិត្យសភាកម្ពុជា លោកបណ្ឌិតហុង វណ្ណៈ បានមានប្រសាសន៍ឲ្យដឹថា ទោះក្នុងបរិបទដែលស្ថានភាពនយោបាយ និងសេដ្ឋកិច្ចពិភពលោក ស្ថិតក្នុងភាពមិនច្បាស់លាស់ ក៏កម្ពុជានៅតែមានសក្តានុពលគ្រប់គ្រាន់ ដើម្បីទាក់ទាញអ្នកវិនិយោគជាតិ និងអន្តរជាតិឱ្យចូលមកបណ្តាក់ទុនកាន់តែច្រើន។
លោកពន្យល់ថា “មូលហេតុដែលកម្ពុជា អាចទាក់ទាញអ្នកវិនិយោគឱ្យមកបើករោងចក្រ /សហគ្រាស គឺដោយសារច្បាប់វិនិយោគមានភាពអំណោយផល សម្បូរពលកម្មវ័យក្មេង ហេដ្ឋារចនាសម្ព័ន្ធដឹកជញ្ជូនងាយស្រួល និងជាពិសេសសមានទីផ្សារ ប្រទេសជាច្រើនចាំទទួលទិញ”។
លោកបន្តថា ការកើនឡើងនៃចំនួនគម្រោងស្នើសុំវិនិយោគ និងកំណើនការអនុម័តរបស់អាជ្ញាធរ បានបញ្ជាក់ពីទំនុកចិត្តរបស់វិនិយោគិន ចំពោះបរិយាកាសអាជីវកម្មនៅកម្ពុជា ក៏ដូចជាភាពធំទូលាយនៃទីផ្សារនាំចេញ។ ចំនួនគម្រោងវិនិយោគនៅកម្ពុជា នឹងកើនឡើងបន្ថែមទៀតនាពេលខាងមុខ។
កាលពីឆ្នាំ២០២៤ ក្រុមប្រឹក្សាអភិវឌ្ឍន៍កម្ពុជា បានអនុម័តលើគម្រោងវិនិយោគសរុប៤១៤ កើនឡើង៥៤%(១៤៦ គម្រោង) បើធៀបនឹងឆ្នាំ ២០២៣ ដែលមានចំនួន២៦៨គម្រោង។ ចំណែកទុនវិនិយោគសរុបរបស់គម្រោងទាំង៤១៤ មានចំនួនប្រមាណ៦,៩ពាន់លានដុល្លារ កើនឡើង៤០% ពីចំនួន៤,៩២ ពាន់លានដុល្លារ៕
 គម្រោងវិនិយោគចំនួន៥៧៥ នៅក្នុងរយៈពេល១០ខែនៃឆ្នាំ២០២៥ កើនជិត៧០ភាគរយ បើធៀបនឹងរយៈពេលដូចគ្នាក្នុងឆ្នាំ២០២៤។){kind=link}