ដោយៈ រ៉ាណេត
ភ្នំពេញៈ ផ្អែកតាមសកម្មភាពជាក់ស្ដែងនៃសន្ទុះ អភិវឌ្ឍវិស័យលំនៅដ្ឋាននៅតាមបណ្តោយផ្លូវជាតិលេខ ៦A នាពេលបច្ចុប្បន្ន ត្រូវបានអ្នកជំនាញក្នុងវិស័យនេះអះអាងថា យ៉ាងយូរមិនលើសពីរយៈពេល៣ឆ្នាំទៀតនោះទេ តំបន់ដ៏ទាក់ទាញមួយនេះនឹងប្រែរូបភាពទៅជាបណ្តុំលំនៅដ្ឋានទំនើបកម្រិតខ្ពស់ និងមានតម្លៃរាប់សិបម៉ឺនដុល្លារ។
ផ្អែកតាមរបាយការណ៍របស់ក្រុមហ៊ុនអន្តរជាតិ ប្រចាំនៅកម្ពុជា CBRE Cambodia បានបង្ហាញថា បច្ចុប្បន្ននេះ មានគម្រោងបុរីចំនួន៨គម្រោង បានបញ្ចប់ការសាងសង់គម្រោងរបស់ខ្លួន ខណៈដែលមានគម្រោងជាច្រើនទៀត កំពុងតែសកម្មក្នុងការសាងសង់ ដែលនឹងបញ្ចប់គម្រោង នៅត្រឹមដំណាច់ឆ្នាំ ២០២១ខាងមុខនេះ។
របាយការណ៍ដដែលបានបង្ហាញទៀតថា បុរីដែលកំពុងតែសម្រុកការសាងសង់បញ្ចប់ គម្រោងទាំងនោះ រួមមានដូចជា បុរី Orkide Villa , បុរី The Bontanic City, បុរី Peng Huoth The Star Munirah, បុរី The Phnom Penh Park, បុរី Chroy Changvar Commercial Center (by OCIC), បុរី Heang City, បុរី The Flora Phase 1 &; 2, និង Chip Mong Parkland 6A បុរីមង្គលភ្នំពេញជាដើម។
អគ្គនាយកបុរីមង្គលភ្នំពេញ លោក អាន រ៉ាឌី បានមានប្រសាសន៍ឲ្យដឹងនាព្រឹកថ្ងៃទី៨ ឧសភានេះថា តំបន់ផ្លូវជាតិលេខ៦A ជាភូមិសាស្ត្រដ៏ល្អប្រសើរ និងមានភាពទាក់ទាញខ្លាំង ដោយសារតែក្រៅពីជាផ្លូវជាតិយ៉ាងសំខាន់ ដែលមានចរាចរណ៍ឆ្លងកាត់ច្រើន ទើបធ្វើឲ្យគម្រោងធំៗមហិមាជាច្រើនទៀត កំពុងតែសម្រុកធ្វើសកម្មភាពអភិវឌ្ឍយ៉ាងខ្លាំងក្លាយ ដូចជាគម្រោងទីក្រុងរណប និងមជ្ឍមណ្ឌលពាណិជ្ជកម្ម ពិព័រណ៍របស់ក្រុមហ៊ុន OCIC គម្រោងទីក្រុងរណបរបស់ក្រុមហ៊ុនលី យ៉ុងផាត់ គម្រោងមជ្ឈមណ្ឌលពាណិជ្ជកម្មរបស់ក្រុមហ៊ុនចិន រួមជាមួយនឹងវត្តមានបណ្តាបុរីលំនៅដ្ឋានទំនើបកម្រិតខ្ពស់ជាច្រើនទៀត។
លោកបានបន្តទៀតថា ដោយមើលឃើញសក្តានុពលនេះ គម្រោងបុរីមង្គលភ្នំពេញ ក៏កំពុងតែសកម្មក្នុងការសាងសង់បញ្ចប់ គម្រោងក្នុងពេលដ៏ខ្លីឆាប់ៗខាងមុខនេះ ដើម្បីបំពេញទៅតាមតម្រូវការរបស់អតិថិជន ដោយមានចំនួនជាង ១០០ខ្នង ជាប្រភេទវីឡាកូនកាត់ទំនើប ខណៈដែលការលក់សម្រេចបានជាង៦០ភាគរយរួចហើយ។
លោកឧកញ៉ា នួន រិទ្ធី អគ្គនាយកក្រុមហ៊ុនអចលនទ្រព្យ Khmer Foundation Appraisal បានមានប្រសាសន៍ប្រាប់តាមទូរស័ព្ទថា “តាមការព្យាករណ៍របស់ខ្ញុំ ក្រុងភ្នំពេញប្រៀបដូចជាក្រុងហុង ចំណែកឯតំបន់ជ្រោយចង្វារ ប្រៀបដូចជាតំបន់កៅលន់យ៉ាងដូច្នោះ ដែលរួមបញ្ចូលទាំងតំបន់ផ្លូវជាតិលេខ៦Aផងដែរ”។ លោកបន្តថា “ផ្អែកតាមសកម្មភាព ពុះកញ្ជ្រោលលើការអភិវឌ្ឍនាពេលបច្ចុប្បន្ននេះ ខ្ញុំគិតថាមិនយូរទៀតនោះទេ តំបន់តាមបណ្តោយផ្លូវជាតិលេខ៦Aនេះ នឹងបង្ហាញពីភាពអស្ចារ្យរបស់ខ្លួន តាមរយៈវត្តមានសំណង់អគារពាណិជ្ជកម្មធំៗ បណ្តុំសំណង់លំនៅដ្ឋានលំដាប់អភិជនព្រោងព្រាត ដែលតំបន់មួយចំនួនទៀតពិបាកនឹងធ្វើបាន”។
អ្នកនាំពាក្យរដ្ឋបាលរាជធានីភ្នំពេញ លោក ម៉េត មាសភ័ក្តី ធ្លាប់បានមានប្រសាសន៍ថា តំបន់ជ្រោយចង្វារត្រូវបានចាត់់ចូលជាតំបន់លំនៅដ្ឋាន នៅក្នុងផែនការមេអភិវឌ្ឍន៍ក្រុងភ្នំពេញឆ្នាំ ២០១៥ – ២០៣០ ដែលបានអនុម័តកាលពីឆ្នាំ២០១៥ ដោយប្រមុខរដ្ឋាភិបាល។ លោកបញ្ជាក់ទៀតថា តំបន់នេះវាស័ក្តិសមជាតំបន់លំនៅដ្ឋាន ដោយសារតំបន់់នេះមានទន្លេព័ទ្ឋជុំវិញ អំណោយផលដល់ការរស់នៅ ព្រោះមានខ្យល់អាកាសចេញចូលប្រកបដោយផាសុកភាព ខណៈដែលអាជ្ញាធរក្រុងនឹងមិនអនុញ្ញាតឱ្យមានរោងចក្រ សហគ្រាសធំសាងសង់ និងវិនិយោគនៅតំបន់នេះនោះទេ។
សម្រាប់ព័ត៌មានបន្ថែមទាក់ទងបុរី សូមខលមកលេខ៖ 077 38 39 40 / 010 38 39 40
[…] ប្រភព៖ Property Area […]