ដោយៈ រ៉ាណេត
ភ្នំពេញៈ នៅពេលដែលអ្នកវិនិយោគ ដោយមិនមានព័ត៌មានគ្រប់គ្រាន់នៅក្នុងដៃ ការវិនិយោគអចលនទ្រព្យរបស់អ្នកអាចងាយរងហានិភ័យខ្ពស់ ហេតុនេះការសិក្សា និងស្វែងយល់ពីព័ត៌មានឱ្យបានគ្រប់ជ្រុងជ្រោយមានសារៈសំខាន់ណាស់ ដើម្បីការវិនិយោគរបស់ខ្លួនប្រាសចាកពីការខាតបង់។
អ្នកវិភាគសេដ្ឋកិច្ចសង្គម និងអចលនទ្រព្យ លោក ង៉ែត ជូ បានមានប្រសាសន៍តាមទូរស័ព្ទថា នៅក្នុងវិស័យនេះមានការបំពុលព័ត៌មានច្រើន ទាក់ទងនឹងការបង្ហាញ ឬលើកឡើងពីគំរោងអភិវឌ្ឍន៍នានា តាមរយៈអ្នកវិនិយោគមួយចំនួននៅក្នុងវិស័យនេះ ដើម្បីទាក់ទាញអតិថិជន ប្រយោជន៍ដើម្បីធ្វើឱ្យពួកគេលក់គំរោងរបស់ពួកគេឆាប់ដាច់។
-->
លោកបន្តថា ជាក់ស្តែងយើងធ្លាប់បានឮ និងឃើញរួចមកហើយ ចំពោះគម្រោងអភិវឌ្ឍសំណង់លំនៅដ្ឋានដែលគ្មានគោលដៅច្បាស់លាស់មួយចំនួន បានប្រកាសបើកលក់គម្រោងក្នុងតម្លៃសមរម្យ ដែលធ្វើឱ្យមហាជនមួយចំនួននាំគ្នាសម្រុកទៅកក់លុយទិញ ហើយមានអ្នកខ្លះបានប្រើប្រាស់លុយធនាគារទៅទិញ ដើម្បីត្រៀមលក់យកចំណេញ ប៉ុន្តែក្រោយបន្តិចមកគំរោងនោះហាក់ស្ងប់ស្ងាត់ គ្មានសកម្មភាព មានភាពស្ងបស្ងាត់ ដែលជាបញ្ហាប្រឈមទៅនឹងការខាតបង់។
លោកបានបន្តទៀតថា “ហេតុនេះមុនសម្រេចចិត្តវិនិយោគ ខ្ញុំសុំឱ្យប្រជាពលរដ្ឋប្រមូលព័ត៌មានឱ្យបានច្បាស់លាស់ និងគ្រប់ជ្រុងជ្រោយជាមុនសិន មុននឹងធ្វើការសម្រេចចិត្តវិនិយោគដើម្បីកាត់បន្ថយហានិភ័យ”។ លោកបន្តថា “នៅពេលយើងមិនសូវស្វែងយល់សិក្សារៀនសូត្រ និងតាមដានព័ត៌មានជាក់លាក់ អាចនឹងធ្វើឱ្យយើងវិនិយោគមានហានិភ័យខ្ពស់”។
លោកបន្តថា ការសិក្សារៀនសូត្រ និងប្រមូលព័ត៌មានបានត្រឹមត្រូវ ជាមូលដ្ឋានដ៏សំខាន់ សម្រាប់ធ្វើការសម្រេចចិត្តបានត្រឹមត្រូវ និងអាចកាត់បន្ថយ ឬបញ្ចៀសបាននូវហានិភ័យ ជាជាងយើងវិនិយោគបែបប្រថុយប្រថាន ព្រោះការវិនិយោគពឹងលើព្រេងសំណាង មិនមែនជាជម្រើសរបស់អ្នកវិនិយោគឆ្លាតវៃនោះឡើយ៕
