រង្វល់មូលក្រុងតាខ្មៅ។ រូបថត៖ សហការី
ដោយ គង់ សូរិយា
កណ្តាលៈ ប្លង់គោលដើម្បីធានាបាននូវការអភិវឌ្ឍប្រកបដោយនិរន្តរភាព នៅគ្រប់ស្រុក ក្រុង នៃខេត្តកណ្តាលបានបញ្ចប់នូវពង្រាងហើយ ដោយនៅសល់តែការកែសម្រួលចុងក្រោយប៉ុណ្ណោះ។
លោកបណ្ឌិតវ៉ាន់ វ៉ាតអ្នកឯកទេសផ្នែកនគរូបនីយកម្ម និងជាអនុប្រធានមន្ទីររៀបចំដែនដី នគរូបនីយកម្ម និងសំណង់ខេត្តកណ្តាល ដែលបានដឹកនាំការងារនេះបានមានប្រសាសន៍ឲ្យដឹងកាលពីចុងសប្តាហ៍មុនថា ការពង្រាងប្លង់គោលអភិវឌ្ឍន៍បានបញ្ចប់ទូទាំងស្រុក ក្រុងក្នុងខេត្តកណ្តាលហើយ និងរង់ចាំការកែសម្រួលឡើងវិញ មុនដាក់ជូនថ្នាក់ដឹកនាំក្រសួងរៀបចំដែនដី នគរូបនីយកម្ម និងសំណង់អនុម័តប៉ុណ្ណោះ។
-->
លោកបន្តថា “ខេត្តកណ្តាលបានបោះជំហ៊ានមុនគេ ក្នុងកិច្ចការងារនេះដោយសារមានការគាំទ្រពីថ្នាក់ដឹកនាំខេត្ត ពិសេសលោកម៉ៅ ភិរុណអភិបាលខេត្តកណ្តាលនិងការគាំទ្រពីក្រសួង”។ លោកបន្តថា “ការរៀបចំប្លង់គោលនេះ មានសារៈសំខាន់ណាស់ ដើម្បីធានានូវការអភិវឌ្ឍប្រកបដោយនិរន្តរភាព ពិសេសដើម្បីរៀបចំនូវតំបន់អភិវឌ្ឍន៍ឲ្យមានភាពសមស្រប នឹងស្ថានភាពសេដ្ឋកិច្ច និងទីតាំងភូមិសាស្រ្ត”។
ប្លង់គោលអភិវឌ្ឍន៍បានរៀបចំឲ្យមានតំបន់ប្រើប្រាស់ដីច្បាស់លាស់ ដូចជាតំបន់ពាណិជ្ជកម្ម តំបន់ឧស្សាហកម្ម តំបន់លំនៅដ្ឋាន និងតំបន់កសិកម្មជាដើម។ ពិសេសប្លង់ គោលក៏បានកំណត់ទំហំផ្លូវនៅតាមតំបន់និមួយៗផងដែរ។ នេះបើតាមការឲ្យដឹងរបស់លោកបណ្ឌិតវ៉ាន់ វ៉ាត។
កម្ពុជាបានចាប់ផ្តើមរៀបចំប្លង់គោលអភិវឌ្ឍន៍នៅគ្រប់បណ្តាខេត្ត ហើយខេត្តដែលបានរៀបចំប្លង់គោលអភិវឌ្ឍន៍រួចមុនគេ គឺខេត្តត្បូងឃ្មុំ ដែលចាត់ទុកជាខេត្តកូនពៅគេមួយ ក្នុងចំណោមរាជធានី ខេត្តទាំង២៥នៅទូទាំងប្រទេស។
ខេត្តកណ្តាល មានក្រុង ស្រុកចំនួន១២ ដោយមានស្រុកចំនួន១១និងក្រុង១៕
