ទិដ្ឋភាពដងផ្លូវទៅកាន់ខេត្តមណ្ឌលគិរីនារដូវវស្សា។ រូបថត៖ ហ្វេសប៊ុក
ដោយស៊ីវ ម៉េង
ភ្នំពេញ៖ ពីមុនការធ្វើដំណើរទៅកាន់បណ្តាខេត្តភូមិភាគឦសាន្ត ត្រូវចំណាយពេលលើសពីមួយថ្ងៃ ប៉ុន្តែពេលនេះហេដ្ឋារចនាសម្ព័ន្ឋនានាត្រូវបានតភ្ជាប់បាននិងកំពុងរៀបចំដោយរដ្ឋាភិលបាល លើវិស័យដឹកជញ្ជូនផ្លូវអាកាស ដែលនឹងជំរុញធ្វើឲ្យសកម្មភាពសេដ្ឋកិច្ច និងភ្ញៀវទេសចរណ៍ទៅទស្សនាតំបន់ទាំងនោះកាន់តែច្រើននាពេលអនាគត។
លោកអ៊ិន ភីរុណប្រជាពលរដ្ឋរស់នៅខេត្តមណ្ឌលគិរីបានថ្លែងឲ្យដឹងតាមទូរស័ព្ទកាលពីថ្ងៃពេលថ្មីៗនេះថា តំលៃអចលនទ្រព្យនៅមណ្ឌលគិរីចាប់ផ្តើមឡើងថ្លៃ ដោយសារដីមណ្ឌលគិរីអាចដាំម្រេចបាន ដែលធ្វើឲ្យប្រជាកសិករ និងឈ្មួញនានាបានសម្រុកទៅទិញដីដើម្បីដាំម្រេច ព្រោះដីនៅតំបន់នោះមានជីវជាតិល្អ។
-->
លោកបន្តថា “នៅពេលលេចលឺពីគំរោងសាងសង់ព្រលានយន្តហោះបែបនេះ អ្នកវិនិយោគក្នុងស្រុកកាន់តែច្រើនកំពុងសំរុកទៅស្វែងរកទិញដីនៅទីនោះ”។
កាលពីពេលថ្មីៗនេះ លោកថោង ខុនរដ្ឋមន្រ្តីក្រសួងទេសចរណ៍បានអះអាងថា ក្រសួងទេសចរណ៍កំពុងសិក្សា Master Plan ដែលគ្រោងចំណាយពេល៦ខែ ដើម្បីសិក្សាលទ្ឋភាពដាំដំណាំបន្លែ បង្កា ផ្កានានាសំរាប់ផ្គត់ផ្គង់និងទាក់ទាញទេសចរណ៍។ លោកបន្តថា ដើម្បីសម្រេចបាននូវការងារនេះ យើងត្រូវសាងសង់ព្រលានយន្តហោះក្នុងស្រុកមុនគេនៅ ខេត្តមណ្ឌលគិរី ដើម្បីដឹកជញ្ជូនបន្លែបង្ការផ្គត់ផ្គង់ទីផ្សារទេសចរណ៍ ក្នុងស្រុក និងនាំភ្ញៀវទេសចរណ៍ទៅទស្សនាតំបន់នោះ។
លោកបន្តថា “វាជាផែនការរបស់រដ្ឋាភិបាលដើម្បីជំរុញកំនើនសេដ្ឋកិច្ច ដើម្បីកាត់បន្ថយការលេចធ្លាយសេដ្ឋកិច្ចក្នុងវិស័យទេសចរណ៍ ព្រោះបើយើងធ្វើបានកម្ពុជាចំណេញច្រើនណាស់”។
អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិល លោកស៊ិន ចាន់សិរីវុត្ថាបានអះអាងថា រដ្ឋាភិបាលបានត្រៀមដីជាង៣៤០ហិកតា ដើម្បីសាងសង់ព្រលានយន្តហោះនៅខេត្តមណ្ឌលគិរីរួចហើយ ប៉ុន្តែលោកបានបដិសេធមិនប្រាប់ទីតាំង ដោយបារម្ភពីការឡើងថ្លៃដីខ្ពស់។
លោកអះអាងថា “ព្រលានយន្តហោះក្នុងស្រុក បើសាងសង់អាចចំណាយថវិកាចន្លោះពី៤០ទៅ៥០លានដុល្លារអាមេរិក”។
ចំណែកប្រធានមន្ទីរទេសចរណ៍ខេត្តបណ្ឌិតគិរីលោកគង់ វិមានបានថ្លែងថា រហូតមកទល់ពេលនេះ ខេត្តមណ្ឌលគិរីមិនទាន់មានសំណង់ផ្ទះល្វែង ឬបុរីនៅឡើយទេ ប៉ុន្តែមានសណ្ឋាគារ និងផ្ទះសំណាក់ចំនួនជាង១០០០បន្ទប់ សម្រាប់ទទួលភ្ញៀវទេសចរ ណ៍ជាតិ អន្តរជាតិ។ លោកបន្តថា ខេត្តមណ្ឌលគិរីមានប្រជាជនរស់នៅជាង៨ម៉ឺននាក់ និងនៅក្រុងសែនមនោរម្យ ដែលជាទីក្រុងរបស់ខេត្តនេះមានមនុស្សរស់នៅជាង២ម៉ឺននាក់។
អភិបាលខេត្តមណ្ឌលគិរីលោកស្វាយ សំអ៊ាងបានថ្លែងឲ្យដឹងផងដែរថា រហូតមកទល់ពេលនេះ មិនទាន់មានអ្នកវិនិយោគរូបណា មកវិនិយោគសំណង់ផ្ទះល្វែងឬបុរីនៅក្នុងខេត្តនេះ ដោយសារមិនមានការចូលមកវិនិយោគពីក្រុមហ៊ុនឯកជន ប៉ុន្តែប្រសិនជាមានក្រុមហ៊ុនឯកជនចូលមកវិនិយោគអា ; ជ្ញាធរខេត្តនឹងសហការគ្នាថាធ្វើក្នុងរូបភាពបែបណា ព្រោះខេត្តកំពុងសាងសង់ផ្សារថ្មីមួយក្នុងខេត្ត ហើយក្នុងគំរោងនេះ ក៏មានការសាងសង់ផ្ទះល្វែងលក់ផងដែរ ប៉ុន្តែក្នុងរូបភាពតូចប៉ុណ្ណោះ។
ខេត្តរតនៈគិរី ក៏ស្ថិតក្នុងផែនការកសាងព្រលានយន្តហោះមួយដូច គ្នានឹងខេត្តស្ទឹងត្រែងផងដែរ។
លោកង៉ែត ពិទូប្រធានមន្ទីរទេសចរណ៍ខេត្តរតនៈគិរីបានថ្លែងថា បច្ចុប្បន្នមានក្រុមហ៊ុនតាយ សេងកំពុងសាងសង់ចំណតរថយន្ត និងផ្ទះល្វែង ព្រមទាំងពុះដីឡូត៍លក់នៅក្នុងខេត្ត ហើយក្រុមហ៊ុនលឹម ប៊ុណ្ណាក៏បានសាងសង់ផ្ទះល្វែងលក់ផងដែរ។លោកបន្តថា ផ្ទះល្វែងក្នុងទីក្រុងនេះ បានដាក់លក់ក្នុងតំលៃចន្លោះពី៥ទៅ៦ម៉ឺនដុល្លារក្នុងមួយល្វែង ហើយមានប្រជាពលរដ្ឋទិញដូរជាហូរហែរផងដែរ។
ទិដ្ឋភាពដងផ្លូវទៅកាន់ខេត្តមណ្ឌលគិរីនារដូវវស្សា។ រូបថត៖ ហ្វេសប៊ុក
ខេត្តរតនៈគិរីមានប្រជាពលរដ្ឋរស់នៅជាង១៨ម៉ឺននាក់ និងក្រុងបានលុងមានប្រជាពលរដ្ឋរស់នៅប្រមាណ ៣០,០០០នាក់ និងមានសណ្ឋាគារសរុបចំនួន១៤ ផ្ទះសំណាក់ចំនួន៣៣ និងមានបន្ទប់សរុបប្រមាណ ១០០០បន្ទប់។
លោកង៉ែត ពិទូបានបន្តថា “តំលៃអចលនទ្រព្យក្នុងខេត្តមិនហក់ឡើងនោះទេ ក្នុងប៉ុន្មានឆ្នាំចុងក្រោយនេះ ប៉ុន្តែដីរដ្ឋកំណត់ដើម្បីបង់ពន្ឋមានតំលៃ២៥០ដុល្លារក្នុងមួយម៉ែត្រការ៉េសំរាប់ដីជុំវិញផ្សារ ប៉ុន្តែទិញដូរតំលៃជាក់ស្តែងមានខ្ពស់ជាងនេះ”។
លោកប៉ែន សុខគានាយកផ្នែកវាយតំលៃនៃក្រុមហ៊ុនប៊ុណ្ណារៀលធីគ្រុបបានថ្លែងថា វិស័យអចលនទ្រព្យនៅតាមបណ្តាខេត្ត ស្ថិតនៅភូមិភាគឦសាន្តមិនមានអ្វីគួរឲ្យកត់សំគាល់នោះទេ ដោយសារមិនមានការសាងសង់បុរី ឬផ្ទះល្វែងលក់នោះទេ ប៉ុន្តែខេត្តមណ្ឌលគិរីមានការពុះដីឡូត៍លក់ តែមិនទទួលបានជោគជ័យឡើយ។លោកបន្តថា ទោះបីជាមានចំនួនទេសចរណ៍ទៅដល់កាន់តែច្រើនក្តី តែចំនួនភ្ញៀវនៅមានកម្រិត ដែលធ្វើឲ្យមូលដ្ឋានក្នុងខេត្តនេះ មានការរីកចំរើនលឿននោះឡើយ។
ដីធ្លីក្នុងក្រុងបានលុង ខេត្តរតនគិរីតំលៃដីមានចន្លោះពី២៥០ ទៅ៣០០ដុល្លារនិងតំបន់ផ្សារឬតំបន់ពាណិជ្ជកម្ម ក្នុងខេត្តមានតំលៃចន្លោះពី៥០០ ទៅ៨០០ដុល្លារនិងតំបន់លំនៅដ្ឋានក្នុងក្រុងមានតំលៃចន្លោះពី៤០ ទៅ១០០ដុល្លារក្នុងមួយម៉ែត្រការ៉េ។
លោកប៉ែន សុខគាបានបន្តថា បើមើលមកកាន់ខេត្តស្ទឹងត្រែង និងខេត្តក្រចេះវិញ គ្រាន់តែជាតំបន់ឆ្លងកាត់ប៉ុណ្ណោះ វាមិនមានសកម្មភាពអភិវឌ្ឍន៍អ្វីគួរឲ្យកត់សំ គាល់នោះទេ ប៉ុន្តែតំលៃដីធ្លីនៅតំបន់ផ្សារ និងតំបន់ពាណិជ្ជកម្មក្នុងខេត្តទាំងពីរក៏មានតំលៃចន្លោះពី៨០០ ទៅ១០០០ដុល្លារផងដែរ។
អភិបាលខេត្តរតនគិរីលោកថន សាវុនមិនអាចទាក់ទងសុំការអត្ថាធិប្បាយបានទេ៕
[…] ប្រភព៖ Property Area […]