ផ្សារទំនើបដំបូងគេតម្លៃជិត ១០លានដុល្លារនៅក្រុងព្រះសីហនុនឹងបើកដំណើរការនៅចុងខែកញ្ញាខាងមុខនេះ

May 21, 2019

ដោយ គង់ សូរិយា

ភ្នំពេញៈ ផ្សារទំនើបដំបូងគេ FURI TIME SQUARE តម្លៃជិត១០លានដុល្លារអាមេរិកនៅក្រុងព្រះសីហនុ នឹងបើកដំណើរការនៅកំឡុងចុងចខែកញ្ញាខាងមុខនេះ ខណៈគំរោងនេះបានទទួលការជួលអស់ជាង ៩០ភាគរយរួចហើយ។

ចុចទីនេះដើម្បី Subscribe Telegram Channel «Property Area Asia» សម្រាប់ទទួលបានព័ត៌មានថ្មីៗ

-->

កញ្ញាលឹម សុខាដាវីននាយកផ្នែកទីផ្សារនៃក្រុមហ៊ុន FUTRI Real Estate បានមានប្រសាសន៍ឲ្យដឹងនារសៀលថ្ងៃទី ២១ ឧសភានេះថា តាមរយៈការជួបជុំជាមួយអតិថិជនកាលពីល្ងាចថ្ងៃទី២០ ឧសភាកន្លងមកនេះ យើងបានទទួលបានយោបល់ល្អ និងមានការកោតសរសើរពីអតិថិជនអ្នកជួលផ្សារទំនើបនេះ ដោយសារផ្សារនេះផ្តោតលើការរៀបចំប្រព័ន្ឋនៃការលក់ទូលាយល្អ មានទីធ្លាសាធារណៈធំទូលាយ ការឌីសាញមានភាពទាក់ទាញ និងទីតាំងនៃគម្រោងនេះល្អ។

ផ្សារទំនើបកំពស់៥ជាន់នេះ ស្ថិតនៅលើផ្លូវឯករាជ្យ ស្ថិតក្នុងសង្កាត់មិត្តភាព ខ័ណ្ឌមិត្តភាព ក្រុងព្រះសីហនុ។

កញ្ញាដាវីនបានបន្តថា “ការទទួលបានការសរសើរពីអតិថិជន អ្នកជួលទីតាំងលក់រាយក្នុងគំរោងនេះ ដោយសារការវិនិយោគរបស់អ្នកវិនិយោគផ្សារទំនើបនេះ ផ្តោតលើការវិនិយោគរយៈពេលវែងជាជាងរកផលចំណេញ”។ កញ្ញាបន្តថា “រហូតមកទល់ពេលនេះហាងអាហារ និងផលិតផលល្បីឈ្មោះជាង២០ក្រុមហ៊ុន បានចុះកុងត្រាលក់នៅផ្សារនេះ ហើយផលិតផលល្បីៗជាច្រើនទៀតកំពុងដំណើរការនិតិវិធី”។

ផ្សារទំនើប FURI TIME SQUARE ក៏មានការវិនិយោគលើ Sky Bar ទំនើបជាងគេ នៅក្នុងក្រុងព្រះសីហនុ ដោយគ្រាន់តែSky Barនេះវិនិយោគអស់ទឹកប្រាក់ជាង១លានដុល្លារអាមេរិក។

កញ្ញាលឹម សុខាដាវីនបានបន្តថា ជាមួយនឹងភាពអំណោយផលនៃទីតាំង កំនើនប្រជាសាស្រ្ត និងកំណើននៃការវិនិយោគនៅខេត្តព្រះសីហនុ បានធ្វើឲ្យគំរោងនេះសម្រេចបានជោគជ័យលើសការរំពឹងទុក ដោយពេលបើកដំណើរការសាកល្បងនៅចុងខែកញ្ញាខាងមុខនេះ ទីតាំងលក់ទំនិញ និងសេវាកម្មប្រមាណ៨០ភាគរយនឹងបើកដំណើរការ រួមទាំងរោងភាពយន្តផងដែរ។