ដោយ គង់ សូរិយា
ភ្នំពេញ៖ លំនៅដ្ឋានមានសារៈសំខាន់ណាស់សម្រាប់ជាជម្រករបស់មនុស្ស ហេតុនេះការសាងសង់លំនៅដ្ឋាន ដែលមានស្ថាបត្យកម្មត្រឹមត្រូវ នឹងផ្តល់ឲ្យអ្នករស់នៅមានផាសុកភាព ប៉ុន្តែបើសាងសង់មិនបានត្រឹមត្រូវ ក៏ធ្វើឲ្យអ្នករស់នៅមិនមានក្តីសុខផងដែរ។
តើការសាងសង់លំនៅដ្ឋានបែបណា ដែលអាចផ្តល់ផាសុខភាពដល់អ្នករស់នៅ?
លោកសាស្រ្តាចារ្យទួស សាភឿនស្ថាបត្យករអាស៊ាន និងជាអគ្គលេខាធិការរងនៃគណៈស្ថាបត្យករកម្ពុជាបានមានប្រសាសន៍ឲ្យដឹងថា ការគូរប្លង់លំនៅដ្ឋានតាមបុរី ឬផ្ទះជាលក្ខណៈឯកជន ស្ថាបត្យករត្រូវគិតគូពីភាពបៃតង និងខៀវ។ ភាពបៃតងសំដៅលើសណ្ឋានដី គម្លាតនៃអាគារ និងគម្លាតផ្ទះពីចិញ្ចើមផ្លូវឲ្យមានភាពសមស្រប និងព៌ណខៀវសំដៅលើទឹក ដែលផ្តល់់ភាពសុខដុមរមនាដល់ម្ចាស់លំនៅដ្ឋាននិមួយៗ។
លោកបន្តថា “ការច្របាច់បញ្ចូលគ្នានូវភាពបៃតង និងខៀវនឹងផ្តល់ឲ្យអ្នករស់នៅមានផាសុខភាព ផ្ទុយទៅវិញបើស្ថាបត្យករមិនគិតគូរពីបញ្ហានេះ នឹងធ្វើឲ្យគំរោងលំនៅដ្ឋានឬបុរីណាមួយមានភាពស្ងួត និងទាក់ទាញការរស់នៅ”។ លោកបន្តថា “ការចោលគម្លាតពីផ្លូវសំរាប់ផ្ទះ ឬអាគារខ្ពស់ក៏មានសារៈសំខាន់មិនអាចខ្វះបានដែរ ព្រោះការចោលគម្លាតត្រឹមត្រូវ ធ្វើឲ្យអាគារឬផ្ទះនោះមានខ្យល់ និងពន្លឺចេញចូលគ្រប់គ្រាន់ ដែលជួយសន្សំសំចៃអគ្គិសនី ក៏ដូចជាជួយផ្តល់ឲ្យអ្នករស់នៅមានភាពត្រជាក់ត្រជុំផងដែរ”។
លោកសាស្រ្តាចារ្យទួស សាភឿនបានបន្តថា បើស្ថាបត្យករគេង ឬអ្នកអភិវឌ្ឍន៍គេងគម្លាតផ្ទះពីផ្លូវ ឬទុកផ្លូវតូចៗក្នុងបុរី ឬសំណង់ផ្ទះល្វែង ដើម្បីបានផលចំណេញច្រើនគំរោងនោះមិនទទួលបានជោគជ័យទេ។ ផ្ទុយទៅវិញបើ គំរោងនោះមានការរៀបចំត្រឹមត្រូវតាមប្លង់ស្ថាបត្យកម្ម ហើយការសាងសង់មានគុណភាព និងសោភ័ណភាព អតិថិជនគ្រាន់តែមើលពីក្រៅ ក៏ចង់រស់នៅ និងធ្វើឲ្យសំណង់បុរី ឬលំនៅដ្ឋាននោះទាក់ទាញអ្នកទិញបានច្រើនមិនខាន៕
