ដោយ ៖ រ៉ាណេត
ភ្នំពេញ ៖ ស្របពេលដែលវិស័យអចលនទ្រព្យ និងសំណង់នៅកម្ពុជាមានភាពរីកចម្រើន និងអភិវឌ្ឍលឿនហួសការរំពឹងទុក សមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានបង្កើតវគ្គសិក្ខាសាលាបណ្តុះបណ្តាលជំនាញភាពជាភ្នាក់ងារលក់ទៅដល់សិក្ខាកាមប្រមាណជាង១០០នាក់។
នៅសណ្ឋាគារភ្នំពេញអេរ៉ា កាលពីល្ងាចថ្ងៃទី៣០ ខែឧសភា ម្សិលមិញនេះ សមាគមអ្នកវាយតម្លៃ និងភ្នាក់ងារអចលនវត្ថុកម្ពុជា CVEA បានបង្កើតវគ្គសិក្ខាសាលាបណ្តុះបណ្តាល និចែករំលែកចំណេះដឹង បទពិសោធន៍ក្នុងនាមជាភ្នាក់ងារលក់អចលនទ្រព្យទៅដល់បណ្តាអ្នកជំនាញក្រោយដែលកំពុងតែចាប់ និងប្រកបអាជីពក្នុងវិស័យនេះ។
-->
ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោក ច្រឹក សុខនីម បានមានប្រសាសន៍ប្រាប់ឱ្យដឹងថា បច្ចុប្បន្ននេះ ចំពោះវិស័យអចលនទ្រព្យគឺមានភាពរីកចម្រើនលើសពីការរំពឹងទុក ដែលធ្វើឱ្យមនុស្សជាច្រើនមានចំណាប់អារម្មណ៍ចូលប្រឡូកនៅក្នុងវិស័យមួយនេះ ដើម្បីទទួលបានផលប្រយោជន៍។
លោកបានមានប្រសាសន៍ទៀតថា ៖ “ដោយសារតែរំពឹង និងចងបានភាគលាភពីវិស័យនេះបានធ្វើឱ្យអ្នកដែលស្ថិតនៅក្នុងវិស័យនេះធ្វើការប្រកួតប្រជែងគ្នា ដើម្បីទទួលបានចំណែកទីផ្សារ រហូតមានពេលខ្លះកើតជាបញ្ហាប្រឈមក៏មានដែរ”។
លោកបានបន្តទៀតថា ៖ “ដោយសារតែសម្លឹងឃើញពីបញ្ហាប្រឈមទាំងនេះ ជាការចូលរួម ខាងសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានបង្កើតជាវគ្គសិក្ខាសាលា ដើម្បីចែករំលែកនូវចំណេះដឹង ក៏ដូចជាបទពិសោធន៍ជូនដល់បណ្តាភ្នាក់ងារអចលវត្ថុ ជាពិសេសអ្នកដែលអនុវត្តផ្នែកលក់ និងទីផ្សារក្រោមការចូលរួមពីសំណាក់ប្រធានក្រុមហ៊ុនអចលនទ្រព្យដែលជាសមាជិកនៅក្នុងសមាគម”។
លោកបានមានប្រសាសន៍បន្ថែមទៀតថា ៖ “សម្រាប់សិក្ខាកាមដែលបានចូលរួម នឹងទទួលបានបន្ថែមនូវចំណេះដឹងអនុវត្តជាក់ស្ដែង ដែលអាចញ្ជៀសហានិភ័យផ្សេងៗដែលអាចកើតមាន ក៏ដូចជាវិធីសាស្ត្រដែលអាចទទួលបានកម្រៃជើងសារខ្ពស់ប្រកបដោយប្រសិទ្ធភាព”។
ប្រធានក្រុមហ៊ុនអចលនទ្រព្រ AMATAK Property Service លោកស្រី តាំង ហួរ ដែលបានចូលរួម និងបញ្ជូនភ្នាក់ងារក្រុមហ៊ុនរបស់ខ្លួនមកស្វែងយល់ពីវគ្គសិក្ខាសាលាស្ដីពីបញ្ហាប្រឈម និងដំណោះស្រាយរបស់ភ្នាក់ងារអចលនវត្ថុ បានមានប្រសាសន៍ប្រាប់ឱ្យដឹងថា វគ្គបណ្តុះបណ្តាលមួយនេះគឺមានប្រយោជន៍ច្រើនចំពោះភ្នាក់ងារជំនាន់ក្រោយដែលកំពុងតែអនុវត្តនៅលើទីផ្សារនាពេលបច្ចុប្បន្ន។
លោកស្រីបានបន្តទៀតថា ៖ “មិនចំពោះតែក្រុមហ៊ុន ឬជាបុគ្គលិកដែលជាភ្នាក់ងារនោះទេ ចាំបាច់ត្រូវតែមានវិធីសាស្ត្រក្នុងការអនុវត្តដើម្បីទទួលបានចំណែកទីផ្សារ”។
លោកស្រីបានបន្តទៀតថា ៖ “ដើម្បីជម្រុញឱ្យការងារទីផ្សារក្នុងអាជីពនេះទទួលបានប្រយោជន៍យូរអង្វែង ចាំណាស់ត្រូវតែមានកិច្ចសហការរវាងបណ្តាក្រុមហ៊ុន ក៏ដូចជាភ្នាក់ងារដែលស្ថិតក្នុងវិស័យរួមគ្នាមួយនេះដើម្បីទទួលបានប្រយោជន៍រួមគ្នា ចៀសវាងការប្រកួតប្រជែងដោយមិនមានភាពស្មោះត្រង់ ឬមានការលួចវាយប្រហារគ្នាក្រោយខ្នងដើម្បីតែផលប្រយោជន៍តូចតែម៉្យាងនោះទេ”៕
