ដោយ គង់ សូរិយា
ភ្នំពេញៈ ប្រធានក្រុមប្រឹក្សាភិបាលសមាគមអ្នកជំនាញអចលនទ្រព្យកម្ពុជា លោកស្រីចេវ សុឃុនបានដឹកនាំថ្នាក់ដឹកនាំ និងសមាជិកសមាគមទៅទទួលការបណ្តុះបណ្តាលជំនាញអចលនទ្រព្យអន្តរជាតិ(CIPS)នៅប្រទេសសឹង្ហបុរីក្នុងរយៈពេលមួយសប្តាហ៍។
ការចូលរួមវគ្គបណ្តុះបណ្តាលនេះ ជាផ្នែកមួយនៃបេសកកម្មរបស់សមាគម ក្នុងការជំរុញការពង្រឹងសមត្ថភាពធនធាន មនុស្ស ដើម្បីចែករំលែកបទពិសោធន៍ដល់អ្នកនៅក្នុងវិស័យនេះ ក្នុងក្របខ័ណ្ឌសមាគម ក៏ដូចជាក្របខ័ណ្ឌជាតិ។
ជាមួយនឹងឳកាសដ៏ល្អនេះ លោកឃាង ពុទ្ឋីប្រធានសមាគមអ្នកជំនាញអចលនទ្រព្យកម្ពុជា ក៏បានចុះអនុស្សរណៈយោគយល់គ្នាជាមួយសមាគម Singapore Estate Agent Association ផងដែរ។ ការចុះអនុស្សរណៈនេះ ជាផ្នែកមួយនៃការពង្រឹងភាពជាដៃគូ ផ្លាស់ប្តូរបទពិសោធន៍គ្នាទៅវិញទៅមក និងចែករំលែកកម្មវិធីសិក្សាពីគ្នាទៅវិញទៅមកផងដែរ។
លោកស្រីចេវ សុខុនបានមាមនប្រសាសន៍ថា ធនធានមនុស្សក្នុងវិស័យអចលនទ្រព្យ ពិតជាមានសារៈសំខាន់ណាស់ ដើម្បីធ្វើឲ្យវិស័យនេះមានការរីកចម្រើនដោយចីរភាព ព្រោះបើគ្មានធនធានមនុស្សពូកែ មានជំនាញខ្ពស់ ការអភិវឌ្ឍក្នុងវិស័យនេះក៏មិនមានភាពរលូនផងដែរ។
លោកស្រីបន្តថា “ការទទួលការបណ្តុះបណ្តាល ពីអ្នកជំនាញលំដាប់ពិភពលោក ជាផ្នែកមួយយ៉ាងសំខាន់ ដែលយើងត្រូវការជាចាំបាច់ ដើម្បីពង្រីកក្រុមហ៊ុនរបស់សមាជិកនិមួយៗកាន់តែរីកចម្រើន និងអភិវឌ្ឍន៍វិស័យនេះ ឲ្យកាន់តែមានភាពរីកចម្រើនបន្ថែមទៀត”។
ប្រធានសមាគមអ្នកជំនាញអចលនទ្រព្យកម្ពុជា លោកឃាង ពុទ្ឋីបានមានប្រសាសន៍ថា ការបណ្តុះបណ្តាលធនធានមនុស្ស ជាទស្សនទានដើមរបស់សមាគម ដើម្បីលើកកំពស់ការអភិវឌ្ឍក្នុងវិស័យនេះ ព្រោះវិស័យនេះមានការរីកចម្រើនលឿន ដែលធ្វើឲ្យកម្ពុជាជួបកង្វះខាតធនធានមនុស្ស ហើយបណ្តាក្រុមហ៊ុនអនន្តរជាតិនានាបានយកធនធានមនុស្សរបស់ពួកគេមកធ្វើការនៅកម្ពុជា។
លោកបន្តថា “ការបង្កើតសមាគមនេះឡើង គោលដៅចំបងគឺពង្រឹងធនធានមនុស្ស ទាក់ទាញការវិនិយោគ ក៏ដូចជា ជម្រុញធ្វើយ៉ាងណាឲ្យវិស័យនេះមានការរីកចម្រើន និងជួយរដ្ឋាភិបាលក្នុងការអភិវឌ្ឍសេដ្ឋកិច្ចជាតិ”៕
