លោកឧកញ៉ា នួន រិទ្ធី / លោក Ken Lo / ប្រធានសមាគម CVEA លោក ច្រឹក សុខនីម
ដោយ ៖ រ៉ាណេត
ភ្នំពេញ៖ នៅក្នុងចំណោមបណ្តាក្រុមហ៊ុនអចលនទ្រព្យជាច្រើនដែលកំពុងតែដំណើរប្រតិបត្តិការនៅលើទីផ្សារនាពេលបច្ចុប្បន្ននេះបានលើកឡើងពីទស្សនៈផ្សេងគ្នា ថាតើគួរអនុវត្តគោលការចាប់ដៃសហការគ្នាដើម្បីទទួលបានប្រយោជន៍រួមគ្នា ឬចាំបាច់ត្រូវតែធ្វើការប្រកួតប្រជែង ដើម្បីទទួលបានប្រយោជន៍ និងបង្ហាញពីសក្ដានុពលរបស់ក្រុមហ៊ុន។
ពាក់ព័ន្ធទៅនឹងការលើកឡើងខាងលើនេះ ស្ថាបនិក និងជានាយកក្រុមហ៊ុន Century 21 Imperial Realty លោក Ken Lo មានប្រសាសន៍ប្រាប់ឱ្យដឹងតាមទូរស័ព្ទកាលពីព្រឹកថ្ងៃទី៤ ខែមិថុនា ឆ្នាំ២០១៩ នេះថា មិនថាជាការប្រកួតប្រជែង ឬជាកិច្ចសហការនោះទេ គឺសុទ្ធតែមានគុណសម្បត្តិ និងគុណវិបត្តិដូចគ្នា សំខាន់ការអនុវត្តត្រូវធ្វើឡើងឱ្យមានតម្លាភាព និងមានវិជ្ជាជីវៈ។
-->
លោកបានបន្តថា ៖ “នៅក្នុងក្រុមហ៊ុននីមួយៗគឺសុទ្ធតែមានគោលការណ៍ និងវិធីសាស្ត្រក្នុងការអនុវត្តផ្សេងៗគ្នាទាំងអស់”។
លោកបានបន្តទៀតថា ៖ “តាមពិតការសហការគ្នាដើម្បីទទួលបានប្រយោជន៍នៅលើទីផ្សារថ្វីត្បិតតែទទួលបានចំណូលតិច ប៉ុន្តែវាមានភាពស្ថិតស្ថេរយូរអង្វែង ។ ឧទាហរណ៍ ដូចជាការផ្តល់សេវាកម្មទៅលើការលក់អចលនវត្ថុមួយរួមគ្នារវាងភ្នាក់ងារចំនួន២ក្រុមហ៊ុនផ្សេងគ្នាអាចធ្វើទៅបានក្រោមការចចារ និងធ្វើកិច្ចសន្យារួមគ្នាក្នុងការទទួលបានចំណែកនៃអត្ថប្រយោជន៍ ប៉ុន្តែវិធីសាស្ត្រនេះមានចំណូលតិចចំពោះក្រុមហ៊ុន ហើយក៏មិនសូវមានគេយកមកអនុវត្តនោះដែរ”។
លោកបានបន្តទៀតថា ៖ “វិធីសាស្ត្រខាងលើនេះ ភាគច្រើនគេធ្វើឡើងចំពោះក្រុមហ៊ុនណាដែលមានធនធានគ្រប់គ្រាន់រួចទៅហើយ ប៉ុន្តែបើចំពោះក្រុមហ៊ុនដែលទើបតែចាប់ដំណើរការ ឬជាប្រភេទក្រុមហ៊ុនខ្នាតតូចគឺគេមិនសូវចាប់អារម្មណ៍ធ្វើនោះទេ ដោយសារតែគេចង់ក្រសោបយកចំណែកទីផ្សាតែម្នាក់ដើម្បីអាចបង្កើនចំណូលសម្រាប់ក្រុមហ៊ុន”។
អគ្គនាយកក្រុមហ៊ុនអចលនទ្រព្យ Khmer Foundation Appraisal លោកឧកញ៉ា នួន រិទ្ធី បង្ហាញពីទស្សនៈគាំទ្រទៅលើការប្រកួតប្រជែងព្រោះលោកយល់ថា ការប្រកួតប្រជែងវាបានឆ្លុះបញ្ចាំងពីភាពមានជំនឿរបស់អតិថិជន និងសក្ដានុពលរបស់ក្រុមហ៊ុន។
លោកឧកញ៉ាបានមានប្រសាសន៍ថា ៖ “ស្ទើរតែគ្រប់ក្រុមហ៊ុននៅលើសាកលលោកគឺតែមានការប្រកួតប្រជែងគ្នាជាចាំបាច់ដើម្បីទទួលបានចំណែកទីផ្សាររៀងៗខ្លួន”។
លោកឧកញ៉ាបន្តទៀតថា ៖ “បើគ្មានការប្រកួតប្រជែង ធ្វើម៉េចទើបក្រុមហ៊ុនមានភាពរីកចម្រើន? វាជាទីផ្សារសេរី ក្រុមហ៊ុន និងភ្នាក់ងារទាំងអស់សុទ្ធតែមានសិទ្ធិក្នុងការប្រកួតប្រជែកទៅតាមលទ្ធភាពរបស់ក្រុមហ៊ុននីមួយៗ។ គុណសម្បត្តិនៃការប្រកួតប្រជែងគឺការទទួលបានចំណែកទីផ្សារទៅតាមលទ្ធភាពរបស់ខ្លួន ហើយចំពោះគុណវិបត្តិគឺកើតឡើងក្រោយពេលប្រកួតប្រជែងមិនឈ្នះគេ”។
លោកឧកញ៉ាបញ្ជាក់ទៀតថា ៖ “ផលវិបាកនៃការប្រកួតប្រជែងគឺរវាងក្រុមហ៊ុនស្របច្បាប់ និងក្រុមហ៊ុនគ្មានច្បាប់ ដែលភាគច្រើនក្រុមហ៊ុនដែលគ្មានច្បាប់ត្រឹមត្រូវតែធ្វើឡើងដោយគ្មានភាពស្មោះត្រង់ និងខុសពីវិជ្ជាជីវៈ” ។
ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោក ច្រឹក សុខនីម បានមានប្រសាសន៍នៅថ្ងៃដដែលនេះដែរថា បច្ចុប្បន្នចំពោះក្រុមហ៊ុនដែលសហការគ្នានៅក្នុងវិស័យនេះហាក់មានចំនួនតិចនៅឡើយ។
លោកបានបន្តថា ៖ “ទាំងការសហការ និងការប្រកួតប្រជែងដោយភាពស្មោះត្រង់គឺសុទ្ធតែមានផលប្រយោជន៍ដូចគ្នា ។ វាត្រូវចំណាយពេលយូរបន្តិចក្នុងការធ្វើឱ្យក្រុមហ៊ុនដែលស្ថិតក្នុងវិស័យរួមគ្នាសហការគ្នា ដោយសារតែក្រុមហ៊ុននីមួយៗមិនបានគិតទៅលើចំណុចនេះនោះទេ ម្នាក់ៗសុទ្ធតែខំប្រឹងយ៉ាងខ្លាំងក្នុងការទទួលបានចំណែកទីផ្សាររៀងៗខ្លួនទៅតាមលទ្ធភាព”។
លោកបានបន្តទៀតថា ៖ “យើងមិនអាចសម្រេចឱ្យគេអនុវត្តតាមអ្វីដែលយើងចង់បាននោះទេ ហើយបើការអនុវត្តនូវវិធីណាមួយដែលមិនមានចំណូលដល់ក្រុមហ៊ុនក៏គេមិនធ្វើនោះដែរ សំខាន់ការអនុវត្តទាំងអស់នោះកុំឱ្យតែប្រាស់ចាកពីច្បាប់ និងវិជ្ជាជីវៈតែប៉ុណ្ណោះ”៕
