ដោយៈ រ៉ាណេត
ភ្នំពេញៈ វិស័យដីធ្លីនៅតាមតំបន់ជុំវិញជាយក្រុងនានា ដែលហ៊ុព័ទ្ធជុំវិញរាជធានីភ្នំពេញ ត្រូវបានគេសម្លឹងឃើញថា កំពុង តែបង្ហាញពីសក្តានុពល ប៉ុន្តែយ៉ាងណាក៏ដោយអ្នកជំនាញនៅក្នុងវិស័យមួយនេះបានសង្កត់ធ្ងន់ថា សក្ដានុពលពិតជាមានដូចគ្នា ប៉ុន្តែបើនិយាយពីតម្លៃវិញដីធ្លីវិញ នៅភាគខាងត្បូងហាក់មានកម្រិតទាបជាងគេនៅឡើយ។
អគ្គនាយកក្រុមហ៊ុនអចលនទ្រព្យអន្តរជាតិ Century 21 Imperial Realty លោក Ken Loបានមានប្រសាសន៍ប្រាប់តាមទូរស័ព្ទ កាលពីរសៀលថ្ងៃទី១០ ខែមិថុនា ឆ្នាំ២០១៩នេះថា ស្ទើរតែគ្រប់តំបន់ដែលស្ថិតនៅជាយរាជធានីភ្នំពេញទាំង អស់ សុទ្ធតែមានភាពទាក់ទាញ និងមានសក្ដានុពលដូចគ្នា ប៉ុន្តែបើចំពោះតម្លៃអចលនទ្រព្យ ក៏ដូចជាដីធ្លីវិញគេសង្កេត ឃើញថា ភាគខាងត្បូងនៅតាមកម្រិតទាបជាងគេនៅឡើយ។
-->
លោកបន្តទៀតថា “ភាគខាងត្បូងរាជធានីភ្នំពេញ តម្លៃដីនៅមានកម្រិតទាបជាងគេ ដែលវាក៏ជាឱកាសល្អសម្រាប់បណ្តាអ្នកវិនិយោគ និងអភិវឌ្ឍក្នុងការទទួលបានចំណេញ”។ លោកបន្តថា “បច្ចុប្បន្ននៅភាគខាងត្បូងភាគច្រើន ជាស្ថានភាពដីកសិកម្មនៅឡើយ ហើយសន្ទុះនៃការអភិវឌ្ឍក៏ទើបតែមានសន្ទុះ ក្នុងមួយរយៈពេលចុងក្រោយនេះតែប៉ុណ្ណោះ”។
លោក Ken Lo បានបន្តថា តម្លៃដី ក៏ដូចជា អចលនទ្រព្យដែលស្ថិតនៅទិសចំនួន៣ផ្សេងទៀត ដែលរួមមានដូចជាទិសខាងកើត ទិសខាងលិច ជាពិសេសទិសខាងជើងគឺសុទ្ធតែមានតម្លៃថ្លៃ ដោយសារតែកក្តាអភិវឌ្ឍជាច្រើន បានសម្រុកនៅតំបន់ទាំងនេះរួចរាល់ ទើបជម្រុញបែរទៅទិសខាងត្បូងនេះចុងក្រោយ។
យ៉ាងណាក៏ដោយ លោក Ken Lo បានបញ្ជាក់ថា ពេលនេះសក្ដានុពលរបស់អចលនទ្រព្យ ក៏ដូចជាវិស័យដីធ្លីអាចផ្តល់ឱកាសច្រើន ដល់អ្នកដែលមានបំណងចង់វិនិយោគបន្ត ព្រោះនៅត្រឹមរយៈពេលដ៏ខ្លីខាងមុននេះ តំបន់ភាគខាងត្បូងក៏មានតម្រូវការខ្ពស់ និងការអភិវឌ្ឍខ្លាំងមិនចាញ់តំបន់ ដែលស្ថិតនៅទិសទាំង៣ទៀតនោះឡើយ។ ពេលនេះនៅប៉ែកខាងត្បូង មានតំបន់ខ្លះដែលមិនទាន់មានគម្រោងអភិវឌ្ឍន៍នៅឡើយ ដែលធ្វើឲ្យតម្លៃដីស្ថិតក្នុងចន្លោះប្រមាណ១០០ដុល្លារក្នុងមួយម៉ែត្រការ៉េ ឬក្រោម១០០ដុល្លារក៏មានដែរ។
លើកឡើងស្រដៀងគ្នានេះ លោកឧកញ៉ានួន រិទ្ឋីអគ្គនាយកក្រុមហ៊ុនអចលនទ្រព្យ Khmer Foundation Appraisal បានមានប្រសាសន៍ឲ្យដឹងនៅថ្ងៃដដែលថា មិនថាទោះជាស្ថិតនៅប៉ែកខាងណានោះទេ នៅពេលអនាគតឆាប់ៗនេះគឺសុទ្ធតែមានតម្រូវការខ្ពស់ដូចគ្នា។ តាមភាពជាក់ស្ដែងនាពេលបច្ចុប្បន្ននេះ បើធ្វើការប្រៀបធៀប ភាគខាងត្បូងរាជធានីភ្នំពេញ ដីធ្លីនៅមានកម្រិតទាបជាងគេ។
លោកឧកញ៉ាបន្តថា “មូលហេតុដែលធ្វើឱ្យភាគខាងត្បូង នៅមានតម្លៃទាបជាងគេ ក៏ព្រោះតែប៉ែកខាងនេះមានការអភិវឌ្ឍក្រោយគេបន្តិច ជាពិសេសនៅក្នុងតំបន់ស្រុកកណ្តាលស្ទឹង ដែលរួមមានដីនៅតាមផ្លូវជាតិ២ ចន្លោះផ្លូវជាតិ៣ និងតំបន់មួយចំនួនតូចទៀតស្ថិតនៅក្នុងតំបន់ក្បែរផ្លូវជាតិ៤”។
លោកឧកញ៉ានួន រិទ្ឋីបានបញ្ជាក់ទៀតថា បើទោះជាបែបនេះក្ដី ប៉ុន្តែយ៉ាងយូរនៅត្រឹមចន្លោះចាប់ពី៥-១០ឆ្នាំខាងមុខ ភាគខាងត្បូងនឹងប្រែក្លាយទៅជាតំបន់ទីប្រជុំជន មានហេដ្ឋារចនាសម្ព័ន្ធផ្លូវថ្នល់ខ្វាត់ខ្វែង ជាមួយសំណង់អគារពាណិជ្ជកម្មពហុចម្រុះជាច្រើន ជាពិសេសវិស័យលំនៅដ្ឋាន នឹងមានការកើនឡើងក្រោយគម្រោងសាងសង់ផ្លូវក្រវ៉ាត់ក្រុងទី៣ និងព្រលានយន្តហោះថ្មីត្រូវបានបញ្ចប់ជាស្ថាពរ៕
