ដោយ វុត្ថា
ព្រះសីហនុៈ រដ្ឋាភិបាលតាមរយៈក្រុមការងារថ្នាក់ជាតិ និងក្រុមការងារថ្នាក់មូលដ្ឋាននៃខេត្តព្រះសីហនុបានប្រកាស ដាក់ផែនការការងារអទិភាពចំនួន៤ ក្នុងចំណោមផែនការផ្សេងទៀត សម្រាប់អភិវឌ្ឍខេត្តព្រះសីហនុ ដើម្បីឆ្លើយតបនឹងតម្រូវការបច្ចុប្បន្ន និងអនាគតនៃទីផ្សារការងារ។
លោក សាយ សំអាល់ ប្រធានក្រុមការងារថ្នាក់ជាតិចុះជួយខេត្តព្រះសីហនុ បានឲ្យដឹងនៅក្នុងកិច្ចប្រជុំកាលពីថ្ងៃទី១៤ មិថុនាម្សិលមិញនេះថា ខេត្តព្រះសីហនុបាននិងកំពុងទទួលបានផលពីផ្លែផ្កាសុខសន្តិភាព ស្ថិរភាព និងការអភិវឌ្ឍដែលបានមកពីការយកជីវិតធ្វើដើមទុនរបស់ថ្នាក់ដឹកនាំយើង។ លោកបន្តថា កិច្ចការអាទិភាពចំនួន៤ ក្នុងចំណោមការងារជាច្រើន ដែលក្រុមការងារត្រូវដោះស្រាយឱ្យបានគឺ ទី១ ការពង្រឹងសន្តិសុខនិងសណ្តាប់ធ្នាប់នៅក្នុងខេត្តព្រះសីហនុទាំងមូល ដោយសហការគ្នារវាងអាជ្ញាធរខេត្ត កងកម្លាំងសមត្ថកិច្ច និងក្រុមការងារឱ្យបានល្អ។
ទី២) ការពារឱ្យបាននូវបរិយាកាសសុខសុវត្ថិភាព សម្រាប់ប្រជាពលរដ្ឋនិងភ្ញៀវទេសចរ ព្រមទាំងវិនិយោគិន។ ទី៣ ការគ្រប់គ្រងការងារសំណង់ដែលជាគម្រោងសាងសង់ថ្មីៗត្រូវមានការគ្រប់គ្រងឱ្យបានល្អ កាត់បន្ថយការបំពុលខ្យល់ និងទី៤ ការគ្រប់គ្រងសំណល់រឹងរាវ និងសំរាម ឱ្យបានល្អដើម្បីធ្វើឱ្យខេត្តព្រះសីហនុមានសោភ័ណភាព មានអនាម័យបរិស្ថានល្អស្អាត និងពលរដ្ឋរស់នៅប្រកបដោយផាសុកភាព និងកាន់តែមានការទាក់ទាញភ្ញៀវទេសចរមកកម្សាន្ត។
លោកសាយ សំអាល់ ក៏បានប្រកាសពីការគ្រប់គ្រងការងារអភិវឌ្ឍន៍ ឱ្យបានត្រឹមត្រូវតាមបទដ្ឋាន និងណែនាំផែនការការគ្រប់គ្រងទឹកស្អាត និងអគ្គិសនីដើម្បីឱ្យការផ្តល់សេវាផ្គត់ផ្គង់កាន់តែប្រសើរ និងការផ្គត់ផ្គង់ឆ្លើយតបនឹងតម្រូវការប្រើប្រាស់ប្រចាំថ្ងៃ។ លោកក៏បានលើកឡើង ពីគម្រោងការស្តារប្រព័ន្ធលូ បង្ហូរទឹកឱ្យបានទៀងទាត់ ក៏ដូចជាការគ្រប់គ្រងសំណល់រាវឱ្យបានល្អ និងត្រូវមាន ការរៀបចំក្រុងឱ្យបានល្អដោយធ្វើយ៉ាងណាបែងចែកឱ្យដាច់រវាងលូទឹកភ្លៀង និងលូទឹកកខ្វក់ ព្រមទាំងកសាងនូវហេដ្ឋារចនាសម្ព័ន្ធផ្លូវថ្នល់ក្នុងខេត្តដើម្បីឆ្លើយតបនឹងកំណើនសេដ្ឋកិច្ច កំណើនប្រជាជន និងចំនួនភ្ញៀវទេសចរនៅក្នុងខេត្តព្រះសីហនុ។
រាជរដ្ឋាភិបាលកម្ពុជាកន្លងមកនេះ បានកំណត់យកខេត្តព្រះសីហនុ ជាប៉ូលសេដ្ឋកិច្ចធំជាងគេក្នុងចំណោមប៉ូលសេដ្ឋកិច្ចទាំង៣ មានរាជធានីភ្នំពេញ សៀមរាប និងខេត្តព្រះសីហនុ។ ក្នុងរយៈពេលប៉ុន្មានឆ្នាំចុងក្រោយនេះ ខេត្តព្រះសីហនុមានការអភិវឌ្ឍន៍ និងរីកចម្រើនគួរឲ្យកត់សម្គាល់ តាមរយៈការបណ្តាក់ទុនវិយោគ ពីក្រុមហ៊ុនបរទេសនានា អភិវឌ្ឍលើវិស័យសំណង់ បដិសណ្ឋារកិច្ច ហេដ្ឋារនាសម្ពន្ធ និង កសិកម្មជាដើម ដើម្បីប្រែក្លាយខេត្តមាត់សមុទ្រមួយនេះ ឲ្យមានការរីកចម្រើន និងមានការអភិវឌ្ឍន៍ដូចបណ្តាក្រុង-ខេត្តនានានៅក្នុងតំបន់ និងពិភពលោក៕
