ដោយ វុត្ថា
អារ៉ាប់រួមៈ ពេលនិយាយដល់ពិភពអារ៉ាប់ គេតែងតែនឹកឃើញពីធនធានប្រេងដ៏សម្បូរបែប និងដឹងថាមានអ្នកមានច្រើនជាងគេពីធនធានប្រេងច្រើនជាងគេផងដែរ ប៉ុន្តែតើអ្នកណាជាអ្នកមានប្រាក់ច្រើនជាងគេនៅក្នុងតំបន់នេះ?។
លោក Majid Al Futtaim ជាមហាសេដ្ឋីអចលនទ្រព្យដែលមានលុយច្រើនជាងគេនៅក្នុងពិភពអារ៉ាប់ និងជាប្រធានក្រុមហ៊ុន Majid Al Futtaim Group ដែលផ្តោមលើការវិនិយោគវិស័យអចលនទ្រព្យ និងអគារជួល ដែលមានគម្រោងជាច្រើនរួមមាននៅតំបន់អាស៊ី និងអាហ្វ្រិក។
កាលពីខែមីនា ឆ្នាំ ២០១៩ កន្លងមកនេះ មហាសេដ្ឋីអចលនទ្រព្យរូបនេះ ត្រូវបានទស្សនាវដ្តីសារព័រមាន Forbes របស់សហរដ្ឋអាមេរិកបានចុះផ្សាយថា លោកមានលុយប្រមាណ ៥.២ពាន់លានដុល្លារសហរដ្ឋអាមេរិក និងជាអ្នកដែលមានលុយច្រើនជាងគេលំដាប់ទី២នៅក្នុងប្រទេសមជ្ឈិមបូព៌ា។
លោក Majid Al Futtaim បានបង្កើតក្រុមហ៊ុនលក់រាយ និង Majid Al Futtaim Holding ដែលត្រូវបានគេស្គាល់ជាទូទៅថា ក្រុមហ៊ុន MAF នៅឆ្នាំ១៩៩២ ។ ក្រុមហ៊ុន MAF ធ្វើប្រតិបត្តិការលើសណ្ឋាគារចំនួន១២ និងផ្សារទំនើបចំនួន២២កន្លែង ដែលរួមមាន Mall of the Emirates នៅទីក្រុងឌូបៃនិង Mall of Egypt ក្នុងទីក្រុង Cairo។
ក្រុមហ៊ុននេះ ក៏មានអាជ្ញាប័ណ្ណវិនិយោគផ្តាច់មុខ ក្នុងការដំណើរការផ្សារទំនើបជាមួយក្រុមហ៊ុនបារាំងCarrefour នៅទូទាំងមជ្ឈឹមបូព៌ា អាហ្វ្រិកខាងជើង និងអាស៊ីកណ្តាលផងដែរ។
ក្រុមហ៊ុន MAF រកចំណូលប្រមាណ ៨,៨ ពាន់លានដុល្លារ និងប្រាក់ចំណេញ ៦00លានដុល្លារកាលពីឆ្នាំ ២០១៧៕
