ដោយ វុត្ថា
ឥណ្ឌូនេស៊ី៖ ប្រទេសឥណ្ឌូនេស៊ីបានប្រកាសឲ្យដឹងថា ខ្លួននឹងបញ្ចប់ការសាងសាង់នូវពហុកីឡដ្ឋានអន្តរជាតិ ដែលមានតម្លៃ៩១លានដុល្លារនៅចុងឆ្នាំ ២០១៩ នេះ ដើម្បីដាក់ឲ្យប្រើប្រាស់ និងត្រៀមប្រកួតកីឡាថា្នក់ជាតិនៅក្នុងឆ្នាំ២០២០ខាងមុខនេះ។
យោងតាមសារព័ត៌មាននៅក្នុងស្រុកចុះផ្សាយនៅទី១៩ ខែមិថុនា ឆ្នាំ ២០១៩ នេះបានឲ្យដឹងថា ការសាងសង់ពហុកីឡដ្ឋានដែលមានឈ្មោះ Papua នេះ ស្ទើរតែជិតរួចរាល់ ១០០% ហើយរហូតមកដល់ពេលនេះនឹងបញ្ចប់នៅចុងឆ្នាំនេះ ដើម្បីត្រៀមរៀបចំការប្រកួតកីឡាជាតិនៅឆ្នាំ២០២០ខាងមុខនេះ។
សារព័ត៌មានដដែលបន្តថា នេះជាកីឡដ្ឋានដ៏សំខាន់ និងដ៏ធំមួយសម្រាប់ប្រទេសឥណ្ឌូនេស៊ី ដែលមានសមត្ថភាពផ្ទុកកៅអីបានចំនួនជិត៤០,០០០ ដែលជាប្រភេទកៅអីស្តង់ដារអន្តរជាតិ។
លោក Joko Widodo ប្រធានាធិបតីប្រទេសឥណ្ឌូនេស៊ី បានចុះត្រួតពិនិត្យការដ្ឋានសាងសង់កាលពីពេលថ្មីៗនេះ បានថ្លែងប្រាប់សារព័ត៌មានក្នុងស្រុកឲ្យដឹងថា ពហុកីឡដ្ឋាជាតិនេះ នឹងត្រូវរៀបចំការប្រកួតកីឡាជាតិឆ្នាំ២០២០ខាងមុខនេះ ហើយការសាងសង់នឹងត្រូវបញ្ចប់នៅចុងឆ្នាំនេះ។
បើតាមលោក Widodo បានឱ្យដឹងថា ការចំណាយលើការសាងសង់នូវពហុកីឡាដ្ឋានជាតិទទួលបានថវិកាពីមូនិធិតំបន់ (Regional Fund) ខណៈការសាងសង់ហេដ្ឋារចនាសម្ព័ន្ធនានាទទួលបានពីថវិកាថ្នាក់ជាតិ (State Budgets) ។
ពហុកីឡដ្ឋានជាតិ Papua Bangkit Stadium ដែលជិតនឹងសាងសង់បញ្ចប់នេះ ត្រូវបានចំណាយថវិកាសរុបចំនួន១.៣ Rp (លុយឥណ្ឌូនេស៊ី) ស្មើនឹង ៩១លានដុល្លាសហរដ្ឋអាមេរិក ហើយវានឹងក្លាយជាពហុកីឡដ្ឋានដ៏ធំបំផុត និងខ្នាតអន្តរជាតិរបស់ប្រទេសឥណ្ឌូនេស៊ី។
ពហុកីឡដ្ឋាននេះ សាងសង់ឡើងស្របស្តង់ដារ FIFA ដែលមានទីលានទាត់បាត់ និងទីលានកីឡផ្សេងទៀត រួមជាមួយនឹងកន្លែងហ្វឹកហាត់កីឡាជាច្រើនផងដែរ៕
