ដោយ រ៉ាណេត
ភ្នំពេញ៖ នៅរាជធានីភ្នំពេញតម្លៃដីបានកើនឡើងជាប្រចាំ ដោយតំបន់ដែលមានអចលនទ្រព្យថ្លៃជាងគេស្ថិតនៅក្នងខ័ណ្ឌចំការមន និងខ័ណ្ឌដូនពេញ ដែលអចលនទ្រព្យនៅតាមតំបន់មួយចំនួនក្នុងខ័ណ្ឌទាំងពីរ មានតម្លៃរហូតដល់ ១០០០០ដុល្លារក្នុងមួយម៉ែត្រការ៉េ។
ដោយឡែកថ្ងៃនេះ យើងទៅមើលតម្លាំដីធ្លីនៅតាមបណ្តោយតីរវិថីព្រះស៊ីសុវត្ថិ (ផ្លូវមាត់ទន្លេ) វិញមានតម្លៃថ្លៃកម្រិតណា។
អគ្គនាយកក្រុមហ៊ុន Premium Group លោក ម៉ាន់ ច័ន្ទឌី បានមានប្រសាសន៍ថាប្រាប់តាមទូរស័ព្ទកាលពីព្រឹកថ្ងៃទី២០ ខែមិថុនា នេះថា តំបន់ខាងលើនេះបានក្លាយជាទីតាំងដ៏ល្អដាច់គេក្នុងនាមជាទីកន្លែងសម្រាប់ការលំហែរកាយ ដើរកម្សាន្ត ដែលបណ្តាជនបរទេសចូលចិត្តបំផុត (Prime Location)។
លោកបន្តថា ដោយសារតែតំបន់ទាំងនេះមានភាពទាក់ទាញខ្លាំង និងអំណោយផលដល់ការរស់នៅ បច្ចុប្បន្នតម្លៃអចលនទ្រព្យ ក៏ដូចជាវិស័យដីធ្លីផងដែរ គឺមានកម្រិតខ្ពស់ ដែលទាបបំផុតត្រឹម៦០០០ដុល្លារក្នុងមួយម៉ែត្រការ៉េ ហើយមានទីតាំងខ្លះ អាចមានតម្លៃរហូតដល់ប្រមាណ៧០០០-៨០០០ ក្នុងមួយម៉ែត្រការ៉េ។
លោកបានបន្តទៀតថា “នៅតំបន់នេះ ក៏ដូចជាតំបន់ដែលស្ថិតនៅជុំវិញគឺមានលក្ខណៈល្អប្រសើរ ដែលពោរពេញទៅសក្ដានុពល អំណោយផលដល់ការប្រកបមុខជំនួញ និងអាជីវកម្មគ្រប់ប្រភេទ ជាពិសេសផ្នែកការផ្គត់ផ្គង់ចំណីអាហារ ភេសជ្ជៈ ពេលរាត្រីតែម្ដង”។ លោកបានបន្តទៀតថា “ក្រៅពីប្រភេទអាជីវកម្មទាំងនេះ ក៏មានការផ្គត់ផ្គង់ទៅលើវិស័យស្នាក់នៅក្នុងរយៈពេលខ្លីផងដែរ ដែលភាគច្រើនជនបរទេសចម្រុះជាតិសាសន៍ចូលចិត្ត និងនិយមនៅតំបន់ទាំងនេះជាងគេ”។
លោកម៉ាន់ ច័ន្ទឌីបានបញ្ជាក់ទៀតថា ដោយសារតែវាជាទីតាំងដ៏ល្អ បច្ចុប្បន្នក្រៅពីមានអ្នកវិនិយោគក្នុងស្រុក កំពុងតែធ្វើការវិនិយោគក្នុងរូបភាពកម្រិតតូច និងមធ្យមនោះ ក៏មានក្រុមហ៊ុនលំដាប់អន្តរជាតិដ៏ល្បីឈ្មោះ Yuetai Group កំពុងតែរៀបចំដំណើរការសាងសង់សំណង់ មជ្ឈមណ្ឌលពាណិជ្ជកម្មក្រោមគម្រោង Phnom Penh Harbour ដែលមានចំនួនអគារធំៗរហូតដល់ប្រមាណ ២២អគារ។
នាយកក្រុមហ៊ុន Easy Property Investment Co,.Ltd លោក ម៉ម សិរីបញ្ញា បានមានប្រសាសន៍ឲ្យដឹងនៅថ្ងៃដដែលថា នៅតំបន់នេះពិតជាមានភាពល្អប្រសើរ និងមានសក្ដានុពលខ្លាំង ប៉ុន្តែបើមានការរៀបចំឱ្យមានសណ្តាប់ និងស្រស់ស្អាតជាងនេះ រឹតតែអាចទាក់ទាញកាន់តែខ្លាំង។ នៅតាមបណ្តោយផ្លូវនេះ វាមានភាពអំណោយផលទាំងការរស់នៅ ទាំងវិស័យទេសចរណ៍ ហើយក៏អាស្រ័យផលជាច្រើនដល់ការធ្វើអាជីវកម្ម។
លោកបានបន្តទៀតថា បច្ចុប្បន្ននេះ ក្រៅពីការប្រកបអាជីវកម្មនៅតាមផ្ទះដែលបង្កើតជារូបភាពភោជនីយដ្ឋាន ឬជាកន្លែងស្នាក់នៅ ក៏មានគម្រោងធំៗមួយចំនួនកំពុងតែអភិវឌ្ឍផងដែរ ដូចជា គម្រោងអាផាតមិន គម្រោងខុនដូ និងមជ្ឈមណ្ឌលពាណិជ្ជកម្មផងដែរ ខណៈដែលផ្ទះនិងបណ្តាសំណង់អាគារ ដែលបន្សល់ទុកកាលពីសម័យបារាំងត្រូវបានអ្នកអភិវឌ្ឍន៍ប្រែក្លាយទៅជាទីតាំង សម្រាប់ជួលស្នាក់នៅក្នុងរយៈពេលខ្លីជាបណ្តើរៗរួចទៅហើយនោះ៕
