ដោយៈ រ៉ាណេត
ភ្នំពេញៈ នៅពេលនិយាយពីអ្នកមានប្រាក់ ពួកគេតែងតែគិតពីការវិនិយោគ ដើម្បីទទួលបានផលចំណេញ និងភាពជោគជ័យសម្រាប់រយៈពេលវែងរបស់ពួកគេ ហេតុនេះការវិនិយោគលើវិស័យអាផាតម៉ិន និងសណ្ឋាគារមួយណាមានផលចំណេញជាង? ជាអ្វីដែលជាសំណួរចាក់ដោតមួយ។
អគ្គនាយកក្រុមហ៊ុន Khmer Foundation Appraisal លោកឧកញ៉ានួន រិទ្ឋី ដែលជាអ្នកមានជំនាញ និងបទពិសោធន៍លើវិស័យអចលនទ្រព្យនៅកម្ពុជា និងមានក្រុមហ៊ុនដៃគូសហការជាច្រើននៅក្នុងវិស័យមួយនេះ បានមានប្រសាសន៍ឱ្យដឹងកាលពីពេលថ្មីៗនេះថា ការវិនិយោគលើអាផាតម៉ិន និងសណ្ឋាគារ ជាការវិនិយោគសម្រាប់រយៈពេលវែងដូចគ្នា និងមានភាពវិជ្ជមានខុសៗគ្នា អាស្រ័យលើអ្នកវិនិយោគនិមួយៗជ្រើសរើស ប៉ុន្តែសម្រាប់ទស្សន និងការយល់ឃើញរបស់លោកផ្ទាល់ គឺការវិនិយោគលើអាផាតម៉ិនមានភាពងាយស្រួលជាង។
អាផាតម៉ិន
លោកឧកញ៉ា នួន រិទ្ឋី បានបន្តថា ការវិនិយោគលើអាផាតម៉ិន ជាការវិនិយោគគិតពីរយៈពេលវែង និងសម្រាប់អ្នកចង់មានសេរីភាពហិរញ្ញវត្ថុ ឬចូលនិវត្តន៍ពីការងារវ័យក្មេង ព្រោះអាផាតម៉ិនទទួលបានចំណូលទៀតទាត់ និងស្ងាត់ស្ងៀម ជាងវិនិយោគលើសណ្ឋាគារ។ ការវិនិយោគលើអាផាតម៉ិន មិនសូវត្រូវការសេវាកម្មច្រើនពេកនោះទេ គឺប្រើប្រាស់បុគ្គលិកតិច និងងាយស្រួលគ្រប់គ្រង។
ការវិនិយោគលើអាផាតម៉ិនជោគជ័យ ទាមទារឱ្យមានការចងបណ្តាញជាមួយអ្នកជំនួញ ការផ្សព្វផ្សាយ និងសេវាកម្មល្អ ពិសេសទីតាំងមានភាពអំណោយផលផងដែរ។
សណ្ឋាគារ
ការវិនិយោគលើសណ្ឋាគារ ជាការវិនិយោគរយៈពេលវែងដូចគ្នា ទទួលបានចំណូលច្រើនផងដែរ ប៉ុន្តែសណ្ឋាគារត្រូវមានសេវាកម្មច្រើនជាងអាផាតម៉ិន ដូចជា ត្រូវមានបន្ទប់ប្រជុំ មានភោជនីយដ្ឋាន កន្លែងហាត់ប្រាណ និងមានការប្រើប្រាស់បុគ្គលិកច្រើនជាងអាផាតម៉ិន ពិសេសត្រូវផ្តោតលើការរក្សានូវផាសុកភាព ភាពកក់ក្តៅ និងសុវត្ថិភាពដល់ភ្ញៀវជាចម្បង។ ផ្ទុយទៅវិញអាផាតម៉ិន មិនចាំបាច់មានភោជនីយដ្ឋាន សាលប្រជុំ ឬប្រើប្រាស់បុគ្គលិកច្រើននោះទេ។ លោកឧកញ៉ា នួន រិទ្ធី បញ្ជាក់ឲ្យដឹង។
លោកឧកញ៉ាបានបន្តថា “ទោះជាយ៉ាងណាការវិនិយោគលើសណ្ឋាគារ ទទួលបានប្រាក់ចំណូលច្រើនប្រចាំថ្ងៃ ប្រសិនជាសណ្ឋាគារនោះដំណើរការដោយជោគជ័យ”។ លោកបន្តថា “ហេតុនេះការវិនិយោគលើអាផាតម៉ិន និងសណ្ឋាគារល្អម្យ៉ាងម្នាក់ ប៉ុន្តែការវិនិយោគលើសណ្ឋាគារ ទាមទារឱ្យម្ចាស់មានភាពមមាញឹកច្រើន”៕
