ដោយ វុត្ថា
ភ្នំពេញៈ ព្រលានយន្តហោះអន្តរជាតិក្រុងប៉េកាំង Daxing ដែលជាព្រលានយន្តហោះខ្នាតយក្សរបស់ចិន បានបញ្ចប់សាងសង់កាលពីថ្ងៃទី៣០ ខែមិថុនា ម្សិលមិញនេះដូចការគ្រោងទុក និងគ្រោងបើកសម្ពោធឲ្យដំណើរការនូវព្រលានយន្តហោះថ្មីនេះ នៅថ្ងៃទី ៣០ ខែកញ្ញាឆ្នាំ ២០១៩ ខាងមុខនេះ។
យោងតាមការចុះផ្សាយរបស់សារព័ត៌រដ្ឋចិន Xinhou បានឱ្យដឹងនាថ្ងៃទី១ កក្កដានេះថា ការដាក់ឱ្យដំណើរការខាងមុខនេះ ដើម្បីឆ្លើយតបទៅនឹងតម្រូវការសេវាហោះហើររបស់ប្រទេស និងជួយសម្រួលដល់ការហោះហើរនៅអាកាសយានដ្ឋានអន្តរជាតិ ប៉េកាំង។ ព្រលានយន្តហោះខ្នាតយក្សថ្មី នៅក្នុងទីក្រុងប៉េកាំងនេះ ត្រូវបានគេចាត់ទុកថា នឹងក្លាយជាព្រលានយន្តហោះមួយ ដែលមានភាពមមាញឹកជាងគេក្នុងពិភពលោកបន្ទាប់ពីបើកដំណើរនៅឆ្នាំនេះ។
ព្រលានយន្តហោះថ្មីនេះ កាលពីកន្លងទៅបានអនុញ្ញាឱ្យក្រុមហ៊ុនអាកាសចរណ៍ចិនចំនួន៤ បានផ្តើមហោះហើរសាកល្បង រួមមាន ក្រុមហ៊ុន China Southern Airlines ក្រុមហ៊ុន China Eastern Airline ក្រុមងហ៊ុន Air China និងក្រុមហ៊ុន Xiamen Airline ដែលមានប្រភេទយន្តហោះ A380, A350-900 ,B747-8, និង B787-8 ដើម្បីបញ្ជាក់ពីភាពត្រឹមត្រូវ និងគ្រប់លក្ខណៈ ព្រមទាំងស្តង់ដារអន្តរជាតិមុននឹងដាក់ឲ្យដំណើរជាផ្លូវការ។
អាកាសយានដ្ឋានថ្មីនេះ ស្ថិតនៅចំណុចប្រសព្វនៃស្រុក Daxing និងទីក្រុង Langfang នៃទីក្រុងប៉េកាំងក្នុងខេត្ត Hebei ហើយត្រូវបានរំពឹងថា នឹងទទួលអ្នកដំណើរ ៤៥លាននាក់ជារៀងរាល់ឆ្នាំនៅឆ្នាំ២០២១ និង៧២លាននាក់នៅត្រឹមឆ្នាំ២០២៥។
ព្រលានយន្តហោះនេះ ត្រូវបានចំណាយពេលសាងសង់រយៈពេល៦ឆ្នាំ មានទំហំរហូតដល់១លានម៉ែត្រការ៉េ មានផ្លូវរត់សម្រាប់យន្តហោះចំនួន៧ និងអាចចុះចតយន្តហោះបានចំនួនប្រមាណ ៦២០,០០០គ្រឿងក្នុងមួយឆ្នាំ។
បច្ចុប្បន្ននេះ វិស័យអាកាសចរណ៍របស់មហាយក្សចិន កំពុងមានការរីកចម្រើនយ៉ាងលឿនបំផុតនៅលើពិភពលោកដោយសារ តែមានការកើនឡើងនៃប្រជាជនដ៏ច្រើន និងការផ្គត់ផ្គង់តម្រូវការជាមូលដ្ឋានលើកាធ្វើដំណើរ៕
