ដោយ គង់ សូរិយា
ភ្នំពេញ៖ ជិតពីរទសវត្សរ៍ចុងក្រោយនេះ វិស័យអចលនទ្រព្យមានការរីកចំរើនយ៉ាងខ្លាំងនៅកម្ពុជា ជាក់ស្តែងវត្តមានអាគារខ្ពស់ៗជាច្រើន បានរីកដូចផ្សិតនៅរាជធានីភ្នំពេញ ពិសេសតំលៃដីធ្លីក៏បានកើនឡើងយ៉ាងគំហុកផងដែរ ដែលតំបន់ខ្លះកើនឡើងទ្វេរដង និងតំបន់ខ្លះទៀតកើនឡើងមួយគុណនឹងបីឬបួនដងក៏មាន។
លោកបណ្ឌិតគីម ហ៊ាង ប្រធាន Keller Williams Cambodia និងជាអគ្គនាយក ក្រុមហ៊ុន ខ្មែរ រៀល អុីស្ទេត បានមានប្រសាសន៍ឲ្យដឹងថា មុនសម្រេច ចិត្តវិនិយោគលើដីធ្លី អ្នកវិនិយោគគួរសម្លឹងមើលកត្តាមួយចំនួនសិន ដូចជា៖
-->
១) ទិញដីក្នុងគោលបំណងអ្វី?
តើអ្នកមានបំណងទិញដី ដើម្បីទុកលក់យកប្រាក់ចំណេញ ឬទុកសាងសង់សំណង់នានា? ប្រសិនជាលោក អ្នកចង់ទិញដីដើម្បីសាងសង់ខុនដូ សាងសង់អាគារការិយាល័យ ឬសម្រាប់សាងសង់សណ្ឋាគារ សូមទិញដីនៅក្នុងខ័ណ្ឌចំការមន។
ប្រសិនជាចង់ទិញដីទុកលក់យកប្រាក់ចំណេញ រយៈពេលបីឆ្នាំខាងមុខ គួរទិញនៅតំបន់ទួលគោក និងតំបន់ភ្នំពេញថ្មី ប៉ុន្តែបើទិញដីដែលមានចម្ងាយពី៧ទៅ១០គីឡូម៉ែត្រពីទីក្រុង ពួកគេត្រូវរង់ចាំដល់៧ឆ្នាំទើបចំណេញបាន។ បើទិញចម្ងាយប្រមាណ ៣០គីឡូម៉ែត្រពីទីក្រុង គឺពួកគេអាចទទួលបានផលចំណេញនៅរយៈពេល១០ឆ្នាំក្រោយ។
២) ការទិញដីធ្លីជាការវិនិយោគត្រឹមត្រូវ និងមិនត្រឹមត្រូវ
លោកគីម ហ៊ាងបានថ្លែងថា ការវិនិយោគដីធ្លី ជាការវិនិយោគដ៏ត្រឹមត្រូវ ប្រសិនជាលោក អ្នកសល់លុយដោយខ្លួនឯង មិនដឹងយកទៅវិនិយោគអ្វី ប៉ុន្តែប្រសិនជាយកលុយបង្វិល ឬយកលុយពីធនាគារដើម្បីទិញដីវិនិយោគ អ្នកជំនាញរូបនេះបាននិយាយថា “កុំអី” ព្រោះអ្នកខ្លះគិតថា ការប្រាក់ធនាគារ១ឆ្នាំ៨ភាគរយ ហើយដីឡើងថ្លៃ២០ភាគរយក្នុងមួយឆ្នាំ គឺអាចខ្ចីឥណទានពីធនាគារយកមកទិញបាន ប៉ុន្តែវាជាការយល់ច្រឡំ ព្រោះដីមិនងាយលក់ភ្លាមៗនោះទេ និងអាចមានភាពជាប់គាំងរយៈពេលពីរឬបីឆ្នាំ ពោលគឺត្រូវការពេលវេលា។
៣) តំបន់ណាចំណេញលឿនជាងគេ
ការទិញដីដែលទទួលបានផលចំណេញលឿនជាងគេ គឺទិញនៅក្នុងខ័ណ្ឌសែនសុខ ដង្កោ និងខ័ណ្ឌពោធិសែនជ័យ ពិសេសតំបន់ទួលគោក និងភ្នំពេញថ្មី ដោយសារតំបន់នេះដីនឹងឡើងថ្លៃទ្វេរដងនៅរយៈពេលពីរ ឬបីឆ្នាំខាងមុខនេះ។
៤) គួរទិញនៅតាមបណ្តាខេត្តឬទេ?
ក្រៅពីខេត្តសៀមរាប និងខេត្តព្រះសីហនុ អ្នកជំនាញរូបនេះបានប្រាក់ថា “កុំទិញអី” ព្រោះក្រៅពីខេត្តទាំងពីរនេះ មិនមានខេត្តណាមានសក្តានុពលខ្ពស់លើផ្នែកនេះទេ ហើយក្នុងចំណោមខេត្តទាំងពីរខាងលើ គឺខេត្តព្រះសីហនុមានសក្តានុពលខ្ពស់ជាងខេត្តសៀមរាប។ ប្រសិនជាទិញដីនៅខេត្តទុកលក់យកប្រាក់ចំណេញ គឺត្រូវរង់ចាំរយៈពេល១០ឆ្នាំទៀត។
៥) ការវិនិយោគដីធ្លីមិនសុទ្ឋជាជម្រើសល្អ
ការវិនិយោគលើវិស័យដីធ្លីមិនសុទ្ឋតែជាជម្រើសល្អនោះទេ ព្រោះក្នុងវិស័យសំណង់ និងអចលនទ្រព្យមានវិស័យផ្សេងៗទៀត ដែលអាចប្រមូលប្រាក់បានលឿនជាងវិស័យដីធ្លី។
លោកគីម ហ៊ាងបានថ្លែងថា ប្រសិនជាអ្នកមានអាយុ៥០ឆ្នាំ ជាពេលដល់អាយុជិតចូលនិវត្តន៍ មិនគួរវិនិយោគលើវិស័យដីធ្លីនោះទេ គឺគួរទិញខុនដូ ទិញដីសាងសង់ផ្ទះជួល ឬទិញផ្ទះល្វែងសម្រាប់ជួល ដែលអាចបានប្រាក់ភ្លាមៗត្រលប់មកវិញ។ ផ្ទុយទៅវិញប្រសិនជាលោក អ្នកមានអាយុចន្លោះពី៣០ទៅ៤០ឆ្នាំ គួរវិនិយោគលើវិស័យដីធ្លី ព្រោះទិញដីមានផលចំណេញខ្ពស់ និងជាវ័យដែលលោក អ្នកកំពុងរកលុយបានច្រើន។
៦) តើមានលុយអ្នកប៉ុន្មាន?
តើលោក អ្នកមានប្រាក់ប៉ុន្មាន មានស្ថានភាពជីវិតយ៉ាងដូចម្តេច? ព្រោះការសម្រេចចិត្តក្នុងលក្ខខ័ណ្ឌនេះមានសារៈសំខាន់ មុនធ្វើការវិនិយោគក្នុងវិស័យនេះ។
លោកគីម ហ៊ាងបានថ្លែងថា ការវិនិយោគលើវិស័យអ្វីមួយ ក៏គួរមានលក្ខខ័ណ្ឌជាក់លាក់ទាក់ទងនឹង ចំនួនទុនវិនិយោគ លក្ខខ័ណ្ឌការងារ លក្ខខ័ណ្ឌជីវិត ជាដើម ដោយលោកបានថ្លែងថា ប្រសិនជាចង់ទិញដីសំរាប់សាងសង់លំនៅដ្ឋាន ឬសាងសង់បុរីលក់នៅរយៈពេល៥ឆ្នាំខាងមុខ សូមទិញលើទីតាំងដែលមានដីចំងាយ ១៥ ទៅ ២០គីឡូម៉ែត្រពីទីក្រុង ទាល់តែ៥ ទៅ ៧ឆ្នាំទើបអាចសង់សំណង់អាគារពាណិជ្ជកម្មផ្សេងៗបាន៕
