ដោយស៊ីវ ម៉េង
ភ្នំពេញៈ គំរោងមជ្ឈមណ្ឌលពាណិជ្ជកម្មលំដាប់អន្តរជាតិ Glory Internationalដែលវានឹងផ្លាស់ប្តូរមុខមាត់ទីក្រុងភ្នំពេញ បានស្ថិតក្នុងស្ថានភាពមិនច្បាស់់លាស់ ខណៈអ្នកគ្រប់គ្រងគំរោងនេះនៅកម្ពុជាបានអះអាងកាលពីឆ្នាំមុនថា ក្រុមហ៊ុនកំពុងរៀបចំឌីសាញអាគារនេះឡើងវិញ។
គំរោងនេះដំបូងឡើយគ្រោងសាងសង់តាំងពីដើមឆ្នាំ២០១៧ ប៉ុន្តែរហូតមកទល់នឹងពេលនេះ ទីតាំងអាគារនេះដែលស្ថិតនៅចំពីក្រោយអាគារ The Bridge មិនមានសកម្មភាពសាងសង់ណាមួយឡើយ។
បុគ្គលិកក្រុមហ៊ុនយុង ឆ័ងដែលជាក្រុមហ៊ុនគ្រោងវិនិយោគសាងសង់មជ្ឈមណ្ឌលពាណិជ្ជកម្ម The Glory International ធ្លាប់បាននិយាយក្នុងលក្ខខ័ណ្ឌមិនបញ្ចេញឈ្មោះថា ការឌីសាញប្លង់អាគារនេះបានបញ្ចប់ហើយ នឹងផ្តើមសាងសង់នៅដើមឆ្នាំ២០១៧ ហើយគ្រោងនឹងបញ្ចប់នៅឆ្នាំ២០២១ខាងមុខ ប៉ុន្តែសាលតាំងបង្ហាញគំរោងនេះនឹងបើកដំណើរការនៅខែវិច្ឆិកាឆ្នាំនេះ។ លោកបន្តថា អាគារនេះនឹងប្រើប្រាស់ចម្រុះ រួមមានផ្សារទំនើប ខុនដូ និងសណ្ឋាគារ ព្រមទាំងមានអាងហែលទឹក និងភោជនីយដ្ឋានវិលលើអាកាសនាជាន់ទី៧៨ផងដែរ។
លោកបន្តថា ផែនការប្រើប្រាស់អាគារនេះលំអិត ក៏បានបញ្ចប់ផងដែរ ប៉ុន្តែលោកបដិសេធមិននិយាយលំអិតនោះទេ។ គំរោងនេះបានទទួលការអនុម័តយល់ព្រមពីក្រសួងរៀបចំដែនដី នគរូបនីយកម្ម និងសំណង់រួចហើយ។
លោកសេង ឡូតអ្នកនាំពាក្យក្រសួងរៀបចំដែនដី នគរូបនីយកម្មនិងសំណង់បានថ្លែងឲ្យដឹងថា ក្រសួងបានយល់ព្រមផ្តល់អាជ្ញាប័ណ្ណ ដល់ក្រុមហ៊ុនយាន ជ័ង រៀលអេស្ទេត ដើម្បីសាងសង់អាគារកំពស់៧៨ជាន់នេះរួចហើយ។
លោកបណ្ឌិតវ៉ាន់ វ៉ាតអ្នកឯកទេសផ្នែកនគរូបនីយកម្មបានថ្លែងថា កម្ពុជាមានបទបញ្ញត្តិស្តីពីការកំណត់កំពស់អាគាររួចហើយ ដូច្នេះប្រសិនជាយើងអនុវត្តន៍ច្បាប់បញ្ញត្តិដែលមានបានល្អ វាមិនត្រឹមតែជួយការពារបាននូវបេតិកភ័ណ្ឌក្នុងទីក្រុងនោះទេ តែវានឹងរក្សាបាននូវទេសភាព សោភ័ណភាព និងកាត់បន្ថយបាននូវផលប៉ះពាល់បរិស្ថានផងដែរ។លោកបន្តថា តាមធម្មតាការសាងសង់អាគារខ្ពស់បែបនេះ ក្រុមហ៊ុនបានសិក្សាពីបទដ្ឋានបច្ចេកទេសអស់ហើយ ចំណែកក្រសួងជំនាញគ្រាន់តែជាអ្នក ពិនិត្យលើបទដ្ឋានសំណង់ ដើម្បីធ្វើឲ្យប្រាកដថាក្រុមហ៊ុនគោរពបានតាមគោលការ ណ៍ស្នើសុំឬអត់ប៉ុណ្ណោះ។
លោកបន្តថា “ការមានអាគារខ្ពស់ៗបែបនេះ វាជាមោទនភាពជាតិ ព្រោះវាមិនត្រឹមតែជួយដល់សេដ្ឋកិច្ចនោះទេ តែវាក៏ផ្តល់ការងារនិងប្រាក់ចំណូលដល់ប្រជា ពលរដ្ឋផងដែរ”៕
