ដោយ ៖ រ៉ាណេត
ភ្នំពេញ៖ មិនមែនមានតែនៅក្រុងព្រះសីហនុនោះទេ ដែលអាជ្ញាធរចុះធ្វើការផ្អាកសកម្មភាពសាងសង់សំណង់អគារខ្ពស់ៗដែលខុសច្បាប់ និងខុសបច្ចេកទេសនោះ នៅក្នុងរាជធានីភ្នំពេញ ខណ្ឌឫស្សីកែវ ក៏មានអគារធំៗ និងខ្ពស់ៗចំនួន១៥ទីតាំង ក៏ត្រូវបានអជ្ញាធរធ្វើការផ្អាកសកម្មភាពសាងសង់ផងដែរ។
បន្ទាប់ពីមានការចុះត្រួតពិនិត្យទៅលើល័ក្ខខ័ណ្ឌនៃការសាងសង់ស្របច្បាប់ ព្រមគ្នាជាមួយនឹងគុណភាពសំណង់នានាក្រោមការបញ្ជាយ៉ាងម៉ឺងម៉ាត់របស់ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ លោក ជា សុផារ៉ា កាលពីម្សិលមិញនេះ នៅត្រឹមព្រឹកថ្ងៃទី៥ ខែកក្កដា ឆ្នាំ២០១៩ នេះ អជ្ញាធរបានចុះធ្វើការផ្អាកសកម្មភាពសាងសង់សំណង់ធំៗ និងខ្ពស់ ដែលមានកម្ពស់ចាប់ពី៥ជាន់ឡើងទៅ ចំនួន១៥ទីតាំង នៅក្នុងខណ្ឌឫស្សីកែវ រាជធានីភ្នំពេញ។
-->
លោក ស៊ូ សោគន្ធ អភិបាលរងខណ្ឌឫស្សីកែវ បានលើកឡើងថា ការផ្អាកការសាងសង់ជាបន្ទាន់ភ្លាមៗ ដោយសារមន្ត្រីជុំនាញចុះអនុវត្តត្រួតពិនិត្យជាក់ស្ដែងផ្ទាល់ បានរកឃើញ ថាការដ្ឋានសំណង់និមួយៗ សាងសង់ខុសបច្ចេកទេស ខ្លះទៀត ស្នើសុំច្បាប់សាងសង់ទៅសាលារាជធានីភ្នំពេញ ឬក្រសួងរៀបចំដែនដី តែមិនទាន់ទទួលបានច្បាប់ត្រឹមត្រូវនៅឡើយ។
លោក ស៊ូ សោគន្ធ បានបញ្ជាក់ថា ប្រសិនបើម្ចាស់សំណង់មិនស្ដាប់ការណែនាំ ហើយនៅតែបន្តសាងសង់ ត្រូវមានវិធានការតាមបែបបទរដ្ឋបាល និងអាចឈានដល់ការកសាងសំណុំរឿងបញ្ជូន ទៅសាលាដំបូងរាជធានីភ្នំពេញ ដើម្បីអនុវត្តតាមនីតិវិធី។
ការដ្ឋានសំណង់ធំៗ និងខ្ពស់ៗចាប់ពី ៥ជាន់ឡើងទៅចំនួន ១៥កន្លែង ក្នុងចំណោម ១៦ទីតាំង ដែលត្រូវបានអជ្ញាធរចុះផ្អាកសកម្មភាពសាងសង់ ស្ថិតនៅសង្កាត់ច្រាំងចំរេះទី១ សង្កាត់គីឡូម៉ែត្រលេខ៦ សង្កាត់ឫស្សីកែវ សង្កាត់ទួលសង្កែទី១ និងសង្កាត់ទួលសង្កែទី២ ខណ្ឌឫស្សីកែវ។
ចំណាត់ការ និងការរឹតបណ្តឹងទៅលើការត្រួតពិនិត្យទៅលើច្បាប់សាងសង់សំណង់អគារខ្ពស់ៗត្រូវបានយកចិត្តទុកដាក់បន្ទាប់កើតមានព្រឹត្តិការណ៍ និងសោកនាដកម្មរលំបាក់អគារកម្ពស់៧ជាន់នៅ សង្កាត់លេខ៤ ក្រុងព្រះសីហនុ ដែលបណ្តាលឱ្យមានមនុស្សស្លាប់ចំនួន២៨នាក់ និងរងរបួសចំនួន២៦នាក់ ៕
