ដោយ វុត្ថា
បាត់ដំបង៖ អភិបាលខេត្តបាត់ដំបង បានអំពាវនាវដល់មន្ត្រីមន្ទីរជំនាញ អាជ្ញាធរក្រុងស្រុកបន្ត យកចិត្តទុកដាក់ត្រួតពិនិត្យលើសំណង់ទាំង៣ប្រភេទ ជាពិសេសសំណង់ ដែល មានហានិភ័យ ( សំណង់ខ្ពស់ៗ ) ប្រសិនគ្មានប្រវត្តិច្បាស់លាស់ ការសាងសង់ពុំបានគោរពទៅតាមបទដ្ឋានបច្ចេកទេសត្រឹមត្រូវ ពុំមានគុណភាព ត្រូវបំពេញឯកសារបិទ មិនឱ្យបន្តការសាងសង់តទៅទៀត។
លោក ងួន រតនៈអភិបាលនៃគណៈអភិបាលខេត្តបាត់ដំបងនៅក្នុងកិច្ចប្រជុំគណៈបញ្ជាការឯកភាពរដ្ឋបាលខេត្ត កាលពីថ្ងៃទី ១២ ខែកក្កដាម្សិលមិញនេះ បានសំណូមពរដល់មន្ទីរពាណិជ្ជកម្មខេត្ត មន្ទីររ៉ែនិងថាមពលខេត្ត និងមន្ទីររៀបចំដែនដី នគរូបនីយកម្ម និងសំណង់ ពិនិត្យ លើបណ្តាស្ថានីយ៍ប្រេងឥន្ធនៈ ហ្គាសមួយ ចំនួនពុំទាន់បាន បំពេញឯកសារធ្វើអាជីវកម្ម សូមឱ្យបងប្អូនអាជីវករមកបំពេញបែបបទធ្វើអាជីវកម្ម ហើយត្រួតពិនិត្យទីតាំង លក្ខណៈ បច្ចេកទេស ឱ្យបានម៉ត់ចត់ ចៀសវាងកើតមានហានិភ័យផ្សេងៗ ដែលធ្វើឱ្យប៉ះពាល់ដល់អាយុជីវិត និងទ្រព្យសម្បតិ្ត របស់ប្រជាពលរដ្ឋ។
លោកអភិបាលខេត្តស្នើឱ្យមានវិធានការបែបនេះ បន្ទាប់ ពីមានគោលការណ៍សម្រេចលើវិធានការចាំបាច់របស់រាជរដ្ឋាភិបាលកម្ពុជា សំដៅទប់ស្កាត់ការដ្ឋានសំណង់ខុសច្បាប់ ដើម្បីធានាអាយុជីវិតមនុស្ស ទ្រព្យសម្បត្តិ សុវត្ថិភាពសំណង់នៅក្នុងដែនដីរដ្ឋបាលខេត្តគ្រប់គ្រង ឱ្យមានសណ្តាប់ធ្នាប់ត្រឹមត្រូវ ។
ជាមួយគ្នានេះ លោក អភិបាលខេត្ត បានថ្លែងអំណរគុណអំណរគុណផងដែរចំពោះការខិតខំប្រឹងប្រែងបំពេញភារកិច្ចរបស់រដ្ឋបាលក្រុងស្រុកនិងអង្គភាពជំនាញ ព្រមទាំងសមត្ថកិច្ចគ្រប់ថ្នាក់គ្រប់ផ្នែក រក្សាបានសភាពការណ៍ សន្តិសុខ សភាពការណ៍ ព្រំដែន និងទប់ស្កាត់បទល្មើសផ្សេងៗ និងកិច្ចប្រតិបត្តិការ បង្រ្កាប ដោយធានារក្សាបានសន្តិសុខ សុវត្ថិភាព សណ្តាប់ធ្នាប់សាធារណៈជូនបងប្អូនប្រជាពលរដ្ឋបានល្អប្រសើរ ។
លោក ជា សុផារ៉ា ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ កាលពីកន្លែងៅថ្មីៗនេះ បានបញ្ជាឱ្យអជ្ញាធរ និងមន្ត្រីពាក់ព័ន្ធទាំងអស់ត្រូវដាក់ពាក្យបណ្តឹងទៅតុលា ឬព្រះរាជ្ញាបន្ទាន់ ដើម្បីដោះស្រាយតាផ្លូវច្បាប់ បន្ទាប់ពីពិនិត្យឃើញការដ្ឋានសំណង់ណាមួយដែលសាងសងគ្មានច្បាប់អនុញ្ញាត ។
លោកឧបនាយករដ្ឋមន្ត្រីថា ”រាល់សំណង់ដែលគ្មានច្បាប់ ចាប់ពីពេលនេះទៅអាជ្ញាធរត្រូវដាក់ ពាក្យបណ្តឹងទៅព្រះរាជអាជ្ញាដើម្បីដោះស្រាយតាមច្បាប់។នៅចំពោះមុខនេះយើងនឹងបង្កើតគណៈកម្មការដើម្បីចុះត្រួតពិនិត្យ រាល់សំណង់ទាំងអស់”៕
