ដោយៈ រ៉ាណេត
ភ្នំពេញៈ សំណង់លំនៅដ្ឋានមួយចំនួននៅពេលបច្ចុប្បន្ន ត្រូវបានគេមើលឃើញថា មានការបំពានមកលើចំណីផ្លូវ ជាពិសេសម្ចាស់ផ្ទះល្វែងមួយចំនួនបានសង់រោងលើចិញ្ចើមផ្លូវ ដើម្បីទុកចតយានយន្តរបស់ខ្លួន ដែលផ្ទុយពីការអនុញ្ញាតរបស់បទដ្ឋានគតិយុត្តិនៃក្រសួងរៀបចំដែនដី នគរូបនីយកម្ម និងសំណង់។
ការសាងសង់បែបអាណាធិបតេយ្យ និងមានការឃុបខិតពីអាជ្ញាធរមូលដ្ឋាននេះ បាននឹងធ្វើឱ្យប៉ះពាល់ដល់សណ្ដាប់ធ្នាប់សង្គម និងក្លាយជាវិបត្តិដ៏ធ្ងន់ធ្ងរដល់ការលក់អចលនទ្រព្យនៅពេលអនាគត។
អនុប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA) លោកស្រីតាំង ហួរ បានមានប្រសាសន៍ឲ្យដឹងតាមទូរស័ព្ទនាព្រឹកថ្ងៃទី១៥ កក្កដានេះដោយបង្ហាញនូវក្ដីបារម្ភជាខ្លាំងពាក់ព័ន្ធទៅនឹងសកម្មភាព និងរូបភាពនៃសំណង់លំនៅដ្ឋានមួយចំនួន ដែលកំពុងតែបំពានចំណីផ្លូវ ហើយវាអាចនឹងក្លាយទៅជាវិបត្តិមួយនៅពេលលក់អចលនទ្រព្យទាំងនេះ។
លោកស្រីបន្តថា “មិនចំពោះអ្នកទិញដើម្បីស្នាក់នៅ ឬជាអ្នកទិញដើម្បីធ្វើការវិនិយោគបន្តនោះទេ មុនពេលទិញគឺគេតែងពិនិត្យ និងពិចារណានូវចំណុចអវិជ្ជមានរបស់សំណង់លំនៅដ្ឋានដែលបានសាងសង់រំលោភលើចំណីផ្លូវ”។លោកស្រីបន្តថា “ជាទូទៅលំនៅដ្ឋានដែលមានទីតាំងមិនអំណោយផល ឬរំលោភលើចំណីផ្លូវ អាចប្រឈមបញ្ហាជាច្រើន ដែលក្រៅពីអាចពាក់ព័ន្ធទៅនឹងច្បាប់ ប៉ះពាល់ដល់កក្តាសង្គម ហើយក៏ជះឥទ្ធិពលមិនល្អទៅដល់ការលក់ផងដែរ”។
លោកស្រីតាំង ហួរបានបញ្ជាក់ទៀតថា “មិនថាចំពោះលំនៅដ្ឋាននៅក្នុងរាជធានីភ្នំ ឬនៅតាមបណ្តាខេត្តក្រុងផ្សេងៗ ដែលកំពុងតែមានទីផ្សារអចលនទ្រព្យល្អខ្លាំងយ៉ាងណាក៏ដោយ ចំពោះប្រភេទលំនៅដ្ឋានដែលសាងសង់បំពានលើចំណីផ្លូវ គឺជាឧបសគ្គបំផុតសម្រាប់ការទិញ-លក់”។
លោកស្រីបន្តថា ការរក្សាទុក និងគ្រប់គ្រងចំណីផ្លូវ ត្រូវបានធ្វើឡើងក្នុងគោលបំណងធំៗដូចជា ទី១ ផាសុកភាព សុវត្ថិភាពសាធារណៈ និងសុវត្ថិភាពចរាចរណ៍ ទី២-ថែរក្សាផ្លូវសាធារណៈសម្រាប់អ្នកប្រើប្រាស់ទូទៅ ទី ៣ រៀបចំឱ្យមានបទដ្ឋានបច្ចេកទេសទូទៅក្នុងការសាងសង់ និងការប្រើប្រាស់ដីចំណីផ្លូវក្នុងទីក្រុង និងទីប្រជុំជន ទី៤ ការពារការរំលោភបំពានដីចំណីផ្លូវ ដើម្បីប្រើប្រាស់ជាលក្ខណៈឯកជន ទី៥ ការពារទ្រព្យសម្បត្តិរបស់ប្រជាពលរដ្ឋតាមបណ្តោយផ្លូវ ទី៦ លើកកម្ពស់សោភ័ណភាពទីក្រុង និងទីប្រជុំជន ៧-កាត់បន្ថយការស្ទះចរាចរណ៍ និងសម្រួលដល់អ្នកថ្មើរជើង ទី៨ គ្រប់គ្រងលំហូរចរាចរណ៍ក្នុងទីក្រុង និងទីប្រជុំជន និងទី៩ ចូលរួមប្រឡងប្រណាំងទីក្រុងស្អាត រមណីយដ្ឋានស្អាត សេវាល្អ។
កាលពីពេលកន្លងទៅ សម្តេច ក្រឡាហោម ស ខេងឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃធ្លាប់បានមានប្រសាសន៍ផងដែរថា តាមច្បាប់បទដ្ឋានគតិយុត្តិ ដែលចេញដោយក្រសួងរៀបចំដែនដី នគរូបនីយកម្ម និងសំណង់ បានបញ្ជាក់ និងកំណត់យ៉ាងច្បាស់ថា រាល់ការសាងសង់សំណង់លំនៅដ្ឋាននានា ដែលស្ថិតនៅជាប់ផ្លូវធំ ត្រូវទុកគម្លាតយ៉ាងតិច ២៥ម៉ែត្រពីអ័ក្ស ដោយឡែកនៅតាមផ្លូវក្នុងតំបន់ (ផ្លូវលំ) គឺត្រូវរក្សាទុកគម្លាត ១៥ម៉ែត្រពីចំណុចអ័ក្ស។
សម្តេចបន្តថា ប៉ុន្តែជាក់ស្ដែងការអនុវត្ត និងការគោរពនៅមានកម្រិតនៅឡើយ ដែលវានឹងបង្កឱ្យមានផលវិបាក ក្នុងការអភិវឌ្ឍហេដ្ឋារចនាសម្ព័ន្ធរបស់រដ្ឋាភិបាលទៅតាមប្លង់គោលនៅពេលអនាគត។ ក្នុងន័យនេះសម្ដេច ក៏បានទទូច និងបង្គាប់ដល់ស្ថាប័នជំនាញ ក៏ដូចជាអជ្ញាធរពាក់ព័ន្ធក្នុងមូលដ្ឋាន ត្រូវមានការយកចិត្តទិកដាក់ក្នុងការគ្រប់គ្រង ជាពិសេសសុំឱ្យមានការចូលរួមពីសំណាក់ប្រជាពលរដ្ឋផងដែរ៕
