ដោយ Donald Lee
ភ្នំពេញ៖ សេដ្ឋវិទូបានអះអាងថា រដ្ឋាភិបាលចិនកំពុងបញ្ចុះតម្លៃប្រាក់យ័ន ដើម្បីឆ្លើយតបនឹងពន្ធអាមេរិក ដែលនឹងដាក់ពន្ធលើទំនិញទាំងអស់ ដែលចេញមកពីចិនដីគោក។
ចិនប្រើប្រាស់រូបិយប័ណ្ណខ្លួនជាអាវុធក្នុងការធ្វើសង្គ្រាមពាណិជ្ជកម្មជាមួយអាមេរិក
អ្នកវិភាគហិរញ្ញវត្ថុព្យាករណ៍ថា ប្រាក់យ័ននឹងចុះថោក ធៀបនឹងប្រាក់ដុល្លារអាមេរិក ដោយតម្លៃប្រាក់យ័ននឹងកើនដល់៧យ័ន ទើបស្មើនឹង១ដុល្លារអាមេរិករហូតដល់ដំណាច់ឆ្នាំ។
ការធ្លាក់ចុះតម្លៃប្រាក់យ័នជួយដល់ក្រុមហ៊ុន ដែលនាំចេញពីប្រទេសចិន ដោយបន្ថយតម្លៃនៃការនាំចេញ និងផ្តល់ឱ្យក្រុមហ៊ុននូវអត្ថប្រយោជន៍ប្រកួតប្រជែង នឹងក្រុមហ៊ុនដែលនាំចេញទៅក្រៅប្រទេស។
ប្រាក់យ័នបានធ្លាក់ដល់កម្រិតទាបមួយ មិនធ្លាប់មានក្នុងរយៈពេល១០ឆ្នាំ នៅក្នុងអ្វីដែលមន្រ្តីរដ្ឋាភិបាលអាមេរិកជាច្រើន បានដាក់ឈ្មោះថាជា “ការរៀបចំរូបិយវត្ថុ”។
ប្រធានាធិបតីអាមេរិកលោក Donald Trump បានសរសេរនៅលើបណ្តាញសង្គមធ្វីតធឺថា “ចិនបានទម្លាក់តម្លៃរូបិយប័ណ្ណរបស់ពួកគេ នៅកម្រិតទាបមួយជាប្រវត្តិសាស្ត្រ”។លោកបានបន្ថែមថា “វាត្រូវបានគេហៅថា“ការកេងចំណេញរូបិយវត្ថុ”។
អ្នកវិភាគហិរញ្ញវត្ថុបានឯកភាពគ្នាថា រដ្ឋាភិបាលចិនរៀបចំអត្រារូបិយប័ណ្ណ ជាអាវុធយុទ្ធសាស្ត្រក្នុងសង្គ្រាមពាណិជ្ជកម្ម។
លោក Eric Fishwick សេដ្ឋវិទូជាន់ខ្ពស់របស់ក្រុមហ៊ុន CLSA បាននិយាយនៅក្នុងបទសម្ភាសន៍មួយនៅលើកញ្ចក់ទូរទស្សន៍អាមេរិកថា “ក្រឡេកមើលរបៀបដែលការជួញដូររូបិយប័ណ្ណ វាត្រូវបានបង្ហាញយ៉ាងច្បាស់ថា វាកំពុងត្រូវបានប្រើជាមធ្យោបាយមួយដើម្បីទូទាត់ផលប៉ះពាល់នៃពន្ធគយ”។
លោកបានបន្ថែមថា“ ប្រាក់យ័នត្រូវបានធ្វើឱ្យចុះខ្សោយ នៅពេលណាដែលអាមេរិកធ្វើឱ្យមានភាពតានតឹងកាន់តែខ្ពស់”៕
