ដោយ ហ្សូលី
ភ្នំពេញ៖ ក្រុមហ៊ុនអចលនទ្រព្យអន្តរជាតិ BlackStone ដែលមានមូលដ្ឋាននៅទីក្រុងញ៉ូវយ៉ក សហរដ្ឋអាមេរិក បានរៃអង្គាសថវិកាបានចំនួនជិត ២០០០លានដុល្លារ ក្នុងគោលបំណងជួយទ្រទ្រង់វិស័យអចលនទ្រព្យនៅក្នុងតំបន់អាស៊ី។
ក្រុមហ៊ុន BlackStone Group Inc. គឺជាក្រុមហ៊ុនដែលបានរៃអង្គាសថវិកាបានយ៉ាងច្រើនសន្ធឹកសន្ធាប់ចំនួន ១.៩ពាន់លានដុល្លារ ដើម្បីបន្តការលូតលាស់នៃវិស័យអចលនទ្រព្យនិងទាក់ទាញឱ្យមានការវិនិយោគបន្ថែមនៅលើវិស័យនេះឱ្យកាន់តែច្រើននៅក្នុងតំបន់។
យោងតាមឯកសាររបស់គណៈកម្មការសន្តិសុខសហរដ្ឋអាមេរិកបានបង្ហាញឱ្យដឹងថា នាយកគ្រប់គ្រងនៃក្រុមហ៊ុនធំជាងគេបំផុតលើពិភពលោក បានប្រមូលថវិការសម្រាប់មូលនិធិស្នូលលើវិស័យអចលនទ្រព្យ សម្រាប់ក្រុមហ៊ុនដៃគូនៅអាស៊ីជាមួយក្រុមហ៊ុនអចលនទ្រព្យអន្តរជាតិ Blackstone ដែលថវិកាចំនួន ១,៣ពាន់លានដុល្លារ ត្រូវបានបញ្ជូនទៅវិស័យអចលនទ្រព្យ ចំណែកថវិកានៅសល់ត្រូវផ្តល់ទៅកាន់មូលនិធិផ្សេងៗទៀត។
ថវិការៃអង្គាសនេះមានភាពខុសគ្នាពីមូលនិធិអចលនទ្រព្យដទៃ ព្រោះវាត្រូវបានប្រើប្រាស់ដើម្បីសិក្សាស្រាវជ្រាវបន្ថែមទៅលើយុទ្ធសាស្រ្តនៃការវិនិយោគលើវិស័យនេះ។ ម្យ៉ាង មូលនិធិមានច្រើនបែបដូចជា មូលនិធិដោះបំណុល មូលនិធិផ្លាស់ប្តូរពាណិជ្ជកម្មសម្រាប់ការវិនិយោគអចលនទ្រព្យ។ ជាទូទៅគេប្រើប្រាស់ទ្រព្យធននេះទៅលើទីផ្សារសំខាន់ៗដូចជានៅអាមេរិកខាងជើង អ៉ឺរ៉ុប និងតំបន់អាស៊ី ព្រោះថវិកានេះត្រូវវិនិយោគទៅលើតំបន់ណាដែលមានប្រវត្តិហានិភ័យទាប។
BlackStone គឺជាក្រុមហ៊ុនវិនិយោគលើវិស័យអចលនទ្រព្យធំជាងគេនៅលើពិភពលោក និងមានភាគហ៊ុនក្រោមការគ្រប់គ្រងប្រមាណ ១៦០ពាន់លានដុល្លារ។ ក្រុមហ៊ុនក៏ជាអ្នកវិនិយោគសំខាន់មួយនៅលើវិទីផ្សារអចលនទ្រព្យប្រទេសឥណ្ឌា និងចំណាយទុនប្រមាណជា ៦ពាន់លានដុល្លាររួចមកហើយក្នុងរយៈពេល ៨ឆ្នាំ៕
