ដោយៈសុខុម
សឹង្ហបុរី: សហរដ្ឋអាមេរិក និងសិង្ហបុរី បានចុះកិច្ចព្រមព្រៀងចាប់ដៃគូ សហការថ្មីមួយដើម្បីពង្រឹងកិច្ចសហការ កាន់តែប្រសើរលើសកម្មភាពអាកាសធាតុ អភិបាលកិច្ច បរិស្ថាន ការអភិវឌ្ឍប្រកបដោយនិរន្តរភាព និងការកាត់បន្ថយការបំភាយកាបូន។ នេះបើយោងតាមសារព័ត៌មាន CNA ចុះផ្សាយនៅថ្ងៃច័ន្ទ ទី២៣ សីហា នេះ។
ក្រសួងពាណិជ្ជកម្ម និងឧស្សាហកម្ម (MTI) នៃប្រទេសសិង្ហបុរី បានលើកឡើងនៅថ្ងៃច័ន្ទនេះថា កិច្ចព្រមព្រៀងចាប់ដៃគូសហការ ផ្នែកអាកាសធាតុអាមេរិក-សិង្ហបុរី (US-Singapore Climate Partnership) នេះនឹងបង្កើតឱកាសពាណិជ្ជកម្មសម្រាប់អាជីវកម្ម និងកម្មករនិយោជិតនានា ក្នុងវិស័យកំណើនបៃតង រួមមាន ទាំងនៅក្នុងអន្តរកាលថាមពល ហេដ្ឋារចនាសម្ព័ន្ធថាមពលស្អាត ការដឹកជញ្ជូនប្រកបដោយនិរន្តរភាព ហិរញ្ញវត្ថុប្រកបដោយនិរន្តរភាព និងទីផ្សារឥណទានកាបូនទាបផងដែរ។
ទោះជាយ៉ាងណា ក្រសួងនេះមិនបានបញ្ជាក់ថា តើកិច្ចព្រមព្រៀងចាប់ដៃគូសហការនេះ នឹងត្រូវចាប់ផ្ដើមអនុវត្តនៅពេលណាឱ្យប្រាកដនោះឡើយ។
ការប្រកាសនេះធ្វើឡើង ខណៈលោកស្រី Kamala Harris អនុប្រធានាធិបតីអាមេរិក កំពុងស្ថិតនៅក្នុងប្រទេសសិង្ហបុរី សម្រាប់ដំណើរទស្សនកិច្ចផ្លូវការរយៈពេល៣ថ្ងៃ។ លោកស្រីបានធ្វើដំណើរ ទៅដល់ប្រទេសដែនកោះដ៏តូចនេះ កាលពីព្រឹកថ្ងៃអាទិត្យ ទី២២ សីហា។
យោងតាមមន្រ្តីរដ្ឋបាលជាន់ខ្ពស់អាមេរិក មួយរូបបានទម្លាយឱ្យដឹងថា បញ្ហាបម្រែបម្រួលកាសធាតុ គឺជាវិស័យមួយដែលលោកស្រីអនុប្រធានាធិបតី Kamala Harris កំពុងព្យាយាមពង្រឹង កិច្ចសហប្រតិបត្តិការទ្វេភាគីឱ្យកាន់តែស៊ីជម្រៅ។ កិច្ចការអាទិភាពផ្សេងៗទៀតរបស់លោកស្រី ជាការឆ្លើយតបទៅនឹងការរីករាលដាលវីរុសកូវីដ-១៩ សន្តិសុខតាមប្រព័ន្ធអ៊ីនធឺណិត ការការពារសន្តិសុខជាតិ និងពាណិជ្ជកម្មឌីជីថល។
កាលពីខែកុម្ភៈ ប្រទេសសិង្ហបុរី បានបង្ហាញ “ផែនការបៃតងឆ្នាំ២០៣០” (Green Plan 2030) ដើម្បីជំរុញការអភិវឌ្ឍប្រកបដោយនិរន្តរភាព។ វិស័យមួយក្នុងចំណោមវិស័យដែលខ្លួនផ្តោតជាសំខាន់ គឺការជំរុញកំណើនសេដ្ឋកិច្ចបៃតង ដើម្បីបង្កើតការងារថ្មីៗ ប្រែក្លាយឧស្សាហកម្មនានា និងប្រើប្រាស់និរន្តរភាពជាគុណប្រយោជន៍ នៃការប្រកួតប្រជែង។
ក្រសួងពាណិជ្ជកម្ម និងឧស្សាហកម្ម (MTI) នៅថ្ងៃច័ន្ទ នេះបានចាត់ទុកបញ្ហាបម្រែបម្រួលអាកាសធាតុជា “បញ្ហាប្រឈមសកលដ៏ធំ” និងជាគោលនយោបាយអាទិភាពកំពូលសម្រាប់សិង្ហបុរី និងសហរដ្ឋអាមេរិក។ ក្រសួងនេះបានបន្ថែមទៀតថា និរន្តរភាព និងកំណើនសេដ្ឋកិច្ចអាចដើរទៅទន្ទឹមគ្នា៕
