ដោយ រ៉ាវី
ភ្នំពេញ៖ នៅពេលបច្ចុប្បន្ននេះ ចំពោះទីផ្សារអចលនទ្រព្យកំពុងតែផុលផុសយ៉ាងខ្លាំង ដែលធ្វើឱ្យមនុស្សមួយចំនួនមានការចាប់អារម្មណ៍ និងចាប់ប្រកបជាមុខជំនួញជាហូរហែរ ដែលក្នុងនោះរាប់ចាប់តាំងពីការចងក្រងបង្កើតជាក្រុមភ្នាក់ងារបម្រើសេវា ដើម្បីទទួលបានកម្រៃជើងសារ រហូតដល់ការបង្កើតជាក្រុមហ៊ុនលំដាប់ស្ដង់ដារ ក្នុងទ្រង់ទ្រាយធំ ដោយមានការតម្កល់ដើមទុនយ៉ាងសន្ធឹកសន្ធាប់។
យ៉ាងណាក៏ដោយនៅក្នុងចំណោមអ្នក ដែលចាប់ប្រកបលើមុខជំនួញផ្នែកអចលនទ្រព្យមួយនេះ មិនមែនសុទ្ធតែទទួលបានភាពជោគជ័យនោះទេ។
ពាក់ព័ន្ធទៅនឹងមុខជំនួញមួយនេះ លោកឧញ៉ា នួន រឹទ្ធី ដែលគេស្គាល់ថាជាអ្នកជោគជ័យក្នុងវិស័យអចលនទ្រព្យ និងទទួលបានពានរង្វាន់ឆ្នើមប្រចាំឆ្នាំ 2018 បានផ្តល់ជាអនុសាសន៍ថា មុខជំនួញអាចសម្រេចជាលទ្ធផលទៅបាន លុះត្រាតែមានការតាំងចិត្តខ្ពស់ និងមានគម្រោងផែនការច្បាស់លាស់ ជាពិសេសត្រូវមានចំណុចសំខាន់ៗទាំង៤ជាដាច់ខាត។
ទុនថវិកា
ជាមួយនឹងការកំណត់ផែនការ ដែលជាគោលបំណង ដើមទុនគឺជាចំណុចសំខាន់ និងដំបូងគេបង្អស់ ដែលត្រូវតែមានជាចាំបាច់ សម្រាប់ដាក់ឱ្យដំណើរការនៃប្រតិបត្តិការនៃមុខជំនួញ ដែលក្នុងនោះរាប់ចាប់តាំងពីការចាត់បែងចែក សម្រាប់ការបង្កើតជាទីស្នាក់ការ ចែកជាខ្ទង់ចំណាយសម្រាប់បុគ្គលិក សមាជិក ការកសាងកេរ្តិ៍ឈ្មោះ ដែលអាចធានាដល់ដំណើរការរបស់ក្រុមហ៊ុនយូរអង្វែង។
ទុនចំណេះ
ថ្វីត្បិតទុនថវិកាជាចំណុចចាប់ផ្តើម និងត្រូវតែមានជាសំខាន់ក្ដី ប៉ុន្តែចំណេះដឹងជាសាកល ក៏ដូចជាជំនាញផ្ទាល់ ដែលពាក់ព័ន្ធទៅនឹងវិស័យអចលនទ្រព្យ ក៏ជាកត្តាចាំបាច់មិនអាចខ្វះបានផងដែរ។
នៅត្រង់ចំណុចនេះ លោកឧកញ៉ា នួន រឹទ្ធី ក៏បានបញ្ជាក់ផងដែរថា ជំនាញ គឺជាទុនយ៉ាងសំខាន់។ អ្នកមានជំនាញច្បាស់លើវិស័យអចនទ្រព្យ ទោះជាមានថវិកាជាទុនតិចតួចក្ដី ក៏អាចឱ្យដំណើរការនៃអាជីវកម្មដើរទៅមុខបានដែរ បើទោះជាមិនមានភាពធំធាត់ឆាប់រហ័សដូចការចំណាយថវិកាជាគោលក្ដី។ ជាក់ស្ដែង នៅលើទីផ្សារអចនទ្រព្យនៅកម្ពុជានាពេលបច្ចុប្បន្ននេះ មានមនុស្សមួយចំនួនបានចាប់ដំណើរការអាជីវកម្ម ក៏ដូចជាមុខជំនួញមួយនេះបានជាបណ្ដើរៗ ដោយផ្តើមពីការងារជាភ្នាក់ងារលក់ និងការសម្រួលជាឯកសារពាក់ព័ន្ធឡើងទៅ ដើម្បីទទួលបានភាគលាភជាកម្រៃជើងសារ (Commission)។
ទុនបណ្តាញ
ការផ្សារភ្ជាប់ និងបង្កើតជាទំនាក់ទំនងបណ្តាញ គឺជាប្រការដែលសំខាន់នៅក្នុងវិស័យមួយនេះ ។ នៅពេលអ្នកមានទំនាក់ទំនងល្អ ជាមួយមនុស្សទូទៅដែលស្ថិតនៅជុំវិញខ្លួន ជាពិសេសស្ថិតនៅក្នុងវិស័យរួមគ្នា នោះអ្នកនឹងអាចបំបែកពង្រីកវិសាលភាពរបស់អ្នកកាន់តែខ្លាំង ដែលអាជបើកជំហរទីផ្សាររបស់អ្នកកាន់តែទូលាយ ប្រកបដោយប្រសិទ្ធភាពខ្ពស់។ ជាមួយនឹងទាំនក់ទំនងល្អ អ្នកក៏អាចបញ្ចៀសនូវរាល់ហានិភ័យ ឬអាចដោះស្រាយបញ្ហាទៅតាមស្ថានការបានយ៉ាងប្រសើរបំផុត។
ស្ថិរភាពសង្គម
សម្រាប់ចំណុចចុងក្រោយនេះ ត្រូវបានលោកឧកញ៉ានួន រឹទ្ធី មានប្រសាសន៍សង្កត់ធ្ងន់ថា មិនថាចំពោះតែប្រទេសកម្ពុជានោះទេ សេចក្ដីសុខ សន្ដិភាព និងស្ថិរភាពសង្គមគឺជាកត្តាចម្បងបំផុត។ នៅពេលប្រទេសមានសន្ដិសុខល្អ អ្នកវិនិយោគ ក៏ដូចជាវិនិយោគិនបរទេសនានា នឹងងាកមកចាប់អារម្មណ៍បណ្តាក់ទុនជាក់មិនខាន ហើយចំណុចមួយទៀត ក៏ជាការអនុគ្រោះដល់ប្រជាពលរដ្ឋក្នុងស្រុក អាចរកចំណូលបានខ្ពស់ ហើយនឹងឈានទៅរកទីជម្រក ដែលស្ថិតនៅក្នុងវិស័យមួយនេះ៕
