ដោយៈ វឌ្ឍនៈ

ភ្នំពេញៈ វិបត្តិនយោបាយនៅមីយ៉ាន់ម៉ា បានធ្វើឲ្យរោងចក្រផលិតស្បែកជើងធំមួយរបស់ចិន ដែលមានមូលដ្ឋាននៅប្រទេសមីយ៉ាន់ម៉ា  ឮបានសម្រេចចិត្ត ផ្លាស់មកដាក់ទុនវិនិយោគនៅកម្ពុជាវិញ។

មូលហេតុនេះ អាស្រ័យដោយកម្ពុជា មានសុខសន្តិភាព ស្ថេរភាពនយោបាយ ការអភិវឌ្ឍយ៉ាងឆាប់រហ័ស ក៏ដូចជាមានគោលនយោបាយជាច្រើនទៀត ក្នុងការលើកទឹកចិត្តអ្នកវិនិយោគមកកាន់កម្ពុជា។ នេះបើតាមការបញ្ជាក់របស់ម្ចាស់ ក្រុមហ៊ុនផលិតស្បែកជើងអលវីនស៊ូ ក្នុងជំនួបជាមួយរដ្ឋមន្ត្រីក្រសួងការងារ និងបណ្តុះបណ្តាល​វិជ្ជាជីវៈ កាលពីថ្ងៃទី១៣មីនា២០២៣ ។

លោក ហ៊ូ ឆាវហ៊ុយ ប្រធានក្រុមប្រឹក្សាភិបាលរបស់ក្រុមហ៊ុនផលិតស្បែកជើង អល វីន ស៊ូបានឱ្យដឹងថា រោងចក្ររបស់ខ្លួនបានដាក់ទីតាំងនៅក្នុងខេត្តកំពង់ស្ពឺ ហើយសម្រាប់ខ្សែច្រវ៉ាក់ផលិតកម្មនឹងអាចដំណើរការ នៅអំឡុងពាក់កណ្ដាលឆ្នាំ ២០២៣នេះ ។

លោកក៏បានជម្រាបជូន ពីតម្រូវការបុគ្គលិកជិត១០០០នាក់ ដើម្បីផលិតស្បែកជើង ឱ្យបាន៧០ម៉ឺនគូក្នុងមួយខែ ក្នុងការនាំចេញទៅកាន់អឺរ៉ុប និងសហរដ្ឋអាមេរិក ។

លោកចង់បានអនុសាសន៍ណែនំាបន្ថែមពីរដ្ឋមន្ត្រី ក្រសួងការ​ងារ និងបណ្ដុះបណ្ដាលវិជ្ជាជីវៈ ចំពោះការអនុវត្តច្បាប់របស់កម្ពុជា ខណៈដែលរោងចក្ររបស់លោក បានដំណើរការនៅក្នុងប្រទេសចិន និងនៅប្រទេសមីយ៉ាន់ម៉ា គឺចូលរួមអនុវត្តន៍ច្បាប់បានយ៉ាងល្អ។

លោកបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈបានថ្លែង អំណរគុណដល់លោកប្រធានក្រុមហ៊ុនដែលមានទំនុកចិត្ត មកលើកម្ពុជាហើយកម្ពុជា ក៏សូមស្វាគមន៍ចំពោះអ្នកវិនិយោគទាំងអស់ ដែលបានបោះទុនវិនិយោគនៅទីនេះ។

លោកបន្តថា “កម្ពុជាមានទីផ្សារនាំចេញផលិតផល ស្បែកជើង កាបូប និងផលិតផលធ្វើដំណើរ ទៅកាន់ទីផ្សារធំៗ ដូចជាសហគមន៍អឺរ៉ុប សហរដ្ឋអាមេរិក ជប៉ុនជាដើម”។

លោកបន្តថា ការរក្សាបានទីផ្សារនាំចេញទាំងអស់នេះ ដោយសា​រតែកម្ពុជា បានអនុវត្តន៍នូវគោលនយោបាយពាណិជ្ជកម្ម ផ្សាភ្ជាប់ទៅនឹងលក្ខខណ្ឌការងារ ដោយធានាបាននូវនិរន្តរភាព នៃការការបញ្ជាទិញពីប្រេនធំៗរបស់ពិភពលោក។ ក្រៅពីនេះ កម្ពុជាក៏មានកិច្ចសហប្រតិបត្តិការពាណិជ្ជកម្មសេរី និងកិច្ចព្រមព្រៀងជាមួយដៃគូច្រើន រួមជាមួយកម្លាំងពលកម្មវ័យក្មេងរបស់កម្ពុជា ដោយក្នុងនោះ សម្តេចនាយករដ្ឋមន្ត្រី ហ៊ុន សែន បានណែនាំឱ្យក្រសួងការងារ ធ្វើការបណ្តុះបណ្តាលជំនាញវិជ្ជាជីវៈ ដើម្បីផ្គត់ផ្គង់ទៅដល់ក្រុមហ៊ុន រោង​ចក្រ សហគ្រាស ដែលកំពុងមានតម្រូវការ ទាំងពេលបច្ចុប្បន្ន និងអនាគត។

លោកបន្ថែមថា កម្ពុជាមានផែនការយុទ្ធសាស្ត្រច្បាស់លាស់ណាស់ សម្រាប់ធ្វើការអភិវឌ្ឍវិស័យមួយនេះ បើមានបញ្ហាអ្វីមួយកើតឡើង នឹងមានយន្តការសម្រាប់ដោះស្រាយ៕

ដោយ: គង់ លាងហួរ
ហុងកុង: ក្រុមហ៊ុន CK Hutchison Holdings ដែលជាក្រុមហ៊ុនឈានមុខគេរបស់មហាសេដ្ឋីធំបំផុតលេខ១នៅទីក្រុងហុងកុងលោក Li Ka-Shing គ្រោងនឹងប្រែក្លាយកន្លែងចតនៅមាត់ទឹកមួយទៅជាតំបន់លំនៅដ្ឋានធំជាងគេទី២របស់ទីក្រុងនេះ។

ក្រុមហ៊ុនមេ Hongkong United Dockyards Limited (HUD) របស់ក្រុមហ៊ុនបុត្រសម្ព័ន្ធ Hutchison បានដាក់សំណើទៅក្រុមប្រឹក្សាផែនការទីក្រុង ដើម្បីសាងសង់ផ្ទះចំនួន១៥.០៧៥ខ្នង នៅលើទីតាំងរបស់ខ្លួន និងដីរដ្ឋាភិបាលដែលនៅជាប់គ្នានៅលើកោះ Tsing Yi។

ទន្ទឹមនឹងនោះ ក្រុមហ៊ុន HUD ខាងលើបានអះអាងថា ទីតាំងនៅជាប់នឹងស្ពាន Tsing Ma នឹងមានផ្ទះល្វែងចំនួន១០.៣៧០ខ្នង និងលំនៅដ្ឋានសាធារណៈចំនួន៤.៧០០ខ្នងផងដែរ។

សេចក្តីថ្លែងការណ៍របស់ក្រុមហ៊ុនមេ HUD របស់ Hutchison ដឹកនាំដោយលោក Victor Li Tzar-kuoi កូនប្រុសច្បងរបស់មហាសេដ្ឋី Li Ka-shing បានបញ្ជាក់ថា “មានតម្រូវការលំនៅដ្ឋានរយៈពេលវែងនៅក្នុងទីក្រុងហុងកុង ហើយក្រុមហ៊ុន HUD សង្ឃឹមថានឹងរួមចំណែកផ្នែកមួយរបស់ខ្លួនក្នុងការដោះស្រាយបញ្ហាលំនៅដ្ឋានតាមរយៈសំណើដែលត្រូវបានដាក់ជូននេះ”។

នៅក្រោមស្ថានភាពខ្វះខាតដីធ្លីនាពេលបច្ចុប្បន្នរបស់ទីក្រុងហុងកុង ក្រុមហ៊ុន HUD ជឿជាក់ថា “ដីឧស្សាហកម្មខ្នាតធំ និងដីរដ្ឋាភិបាលដែលទុកចោលអាចជាផ្នែកមួយនៃដំណោះស្រាយដើម្បីជួយសម្រាលនូវតម្រូវការលំនៅដ្ឋានរបស់ក្រុងហុងកុង”។

សំណើនោះដាក់បញ្ចូលគ្នានូវដីឡូតិ៍របស់ក្រុមហ៊ុន ជាមួយនឹងដីទំនេរមួយកន្លែង ដែលគ្រប់គ្រងដោយរដ្ឋាភិបាលនៅក្រោមស្ពាន Tsing Ma ដោយប្រើប្រាស់ផ្លូវមួយដើម្បីតភ្ជាប់ក្បាលដីទាំងពីរចូលទៅក្នុងការដ្ឋាន ដែលមានទំហំ១៩,៩ហិកតា។

ទំហំនៃគម្រោងនេះគឺស្ថិតនៅលំដាប់ទី២បន្ទាប់ពីគម្រោងផ្ទះចំនួន២១.៥០០ខ្នង នៅបរិវេណលំនៅដ្ឋានដ៏ធំបំផុតរបស់ហុងកុង Lohas Park នៅទីក្រុងថ្មី Tseung Kwan O និងធំជាងគម្រោង Hutchison’s Whampoa Garden នៅស្រុក Hung Hom ដែលមានផ្ទះល្វែងចំនួន១០.២៨៥ខ្នង។

តម្លៃដីត្រូវបានប៉ាន់ប្រមាណថា មានចំនួន២២ពាន់លានដុល្លារហុងកុង(២,៨ពាន់លានដុល្លារអាមេរិក) បន្ទាប់ពីការទូទាត់បុព្វលាភដីធ្លី ហើយសន្មតថា អ្នកអភិវឌ្ឍន៍មិនតម្រូវឱ្យទទួលបន្ទុកចំណាយលើការសាងសង់ផ្ទះសាធារណៈនោះទេ។ នេះបើយោងតាមនាយកជាន់ខ្ពស់របស់ក្រុមហ៊ុន CHFT Advisory and Appraisal លោក Alex Leung ៕

ដោយ: គង់ លាងហួរ

ប៉េកាំង: នាយករដ្ឋមន្ត្រីថ្មីរបស់ប្រទេសចិន លោក Li Qiang បានធ្វើសន្និសីទសារព័ត៌មាន ជាលើកដំបូងរបស់លោក បន្ទាប់ពីពិធីបិទសភាប្រជាជនជាតិនៅថ្ងៃចន្ទ ទី១៣ ខែមីនានេះ។

ក្នុងនាមជាជំនួយការយូរឆ្នាំ របស់ប្រធានាធិបតី លោកស៊ី ជីនពីង លោកLi ត្រូវបានគេរំពឹងថា លោកនឹងមានសេរីភាពធ្វើសកម្ម​ភាព ក្នុងដែនកំណត់ជាក់លាក់បន្ថែមទៀត ដើម្បីបង្ហាញពីគំនិតរបស់លោកជាសាធារណៈ ដោយមិនត្រូវបានគេមើលឃើញថា ជាបញ្ហាប្រឈមមួយចំពោះលោកស៊ី ជីនពីង។

ការ​ឆ្លើយ​តប​របស់​លោក​ Li Qiang ផ្តល់​សញ្ញា​នៃ​អ្វី​ ដែល​អាច​នឹង​កើត​មាន​នៅ​ខាង​មុខ ​សម្រាប់​មហាសេដ្ឋកិច្ច​ធំ​ជាង​គេ​ទីពីរ​របស់​ពិភពលោកមួយនេះ។

ចំណុចសំខាន់ៗដែលដកស្រង់ ពីសន្និសីទសារព័ត៌មានរបស់លោកនាយករដ្ឋមន្ត្រី Li Qiangមានដូចខាងក្រោមនេះ។

ប្រទេស​ចិន​នឹង​ប្តូរ​ការ​ផ្តោត ​ទៅ​លើ​ការ​អភិវឌ្ឍ​ដែល​មាន​គុណភាព​ខ្ពស់ និង​ធ្វើ​ឱ្យ​ប្រសើរ​ឡើង​នូវ​វិទ្យាសាស្ត្រ និង​បច្ចេកវិទ្យា

ដើម្បីសម្រេចបាននូវគោលដៅ កំណើនសេដ្ឋកិច្ច៥ភាគរយនឹងមិនងាយស្រួលនោះទេ ហើយរដ្ឋាភិបាលចិននឹងដាក់ចេញ នូវគោលនយោបាយជំរុញតម្រូវការ និងការវិនិយោគ។

ហុងកុងមានតួនាទីសំខាន់ជាមជ្ឈមណ្ឌលហិរញ្ញវត្ថុ ពាណិជ្ជកម្ម និងដឹកជញ្ជូន

រដ្ឋាភិបាល​ចិន​បាន​គាំទ្រ​អាជីវកម្ម​ឯកជន ហើយ​ការ​និយាយ​ថា​ ចិន​ កំពុង​បំបាក់​ទឹកចិត្ត​របស់សហគ្រិន​ឯកជន ​គឺមិនសមរម្យនោះទេ។

យុទ្ធសាស្ត្រកូវីដ-១៩ របស់ប្រទេសចិនត្រូវបានគិតគូរយ៉ាងល្អ ហើយបានផ្តល់ពេលវេលាដល់ប្រទេសនេះ ក្នុងការអភិវឌ្ឍន៍វ៉ាក់សាំង និងថ្នាំបង្ការ។ ការ​ផ្ដាច់​ទំនាក់ទំនង​រវាង​ចិន ​និង​សហរដ្ឋអាមេរិក​គឺ​គ្រាន់​តែ​ជា​ការ​ឃោសនាបំផ្លើសុំ

ការប្តេជ្ញាចិត្តចុងក្រោយ

លោក Li Qiang បញ្ចប់សន្និសីទសារព័ត៌មានដោយប្តេជ្ញាអនុវត្តគោលនយោបាយនានា ដែលសម្រេចដោយគណៈកម្មាធិការមជ្ឈិមបក្សកុម្មុយនិស្ត។

មតិ​សាធារណៈ

លោក Li ក៏អំពាវនាវដល់មន្ត្រីរដ្ឋាភិបាល ជាពិសេសកម្មាភិបាលវ័យក្មេង ដែលអង្គុយនៅក្នុងការិយាល័យរដ្ឋាភិបាល ដើម្បីទៅធ្វើទស្សនកិច្ចសហគមន៍មូលដ្ឋាន ដើម្បីសុំមតិសាធារណៈ។

សុទិដ្ឋិនិយមអំពីអនាគត

លោក Li បានលើកឡើងពីបទពិសោធន៍របស់លោក នៅក្នុងតំបន់ផ្សេងៗ នៃប្រទេសចិនក្នុងអំឡុងសន្និសីទកាសែត ដោយចង្អុលទៅទំនាក់ទំនងជាមួយវិនិយោគិនបរទេស នៅពេលលោកជាប្រធានបក្សក្រុងសៀងហៃ និងការប្រាស្រ័យទាក់ទងជាមួយសហគ្រិនឯកជន នៅពេលលោកជាមន្ត្រីកំពូលនៅក្នុងខេត្ត Zhejiang និងខេត្ត Jiangsu។

លោក Li បានមានប្រសាសន៍ថា នៅពេលលោកនៅទីក្រុងសៀងហៃ ដែលជាបណ្តុំមូលដ្ឋានរបស់ក្រុមហ៊ុន បរទេសជាង៧០.០០០ ក្រុមហ៊ុនទាំងនោះជាច្រើន រួមទាំងក្រុមហ៊ុនអាមេរិកបានប្រាប់លោកថា ពួកគេមានសុទិដ្ឋិនិយម ចំពោះអនាគតនៃទីក្រុងសៀងហៃ និងប្រទេសចិន។

ទំនាក់ទំនងចិន-អាមេរិក

លោក Li អះអាងថា លោក​នឹង​មិន​បញ្ជាក់​ជា​ថ្មី​ម្តង​ទៀត ​នូវ​ការ​លើក​ឡើង​របស់​រដ្ឋមន្ត្រី​ការ​បរទេស លោក Qin Gang ក្នុង​សន្និសីទ​កាសែត​កាល​ពី​សប្តាហ៍​មុន​ អំពី​ទំនាក់​ទំនង​រវាង​សហរដ្ឋ​អាមេរិក និង​ចិននោះទេ។

ប៉ុន្តែលោកសង្ឃឹមថា កិច្ចព្រមព្រៀងរវាងលោកប្រធានាធិបតីចិន ស៊ី ជីនពីង និងលោក ចូ បៃដិននៅក្រៅកិច្ចប្រជុំ G20 កាលពីឆ្នាំមុន អាចប្រែក្លាយទៅជាសកម្មភាព។

លោក Li បានមានប្រសាសន៍ថា “ពាណិជ្ជកម្មរវាងប្រទេសចិន និងសហរដ្ឋអាមេរិក បានឈានដល់កម្រិតខ្ពស់កាលពីឆ្នាំមុន ហើយទំនាក់ទំនងសេដ្ឋកិច្ច រវាងប្រទេសទាំងពីរគឺពឹងផ្អែក និងផ្តល់ផលប្រយោជន៍ទៅវិញទៅមក”។លោក​​បន្ថែមថា “គំនិត​នៃការ​ផ្តាច់​ចំណងគឺ​គ្រាន់​តែ​ជា​ការ​ឃោសនាបំផ្លើស ហើយមាន​វិស័យ​ជា​ច្រើន​ដែល​ចិន និង​អាមេរិក​អាច​ធ្វើ​ការ​ជាមួយ​គ្នាបាន”។

ការបើកចំហនៃប្រទេសចិន

លោក Li បានមានប្រសាសន៍ថា “កំណែទម្រង់​ និង​ការ​បើក​ចំហ​របស់​ប្រទេស​ចិន ​បាន​ជួយ​ឱ្យ​ប្រទេស​នេះ ​មាន​ការ​អភិវឌ្ឍ និង​មាន​ឥទ្ធិពល​លើ​ពិភពលោក​ទាំងមូល”។

លោកបានបន្តថា អាជីវកម្មបរទេសភាគច្រើន មានសុទិដ្ឋិនិយមចំពោះអនាគតនៅក្នុងប្រទេសចិន ហើយដោយមិនគិតពីការ​ផ្លាស់​ប្តូរ​ខាង​ក្រៅ​ យើង​នឹង​បន្ត​អនុវត្ត​គោល​នយោបាយ នៃការ​បើក​ចំហរបស់​យើង​ដោយ​ឥត​ងាករេ​។

លោក​បាន​បញ្ជាក់ថា​ “ប្រទេស​ចិន​នឹង​បើក​ចំហខ្លួនឯង ​ឱ្យ​កាន់​តែ​ទូលំទូលាយ​សម្រាប់​ពិភពលោក ហើយ​យើង​នឹង​ផ្តល់​សេវាកម្ម​កាន់តែ​ប្រសើរ​ដល់​មនុស្ស​ទាំងអស់​គ្នា​”។

លោកបន្ថែមថា ប្រទេសចិនដែលបើកចំហ និងប្រទេសចិនដែលស្ថិតនៅក្នុងដំណើរការ នៃការអភិវឌ្ឍន៍ឥតឈប់ឈរ ទទួលស្វាគមន៍ការវិនិយោគមកពីទូទាំងពិភពលោក។

ចំពោះទីជនបទ

នៅលើការអភិវឌ្ឍន៍ជនបទ លោក Li បានគូសបញ្ជាក់អំពីតម្រូវការការពារបរិស្ថាន និងថែរក្សាលក្ខណៈប្លែកៗនៃជនបទ។

លោក​ក៏​មាន​ប្រសាសន៍​ថា កសិករ​គួរ​តែ​ត្រូវ​បាន​លើក​ទឹក​ចិត្ត​ឲ្យ​មាន​គំនិត​ផ្តួច​ផ្តើម ​ក្នុង​ការ​ស្តារ​ជនបទ​ឡើង​វិញ។

ថ្លែងទៅកាន់កសិករដោយផ្ទាល់ លោក Li បានមានប្រសាសន៍ថា គោលនយោបាយរបស់រដ្ឋាភិបាល ក្នុងការគាំទ្រផលិតកម្មគ្រាប់ធញ្ញជាតិនឹងកើនឡើង។

លោក​លើកទឹកចិត្ត​ដល់កសិករ ​ឱ្យ​ដាំ​ដំណាំ​ស្រូវ​ឱ្យបាន​ច្រើនដើម្បី​ធ្វើ​ឱ្យ​ប្រាកដ​ថា​ ឆ្នាំងបាយ​របស់​ប្រជាជន​ចិន​ ចំនួន១,៤​ពាន់​លាន​នាក់​នឹង​កាន់​យ៉ាង​រឹងមាំ​ នៅក្នុង​ដៃ​របស់​យើង​ជានិច្ច​។

ចំពោះកោះតៃវ៉ាន់

លោក Li បានមានប្រសាសន៍ថា ជនជាតិចិននៅសងខាងនៃច្រកសមុទ្រតៃវ៉ាន់ គឺជាសមាជិកនៃគ្រួសារតែមួយ។

ទីក្រុងប៉េកាំង នឹងជំរុញកិច្ចសហប្រតិបត្តិការសេដ្ឋកិច្ច និងវប្បធម៌ឆ្លងច្រកសមុទ្រ ដោយឈរលើមូលដ្ឋាន នៃគោលការណ៍ចិនតែមួយ និងកុងសង់ស៊ីសឆ្នាំ១៩៩២។

លោក Li Qiang អះអាងថា ទីក្រុងប៉េកាំងនឹងលើកទឹកចិត្តអ្នកជំនួញតៃវ៉ាន់កាន់តែច្រើនឱ្យមកចិនដីគោក ហើយថាការឆ្លងឆ្លើយធម្មតារវាងភាគីទាំងពីរ នៃច្រកសមុទ្រ គឺជាសេចក្តីប្រាថ្នារបស់ទីក្រុងប៉េកាំង និងតម្រូវឱ្យមានកិច្ចខិតខំប្រឹងប្រែងរួមគ្នា។

លោកបានលើកឡើងពីសារៈសំខាន់ នៃការធ្វើឱ្យមានការឆ្លងឆ្លើយធម្មតារវាងភាគីទាំងពីរ ដោយមិនបានបញ្ជាក់ថា តើទីក្រុងប៉េកាំងមានឆន្ទៈ ក្នុងការសន្ទនាជាមួយរដ្ឋបាលតៃវ៉ាន់ ដែលមានស្រាប់នៅក្រោមគណបក្សរីកចម្រើនប្រជាធិបតេយ្យ ដែលគាំទ្រឯករាជ្យដែរឬយ៉ាងណានោះទេ។

ការផ្លាស់ប្តូរជាផ្លូវការ ត្រូវបានផ្អាកចាប់តាំងពីលោកស្រី Tsai Ing-wen ក្លាយជាប្រធានាធិបតីតៃវ៉ាន់ ទោះបីជាទីក្រុងប៉េកាំងបានលើកទឹកចិត្ត ឱ្យមានការផ្លាស់ប្តូរប្រជាជន និងប្រជាជននៅកម្រិតរដ្ឋបាលក្នុងតំបន់យ៉ាងណាក្តី។

អាទិភាព

នៅពេលសាកសួរអំពីអាទិភាព នៃរដ្ឋាភិបាលរបស់លោក លោក Li សំដៅទៅលើរបាយការណ៍ ដែលផ្តល់ដោយលោកប្រធានាធិបតីស៊ី ជីនពីងក្នុងអំឡុងពេលសមាជបក្ស ក្នុងខែតុលា ដោយលោកនិយាយថា បេសកកម្មរបស់គណៈរដ្ឋមន្ត្រី គឺអនុវត្តន៍ចក្ខុវិស័យ ដែលមាននៅក្នុងរបាយការណ៍នោះ។

ការអភិវឌ្ឍន៍គុណភាពខ្ពស់

លោក Li បានមានប្រសាសន៍ថា ចិន​នឹង​ផ្លាស់ប្តូរ​ការ​ផ្តោត​យកចិត្តទុកដាក់ទៅ​លើ​ការ​អភិវឌ្ឍ​ ដែល​មាន​គុណភាព​ខ្ពស់ លើក​កម្ពស់​វិទ្យាសាស្ត្រ និង​បច្ចេកវិទ្យា។  ការអភិវឌ្ឍន៍នឹងផ្តោតលើមនុស្សកាន់​តែច្រើន ហើយនឹងមានគោលបំណងធ្វើឱ្យប្រសើរឡើង នូវជីវភាពរស់នៅរបស់ប្រជាជន នៅក្នុងតំបន់រាប់ចាប់ពីលំនៅដ្ឋាន និងការងារ រហូតដល់សេវាវេជ្ជសាស្រ្ត។

គ្មានកិច្ចការងាយស្រួលទេ

លោក Li បានមានប្រសាសន៍ថា ការ​សម្រេច​បាន​គោលដៅ​របស់​ប្រទេស​ចិន សម្រាប់កំណើន GDP ប្រហែល៥ភាគរយ ​នៅ​ឆ្នាំ​នេះ​ នឹង​មិន​មែន​ជា​កិច្ចការ​ងាយ​ស្រួល​នោះ​ទេ។

ទស្សនវិស័យសម្រាប់សេដ្ឋកិច្ចពិភពលោក មិនមានសុទិដ្ឋិ​និយមនោះទេ ហើយលោក Li បានព្រមានអំពីកត្តាមិនច្បាស់លាស់ និងមិនអាចទាយទុកជាមុនបាន ហើយជួនកាលទៀតអាចមានឧប្បត្តិហេតុដែលមិននឹកស្មានដល់។

ការបន្ទរតាមលោក ស៊ី ជីនពីង

នៅក្នុងការឆ្លើយសំណួរដំបូង លោក Li សំដៅលើលោកប្រធា​នាធិបតី ស៊ី ជីនពីង តាមឈ្មោះជាច្រើនដង ក៏ដូចជាគោលការណ៍ជាច្រើនរបស់លោក ស៊ី ដូចជាគោលដៅ២០០ឆ្នាំ និងទស្សនវិជ្ជាអភិវឌ្ឍន៍ថ្មី ។

បន្សំនៃគោលនយោបាយនានា

លោក Li បានសង្កត់ធ្ងន់លើសារៈសំខាន់ នៃស្ថិរភាពសេដ្ឋកិច្ចនៅឆ្នាំនេះ។

លោកបានមានប្រសាសន៍ថា “ការរួមផ្សំគ្នានៃគោលនយោបាយមួយចំនួន នឹងត្រូវបានដាក់ចេញសម្រាប់ម៉ាក្រូសេដ្ឋកិច្ច ដើម្បីជំរុញតម្រូវការ និងការវិនិយោគ ក៏ដូចជាលើកំណែទម្រង់ ការច្នៃប្រឌិត និងដើម្បីការពារហានិភ័យផងដែរ”។

សន្ទស្សន៍ផ្សារហ៊ុន Shanghai ហក់ឡើង

សន្ទស្សន៍ Shanghai Composite Index បានហក់ឡើងថ្លៃ បន្ទាប់ពីសន្និសីទសារព័ត៌មាន របស់នាយករដ្ឋមន្ត្រីចិន បានចាប់ផ្តើម ហើយឥឡូវនេះបានហក់ឡើង០,៧ភាគរយ។

ការឆ្លើយតបនឹងជំងឺកូវីដ-១៩

នៅពេលសាកសួរថាតើវិធានការកូវីដ-១៩ របស់ចិនគឺចាំបាច់ឬអត់ លោក Li បានឆ្លើយថា យុទ្ធសាស្ត្រនេះ ត្រូវបានគិតគូរយ៉ាងល្អ ហើយបានផ្តល់ពេលវេលា ដល់ប្រទេសចិន ក្នុងការអភិវឌ្ឍន៍វ៉ាក់សាំង និងថ្នាំ។

លោកបានមានប្រសាសន៍ថា “អស់រយៈពេលជាងបីឆ្នាំ ក្រោមការដឹកនាំរបស់បក្សកុម្មុយនិស្ត ប្រជាជនចិនបានរួបរួមគ្នាក្នុងការប្រយុទ្ធប្រឆាំងនឹងជំងឺកូវីដ-១៩ ហើយឥឡូវនេះយើងទទួលបានជ័យជំនះយ៉ាងសំខាន់ និងដាច់ខាតប្រឆាំងនឹងជំងឺនេះ តែលោកមិនប្រើពាក្យថា“សូន្យកូវីដ”នោះទេ។

ការចូលនិវត្តន៍

លោក Li បានមានប្រសាសន៍ថា លោកដឹងពីការព្រួយបារម្ភជាសាធារណៈ ទាក់ទងនឹងគោលនយោបាយចូលនិវត្តន៍ របស់ប្រទេស ប៉ុន្តែលោកមិនបានបញ្ជាក់លម្អិត អំពីការផ្លាស់ប្តូរអ្វីដែលអាចនឹងកើតមាននៅខាងមុខនោះទេ។

ទីក្រុងហុងកុង និងម៉ាកាវ

លោកនាយករដ្ឋមន្ត្រីថ្មីរូបនេះ បានរំលេចទីក្រុងហុងកុង និងម៉ាកាវជាធាតុសំខាន់នៃយុទ្ធសាស្ត្ររបស់ប្រទេស។

លោក Li បានមានប្រសាសន៍ថា ទីក្រុងហុងកុង ដែលជាមជ្ឈ​មណ្ឌលសេដ្ឋកិច្ច ហិរញ្ញវត្ថុ ពាណិជ្ជកម្ម និងដឹកជញ្ជូន ចំណែកម៉ាកាវ ដែលជាមជ្ឈមណ្ឌលកម្សាន្ត និងទេសចរណ៍ដ៏ល្បីល្បាញលើពិភពលោក នឹងត្រូវបានពង្រឹង និងរួបរួមគ្នាជាមួយនឹងការគាំទ្រ ពីរដ្ឋាភិបាលកណ្តាល។

លោកបន្ថែមថា “ប្រទេសមួយ ប្រព័ន្ធពីរ”នឹងត្រូវបានគាំទ្រដោយរដ្ឋាភិបាលកណ្តាលយ៉ាងពេញលេញ ស្មោះត្រង់ និងម៉ឺងម៉ាត់ ដែលនឹងគាំទ្រទីក្រុងហុងកុង និងម៉ាកាវ ដើម្បីធ្វើសមាហរណកម្មទៅក្នុងការអភិវឌ្ឍរួមរបស់ប្រទេស បង្កើនសេដ្ឋកិច្ច និងជីវភាពរស់នៅរបស់ពួកគេ ព្រមទាំងពង្រឹងការប្រកួតប្រជែង ជាសកលរបស់ទីក្រុងទាំង២ផងដែរ”៕

ដោយ៖ វឌ្ឍនៈ

ភ្នំពេញ៖ ខេត្តកំពង់ស្ពឺកំពុងក្លាយជាតំបន់ពេញនិយម និងចាប់អារម្មណ៍ពីសំណាក់វិនិយោគិនក្នុង និងក្រៅប្រទេស ក្នុងនោះដែរវិនិយោគិនហុងកុងក៏បាន និងកំពុងចាប់អារម្មណ៍លើខេត្តមួយ ដោយមានក្រុមហ៊ុនជាង១០០ក្រុមហ៊ុន គ្រោងនឹងបណ្ដាក់ទុនវិនិយោគនៅក្នុងតំបន់មួយនេះផងដែរ។

លោកវ៉ី សំណាង អភិបាលខេត្តកំពង់ស្ពឺបានមានប្រសាសន៍នាពេលថ្មីៗនេះថា ខេត្តកំពង់ស្ពឹជាខេត្ត ដែលកំពុងល្បីល្បាញនិងចង់មកបណ្ដាក់ទុនរកស៊ី ពីសំណាក់វិនិយោគិនបរទេស ហើយឆាប់ៗខាងមុខនេះដែរ លោកនឹងដឹកនាំប្រតិភូទៅទីក្រុងហុងកុង ដើម្បីជួបជាមួយនឹងវិនិយោគិនហុងកុងនៅទីនោះជាច្រើននាក់  ។

លោកបន្តថា “វិនិយោគិននៅហុងកុងជាង១២០ក្រុមហ៊ុន ក៏កំពុងទន្ទឹងរង់ចាំវត្តមានរបស់ប្រតិភូពីកំពង់ស្ពឺ និងដើម្បីសិក្សាពីសក្ដានុពលវិនិយោគនៅក្នុងខេត្តកំពង់ស្ពឺផងដែរ”។ លោកបន្តថា “គម្រោងទៅក្រុងហុងកុង ជួបជាមួយវិនិយោគិននៅទីនោះ គឺនៅថ្ងៃទី៣១មីនា ថ្ងៃទី០១និងថ្ងៃទី២ ខែមេសា២០២៣នេះ ហើយយើងជឿថានឹងមានវត្តមានក្រុមហ៊ុនពីហុងកុងជាច្រើនទៀត ចូលមកវិនិយោគនៅកម្ពុជាជាបន្តបន្ទាប់ ” ។

លោកវ៉ី សំណាង បានបន្ថែមថា ថ្មីៗនេះខេត្តកំពង់ស្ពឺក៏ត្រូវបានប្រកាសថាជាខេត្តអស់មីន ដែលការប្រកាសនេះ ក៏បានធ្វើឱ្យវិនិយោ​គិន បរទេសរឹតតែចង់មកបណ្ដាក់ទុនបន្ថែមទៀត ហើយអាជ្ញាធររបស់យើងក្នុងខេត្តទាំងមូល ក៏ត្រៀមស្វាគមន៍ និងសម្រួលដល់ការវិនិយោគរបស់វិនិយោគិនជាតិនិងអន្តរជាតិផងដែរ។

ការវិនិយោគនៅក្នុងខេត្តកំពង់ស្ពឺ ត្រូវបានគេមើលឃើញថាភាគច្រើនផ្ដោតលើរោងចក្រឧស្សាហកម្ម និងបានធ្វើឱ្យតម្រូវការដីធ្លីសម្រាប់បម្រើ ក្នុងវិស័យឧស្សាហកម្ម នៅក្នុងខេត្តមួយនេះ កាន់តែមានកំណើនច្រើនជាបន្តបន្តាប់ទៀបផងដែរ ។

លោកបូ សេងហួរ ប្រធានសាខានៃក្រុមហ៊ុនអចលនទ្រព្យ Century 21 Zillion Holding ប្រចាំខេត្តកំពង់ស្ពឹក៏បានឱ្យដឹងថា កាលពីថ្មីៗនេះ មានក្រុមហ៊ុនបរទេសជាច្រើន បានចូលមកកក្នុងខេត្តកំពង់ស្ពឺ និងស្វែងរកការវិនិយោគ ជាពិសេសក្នុងវិស័យឧស្សាហកម្ម ដែលធ្វើឱ្យតម្រូវការដី នៅក្នុងខេត្តនេះ សម្រាប់អភិវឌ្ឍន៍វិស័យឧស្សា​ហកម្មកាន់តែច្រើន និងបានធ្វើឱ្យតម្លៃដីធ្លីរក្សាតម្លៃល្អ ទោះបីជាស្ថិតនៅក្នុងស្ថានភាពសេដ្ឋកិច្ចពិភពលោក មិនទាន់មានស្ថិរភាពក្ដី ។

លោកបន្តថា តំបន់នៅតាមបណ្ដោយផ្លូវជាតិ និងផ្លូវសំខាន់ៗក្នុងខេត្តកំពង់ស្ពឺ មានសកម្មភាពអភិវឌ្ឍន៍យ៉ាងមមាញឹក ជាក់ស្ដែងតាមបណ្ដោយផ្លូវ៥១ ផ្លូវ៤១ ផ្លូវ៤២ និងផ្លូវជាតិលេខ៣ និងលេខ៤ជាដើម៕

   ដោយៈ គង់ សូរិយា

       ព្រះសីហនុៈ  លោក ឡុង ឌីម៉ង់ អភិបាលរងខេត្តព្រះសីហនុ ដឹកនាំក្រុមការងារបច្ចេកទេស ចុះពិនិត្យសំណើសុំសាងសង់ជលយានដ្ឋាន ស្ថិតនៅស្រុកស្ទឹងហាវ ខេត្តព្រះសីហនុ។

ការចុះពិនិត្យទីតាំងនេះ បានធ្វើឡើងកាលពីចុងសប្តាហ៍មុន និងទទួលបានសាទរពីប្រជានេសាទ នៅក្នុងតំបន់ ជាពិសេសបងប្អូនប្រជានេសាទនៅស្រុកស្ទឹងហាវតែម្តង។

គម្រោងសាងសង់ ជលយានដ្ឋាននេះ ជាគម្រោងវិនិយោគដ៏ល្អ ដែលមានលក្ខណៈស្របទិសជាមួយនឹងផែនការមេអភិវឌ្ឍ ព្រះសីហនុទៅជាតំបន់សេដ្ឋកិច្ចពិសេសគំរូពហុបំណង និងត្រូវបានរំពឹងថានឹងចូលរួមបង្កើនសេដ្ឋកិច្ចគ្រួសារ និងសេដ្ឋកិច្ចសង្គមរបស់ប្រជានេសាទនៅក្នុង ខេត្តជាប់មាត់សមុទ្រទាំងបួន របស់ព្រះរាជាណាចក្រកម្ពុជាផងដែរ។

ក្នុងឱកាសនេះលោកឡុង ឌីម៉ង់បានបញ្ជាក់ថា កន្លងមកនៅពេលដែលទូក ឬការណូតរបស់បងប្អូនប្រជានេសាទខូច យើងតែងនាំយកទូក ឬកាណូតទៅជួសជុលនៅប្រទេសជិតខាង ដែលការណ៍នេះ នាំឱ្យមានការប្រឈមនឹងគ្រោះថ្នាក់នានា ខាតពេលវេលា និងចំណាយថវិកាខ្ពស់។ ដូច្នេះការបង្កើតឱ្យមានជលយានដ្ឋាន នៅក្នុងស្រុក មិនត្រឹមតែជម្រុញការលើកទឹកចិត្ត បណ្តុះបណ្តាលជំនាញ បច្ចេកទេសក្នុងការជួសជុល ដល់ប្រជាពលរដ្ឋរបស់យើង កាន់តែស្ទាត់ជំនាញបន្ថែម មួយកម្រិតទៀតតែប៉ុណ្ណោះទេ គឺយើងនឹងចូលរួមកសត់បន្ថយលំហូរថវិកា ទៅកាន់ប្រទេសជិតខាងមួយកម្រិតបន្ថែមទៀតផង៕

ដោយ: គង់ លាងហួរ

ភ្នំពេញ: ប្រទេសកម្ពុជាកំពុងជំរុញទេសចរណ៍ កីឡាជាផ្នែកមួយនៃយុទ្ធនាការ Visit Cambodia Year 2023 ខណៈដែលកម្ពុជាកំពុងត្រៀមខ្លួនធ្វើជាម្ចាស់ផ្ទះ នៃការប្រកួតកីឡាស៊ីហ្គេម ជាលើកដំបូងនៅក្នុងខែឧសភាខាងមុខ។

លោក ប្រាក់ វុទ្ធី ប្រធាន​នាយកដ្ឋាន​សិក្សាទីផ្សារ និង​ផ្សព្វផ្សាយ​ទេសចរណ៍ក្រៅប្រទេស ​នៃ​ក្រសួងទេសចរណ៍​បាន​មានប្រសាសន៍ថា “ការប្រកួតកីឡាស៊ីហ្គេម ​នឹង​ដើរតួ​ជា​កត្តា​ជំរុញ​ដល់​វិស័យ​ទេស​ចរណ៍​កីឡា​នៅទូទាំងប្រទេស​”។

រាជធានី​ភ្នំពេញ​របស់​ប្រទេសកម្ពុជា​ នឹង​ធ្វើ​ជា​ម្ចាស់​ផ្ទះ​នៃការប្រកួតកីឡា​អាស៊ី​អាគ្នេយ៍​ នៅ​ខែ​ឧសភា​ឆ្នាំ​២០២៣នេះ។

លោក​ ប្រាក់ វុទ្ធី បាន​កត់​សម្គាល់​ថា “នៅឆ្នាំ​២០២៣នេះ​ កម្ពុជា​នឹងធ្វើ​ជា​ម្ចាស់​ផ្ទះ​កីឡាស៊ីហ្គេម និង​អាស៊ាន​ប៉ារ៉ាហ្គេម ដែល​ជា​រឿង​ដ៏​ធំ​មួយ​សម្រាប់​កម្ពុជា”។

ព្រឹត្តិការណ៍ទាំងពីរនេះត្រូវបានគេរំពឹងថា នឹងទាក់ទាញភ្ញៀវទេសចរអន្តរជាតិមកកម្ពុជា បានចន្លោះពី២៥០.០០០ ដល់៥០០.០០០នាក់។

ព្រឹត្តិការណ៍កីឡាស៊ីហ្គេម​ នឹង​ប្រព្រឹត្ត​ទៅ​ចាប់ពី​ថ្ងៃ​ទី​៥ ដល់​ថ្ងៃ​ទី​១៧ ខែ​ឧសភា បន្ទាប់​មក​ព្រឹត្តិការណ៍កីឡាអាស៊ាន​ ប៉ារ៉ាហ្គេម​ឆ្នាំ​២០២៣ នឹងប្រារព្ធធ្វើឡើងចាប់​ពី​ថ្ងៃ​ទី​៣ ដល់​ទី​៩ ខែ​មិថុនាខាងមុខនេះ។

លោក ប្រាក់ វុទ្ធី បានបន្ថែមថា “កម្ពុជាបានរៀបចំព្រឹត្តិការណ៍កីឡាប្រចាំឆ្នាំជាច្រើន ដែលទាក់ទាញដល់អ្នកទស្សនា មកពីជុំវិញពិភពលោក រួមទាំងព្រឹត្តិការណ៍រត់ប្រណាំង ពាក់កណ្តាលម៉ារ៉ាតុងអង្គរក្នុងខែធ្នូ និង Ultra-Trail Angkor ក្នុងខែកុម្ភៈ និងព្រឹត្តិការណ៍ប្រណាំងកង់អន្តរជាតិផ្សេងៗផងដែរ”។

លោក​បាន​មានប្រសាសន៍ថា “ឆ្នេរ​សមុទ្រ​ភាគ​ខាង​ត្បូង​របស់​ប្រទេស​កម្ពុជា​ ក៏​មានភាពល្អ​ឥត​ខ្ចោះ​ សម្រាប់​សកម្មភាពប្រកួតលើទឹកនានាផងដែរ ដូចជាការ​ជិះទូក​ក្ដោង និង​ទូក​កំសាន្ត ដោយ​មាន​គម្រោង​ធ្វើ​ដំណើរ​ពាក់ព័ន្ធនឹងកីឡា​បន្ថែម​ទៀត”៕