ដោយ: គង់ លាងហួរ
អន្តរជាតិ: នាយករដ្ឋមន្ត្រីម៉ាឡេសុីលោក Anwar Ibrahim បានមានប្រសាសន៍ថា ឥឡូវនេះ រដ្ឋាភិបាលបើកចំហចំពោះរាល់សំណើនានាពីក្រុមហ៊ុនទាំងអស់ ដែលជាសញ្ញាថា ម៉ាឡេស៊ីចង់ពិនិត្យមើលឡើងវិញនូវគម្រោងផ្លូវដែកល្បឿនលឿនតភ្ជាប់ទីក្រុងគូឡាឡាំពួ និងទីក្រុងសិង្ហបុរី។

រដ្ឋមន្ត្រីក្រសួងដឹកជញ្ជូន លោក Anthony Loke បានអះអាងថា “ខណៈរដ្ឋាភិបាលមិនទាន់សម្រេចចិត្តក្នុងការស្តារគម្រោងនេះឡើងវិញនៅឡើយនោះ រដ្ឋាភិបាលក៏មិនទាន់មានចេតនាទាត់ចោលគម្រោងនេះនៅឡើយដែរ”។

លោក Loke បានប្រាប់អ្នកយកព័ត៌មាននៅខាងក្រៅសន្និសីទ Invest Malaysia ថា “លោកនាយករដ្ឋមន្ត្រីបានផ្តល់ការណែនាំដល់ខ្ញុំថា យើងអាចពិភាក្សាអំពីវា ហើយយើងអាចបើកចំហចំពោះរាល់សំណើពីវិស័យឯកជន ដរាបណាវាមិនត្រូវបានផ្តល់មូលនិធិពីរដ្ឋាភិបាល”។

លោកបានធ្វើការពន្យល់ថា “ទោះបីជារដ្ឋាភិបាលមិនទាន់ទទួលបានសំណើជាក់លាក់យ៉ាងណាក្តី ក៏ប៉ុន្តែភាគីជាច្រើនមានបំណងបន្តគម្រោងនេះ”។

លោកបានបន្ថែមថា “យើងមិនមានពេលវេលាកំណត់ទេ ដោយសារតែកិច្ចព្រមព្រៀងទ្វេរភាគីរវាងម៉ាឡេស៊ី និងសិង្ហបុរីត្រូវបានលុបចោលដោយរដ្ឋាភិបាលចាស់ក្រោមអាណត្តិលោកនាយករដ្ឋមន្ត្រី Muhyiddin Yassin”។

លោកបានបញ្ជាក់ថា “វាមិនមានភាពបន្ទាន់ក្នុងការឈានទៅដល់ដំណាក់កាលសំខាន់ណាមួយទេ ហើយឥឡូវនេះយើងបើកចំហចំពោះយន្តការរបៀបផ្តល់មូលនិធិថ្មីពេញលេញ និងគំរូនៃការអនុវត្ត”។

គម្រោងរថភ្លើងល្បឿនលឿនដែលមានតម្លៃរាប់ពាន់លានដុល្លារនេះត្រូវបានស្នើឡើងក្នុងឆ្នាំ២០១៣ នៅក្រោមអាណត្តិលោកនាយករដ្ឋមន្ត្រី Najib Razak ដែលមានគោលបំណងគ្របដណ្តប់ចម្ងាយ៣៥០គីឡូម៉ែត្ររវាងទីក្រុងគូឡាឡាំពួ និងទីក្រុងសិង្ហបុរីនៅក្នុងរយៈពេលតិចជាង៩០នាទី។

ការចំណាយរបស់គម្រោងនេះត្រូវបានគេប៉ាន់ស្មានថាមានចំនួន៦៨ពាន់លានរីងហ្គីត(ប្រហែល១៥ពាន់លានដុល្លារអាមេរិក)។

នៅពេលដែលលោក Mahathir Mohamad បានឡើងកាន់តំណែងជានាយករដ្ឋមន្ត្រីម៉ាឡេសុី លោកបានស្នើសុំឱ្យផ្អាកគម្រោងនេះ រួមជាមួយនឹងគម្រោងហេដ្ឋារចនាសម្ព័ន្ធធំៗជាច្រើនទៀត ដែលជាផ្នែកមួយនៃវិធានការរឹតបន្តឹង ដែលត្រូវបានអនុម័តដោយរដ្ឋាភិបាលនៅពេលនោះ៕

ដោយ: គង់ លាងហួរ
អន្តរជាតិ: ទីក្រុងដ៏ស្តុកស្តម្ភសម្បូរបែប Changzhou ក្នុងខេត្ត Jiangsu ភាគខាងកើតនៃប្រទេសចិន បានបន្ធូរបន្ថយការរឹតបន្តឹងលើការលក់លំនៅដ្ឋានចេញទៅវិញ(Resale) ដែលសកម្មភាពនេះស្របតាមវិធានការរបស់ទីក្រុងលំដាប់ទី២ជាច្រើន ដើម្បីបង្កើនតម្រូវការទីផ្សារដែលកំពុងជួបការលំបាក។

ចំណាត់ការនេះអនុញ្ញាតឱ្យ ម្ចាស់ផ្ទះអាចដាក់លក់ផ្ទះរបស់ពួកគេបាននៅលើទីផ្សារនៅពេលពួកគេទទួលបានប័ណ្ណកម្មសិទ្ធិអចលនទ្រព្យ ជំនួសឱ្យការដែលត្រូវរង់ចាំអស់ពេល២ឆ្នាំ បន្ទាប់ពីការទិញ។ នេះបើយោងតាមសេចក្តីថ្លែងការណ៍របស់ការិយាល័យលំនៅដ្ឋានរបស់ទីក្រុង Changzhou កាលពីថ្ងៃអង្គារកន្លងទៅថ្មីៗនេះ។

ម្ចាស់ផ្ទះជាធម្មតាត្រូវរង់ចាំចន្លោះពី៣ទៅ៦ខែ ដើម្បីទទួលបានប័ណ្ណកម្មសិទិ្ធរបស់ពួកគេ មានន័យថារយៈពេលកំណត់ត្រូវបានកាត់បន្ថយយ៉ាងហោចណាស់១៨ខែក្នុងករណីភាគច្រើន ហើយវិធានការ​នេះ​បានចូល​ជា​ធរមាន​កាលពីថ្ងៃ​ទី ១៥ ខែ​កុម្ភៈមកម្ល៉េះ។

យោងតាមគេហទំព័រផ្លូវការរបស់រដ្ឋបាលទីក្រុងបានឱ្យដឹងថា ផលិតផលក្នុងស្រុកសរុប (GDP) របស់ទីក្រុង Changzhou បានកើនឡើងដល់១៧៨.២៤៣យ័ន(២៥.៧១១ដុល្លារអាមេរិក) នៅក្នុងឆ្នាំ២០២២។

ការដាក់កំហិតលើការលក់ផ្ទះចេញវិញ (Resale) គឺជាឧបករណ៍សំខាន់ ដែលនិយតករធ្លាប់បានប្រើដើម្បីទប់ស្កាត់ការទិញទុកចំណេញនៅក្នុងវិស័យអចលនទ្រព្យ ក្នុងគោលបំណងដើម្បីទប់ទល់នឹងតម្លៃកើនឡើងខ្ពស់ក្នុងរយៈពេលប៉ុន្មានឆ្នាំថ្មីៗនេះ។

ចំណាត់ការនេះធ្លាប់ត្រូវបានប្រើប្រាស់ដោយអាជ្ញាធរចិនចាប់តាំងពីឆ្នាំ២០១៧ រួមជាមួយនឹងវិធានការផ្សេងទៀតដូចជាការកំណត់បរិមាណផ្តល់ប្រាក់កម្ចី ការរឹតបន្តឹងលើការទិញផ្ទះដើម្បីទប់ទល់នឹងស្ថានភាពផ្ទះច្រើនតែគ្មានអ្នកណារស់នៅ។

ទោះបីជាយ៉ាងនេះក្តី អ្វីៗទាំងអស់បានផ្លាស់ប្តូរនៅក្នុងខែវិច្ឆិកា ឆ្នាំ២០២២ នៅពេលដែលរដ្ឋបាលក្នុងតំបន់បានងាកទៅរកគោលនយោបាយគាំទ្រដើម្បីជួយសង្គ្រោះដល់វិស័យអចលនទ្រព្យដែលកំពុងតែជួបបញ្ហា ចាប់ពីការធ្វើឱ្យវាកាន់តែងាយស្រួលសម្រាប់អ្នកអភិវឌ្ឍន៍ក្នុងការទទួលបានមូលនិធិរហូតដល់ការបញ្ចុះអត្រាប្រាក់កម្ចីទិញផ្ទះដើម្បីជំរុញការលក់៕

ដោយ: វឌ្ឍនៈ

ភ្នំពេញ ៖ គម្រោងអភិវឌ្ឍន៍ហេដ្ឋារចនាសម្ព័ន្ធធំ៣នៅក្នុងប្រទេសកម្ពុជា គ្រោងនឹងចាប់ផ្ដើមអភិវឌ្ឍន៍នៅឆ្នាំនេះ និងឆ្នាំ ក្រោយ ហើយគម្រោងធំបីនេះ គ្រោងនឹងចំណាយថវិកាប្រមាណជិត៧០០លានដុល្លារអាមេរិក ។

តាមរយៈគម្រោងធំៗទាំងបីនេះ នឹងជំរុញកំណើនសេដ្ឋកិច្ចកម្ពុជាឱ្យមានសន្ទុះមួយកម្រិតទៀត ពីព្រោះគម្រោងទាំង៣នឹងជួយបម្រើដល់ចរន្តសេដ្ឋកិច្ច ការដឹកជញ្ជូននិងការធ្វើដំណើររបស់ប្រជាពលរដ្ឋរស់នៅតាមតំបន់ទាំងនោះ ។

គម្រោងអាទិភាពទី១ គ្រោងនឹងបើកការដ្ឋានសាងសង់ដំណាលគ្នានឹងផ្លូវល្បឿនលឿនភ្នំពេញ បាវិត នៅពាក់កណ្ដាលឆ្នាំ២០២៣នេះ ។ គម្រោងនេះ គឺស្ពានតភ្ជាប់ពីផ្លូវជាតិលេខ១ទៅស្រុកល្វាឯមខេត្តកណ្ដាលគ្រោងនឹងចំណាយថវិកាប្រមាណ២០០លានដុល្លារអាមេរិកសម្រាប់តភ្ជាប់ជាមួយនឹងផ្លូវល្បឿនលឿនភ្នំពេញ បាវិត ហើយគម្រោងនេះក៏នឹងត្រូវបញ្ចប់ដំណាលគ្នានឹងផ្លូវល្បឿនលឿនភ្នំពេញ បាវិតផងដែរ ។ថវិកាសម្រាប់សាងសង់ស្ពានមួយនេះគឺជាថវិការបស់រដ្ឋទាំងស្រុង ។

គម្រោងអាទិភាពទី២ គឺស្ពាន ឆ្លងទន្លេពីភ្នំពេញ ទៅក្រុងអរិយក្សត្រ ដែលគម្រោងនេះត្រូវបានរាជរដ្ឋាភិបាលចុះហត្ថលេខាជាមួយភាគីកូរ៉េរួចហើយ ដោយគ្រោងនឹងចំណាយថវិកាប្រមាណ ២៤៥លានដុល្លារអាមេរិក ។ គម្រោងនេះក៏គ្រោងនឹងបើកការដ្ឋានសាងសង់នៅចុងឆ្នាំ ២០២៣ ឬដើមឆ្នាំ ២០២៤ខាងមុខ ដែលវានឹងបម្រើដល់ការធ្វើដំណើររបស់ពលរដ្ឋក្នុងរាជធានីភ្នំពេញ និងតំបន់ក្រុងអរិយក្សត្រ និងប្រជាពលរដ្ឋនៅប៉ែកខាងកើតភ្នំពេញផងដែរ ។

គម្រោងមួយទៀតដែលចាត់ទុកជាគម្រោងធំមួយរបស់រដ្ឋាភិបាលកម្ពុជានោះ គឺគម្រោងសាងសង់ផ្លូវលេខ៥០C តភ្ជាប់ពីខេត្តកំពង់ឆ្នាំងទៅខេត្តកំពង់ធំ មានប្រវែង ជាង៥០គីឡូម៉ែត្រ ។ គម្រោងនេះត្រូវបានសិក្សាចប់សព្វគ្រប់ហើយ ដោយគ្រោងនឹងចំណាយថវិកាប្រមាណ២៥០លានដុល្លារអាមេរិក និងកំពុងស្វែងរកថវិកាសម្រាប់ដំណើរការ ។ យ៉ាងណារដ្ឋាភិបាលបានដាក់ផែនការត្រូវរកថវិកាឱ្យបាននៅក្នុងឆ្នាំ ២០២៤ ដើម្បីបើកការដ្ឋានសាងសង់នៅក្នុងឆ្នាំក្រោយនេះ ។គម្រោងនេះដែរនឹងត្រូវសង់ស្ពានមួយប្រវែងជាង៣គីឡូម៉ែត្រដែលចាត់ទុកជាស្ពានវែងជាងគេនៅក្នុងប្រទេសកម្ពុជា ។

តាមរយៈគម្រោងធំៗដែលរដ្ឋាភិបាលគ្រោងអភិវឌ្ឍន៍នេះ រំពឹងថានឹងជំរុញឱ្យមានការវិនិយោគលើអចលនទ្រព្យនិងដីធ្លីនៅតំបន់ទាំងនោះបានមួយកម្រិតទៀតផងដែរ ជាក់ស្ដែងគម្រោងស្ពានពីភ្នំពេញ ទៅក្រុងអរិយក្សត្រ បានជំរុញឱ្យតម្លៃដីធ្លីនៅក្រុងអរិយក្សត្រហក់ឡើងមួយកម្រិតទៀត ទោះបីជាស្ថានភាពសេដ្ឋកិច្ចពិភពលោកនាពេលនេះមិនទាន់ប្រាកដប្រជាក្ដី ។

ម្យ៉ាងវិញទៀត បើតាមអ្នកអភិវឌ្ឍន៍អចលនទ្រព្យមួយចំនួនបានបង្ហាញ ក្រោយពីរដ្ឋាភិបាលបានបង្ហាញពីផែនការអភិវឌ្ឍស្ពានតភ្ជាប់ភ្នំពេញ ក្រុងអរិយក្សត្រមកឃើញថាអ្នកអភិវឌ្ឍន៍ជាច្រើនបានចាប់ផ្ដើមចូលទៅកាន់តំបន់អរិយក្សត្រដើម្បីនិងត្រៀមអភិវឌ្ឍន៍គម្រោងរបស់ខ្លួន ជាពិសេសគម្រោងអភិវឌ្ឍន៍លំនៅឋាន ដោយរំពឹងថាប្រជាពលរដ្ឋកាន់តែច្រើនទៅរស់នៅក្រុងថ្មីនៃតំបន់អរិយក្សត្រ ៕

ដោយ: គង់ លាងហួរ
បាងកក: ក្រុមហ៊ុនលក់រាយ និងអភិវឌ្ឍន៍អចលនទ្រព្យ Central Pattana Plc (CPN) គ្រោងបង្កើតគម្រោងប្រើប្រាស់ចម្រុះដ៏ធំចំនួន៤បន្ថែមទៀតក្នុងរយៈពេល៥ទៅ១០ឆ្នាំខាងមុខ តាមរយៈការបណ្តាក់ទុនរួមគ្នា និងតាមរយៈការវិនិយោគផ្ទាល់របស់ខ្លួន។

លោកស្រី Wallaya Chirathivat ដែលជាប្រធាន និងជានាយកប្រតិបត្តិរបស់ក្រុមហ៊ុន បានមានប្រសាសន៍ថា គម្រោងទាំង៤នឹងត្រូវបានអភិវឌ្ឍលើផ្ទៃដីដែលមានទំហំយ៉ាងតិច៤ហិកតាក្នុងមួយគម្រោង។

គម្រោងនីមួយៗនឹងមានទំហំផ្ទៃសរុបនៃអចលនទ្រព្យទាំងមូលជាង៣៥០.០០០ម៉ែត្រការ៉េ និងថវិកាវិនិយោគជាង២០ពាន់លានបាត(ប្រហែល៥៦៩,៧លានដុល្លារ) ពោលគឺគម្រោងទាំង៤នោះមានតម្លៃសរុប៨០ពាន់លានបាត(២,២៨ពាន់លានដុល្លារ)។

ក្រុមហ៊ុននេះកាន់កាប់ដីសម្រាប់អភិវឌ្ឍគម្រោងប្រើប្រាស់ចម្រុះរបស់ខ្លួននៅក្នុងទីក្រុងបាងកក និងខេត្តជុំវិញ ដោយរំពឹងថានឹងប្រកាសគម្រោងមួយ ឬពីរនៅឆ្នាំនេះ រួមទាំងគម្រោងមួយទៀតនៅ Magic Land លើផ្លូវ Phahon Yothinផងដែរ ។

លោកស្រី Wallaya បានអះអាងថា “គម្រោងទាំងនេះអាចមានសក្តានុពលក្នុងការលើកកំពស់ទីក្រុងបាងកក ទៅជាទីក្រុងលំដាប់ថ្នាក់ពិភពលោក ស្របជាមួយនឹងទីក្រុងធំៗដូចជា ញូវយ៉ក តូក្យូ និងសេអ៊ូល”។

ក្នុងចំណោមគម្រោងប្រើប្រាស់ចម្រុះខ្នាតធំថ្មីចំនួន៤នោះ ដែលគ្រោងនឹងអភិវឌ្ឍនាពេលអនាគត ក្នុងនោះគម្រោងចំនួន៣ នឹងត្រូវធ្វើឡើងតាមរយៈការបណ្តាក់ទុនរួមគ្នា ហើយគម្រោងមួយទៀតនឹងត្រូវបានអភិវឌ្ឍតែតាមរយៈការវិនិយោគផ្ទាល់របស់ក្រុមហ៊ុនប៉ុណ្ណោះ។

លោក Naparat Sriwanvit អនុប្រធានប្រតិបត្តិជាន់ខ្ពស់ និងជាប្រធានផ្នែកហិរញ្ញវត្ថុរបស់ក្រុមហ៊ុន CPN បានអះអាងថា នៅឆ្នាំនេះ ក្រុមហ៊ុននឹងបែងចែកប្រាក់ចន្លោះពី២៣ទៅ៣៥ពាន់លានបាត ដើម្បីពង្រីកអាជីវកម្មរបស់ខ្លួន ដោយថវិកា៧០ភាគរយគ្រោងសម្រាប់គម្រោងលក់រាយក្នុងស្រុក និងការប្រើប្រាស់ចម្រុះ។

លោក Chanavat Uahwatanasakul ប្រធានផ្នែកអភិវឌ្ឍន៍ និងពាណិជ្ជកម្មរបស់ក្រុមហ៊ុនបានមានប្រសាសន៍ថា “សម្រាប់អាជីវកម្មលក់រាយ ក្រុមហ៊ុននឹងចំណាយប្រាក់៤,៥ពាន់លានបាត ដើម្បីអភិវឌ្ឍគម្រោង Central Krabi ដែលគ្រោងនឹងបើកនៅត្រីមាសទី៤ ឆ្នាំ២០២៤”។

គម្រោង Krabi នេះនឹង​ត្រូវ​បាន​បង្កើត​ឡើង​ក្រោម​គោល​គំនិត “New Gateway to Southern Paradise” ដែល​រួម​មាន​ផ្សារ​ទំនើប គម្រោង​លំនៅដ្ឋាន និង​សណ្ឋាគារ។

ក្រុមហ៊ុន CPN ក៏គ្រោងកែលម្អគម្រោង Nawamin City Avenue ដែលមានស្រាប់របស់ខ្លួន ហើយនឹងជួសជុលផ្សារទំនើបចំនួន៤ផ្សេងទៀតនៅក្នុងឆ្នាំនេះ ដើម្បីផ្តល់ជូនអតិថិជននូវបទពិសោធន៍កាន់តែប្រសើរឡើង។

ទាក់ទងនឹងគម្រោងលំនៅដ្ឋាន លោក Kree Dejchai ប្រធានផ្នែកអាជីវកម្មលំនៅដ្ឋានបានមានប្រសាសន៍ថា គម្រោងថ្មីចំនួន៧ ដែលមានតម្លៃជាង៩ពាន់លានបាតនឹងត្រូវបានដាក់ឱ្យដំណើរការនៅឆ្នាំនេះ រួមទាំងខុនដូ Ecent ថ្មីចំនួន៣ និងគម្រោងលំនៅដ្ឋានចំនួន៤។