ដោយ: គង់ លាងហួរ
សិង្ហបុរី: មន្ត្រីពាណិជ្ជកម្មកំពូលក្នុងប្រទេសសិង្ហបុរីបានអះអាងថា សិង្ហបុរីមានឆន្ទៈក្នុងការសម្របសម្រួលកិច្ចសន្ទនារវាងសហរដ្ឋអាមេរិក និងចិន ដើម្បីជួសជុលទំនាក់ទំនងរបស់ពួកគេ ខណៈលោកបានចាត់ទុកភាពតានតឹងរវាងប្រទេសមហាអំណាចសេដ្ឋកិច្ចទាំង២ជាផលប៉ះពាល់ដល់ពិភពលោក។

លោក Gan Kim Yong រដ្ឋមន្ត្រីក្រសួងពាណិជ្ជកម្ម និងឧស្សាហកម្មសិង្ហបុរី បានថ្លែងប្រាប់ទូរទស្សន៍ Bloomberg ក្នុងបទសម្ភាសន៍មួយថា “ភាពតានតឹងរវាងសហរដ្ឋអាមេរិក និងចិនមានផលវិបាកធ្ងន់ធ្ងរសម្រាប់ពិភពលោកទាំងមូល ហើយដូចដែលអ្នកដឹងសិង្ហបុរីតែងតែចង់ធ្វើជំនួញជាមួយប្រទេសទាំងពីរ”។

សេដ្ឋកិច្ចរបស់សិង្ហបុរីពឹងផ្អែកខ្លាំងលើពាណិជ្ជកម្ម ហើយងាយរងគ្រោះទៅនឹងវិបត្តិ ដែលបណ្តាលមកពីការរំខានក្នុងពាណិជ្ជកម្ម ជាពិសេសពាក់ព័ន្ធនឹងប្រទេសចិន ដែលជាដៃគូពាណិជ្ជកម្មលេខ១របស់រដ្ឋ។

ភាពតានតឹងពាណិជ្ជកម្មចុងក្រោយនេះកើតចេញពីកិច្ចខិតខំប្រឹងប្រែងរបស់សហរដ្ឋអាមេរិកក្នុងការទប់ស្កាត់ការចូលទៅកាន់បច្ចេកវិទ្យាបន្ទះ semiconductor ដ៏សំខាន់របស់ចិន និងដើម្បីដាក់ការត្រួតពិនិត្យការនាំចេញ។

លោក Gan បាន​មានប្រសាសន៍ដោយ​សំដៅ​ទៅ​លើ​ការ​គ្រប់​គ្រង​ការ​នាំ​ចេញ​ថា“យើង​ទាំង​អស់​គ្នា​មាន​ការ​ព្រួយ​បារម្ភ និង​កំពុងពិនិត្យមើល​ការវិវឌ្ឍ​នេះ​យ៉ាង​ដិតដល់”។

ប្រទេសសិង្ហបុរី និងរដ្ឋាភិបាលរបស់បណ្តាប្រទេសអាស៊ីអាគ្នេយ៍ផ្សេងទៀតបានផ្តោតទៅលើការកសាងទំនាក់ទំនងរបស់ពួកគេជាមួយសហរដ្ឋអាមេរិកជុំវិញកិច្ចពិភាក្សាស្តីពីក្របខ័ណ្ឌសេដ្ឋកិច្ចឥណ្ឌូប៉ាស៊ីហ្វិករបស់សេតវិមាន។

ខណៈប្រទេសចូលរួមជាច្រើនបានអបអរសាទរការយកចិត្តទុកដាក់ជាថ្មីរបស់ទីក្រុងវ៉ាស៊ីនតោន លើតំបន់១០ប្រទេស និងប្រទេសជិតខាងរបស់ខ្លួន កិច្ចព្រមព្រៀងនោះបានរងការរិះគន់យ៉ាងខ្លាំង ដោយសារវាផ្តោតខ្លាំងពេកដើម្បីប្រឆាំងចិន ជាពិសេសគ្មានកិច្ចព្រមព្រៀងចូលទីផ្សារ ដែលប្រទេសពឹងផ្អែកលើពាណិជ្ជកម្មនៅទូទាំងតំបន់អាស៊ីចង់បាន។

ល្បឿននៃការពង្រីកសេដ្ឋកិច្ចរបស់ប្រទេសសិង្ហបុរីត្រូវបានគេរំពឹងថា នឹងធ្លាក់ចុះចន្លោះពី០,៥ទៅ២,៥ភាគរយនៅឆ្នាំនេះ និងមានទំនុកចិត្តក្នុងការជៀសផុតពីវិបត្តិសេដ្ឋកិច្ច ចំពេលមានការជំរុញពីការបើកដំណើរការឡើងវិញរបស់ប្រទេសចិន។

លោក Gan បានបញ្ជាក់ថា “យើងពឹងផ្អែកលើការរីកចម្រើនរបស់ពិភពលោក ដើម្បីជំរុញកំណើនសេដ្ឋកិខ្ចរបស់ប្រទេសសិង្ហបុរី ហើយការព្យាករណ៍នឹងត្រូវបានកែសម្រួលអាស្រ័យលើបរិយាកាសពិភពលោកដែលកំពុងវិវត្តទៅមុខ”៕

ដោយៈ សុខុម

មូស្គូ: ប្រទេសម៉ុលដាវី (Moldova) អាចក្លាយជា “អ៊ុយក្រែន បន្ទាប់”។  នេះជាការលើកឡើងរបស់លោក Sergey Lavrov រដ្ឋមន្ត្រីការបរទេសរុស្ស៊ី ដែលបានបង្កពិភពលោក មានការព្រួយបារម្ភយ៉ាងខ្លាំង។ នេះបើយោងតាមសារព័ត៌មាន Japan Times ចុះផ្សាយកាលពីថ្ងៃព្រហស្បតិ៍ ទី៩ ខែមីនា។

ប្រទេសម៉ុលដាវី មានស្ថានភាពស្រដៀង នឹងប្រទេសអ៊ុយក្រែន នៅមុនពេលលោក ពូទីន បើកការវាយប្រហារចូលឈ្លានពានកាលពីមួយឆ្នាំមុន។ ប្រទេសទាំងពីរដែលធ្លាប់ជាផ្នែកមួយ នៃសហភាពសូវៀត ទទួលបានឯករាជ្យឡើងវិញ បន្ទាប់ពីសង្គ្រាមត្រជាក់បញ្ចប់។

ប្រទេសទាំងពីរ នៅក្នុងរយៈពេលប៉ុន្មានទសវត្សរ៍ចុងក្រោយនេះ បានងាកទៅរកលោកលិច ដោយមានបំណងប្រាថ្នាចង់ចូលជាសមាជិ​ករបស់សហភាពអឺរ៉ុប នៅថ្ងៃណាមួយ។ កាលពីឆ្នាំមុន សហភាពអឺរ៉ុប បានជួយពន្លឿនឱ្យប្រទេសអ៊ុយក្រែន និងប្រទេសម៉ុលដាវី បានចូលជាបេក្ខភាពផ្លូវការ សម្រាប់ការដាក់ពាក្យសុំ ក្លាយជាសមាជិកសហភាពអឺរ៉ុប។

រដ្ឋាភិបាលក្រុងមូស្គូអះអាងថា ប្រទេសទាំងពីរថែមទាំងចង់ចូលរួមជាសមាជិក នៃអង្គការបក្សសម្ព័ន្ធយោធា NATO និងសម្របតាម “លោកខាងលិច” ដែលដឹកនាំដោយសហរដ្ឋអាមេរិក នៅក្នុងការប្រឆាំងនឹងប្រទេសរុស្ស៊ី។

លោក ពូទីន និងលោក Sergey Lavrov ក៏បានគូសបញ្ជាក់ដែរថា ប្រទេសម៉ុលដាវី ដូចអ៊ុយក្រែន ដែរចាប់តាំងពីឆ្នាំ២០១៤ គឺមានតំបន់ភាគខាងកើតមួយឱ្យឈ្មោះថា Transnistria ដែលជាមានក្រុមបំបែកខ្លួនជនជាតិរុស្ស៊ី។ តំបន់ Transnistria ក៏មានទាហានរុស្ស៊ី ជាង១.០០០នាក់ ព្រមទាំងឃ្លាំងរំសេវដ៏ធំមួយផងដែរ។

វត្តមានរបស់ជនជាតិរុស្សី នៅក្នុងប្រទេសម៉ុលដាវី ដូចជានៅក្នុងប្រទេសអ៊ុយក្រែន និងបណ្តាប្រទេសផ្សេងៗទៀត នៃអតីតសហភាពសូវៀត ដែរ អនុញ្ញាតឱ្យលោក ពូទីន ផ្សព្វផ្សាយរឿងប្រឌិតថា ប្រជាជនរុស្ស៊ី កំពុងរងការគាបសង្កត់ ហើយត្រូវការការការពារ និងការអន្តរាគមន៍ពីលោក។

បន្ទាប់មកលោក ពូទីន ប្រើពាក្យកុហកទាំងនេះ ធ្វើជាលេសដើម្បីបើកការឈ្លានពានបន្ថែមទៀត។

នៅពេលលោក Sergey Lavrov លើកឡើងថា ប្រទេសម៉ុលដាវី អាចក្លាយជាអ៊ុយក្រែនបន្ទាប់ គឺលោកកំពុងបញ្ជាក់ថា ប្រទេសនេះកំពុងតែព្យាយាម ចុះចូលជាមួយលោកខាងលិច ដែលតម្រូវឱ្យរុស្ស៊ី ចូលលុកលុយ ឬចូលត្រួតត្រាកាន់កាប់ ឬក៏បើកការវាយប្រហារតែម្ដងដើម្បី “ការពារខ្លួន”៕ Japan Times៕

សុខុម

ប៉េកាំង: ដោយបន្តផ្តល់អាទិភាព លើការអភិវឌ្ឍនៅឆ្នាំ២០២៣ ប្រទេសចិន នឹងប្រឹងប្រែងឱ្យកាន់តែខ្លាំង ដើម្បីបង្កើនតម្រូវការក្នុងស្រុក ធ្វើឱ្យប្រសើរឡើងនូវបរិយាកាសធុរកិច្ច សម្រាប់ក្រុមហ៊ុនឯកជន និងការពារហានិភ័យហិរញ្ញវត្ថុ ក្នុងចំណោមកិច្ចខិតខំប្រឹងប្រែងផ្សេងៗទៀត។

គណៈកម្មាធិការកិច្ចការហិរញ្ញវត្ថុ និងសេដ្ឋកិច្ចនៃសភាប្រជាជនចិន បានអះអាងកាលពីថ្ងៃព្រហស្បតិ៍ ទី៩ ខែមីនា ថា ខ្លួនបានចេញផ្សាយរបាយការណ៍ពិនិត្យផ្ទៀងផ្ទាត់ លើការអនុវត្តផែនការអភិវឌ្ឍន៍សេដ្ឋកិច្ច និងសង្គមថ្នាក់ជាតិនៅឆ្នាំ២០២២ និងសេចក្តីព្រាងផែនការអភិវឌ្ឍន៍នៅឆ្នាំ២០២៣ ដាក់ជូនដោយក្រុមប្រឹក្សារដ្ឋ (State Council) ដែលជាគណៈរដ្ឋមន្ត្រីនៃប្រទេសចិន។

គណៈកម្មាធិការនេះនិយាយថា ២០២៣ គឺជាឆ្នាំដំបូងសម្រាប់ប្រទេសចិន អនុវត្តឱ្យបានពេញលេញ នូវគោលការណ៍ណែនាំនៃសមាជជាតិលើកទី២០ របស់បក្សកុម្មុយនីស្តចិន (CPC) ហើយវាមានសារៈសំខាន់ណាស់ សម្រាប់ប្រទេសនេះ ធ្វើការងារឱ្យបានល្អក្នុងការអភិវឌ្ឍសេដ្ឋកិច្ច និងសង្គម។

ជាការចាប់ផ្តើម វាពិតជាមានសារៈសំខាន់ណាស់ ក្នុងការរក្សាដំណើរការសេដ្ឋកិច្ចប្រកបដោយស្ថិរភាព និងភាពរឹងមាំ។ បន្ថែមពីលើការធ្វើឱ្យប្រសើរឡើង នូវការរំពឹងទុកផ្នែកចិត្តសាស្រ្តសង្គម និងបង្កើនទំនុកចិត្តលើការអភិវឌ្ឍ វាក៏មានសារៈសំខាន់ផងដែរ ក្នុងការអនុវត្តគោលនយោបាយសារពើពន្ធសកម្ម និងគោលនយោបាយរូបិយវត្ថុប្រកបដោយការប្រុងប្រយ័ត្ន ដោយផ្អែកលើមូលដ្ឋាន នៃការស្វែងរកវឌ្ឍនភាព ខណៈរក្សាបាននូវស្ថិរភាព។

យោងតាមសេចក្ដីព្រាងថវិកា ដែលដាក់ជូនដោយក្រុមប្រឹក្សារដ្ឋកាលពីថ្ងៃច័ន្ទ ដើមសប្ដាហ៍នេះបង្ហាញថា នៅឆ្នាំ២០២៣ ប្រាក់ចំណូ លជាតិនៃប្រទេសចិន ត្រូវបានព្យាករថានឹងកើនឡើង ដល់៣,៩២ទ្រីលានដុល្លារអាមេរិក ដែលកើនឡើង៦,៧%បើធៀបនឹងឆ្នាំ២០២២ ខណៈការចំណាយរំពឹងថា នឹងកើនឡើងដល់៣,៩៥ទ្រីលានដុល្លារអាមេរិក ដោយកើនឡើង៥,៦%៕ Global Times៕

  ដោយៈ គង់ ម៉ាលីនណា

    ភ្នំពេញៈ មន្រ្តីជាន់ខ្ពស់ក្រសួងសាធារណៈការ និងដឹកជញ្ជូនបាន ចុះពិនិត្យមើលដំណោះស្រាយ ប្រព័ន្ធរំដោះទឹកនៅតាមការដ្ឋាន នៃគម្រោងស្តារ និងលើកកម្រិតគុណភាពផ្លូវជាតិលេខ៤១ ដើម្បីធានាដល់ការបញ្ចៀស នូវគ្រោះមហន្តរាយជំនន់ទឹកភ្លៀង ដែលបង្កហានិភ័យលិចលង់ ដល់ហេដ្ឋារចនាសម្ព័ន្ធសាធារណៈ ក៏ដូចជាទ្រព្យសម្បត្តិ និងអាយុជីវិតរបស់ប្រជាពលរដ្ឋ។

លោកស៊ុយ សាន រដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញដឹកនាំក្រុមការងារបច្ចេកទេស ក្រសួងចុះពិនិត្យមើលដំណោះស្រាយ ប្រព័ន្ធរំដោះទឹកនៅតាមការដ្ឋានផ្លូវជាតិលេខ៤១ ដោយមានការអញ្ជើញចូលរួមពីតំណាងក្រសួងធនធាន ទឹក និងឧតុនិយម តំណាងក្រុមហ៊ុនសាជីវកម្មស្ពានថ្នល់ចិន (CRBC) ប្រធានមន្ទីរសាធារណការ និងដឹកជញ្ជូនខេត្តកំពង់ស្ពឺ និងខេត្តកំពត តំណាងមន្ទីរសាធារណការខេត្តកណ្ដាល និងខេត្តតាកែវ និងសមាជិកសមាជិ កាក្រុមការងារគម្រោងជាច្រើនរូបផងដែរ។

ការចុះពិនិត្យនេះធ្វើឡើងក្នុងគោលបំណង ដើម្បីធានាដល់ការបញ្ចៀសនូវគ្រោះមហន្តរាយ ជាពិសេសជំនន់ទឹកភ្លៀងដែលបង្កឱ្យមានហានិភ័យលិចលង់ ដល់ហេដ្ឋារចនាសម្ព័ន្ធសាធារណៈ ក៏ដូចជាទ្រព្យសម្បត្តិ និងអាយុជីវិតរបស់ប្រជាពលរដ្ឋ ក្នុងបរិបទបម្រែបម្រួលអាកាសធាតុ ដែលអាចកើតមានឡើងជាយថាហេតុនាពេលអនាគត។

គម្រោងស្តារ និងលើកកម្រិតគុណភាពផ្លូវជាតិលេខ៤១ ត្រូវបានប្រកាសបើកការដ្ឋាន កាលពីថ្ងៃទី២៦ ធ្នូ ២០២២ ក្រោមអធិបតីភាពដ៏ខ្ពង់ខ្ពស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។

ផ្លូវនេះមានប្រវែងសរុបប្រមាណ៩៥,២៧គីឡូម៉ែត្រ ចាប់ពីថ្នល់ ទទឹង (ចំណុចប្រសព្វផ្លូវជាតិលេខ៤) ខេត្តកណ្តាល ទៅដល់ស្រុកជុំគិរី (ចំណុចប្រសព្វផ្លូវជាតិលេខ៣) ខេត្តកំពត ដែលនឹងត្រូវសាងសង់ជាប្រភេទផ្លូវក្រាលបេតុងកៅស៊ូ AC កម្រាស់សង់ទីម៉ែត្រ និងពង្រីកទទឹងតួផ្លូវរហូតដល់១២ម៉ែត្រ៕

ស្របជាមួយគ្នាផងដែរ នឹងសាងសង់បន្ថែមសំណង់សិល្បការ្យផ្សេងៗរួមមាន ពង្រីកស្ពានចាស់ចំនួន១កន្លែង ប្រវែងសរុប២០០ម៉ែត្រ ដាក់លូគ្រប់ប្រភេទចំនួន៣១៥កន្លែង បំពាក់កាមេរ៉ាត្រួតពិនិត្យល្បឿនចំនួន០៨កន្លែង រួមទាំងបំពាក់ផ្លាកសញ្ញាចរាចរណ៍ គំនូសសញ្ញាចរាចរណ៍ បង្គោលគីឡូម៉ែត្រ និងបង្គោលសុវត្ថិភាពផងដែរ។

គម្រោងនេះ នឹងត្រូវអនុវត្តការសាងសង់ ដោយប្រើរយៈពេលសរុបចំនួន៤០ខែ នឹងបញ្ចប់នៅអំឡុងឆ្នាំ២០២៦ គ្រោងចំណាយថវិកាសរុបប្រមាណ៦៧លានដុល្លារអាមេរិក ដែលជាឥណទានសម្បទានពីរដ្ឋាភិបាល នៃសាធារណរដ្ឋប្រជាមានិតចិន រួមជាមួយនឹងថវិកាបដិភាគរបស់រាជរដ្ឋាភិបាលកម្ពុជា សម្រាប់ការដោះស្រាយផលប៉ះពាល់ និងពន្ធអាករផ្សេងៗ៕

ដោយ៖ វឌ្ឍនៈ

ភ្នំពេញ៖ តំបន់ព្រែកព្នៅ ប៉ែកខាងជើងរាជធានីភ្នំពេញ កាលពីប៉ុន្មានឆ្នាំមុន គ្រាន់តែជាតំបន់ជាយក្រុង និងជាតំបន់ស្ងប់ស្ងាត់មួយប៉ុណ្ណោះ ប៉ុន្តែក្រោយពីមានការអភិវឌ្ឍហេដ្ឋារចនាសម្ព័ន្ធ តភ្ជាប់ចូលទៅកាន់តំបន់នោះ ជាពិសេសក្រោយពីរាជរដ្ឋាភិបាល សម្រេចសាងសង់ពហុកីឡដ្ឋានជាតិថ្មីនៅតំបន់នោះ ក៏ឃើញមានគម្រោងវិនិយោគឯកជននិងរដ្ឋជាច្រើន បានចូលទៅទីតាំងនោះ និងបានធ្វើឱ្យតំបន់នោះក្លាយជាតំបន់ទាក់ទាញថ្មីមួយនៅរាជធានីភ្នំពេញ។

លោកឆេ វិសិដ្ឋ អ្នកគ្រប់គ្រងអភិវឌ្ឍន៍មួយរបស់ក្រុមហ៊ុនWorldbridge បានឱ្យដឹងថា ចាប់តាំងពីមានការសាងសង់ពហុកីឡដ្ឋានជាតិថ្មី នៅតំបន់ប៉ែកខាងជើងរាជធានីភ្នំពេញ ឃើញថាតំបន់ជុំវិញពហុកីឡដ្ឋានជាតិថ្មីនេះ មានការទាក់ទាញវិនិយោគិនជាតិ និងអន្តរជាតិជាច្រើន ចូលទៅបណ្ដាក់ទុន និងចាប់ផ្ដើមសាងសង់គម្រោងរបស់ពួកគេជាបន្តបន្ទាប់។

លោកបន្តថា ក្រៅពីគម្រោងដ៏ធំមួយរបស់Worldbridge ក៏ឃើញថា មានគម្រោងសាលារៀនរដ្ឋ និងឯកជន  ផ្សារទំនើបម៉ាក្រូ គម្រោងអភិវឌ្ឍន៍លំនៅឋានជាច្រើន បានចាប់ផ្ដើមសាងសង់ផ្គត់ផ្គង់ជូនអតិថិជនរបស់ខ្លួន នៅតំបន់ជុំវិញពហុកីឡដ្ឋានជាតិថ្មី ហើយក៏រំពឹងថាគម្រោងជាច្រើន នឹងចូលទៅកាន់តំបន់នោះ ដែលនឹងជំរុញឱ្យតំបន់នោះ កាន់តែមានការអភិវឌ្ឍ ។

អ្នកជំនាញ និងអ្នកវិនិយោគអចលនទ្រព្យជាច្រើន បានមើលឃើញថា តំបន់ប៉ែកខាងជើងរាជធានីភ្នំពេញ ក្នុងរយៈពេលប៉ុន្មានឆ្នាំកន្លងមកនេះ បានបង្កើតសក្ដានុពលកាន់តែខ្លាំង សម្រាប់ទាក់ទាញការវិនិយោគ ហើយតំបន់នេះ នឹងក្លាយទៅជាតំបន់ពាណិជ្ជកម្ម និងលំនៅឋាន ក្នុងរយៈពេលខ្លីខាងមុខនេះ ដោយបច្ចុប្បន្នមានគម្រោងអភិឌ្ឍន៍លំនៅឋានជាច្រើន បានបោះទីតាំងនិងកំពុងអភិវឌ្ឍន៍យ៉ាងមមាញឹករួចហើយដែរ។

លោកថាន់ ចាន់ណា អ្នកអភិវឌ្ឍន៍លំនៅឋានមួយរូបនៅជាយក្រុងភ្នំពេញបានឱ្យដឹងថា សម្រាប់តំបន់ចាប់ពីស្ពានជ្រោយចង្វារទៅដល់មហាវិថីឈ្នះឈ្នះ ឃើញមានការអភិវឌ្ឍលំនៅឋាន តម្លៃខ្ពស់ៗសម្រាប់អ្នកមានចំណូលមធ្យមឡើងទៅ ហើយក៏ឃើញថាមានការអភិវឌ្ឍជាតំបន់ពាណិជ្ជកម្មជាបន្តបន្ទាប់ដែរ ។

លោកបានបន្តថា “អ្នកអភិវឌ្ឍន៍លំនៅឋានតម្លៃសមរម្យ ប្រ ហែលជាចូលមិនចុះទេ នៅក្នុងតំបន់នេះ ដោយសារតែតម្លៃដីធ្លីបានឡើងខ្ពស់ មិនអាចទិញដើម្បីអភិវឌ្ឍន៍ផ្ទះតម្លៃសមរម្យបាននោះទេ”៕

   ដោយៈ គង់ សូរិយា

    កោះកុងៈ លោកឈេង សុវណ្ណដា អភិបាលរង នៃគណៈអភិបា លខេត្តកោះកុង បានលើកឡើងសក្តានុពលរបស់ខេត្ត ដែលបាននិងកំពុងរីកចម្រើនយ៉ាងលឿន សមនឹងជាតារារះនាទិសនារតី។

លោកបានលើកឡើងបែបនេះ ក្នុងពិធីស្វាគមន៍លោកទិត រិទ្ធីពល អនុរដ្ឋលេខាធិការ និងជាអគ្គនាយកស្ដីទីពាណិជ្ជកម្មអន្តរជាតិ នៃក្រសួងពាណិជ្ជកម្ម ក្នុងសិក្ខាសាលាស្តីពី”ការជំរុញផលិតផលសក្ដានុពលកម្ពុជាទៅកាន់ទីផ្សារប្រទេសកាណាដា”។

លោកអភិបាលរងខេត្តបានលើកឡើងថា ដោយសារតែភាពអំណោយផល នៃទីតាំងភូមិសាស្ត្រជាប់ឆ្នេរសមុទ្រ និងភាពរីកចម្រើន នៃហេដ្ឋារចនាសម្ព័ន្ធ ខេត្តកោះកុង ដែលមានឆ្នេរសមុទ្រសរុបប្រវែង២៣៧គីឡូម៉ែត្រ  កំពុងទាក់ទាញវិនិយោគបន្ថែមទៀត តាមរយៈការបង្កើតតំបន់សេដ្ឋកិច្ចពិសេសជាបន្តបន្ទាប់។

ជាក់ស្តែង នៅខែវិច្ឆិកា ឆ្នាំ២០២០ ក្រុមហ៊ុនធំជាងគេមួយនៅប្រទេសកម្ពុជា រ៉ូយ៉ាល់គ្រុប ត្រូវបានអនុញ្ញាតិឱ្យធ្វើការវិនិយោគបង្កើតតំបន់សេដ្ឋ កិច្ចពិសេស នៅលើទំហំផ្ទៃដី១ម៉ឺនហិកតា នៅក្នុងឧទ្យានជាតិបុទុមសាគរ នាភូមិសាស្ត្រឃុំតានូន និងឃុំថ្មស ស្រុកបូទុមសាគរ ខេត្តកោះកុង។

បន្ទាប់ពីក្រុមហ៊ុន រ៉ូយ៉ាល់គ្រុប បង្កើតតំបន់សេដ្ឋកិច្ចពិសេសមួយនៅទីនេះ ខេត្តកោះកុង គឺមានតំបន់សេដ្ឋកិច្ចពិសេសសរុបចំនួនពីរ ដែលនឹងបង្កើតការងារបានជាច្រើន កន្លែងថែមទៀតជូនប្រជាពលរដ្ឋ។ ទាំងនេះ គឺដោយសារតែខេត្តកោះកុង បានស្គាល់ភាពរីកចម្រើនយ៉ាងច្រើនផ្នែកហេដ្ឋារចនាសម្ព័ន្ធនានា ក្នុងរយៈពេលប៉ុន្មានឆ្នាំចុងក្រោយនេះ ដូចជា គម្រោងសាងសង់ព្រលានយន្តហោះ ចំនួនពីរកន្លែង ដែលបាននឹងកំពុងសាងសង់ក្នុងពេលសព្វថ្ងៃនេះ។

ក្រៅពីនេះទៀត ខេត្តកោះបាននិងកំពុងសាងសង់ កំពង់ផែទឹកជ្រៅមួយផងដែរ ដើម្បីដឹកជញ្ជូនទំនិញទៅកាន់ រាជធានីខេត្តផ្សេងៗនៃប្រទេសកម្ពុជា ដែលជាភាពទាក់ទាញ សម្រាប់ក្រុមហ៊ុនផលិតទំនិញ ដើម្បីនាំចេញរបស់ប្រទេសកម្ពុជា និងនៅពេលខាងមុខខេត្តកោះកុង នឹងមានតំបន់សេដ្ឋកិច្ចច្រើនជាងខេត្តដទៃ ដោយមិនចាញ់ខេត្តព្រះសីហនុនោះឡើយ។

ខេត្តកោះកុង មានផ្លូវជាតិលេខ៤៨ តភ្ជាប់ខេត្តព្រះសីហនុ ទៅកាន់ខេត្តកោះកុង គឺជារបៀងមាត់សមុទ្រ ដែលបម្រើឱ្យមិនត្រឹមតែទំនាក់ទំនងផ្ទៃក្នុងរបស់កម្ពុជាទេ ក៏ប៉ុន្តែទំនាក់ទំនងរវាងថៃ កម្ពុជា និងវៀតណាម ដែលឆ្លងកាត់ រវាងមាត់សមុទ្រនេះ។ ប្រសិនបើវៀតណាមចង់យកទំនេញទៅប្រទេសថៃ ឆ្លងកាត់តាមផ្លូវនេះក៏រហ័ស ថៃចង់យក ទំនិញទៅវៀតណាម ក៏អាចឆ្លងកាត់តាមផ្លូវនេះ។

របៀងមាត់សមុទ្រនេះ ក៏ក្លាយជាតំបន់ទេសចរណ៍ដ៏គួរឱ្យទាក់ទាញ និងតំបន់ប៉ូលសេដ្ឋកិច្ចនៅទិសនារតី ដែលមុននេះមានក្នុងខេត្តព្រះសីហនុតែប៉ុណ្ណោះ។ តែឥឡូវនេះ គ្របដណ្តប់ខេត្តទិសនារតីរបស់យើង មានខេត្តព្រះសីហនុ ខេត្តកោះកុង ខេត្តកែប និងខេត្តកំពត ជាមួយនឹងប៉ូលសេដ្ឋកិច្ច ដ៏រីកចម្រើននិងមានសក្តានុពលខ្ពស់នៅពេលខាងមុខផងដែរ។

ក្រៅតែពីផ្លូវជាតិលេខ៤៨ ខេត្តកោះកុងក៏បានតភ្ជាប់យ៉ាងសំខាន់ជាមួយខេត្តបាត់ដំបង ពោធិ៍សាត់ ទៅខាងប៉ៃលិន បន្ទាយមានជ័យ តាមរយៈផ្លូវជាតិលេខ១០ ដែលនេះជាការសម្រួលដល់ការធ្វើដំណើររបស់ប្រជាពលរដ្ឋកម្ពុជា ដោយមិនចាំបាច់ធ្វើដំណើរឆ្លង កាត់តាមរាជធានីភ្នំពេញទៀតឡើយ និងនាំចេញកសិផល និងផលិតផលនានារបស់កសិករ និងឧស្សាហករកម្ពុជាទៅកាន់បរទេស បានដោយងាយស្រួល និងរួមចំណែកកាត់បន្ថយថ្លៃដើមផលិតកម្ម។

ក្រៅពីនេះនៅទូទាំងខេត្ត មានរោងចក្រ សហគ្រាស ឧស្សាហកម្ម ពាណិជ្ជកម្ម ទេសចរណ៍ សណ្ឋាគារ និងគ្រឹះស្ថានសំខានៗ ជាច្រើនកន្លែងទៀត ដែលរួមចំណែកកាត់បន្ថយ ការធ្វើចំណាកស្រុកទៅរកការងារធ្វើនៅក្រៅខេត្ត និងកាត់បន្ថយភាពក្រីក្រ របស់ប្រជាពលរដ្ឋបានមួយកម្រិតថែមទៀត៕

   ដោយៈ គង់ សូរិយា

    ភ្នំពេញៈ ឧបនាយករដ្ឋមន្រ្តីអូន ព័ន្ឋមុនីរ័ត្នរដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុបានស្នើសមភាគីកូរ៉េ ជួយសិក្សាគំរោងហេដ្ឋារចនាសម្ព័ន្ឋ តភ្ជាប់ជាមួយស្ពាន ដែលត្រៀមសាងសង់នាពេលខាងមុខនេះ។

លោកបានថ្លែងបែបនេះ ​ក្នុងជំនួប​កាលពី​ថ្ងៃទី៩ ខែមីនា ក្នុងជំនួបជាមួយលោកស្រី Kim Kyung Hee អគ្គនាយក​នៃ​ក្រសួង​សេដ្ឋកិច្ច និង​ហិរញ្ញវត្ថុ​កូរ៉េ​ខាងត្បូង នៅរាជ​ធានី​ភ្នំពេញ។

លោកបន្តថា ក្រសួង​សេដ្ឋកិច្ច គាំទ្រ​ឱ្យមាន​ការសិក្សា​គម្រោង គមនាគមន៍​នានា ដែលជា​ការតភ្ជាប់​ជាមួយ ​គម្រោង​សាងសង់​ស្ពាន​មិត្តភាព​កម្ពុជា- សាធារណរដ្ឋ​កូរ៉េ នៅប៉ែក​ខាងកើត​រាជធានី​ភ្នំពេញផងដែរ” ។

យោងតាមសេចក្តីប្រកាស​ព័ត៌មាន​ក្រសួង​សេដ្ឋកិច្ច និង​ហិរញ្ញវត្ថុ​កម្ពុជា​ ដែលបានចេញផ្សាយកាលពីថ្ងៃទី១០ ខែមីនា ថា លោក អូន ព័ន្ធមុនីរ័ត្ន បានថ្លែង​អំណរគុណ​ដល់​កូរ៉េ​ខាងត្បូង ដែល​បានសម្រេច​ផ្តល់​នូវការសន្យា​ស្តីពី​ ការផ្តល់​ឥណទាន​សម្បទាន តាមរយៈ​កិច្ចព្រមព្រៀង​ក្របខ័ណ្ឌ​ឆ្នាំ២០២២ -២០២៦ ដែល​មាន​ទំហំ​ទឹក​ប្រាក់​ចំនួន១៥០០ លាន​ដុល្លារ​អាមេរិក ដែលត្រូវ​បានចុះ​ហត្ថលេខា​កាលពី​ចុង​ឆ្នាំ២០២២។

សេចក្តី​ប្រកាស​ព័ត៌មានដដែល​បន្ត​ថា គិតចាប់​ពី​ឆ្នាំ ២០០១ មកដល់​ដំណាច់​ឆ្នាំ ២០២២ ភាគី​កូរ៉េ​ខាងត្បូង​បានសន្យា​ផ្តល់​ឥណទាន​សម្បទាន​ដែលមាន​ទឹក​ប្រាក់​សរុប​ ប្រមាណ១៨០០លានដុល្លារ​អាមេរិក។

សេចក្តីប្រកាស​ព័ត៌មាន​បញ្ជាក់​ថា ភាគី​ទាំង២ ក៏បាន​សន្យា​ថា នឹងបន្ត​ពង្រឹង និង​ពង្រីក​កិច្ចសហ​ប្រតិបត្តិការ​នានា​ តាមរយៈ​ការផ្ដល់​ហិរញ្ញប្បទាន​អភិវឌ្ឍន៍​ផ្លូវការ ក្នុងក្របខ័ណ្ឌ​ឥណទាន​សម្បទាន ដើម្បី​រួមចំណែក​លើកស្ទួយ​ សកម្មភាព​អភិវឌ្ឍន៍​សង្គម- សេដ្ឋកិច្ច​កម្ពុជា​ឱ្យកាន់តែ​មានភាព​រីកចម្រើន និង​អភិវឌ្ឍន៍​បន្ថែមទៀត ស្របតាម​យុទ្ធសាស្ត្រ​របស់រាជ​រដ្ឋាភិបាល​កម្ពុជា ជាពិសេស ការសិក្សា​ទៅលើ​គម្រោ​ង​អភិវឌ្ឍ​ហេដ្ឋារចនា​សម្ព័ន្ធ​ធំៗ​នានា ​សម្រាប់​ទុកជា​ប្រវត្តិសាស្ត្រ​នៃទំនាក់ទំនង​មិត្តភាព​រវាង​ប្រទេសទាំង២៕