ដោយ: គង់ លាងហួរ

ភ្នំពេញ: ប្រទេសកម្ពុជា​បានចាត់ទុក​ឆ្នាំ​២០២៣នេះ ជា​ឆ្នាំ​ដ៏សំខាន់​មួយ សម្រាប់​ទាក់ទាញ​ភ្ញៀវទេសចរ​បរទេស​កាន់តែច្រើន​។

បន្ទាប់ពីរងផលប៉ះពាល់ដ៏អាក្រក់ នៃវិបត្តិជំងឺកូវីដ-១៩ ឆ្នាំ២០២៣នេះ គួរតែជួយដល់កម្ពុជា ក្នុងការជំនះវិបត្តិ ដែលបានហ៊ុមព័ទ្ធវិស័យទេសចរណ៍ ខណៈវិស័យនេះត្រូវបានចាត់ទុកថា ជាសសរស្តម្ភមួយ ក្នុងចំណោមសសរស្តម្ភទាំង៤ សម្រាប់ទ្រទ្រង់សេដ្ឋកិច្ចរបស់កម្ពុជា។

ឧស្សាហកម្មទេសចរណ៍របស់ប្រទេសកម្ពុជា ទទួលបានប្រាក់ចំណូលសរុបចំនួន១,៤១ពាន់លានដុល្លារក្នុងឆ្នាំ២០២២ ដែលនេះជាសូចនាករវិជ្ជមាន សម្រាប់វិស័យនេះរួចទៅហើយ ពោលគឺកើនឡើងរហូតដល់ទៅ៦៦៩ភាគរយ បើធៀបនឹងឆ្នាំ២០២១។

ស្ថានភាពអាចមានភាពប្រសើរឡើងខ្លាំង នៅឆ្នាំ២០២៣នេះ ដោយសារចំនួនជើងហោះហើរអន្តរជាតិ ជាពិសេសពីប្រទេសចិន ដែលជាទីផ្សារដ៏សំខាន់ សម្រាប់ទេសចរណ៍កម្ពុជា បានចាប់ផ្តើមកើនឡើង បន្ទាប់ពីទីក្រុងប៉េកាំង បានបន្ធូរបន្ថយការរឹតបន្តឹងលើការធ្វើដំណើរ។

យោងតាមការប៉ាន់ប្រមាណរបស់ក្រសួងទេសចរណ៍ បានឱ្យដឹងថា កម្ពុជាទទួលបានភ្ញៀវទេសចរអន្តរជាតិ ចំនួន២,២៨លាននាក់ក្នុងឆ្នាំ២០២២ កើនឡើង១.០៥៨ភាគរយ បើធៀបនឹងឆ្នាំ២០២១។ លើសពីនេះ ឧស្សាហកម្មទេសចរណ៍បានបង្កើតបាន៣,៦ភាគរយនៃផលិតផល ក្នុងស្រុកសរុបរបស់កម្ពុជាកាលពីឆ្នាំ២០២២។

ជាមួយនឹងអនាគតដ៏ភ្លឺស្វាងខាងមុខ ប្រទេសកម្ពុជាត្រូវបានគេព្យាករណ៍ថា នឹងទាក់ទាញភ្ញៀវទេសចរអន្តរជាតិ បានចំនួន៤លាននាក់នៅឆ្នាំ២០២៣នេះ។

លោក ថោង ខុន រដ្ឋមន្ត្រីក្រសួងទេសចរណ៍ ត្រូវបានដកស្រង់សម្តីនៅក្នុងរបាយការណ៍មួយថា “ឆ្នាំនេះយើងសង្ឃឹមថា កម្ពុជានឹងទាក់ទាញភ្ញៀវទេសចរចិន បានចន្លោះពី៨០០.០០០ ទៅដល់១លាននាក់”។

ម្យ៉ាងវិញទៀត ប្រទេសកម្ពុជាបានស្វាគមន៍ ភ្ញៀវទេសចរអន្តរជាតិចំនួន៦,៦១លាននាក់ ក្នុងឆ្នាំ២០១៩ ដែលផ្តល់ប្រាក់ចំណូលសរុបចំនួន៤,៩២ពាន់លានដុល្លារ។

ជាមួយនឹងសកម្មភាពដ៏សុទិដ្ឋិនិយមនានា រដ្ឋាភិបាលរំពឹងថា កម្ពុជា នឹងអចឈានដល់កម្រិតទេសចរណ៍ឆ្នាំ២០១៩ ក្នុងរយៈពេលពីរបីឆ្នាំទៀត៕

 ដោយៈ គង់ សូរិយា

       ពោធិសាត់ៈ សម្តេចតេជោហ៊ុន សែននាយករដ្ឋមន្រ្តីនៃកម្ពុជាបានថ្លែងថា តម្រូវការអគ្គិសនីនៅរាជធានីភ្នំពេញ បានកើនពី៣០ ដល់១០០០​មេហ្កាវ៉ាត់ ខណៈបច្ចុប្បន្នប្រជាពលរដ្ឋទូទាំងប្រទេស៩០ភាគរយ បានភ្ជាប់បណ្តាញអគ្គិសនីរួចហើយ។

សម្តេចតេជោ ហ៊ុន សែនបានលើកឡើងបែបនេះ ក្នុងពិធីសម្ភោធបើកការដ្ឋាន សាងសង់ទំនប់វារីអគ្គិសនី ស្ទឹងពោធិសាត់១ នាព្រឹកថ្ងៃទី១៤ មិនានេះ។

សម្តេចបានស្នើសុំការយោគយល់ ពីប្រជាពលរដ្ឋចំពោះផលប៉ះពាល់កើតចេញ ពីការធ្វើវារីអគ្គសិសនីស្ទឹងពោធិ៍សាត់១។

សម្តេចតេជោបានបញ្ជាក់ថា “សម័យនេះប្រជាពលរដ្ឋប្រើអគ្គិសនី មិនមែនសម័យប្រើភ្លើងចន្លុះទៀតនោះទេ”។

សម្តេចតេជោ ហ៊ុន សែន បានថ្លែងថា បច្ចុប្បន្នថាមពលអគ្គិសនីរបស់កម្ពុជា ទទួលបានពីប្រភពកកើតឡើងវិញរហូតដល់ទៅ៦២ភាគរយ។

សម្តេចតេជោហ៊ុន សែន បានថ្លែងថា វារីអគ្គិសនីជាប្រភពថាមពលដ៏ល្អមួយ។

សម្តេចតេជោបានរំលឹកថា កាលពីទសវត្សរ៍៩០ កម្ពុជា ប្រើអគ្គិសនីត្រឹមប្រមាណ៣០មេហ្គាវ៉ាត់ប៉ុណ្ណោះ តែបច្ចុប្បន្នប្រើរហូតដល់ទៅ២២០០មេហ្គាវ៉ាត់។

សម្តេចតេជោ ហ៊ុន សែន បានថ្លែងថា អ្នកបរិស្ថាននិយមជំទាស់រោងចក្រអគ្គិសនីដើរដោយធ្យូងថ្ម ជំទាស់ការធ្វើវារីអគ្គិសនី តើចង់វិលទៅដុតចន្លុះវិញឬយ៉ាងណា?។

សម្តេចតេជោ ហ៊ុន សែន បានថ្លែងថា “បើមិនប្រឹងបង្កើតប្រភពថាមពលអគ្គិសនីទេ ប្រជាពលរដ្ឋនៅតែដុតចន្លុះ ប្រើចង្កៀង និងដុតប្រេងកាត”។

សម្តេចតេជោ ហ៊ុន សែន បានថ្លែងថា អគ្គិសនី មិនត្រឹមតែបំពេញការប្រើប្រាស់ របស់ប្រជាពលរដ្ឋប៉ុណ្ណោះទេ តែក៏បំពេញដល់តម្រូវការឧស្សាហកម្ម និងទេសចរណ៍ផងដែរ៕

សុខុម

វៀងចន្ទន៍: ប្រទេសវៀតណាម បានចាប់ផ្តើមគម្រោងជួសជុល និងពង្រីកផ្លូវតភ្ជាប់តំបន់ភាគកណ្តាលរបស់ខ្លួនមកកាន់បណ្ដាប្រទេសជិតខាងរួចមានថៃ ឡាវ និងកម្ពុជា។ នេះបើយោងតាមសារព័ត៌មាន Laotian Times ចុះផ្សាយកាលពីថ្ងៃច័ន្ទ ទី១៣ ខែមីនា។

សារព័ត៌មាន Viet Nam News បានចុះផ្សាយថា តាមការរំពឹងទុក គម្រោងនេះនឹងចំណាយអស់ទឹកប្រាក់៧៦លានដុល្លារអាមេរិក។ គម្រោងនេះនឹងជួសជុលកែលម្អផ្លូវនានានៅក្នុងខេត្តភាគកណ្ដាល Quang Nam និងតំបន់ខ្ពង់រាបភាគកណ្តាលនៃប្រទេសវៀតណាម ដែលតភ្ជាប់មកកាន់ប្រទេសជិតខាងទាំង៣។

ផ្លូវហាយវ៉េ 14E របស់វៀតណាម នេះតភ្ជាប់ខេត្ត Quang Nam ទៅកាន់តំបន់ខ្ពង់រាបភាគកណ្តាល ដែលតភ្ជាប់ប្រទេសថៃ ឡាវ និងកម្ពុជា តាមរយៈផ្លូវហូជីមិញ (Ho Chi Minh Road)។

នាយកដ្ឋានផ្លូវថ្នល់ក្នុងប្រទេសវៀតណាម គឺជាអ្នកវិនិយោគដ៏ធំនៅក្នុងគម្រោងនេះដែលរំពឹងថានឹងបញ្ចប់ការងារស្ថាបនានៅត្រឹមឆ្នាំ២០២៥។

ប្រវែងសរុប៧៤គីឡូម៉ែត្រនៅលើផ្លូវនេះនឹងត្រូវបានជួសជុលឡើងវិញ ក្រោមទំហំទុនវិនិយោគសរុបជាង៧៥,៨លានដុល្លារអាមេរិក។

រដ្ឋមន្ត្រីដឹកជញ្ជូនវៀតណាម លោក Nguyen Van Thang អះអាងថា ផ្លូវនេះនឹងតភ្ជាប់តំបន់វាលទំនាប និងតំបន់ខ្ពង់រាប ហើយនឹងជំរុញការអភិវឌ្ឍក្នុងខេត្ត Quang Nam និងតំបន់ភាគកណ្តាល ដោយជំរុញពាណិជ្ជកម្មតាមបណ្ដោយច្រករបៀងសេដ្ឋកិច្ចភាគខាងកើត-ភាគខាងលិច (East-West Economic Corridor) ក្នុងប្រទេសវៀតណាម។

គម្រោងនេះនឹងកាត់បន្ថយចម្ងាយធ្វើដំណើរ និងការដឹកជញ្ជូនទំនិញរវាងតំបន់ខ្ពង់រាបភាគកណ្តាល តំបន់ឆ្នេរភាគខាងជើង និងភាគខាងត្បូងនៃប្រទេសវៀតណាម ប្រទេសឡាវ ភាគខាងត្បូង ប្រទេសកម្ពុជា ភាគឦសាន និងប្រទេសថៃ។ វាក៏នឹងកាត់បន្ថយពេលវេលាធ្វើដំណើរនៅលើផ្លូវនេះផងដែរ៕ Laotian Times៕

ដោយ: គង់ លាងហួរ
អន្តរជាតិ: ប្រទេសថៃ និងចិនស្ថិតក្នុងចំណោមចំណុចភ្លឺតែមួយគត់នៅតំបន់អាស៊ី ដែលត្រូវបានព្យាករណ៍ថា នឹងមានកំណើន GDP ពិតប្រាកដខ្ពស់នៅឆ្នាំនេះ ទោះជាតំបន់ផ្សេងទៀតត្រូវបានវាយលុកដោយស្ថានភាពសេដ្ឋកិច្ចពិភពលោកមិនអំណោយផល និងភាពតានតឹងភូមិសាស្ត្រនយោបាយយ៉ាងណាក្តី។

នេះបើយោងតាមក្រុមហ៊ុនធានារ៉ាប់រងពាណិជ្ជកម្មពិភពលោក Atradius ។

យោងតាមរបាយការណ៍“Regional Economic Outlook Asia”ដែលបានចេញផ្សាយនាថ្មីៗនេះរបស់ក្រុមហ៊ុនធានារ៉ាប់រង Atradius បានចង្អុលបង្ហាញថា “ការស្ទុះងើបឡើងវិញនៃសេដ្ឋកិច្ចក្នុងតំបន់គឺបាត់បង់សន្ទុះយ៉ាងច្បាស់ ដោយសារតែស្ថានភាពហិរញ្ញវត្ថុកាន់តែតឹងតែង អតិផរណា បរិយាកាសសេដ្ឋកិច្ចពិភពលោកចុះខ្សោយ និងភាពតានតឹងនៃភូមិសាស្ត្រនយោបាយ”។

ក្រុមហ៊ុន Atradius បានកត់សម្គាល់ថា “ខណៈប្រទេសចិន និងថៃត្រូវបានគេរំពឹងថា នឹងប្រកាសកំណើនពីមួយឆ្នាំទៅមួយឆ្នាំកាន់តែខ្ពស់នៅឆ្នាំ២០២៣ រីឯសេដ្ឋកិច្ចនៅក្នុងតំបន់ផ្សេងទៀតត្រូវបានគេប៉ាន់ប្រមាណថា នឹងបោះជំហានថយក្រោយ ខណៈពួកគេព្យាយាមដោះស្រាយលក្ខខណ្ឌហិរញ្ញវត្ថុដ៏តឹងតែង និងភាពខ្សោយនៃតម្រូវការខាងក្រៅ”។

លោក Bert Burger សេដ្ឋវិទូប្រចាំនៅក្រុមហ៊ុនដែលមានមូលដ្ឋាននៅទីក្រុង Amsterdam មួយនេះ បានអះអាងថា “សេដ្ឋកិច្ចអាស៊ីកំពុងស្ថិតក្នុងដំណើរឆ្ពោះទៅរកកំណើនតិចតួចនៅឆ្នាំនេះ”។

លោក​បាន​បន្ត​ថា “កំណើន​សេដ្ឋកិច្ចនៅ​ប្រទេស​ជប៉ុន និង​កូរ៉េ​ខាង​ត្បូង​នឹង​ត្រូវ​បាន​បិទ​នៅ​ត្រឹ០,៧% និង០,៨% រៀង​ៗគ្នា ខណៈ​អត្រាអតិផរណា​ដ៏ខ្ពស់​អាច​កាត់​បន្ថយ​ការ​ស្ទុះ​ងើប​ឡើង​វិញ​របស់​ពួក​គេ”។

ប្រទេសឥណ្ឌាត្រូវបានកំណត់ថា ជាប្រទេសដែលមានកំណើនសេដ្ឋកិច្ចលឿនបំផុតនៅតំបន់អាស៊ីក្នុងឆ្នាំនេះ និងឆ្នាំក្រោយ ក្នុងរង្វង់កំណើន៨ភាគរយ និង៦,៨ភាគរយ រៀងៗគ្នា ដោយសារសេដ្ឋកិច្ចក្នុងស្រុករុឹងមាំ និងការកែលម្អបរិយាកាសអាជីវកម្ម។

លោក Burger បានអះអាងថា “ជាមួយនឹងសេដ្ឋកិច្ច និងប្រព័ន្ធហិរញ្ញវត្ថុដ៏រុឹងមាំរបស់ពួកគេ ទីផ្សារដែលកំពុងរីកចម្រើនធំជាងគេទាំង៥នៅតំបន់អាស៊ីអាគ្នេយ៍នៅតែមានភាពធន់នឹងវិបត្តិខាងក្រៅនាពេលថ្មីៗនេះ ដែលអាចនាំឱ្យពួកគេទទួលបានអត្ថប្រយោជន៍ពីនិន្នាការធ្វើពិពិធកម្មខ្សែសង្វាក់ផ្គត់ផ្គង់ពិភពលោក”។

ប្រទេសហ្វីលីពីន​នឹង​មាន​កំណើន​សេដ្ឋកិច្ចលឿន​បំផុត​ក្នុង​តំបន់​ក្នុង​អត្រា៤,១ភាគរយ តាម​ពីក្រោយ​ដោយ​ប្រទេស​ថៃ និង​វៀតណាមក្នុងរង្វង់៤ភាគរយ ខណៈឥណ្ឌូណេស៊ី​នឹង​ក្លាយ​ជា​ប្រទេស​មានកំណើនសេដ្ឋកិច្ចយឺតយ៉ាវ​ក្នុងអត្រា៣,៦ភាគរយនៅ​ឆ្នាំ​២០២៣នេះ។

ចំណែកនៅក្នុងប្រទេសចិន តម្រូវការនាំចេញទន់ខ្សោយពីប្រទេសអភិវឌ្ឍន៍ និងវិស័យអចលនទ្រព្យដែលកំពុងជួបការលំបាក ត្រូវបានគេរំពឹងថា នឹងកំណត់កំណើនសេដ្ឋកិច្ចចិនមិនខ្ពស់ជាង៤,៥ភាគរយនៅឆ្នាំ២០២៣នេះ ពោលគឺលើសពីអត្រាកំណើនសេដ្ឋកិច្ចត្រឹម៣ភាគរយ ដែលចិនសម្រេចបាននៅក្នុងឆ្នាំ២០២២៕

 ដោយៈ គង់ សូរិយា

       ភ្នំពេញៈ ក្រុ​មមន្រ្តីបានបើកកិច្ចប្រជុំគ្រប់គ្រង និងវាយតម្លៃការអនុវត្តការងារផ្លូវល្បឿនលឿន ក្រោមគណៈកម្មាធិការសម្រាប់គ្រប់​គ្រងកិច្ចព្រមព្រាងសម្បទាន គម្រោងផ្លូវល្បឿនលឿនភ្នំពេញ-ក្រុងព្រះសីហនុ ដើម្បីគ្រប់គ្រង និងជំរុញការបម្រើសេវាផ្លូវល្បឿលឿនឱ្យកាន់តែល្អប្រសើរ។

លោកសួង ហេង រដ្ឋលេខាធិការក្រសួងសាធារណការ និងដឹកជញ្ជូន និងលោកហែម វណ្ណឌី រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានដឹកនាំជាសហប្រធាន លើកិច្ចប្រជុំគណ:កម្មាធិការក្របខណ្ឌ សម្រាប់កិច្ចព្រមព្រៀងសម្បទាន គម្រោងផ្លូវល្បឿនលឿនភ្នំពេញ-ក្រុងព្រះសីហនុ ដោយមានការចូលរួមពីថ្នាក់ដឹកនាំក្រសួងពាក់ព័ន្ឋ។

កិច្ចប្រជុំនេះធ្វើឡើងដើម្បីគ្រប់គ្រងប្រតិបត្តិការ និងដំណើរការរបស់គម្រោងឱ្យប្រព្រឹត្តទៅដោយរលូន ក៏ដូចជាជួយសម្រួលដល់វិនិយោគិនទាំងផ្នែកហរិញ្ញវត្ថុ និងផ្នែកបច្ចេកទេស។ ក្នុងនោះអង្គប្រជុំបានពិភាក្សាលើការកំណត់តួនាទី គណៈកម្មាធិការក្នុងការងារផ្លូវល្បឿនលឿន ការគ្រប់គ្រង និងការតភ្ជាប់ទិន្នន័យចំណូលនៃការប្រើប្រស់ផ្លូវល្បឿនលឿន តាមរយៈអគ្គនាយកដ្ឋានបច្ចេកវិទ្យា និងទំនាក់ទំនងសាធារណៈ និងលើកឡើងអំពីបញ្ហាមួយចំនួន ដូចជា បញ្ហាដែលកើតមានលើផ្លូវល្បឿនលឿន និងការកោះប្រជុំគណៈកម្មាធិការក្នុងការដោះស្រាយបញ្ហា និងផលប៉ះពាល់ នៃការបញ្ចុះតម្លៃនៃការប្រើប្រាស់លើផ្លូវល្បឿនលឿន។

ជាលទ្ធផលនៃអង្គប្រជុំ លោករដ្ឋលេខាធិការសហប្រធានអង្គប្រជុំ បានឯកភាពគ្នាថា កិច្ចប្រជុំគណៈកម្មាការនេះត្រូវធ្វើឡើងរយៈពេលមួយត្រីមាសម្ដង ប៉ុន្ដែប្រសិនមានបញ្ហាបន្ទាន់ចាំបាច់ អាចប្រជុំទៅតាមតម្រូវការជាក់ស្ដែង។

លើសពីនេះ ពាក់ព័ន្ធទៅនឹងឯកសារមួយចំនួន ដែលស្នើសុំដោយភាគីក្រសួងសេដ្ឋកិច្ច និងហិរញ្ញវត្ថុ នឹងត្រូវផ្ញើជូនតាមការស្នើសុំ។

បន្ថែមពីលើនេះ លោកសួង ហេងរដ្ឋលេខាធិការសហប្រធានអង្គប្រជុំក៏បានចូលរួមយោបល់ថា លេខាធិការដ្ឋាន ត្រូវធ្វើរបាយការណ៍មកកាន់គណៈកម្មាធិការ អំពីបញ្ហាកើតឡើងណាមួយ។ ចំពោះបញ្ហាដែលលេខាធិការដ្ឋាន មិនអាចដោះស្រាយបាន អាចរាយការណ៍មកកាន់គណៈកម្មាធិការផ្ទាល់តែម្ដង៕

សុខុម

ហូជីមិញ: អ្នកជំនាញព្រមានថា ទោះបីរដ្ឋាភិបាលវៀតណាម ខិតខំប្រឹងប្រែងលុបបំបាត់បញ្ហានានាដែលទីផ្សារអចលនទ្រព្យប្រឈមយ៉ាងណាក្ដី ក៏វិស័យនេះនឹងមិនមានការរីកចម្រើនរហូតដល់ចុងឆ្នាំ២០២៤។ នេះបើយោងតាមសារព័ត៌មាន Vietnam News ចុះផ្សាយកាលពីថ្ងៃច័ន្ទ ទី១៣ ខែមីនា។

ថ្លែងក្នុងវេទិកាមួយកាលពីថ្ងៃសុក្រ សប្ដាហ៍មុន លោក Nguyen Quoc Hiep ប្រធានសមាគមក្រុមហ៊ុនម៉ៅការសំណង់វៀតណាម ថ្លែងថា ទីផ្សារនឹងបន្តជួបបញ្ហាប្រឈមមុខអូសបន្លាយដូចជា កង្វះលទ្ធភាពទទួលបានដើមទុន ការរឹតបន្តឹងឥណទាន ការរាំងស្ទះផ្លូវច្បាប់ និងការពន្យារពេលក្នុងការទូទាត់មូលបត្របំណុលជាដើម។

លោកបានបន្ថែមថា ក្រឹត្យលេខ០៨ ដែលរដ្ឋាភិបាលបានចេញនាពេលថ្មីៗនេះក្នុងគោលបំណងលុបបំបាត់ការលំបាកនានាសម្រាប់ទីផ្សារមូលបត្រសាជីវកម្ម គ្មានប្រសិទ្ធភាពគ្រប់គ្រាន់នឹងទទួលបានទំនុកចិត្តរបស់វិនិយោគិនឡើងវិញនៅក្នុងទីផ្សារនោះឡើយ។

លោកបានបន្តថា “ក្រឹត្យដែលអនុញ្ញាតឱ្យអ្នកបោះផ្សាយមូលបត្របំណុលពន្យាររយៈពេលទូទាត់ថ្លៃមូលបត្ររហូតដល់២ឆ្នាំនេះ អាចត្រឹមតែជួយការពារទីផ្សារកុំឱ្យដួលរលំប៉ុណ្ណោះ ហើយមិនអាចការពារសិទ្ធិ និងអត្ថប្រយោជន៍របស់អ្នកកាន់មូលបត្របំណុល (ម្ចាស់បំណុល) នោះទេ”។

លោកបានគូសបញ្ជាក់ថា មូលបត្របំណុលដ៏ច្រើននឹងដល់ពេលត្រូវទូទាត់ត្រលប់វិញនៅឆ្នាំនេះ និងឆ្នាំក្រោយ ដោយដាក់សម្ពាធយ៉ាងខ្លាំងទៅលើអ្នកបោះផ្សាយមូលបត្របំណុលដែលភាគច្រើនជាក្រុមហ៊ុនអភិវឌ្ឍន៍អចលនទ្រព្យ ដោយសារពេលនេះពួកគេប្រឈមនឹងបញ្ហាសាច់ប្រាក់ និងមិនអាចបោះផ្សាយមូលបត្របំណុលថ្មីៗដើម្បីរៀបចំបំណុលឡើងវិញបាន។

លោកបានបន្ថែមទៀតថា វាមានសារៈសំខាន់ណាស់ក្នុងការបង្កើតមូលដ្ឋានច្បាប់រយៈពេលវែងសម្រាប់ការបោះផ្សាយមូលបត្របំណុលសាជីវកម្មដើម្បីកសាងទីផ្សារមូលធនប្រកបដោយនិរន្តរភាពសម្រាប់វិស័យអចលនទ្រព្យ៕ Vietnam News៕