(ភ្នំពេញ)៖ លោកស្រីឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិ បានឱ្យដឹងថា គិតត្រឹមល្ងាចថ្ងៃទី៣០ ខែកក្កដា ឆ្នាំ២០២៥ ជនភៀសសឹងកម្ពុជា ដោយសារសង្គ្រាមនៅព្រំដែនកម្ពុជា-ថៃ បានកើនឡើងដល់ ១៧២ ០៩៤នាក់។

លើកឡើងក្នុងសន្និសីទសារព័ត៌មានស្តីពី «លទ្ធផលនៃការអនុវត្តបទឈប់បាញ់រវាងកម្ពុជា- ថៃ» នាថ្ងៃទី៣១ ខែកក្កដា ឆ្នាំ២០២៥នេះ លោកស្រីឧត្តមសេនីយ៍ឯក ម៉ាលី សុជាតា បានឱ្យដឹងថា «ចំពោះការធ្វើបច្ចុប្បន្នភាពនៃជនភៀសសឹង គិតត្រឹមល្ងាចថ្ងៃទី៣០ ខែកក្កដា ឆ្នាំ២០២៥ នៅខេត្តឧត្តរមានជ័យសរុបចំនួន ៣៩ ៥៤៦នាក់, ខេត្តព្រះវិហារសរុប ៣២ ៥៥៨នាក់, បន្ទាយមានជ័យសរុបចំនួន ៣៥ ០៥៧នាក់, ខេត្តពោធិ៍សាត់សរុបចំនួន ៣ ០២៦នាក់, ខេត្តសៀមរាបសរុបចំនួន ៦១ ៩០៧នាក់ ដែលសរុបទាំង៥ខេត្តនេះ កើនឡើងដល់ ១៧ ២០៩៤នាក់»។

សូមបញ្ជាក់ថា គិតចាប់ពីថ្ងៃទី២៤ ដល់ថ្ងៃទី២៨ ខែកក្កដា ឆ្នាំ២០២៥ យោធាឈ្លានពានថៃ​ បានបើកការវាយប្រហារមកលើកម្ពុជាជាច្រើនទីតាំង ដោយមានការប្រើប្រាស់អាវុធធុនធ្ងរ និងយន្តហោះចម្បាំង F-16 ផងដែរ។ ទីតាំងទាំងនោះ រួមមាន៖ តំបន់ភ្នំទ្រព្យ, តាថាវ, ភ្នំខ្មោច, អូរផ្កាស្នេហ៍, មុំបី, ប្រាសាទតាមាន់ធំ,​ ប្រាសាទតាក្របី, វត្តអារាម, មណ្ឌលសុខភាព, ភូមិឋានប្រជាពលរដ្ឋ និងប្រាសាទព្រះវិហារជាដើម នឹងបានធ្វើឱ្យប្រជាពលរដ្ឋរាប់សែននាក់ ត្រូវធ្វើភៀសសឹក ចាគចេញពីផ្ទះរបស់ខ្លួនដើម្បីគេចចេញពីគ្រាប់ផ្លោងរបស់សៀម។

ជាមួយគ្នានោះ កម្ពុជា-ថៃ បានឯកភាពគ្នាលើបទឈប់បាញ់ ដែលអនុវត្តចាប់ពីម៉ោង ១២រំលងអធ្រាត្រថ្ងៃទី២៨ ខែកក្កដា ឆ្នាំ២០២៥។ ការឯកភាពគ្នានេះ បានធ្វើឡើងក្នុងកិច្ចចរចាមួយនៅប្រទេសម៉ាឡេស៉ី កាលពីរសៀលថ្ងៃទី២៨ ខែកក្កដា ឆ្នាំ២០២៥ ដែលមានការផ្ដួចផ្ដើមគំនិតពីសហរដ្ឋអាមេរិក និងដឹកនាំសម្របសម្រួលដោយនាយករដ្ឋមន្ដ្រីម៉ាឡេស៉ី ក្នុងនាមជាប្រធានអាស៊ានប្ដូរវេន ព្រមទាំងមានការចូលរួមពីចិនផងដែរ៕

សូមជម្រាបដែរថា​ ចំពោះជនភៀសសឹងវិញ ក្រោមការគិតគូរនិងយកចិត្តទុកដាក់ខ្ពស់របស់ប្រមុខរាជរដ្ឋាភិបាលសម្តេចបវរធិបតី ហ៊ុន​ ម៉ាណែត នាយករដ្ឋមន្ត្រីកម្ពុជា បានណែនាំឱ្យអាជ្ញាធរមានសមត្ថកិច្ច យកចិត្តទុកដាក់ចំពោះប្រជាពលរដ្ឋ ជាជនភៀសសឹក ដែលបានជម្លៀសខ្លួនចេញពីតំបន់ប្រយុទ្ធគ្នា ដោយរៀបចំទួលសុវត្ថិភាព ក៏ដូចជាដោះស្រាយទីតាំងស្នាក់នៅ ការហូបចុក និងសុខាភិបាលជូនបងប្អូនទាំងអស់គ្នា។

ជាមួយគ្នានេះក្នុងស្មារតីខ្មែរជួយខ្មែរ ស្មារតីខ្មែរតែមួយ មានប្រជាពលរដ្ឋជាច្រើនបានចូលរួមបរិច្ចាគទាំងថវិកា និងកញ្ចប់ស្បៀងអាហារ ថ្នាំពេទ្យ និងសម្ភារៈប្រើប្រាស់នានាជាច្រើនទៀតជួយដល់កងទ័ពជួរមុខ និងប្រជាពលរដ្ឋភៀសសឹកពីតំបន់មានជម្លោះព្រំដែនកម្ពុជា-ថៃផងដែរ៕

(ភ្នំពេញ)៖ សហគមន៍បរទេសដែលកំពុងរស់នៅក្នុងប្រទេសកម្ពុជា បានអញ្ជើញមកដល់ស្ថានីយ៍ទូរទស្សន៍ស៊ីធីអិន ដោយផ្ទាល់ កាលពីរសៀលថ្ងៃទី៣០ ខែកក្កដា ឆ្នាំ២០២៥នេះ ដើម្បីចូលរួមជាមួយមូលនិធិ ទ្រទ្រង់ជនភៀសសឹក នូវថវិកាមួយចំនួន សម្រាប់ជួយដល់កងទ័ព ជនភៀសសឹក ដែលបានភៀសខ្លួនចេញពីតំបន់វាយប្រហារពីការឈ្លានពានរបស់ថៃ
មកកាន់ទីជំរុំសុវត្ថិភាព ។

សហគមន៍ជនបរទេសប្រមាណជាង៣០នាក់ ដែលមានវត្តមានមកចូលរួមមូលនិធិនៅស្ថានីយទូរទស្សន៍ ស៊ីធីអិន នេះ ត្រូវបានគេដឹងថាមកពីបណ្តាក្រុមហ៊ុន អង្គការ ស្ថាប័នជាច្រើនផ្សេងគ្នា និងចម្រុះជាតិសាសន៍ ក្នុងនោះមានជនជាតិ សហរដ្ឋអាមេរិក សិង្ហបុរី អ៊ុយក្រែន ឥណ្ឌា ប៉ាហ្គីស្ថាន ម៉ាឡេស៊ី ស្កុតឡែន អាហ្វ្រិកខាងត្បូង បារាំង ហ្វីលីពីន ឆែក អាល្លឺម៉ង់ និងរុស្ស៊ី។

តំណាងសហគមន៍បរទេសរស់នៅ និងធ្វើការនៅកម្ពុជា លោក Mark Hana បានឱ្យដឹងថា សហគមន៍ជនបរទេស ដែលមករកទទួលទាន រស់នៅ និងធ្វើការងារនៅកម្ពុជា បានមើលឃើញពីការបង្កើតមូលនិធិ ទ្រទ្រង់ជនភៀសសឹក និងបានឃើញពីសង្គ្រាមក្នុងរយៈពេលប៉ុន្មានថ្ងៃមកនេះ តាមបណ្តោយព្រំដែនកម្ពុជា-ថៃ និងបានឃើញពីទុក្ខសោករបស់ប្រជាជនកម្ពុជា បានឃើញព័ត៌មានពិត ដែលកម្ពុជាជាប្រទេសដែលរងគ្រោះ ពីការឈ្លានពានរបស់ថៃ ។

លោក Mark Hana បន្តថា ការមកចូលរួមជាមួយ មូលនិធិទ្រទ្រង់ជនភៀសសឹក នៅស្ថានីយទូរទស្សន៍ ស៊ីធីអិន នេះ ក្នុងគោលបំណងដើម្បីជាការជួយដឹងឮ ជួយឈឺឆ្អាល ក្នុងនាមជនបរទេសដែលរកស៊ីនៅស្រុកខ្មែរ ដឹងពីធាតុពិត ដឹងពីការពិតនូវអ្វីដែលបានកើតឡើងពីការឈ្លានពានរបស់ថៃ ដូច្នេះពួកគាត់មកចូលរួមជាមូលនិធិផង និងចូលរួមជាការបង្ហាញពីសំឡេងរបស់ពួកគាត់ ក្នុងនាមជាជនបរទេសក្នុងស្រុកខ្មែរ ចង់បង្ហាញទៅកាន់ពិភពលោកថា វាជាការពិតដែលកម្ពុជាត្រូវទទួលបានយុត្តិធម៌ ហើយពិភពលោកក៏គួរតែដឹងអំពីកម្ពុជា កំពុងទទួលរងគ្រោះ សោកសង្រេងពីការឈ្លានពានរបស់ប្រទេសថៃ ។

ក្នុងនោះសហគមន៍ជនបរទេស ក៏បានបង្ហាញចំណាប់អារម្មណ៍របស់ខ្លួន ដោយផ្ញើសារ ពីការឈឺចាប់របស់ប្រជាជនកម្ពុជាដែលរងគ្រោះ ហើយចង់ឱ្យការឈឺចាប់ទាំងអស់នេះ ទទួលបានការដឹងឮនៅលើពិភពលោកផងដែរ។ ជាក់ស្តែងដូចជាអ្នកជំនួញម្នាក់មកពី អ៊ុយក្រែន បានបញ្ជាក់ថា ស្ថានភាពសង្គ្រាមដ៏អាក្រក់នៅអ៊ុយក្រែន ពិតជាបានធ្វើឱ្យលោកយល់ពីការរងគ្រោះរបស់កម្ពុជា និងភាពឈឺចាប់ វេទនារបស់ប្រជាជនកម្ពុជា។ ដូច្នេះភាពរំជួលចិត្តបានធ្វើឱ្យលោកត្រូវតែមកចូលរួមជាសក្ខីភាពនាពេលនេះ។

សូមបញ្ជាក់ថា តបតាមការអំពាវនាវពីសំណាក់សម្តេចតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា, មូលនិធិ CTN ទ្រទ្រង់កងទ័ពការពារព្រំដែនជាតិនៃក្រុមហ៊ុន CBS របស់អ្នកឧកញ៉ា គិត ម៉េង បានប្រកាសចាប់ផ្តើម កៀរគរថវិកាជួយដល់កងទ័ព ដែលកំពុងឈរជើងការពារដែនអធិបតេយ្យភាពជាតិនៅតាមបន្ទាត់ព្រំដែនកម្ពុជា​-ថៃ។ ដោយឡែកនេះជា មូលនិធិ ទ្រទ្រង់ជនភៀសសឹក ដំណាក់កាលទី២ ដើម្បីកៀរគរមូលនិធិ និងសម្ភារៈប្រើប្រាស់ផ្សេងៗ ជួយដល់កងទ័ព និងជនភៀសសឹកពីការវាយប្រហារឈ្លានពានរបស់ថៃ៕

ដោយ: គង់ លាងហួរ
ភ្នំពេញ: កាសែតបរទេសឯករាជ្យនានាបានចុះផ្សាយនូវការបដិសេធរបស់ភាគីកម្ពុជាចំពោះភាគីថៃ ដែលបានចោទប្រកាន់ថា កម្ពុជាបានរំលោភបទឈប់បាញ់ ដែលត្រូវបានឯកភាពគ្នា ក្រោមការសម្របសម្រួលដោយសហរដ្ឋអាមេរិក ប្រទេសម៉ាឡេសុី និងប្រទេសចិន។

កាសែត Reuters បានរាយការណ៍ថា ខណៈពេលដែលប្រទេសថៃបានចោទប្រកាន់កម្ពុជាពីការរំលោភលើបទឈប់បាញ់ កម្ពុជាបានបដិសេធការចោទប្រកាន់នេះ ដោយអះអាងថា កងទ័ពរបស់ខ្លួនបានគោរពយ៉ាងម៉ឺងម៉ាត់ចំពោះបទឈប់បាញ់។

កាសែត Reuters បានកត់សម្គាល់ថាបទឈប់បាញ់នៅតែត្រូវបានគោរពជាផ្លូវការ បន្ទាប់ពីមានអន្តរាគមន៍ការទូត ដោយកម្ពុជាបានច្រានចោលការចោទប្រកាន់របស់ភាគីថៃអំពីការរំលោភបទឈប់បាញ់ និងបញ្ជាក់ពីការអនុលោមតាមច្បាប់ពេញលេញ។

កាសែត The Guardian ក៏​បាន​បញ្ជាក់​ថា កម្ពុជា​បាន​ច្រាន​ចោល​ការ​ចោទ​ប្រកាន់​នេះ ដោយ​កម្ពុជាអះអាង​ថា​ ខ្លួនបានគោរព​តាម​កិច្ច​ព្រមព្រៀង​នេះ។ បទ​ឈប់​បាញ់​ត្រូវ​បាន​គេ​ចាត់​ទុក​ថា​ មាន​ភាព​ផុយ​ស្រួយ។ ទោះជាយ៉ាងណា បទឈប់បាញ់នៅ​តែ​អាចរក្សា​បានជាធរមាន មកទល់ពេលនេះ។

យោងតាមសារព័ត៌មាន AP បានចុះផ្សាយថា ខណៈបទឈប់បាញ់ត្រូវបានសាកល្បង ហើយប្រទេសថៃបានធ្វើការចោទប្រកាន់ ភាគីទាំង២ បានឯកភាពផ្អាកការចល័តទ័ព និងបញ្ចៀសការកើនឡើងកំដៅនៃភាពតានតឹង។

លោក Sean O’Neill បេក្ខភាពឯកអគ្គរដ្ឋទូតអាមេរិកប្រចាំនៅប្រទេសថៃបានអះអាងថា ជម្លោះព្រំដែនរវាងថៃជាមួយកម្ពុជានាពេលថ្មីៗនេះ មិនមានផលប្រយោជន៍សម្រាប់ប្រជាជនថៃ ឬសម្ព័ន្ធភាពរបស់ប្រទេសថៃជាមួយសហរដ្ឋអាមេរិកនោះទេ។

លោក Sean O’Neill បានលើកឡើងបែបនេះក្នុងព្រឹទ្ធសភាអាមេរិក នៅពេលលោកត្រូវបានគេសាកសួរអំពីការប្រយុទ្ធគ្នាអស់រយៈពេល៥ថ្ងៃរវាងប្រទេសថៃ និងកម្ពុជា។

នៅពេលសាកសួរថា តើលោកនឹងធ្វើដូចម្តេចដើម្បីធានាថា បទឈប់បាញ់នឹងក្លាយជាកិច្ចព្រមព្រៀងសន្តិភាពរយៈពេលវែង លោក O’Neill បានអះអាងថា “ខ្ញុំគិតថា រឿងដំបូងដែលខ្ញុំនឹងធ្វើ គឺខ្ញុំចង្អុលប្រាប់ទៅកាន់ថៃ ដែលជាសម្ព័ន្ធមិត្តរបស់យើងនៅតំបន់អាស៊ីថា សង្រ្គាមបែបនេះ ជម្លោះបែបនេះ មិនមានផលប្រយោជន៍សម្រាប់ប្រជាជនថៃនោះទេ”៕ប្រភព: CNA & The Guardian & Reuters & AP៕

ដោយ: គង់ លាងហួរ
អន្តរជាតិ: ប្រទេសជប៉ុនបានឈានចូលដល់ដំណាក់កាលនៃការផ្លាស់ប្តូរយ៉ាងសុីជម្រៅ។ អត្រាអតិផរណានៅក្នុងប្រទេសជប៉ុនបានងើបឡើងវិញ ខណៈទំនាក់​ទំនង​រវាងទីក្រុងតូក្យូ​ជាមួយ​សហរដ្ឋ​អាមេរិក​បាន​ធ្លាក់​ចុះ​យ៉ាង​គំហុក។

លើសពីនេះ ប្រទេសជប៉ុនប្រឈមមុខនឹងហានិភ័យនយោបាយ បន្ទាប់ពីគណបក្សប្រជាធិបតេយ្យសេរី ដែលកំពុងកាន់អំណាច និងគណបក្ស Komeito ដែលជាដៃគូសម្ព័ន្ធយុវជនបានបាត់បង់សំឡេងភាគច្រើននៅសភាជាន់ខ្ពស់ក្នុងការបោះឆ្នោតកាលពីថ្ងៃទី២០ ខែកក្កដា។

តម្លៃប្រាក់យ៉េនរបស់ប្រទេសជប៉ុនបានដាំក្បាលចុះ២៨ភាគរយធៀបនឹងប្រាក់ដុល្លារអាមេរិកគិតចាប់តាំងពីខែមីនា ឆ្នាំ២០២២។ ការណ៍នេះបានជំរុញឱ្យអតិផរណាលើតម្លៃទំនិញនៅក្នុងប្រទេសជប៉ុនមានការកើនឡើង។

ប៉ុន្តែ ស្របពេលជាមួយគ្នានេះ ការដាំក្បាលចុះនៃតម្លៃប្រាក់យ៉េនបានធ្វើឱ្យភ្ញៀវទេសចរណ៍បរទេសហូរចូលមកកាន់ប្រទេសជប៉ុនកាន់តែច្រើន និងធ្វើឱ្យវិស័យអចលនទ្រព្យជប៉ុនមានភាពរីកចម្រើន។ ទីផ្សារអចលនទ្រព្យពាណិជ្ជកម្មនៅប្រទេសនេះបានគ្របដណ្តប់នូវចំណែកជាង១ភាគ៣នៃការវិនិយោគសរុបក្នុងតំបន់អាសុីប៉ាសុីហ្វិកនៅត្រីមាសទី១។

លើសពីនេះ តម្លៃជួលការិយាល័យកម្រិត A នៅក្នុងទីក្រុងតូក្យូ បានកើនឡើងក្នុងល្បឿនលឿនបំផុត ក្នុងចំណោមបណ្តាទីក្រុងផ្សេងទៀតនៅក្នុងតំបន់អាស៊ីប៉ាស៊ីហ្វិកកាលពីត្រីមាសទី២ ខណៈតម្លៃជួលអាផាតមុិននៅក្នុងទីក្រុងតូក្យូក៏បានកើនឡើងផងដែរ៕ប្រភព: SCMP៕