ដោយៈ ចំណាន

    ភ្នំពេញៈ មន្រ្តីជាន់ខ្ពស់នៃរាជរដ្ឋាភិបាលកម្ពុជា បានបង្ហាញសក្តានុពលនៃការធ្វើទំនើបកម្មវិស័យភស្តុភារកម្ម និងកិច្ចសហប្រតិបត្តិការរដ្ឋ-ឯកជន ក្នុងសន្និសីទស្តីពី “ការជំរុញកំណើនសេដ្ឋកិច្ចតាមរយៈវិស័យភស្តុភារកម្ម”។

ព័ត៌មាននេះត្រូវបានលើកឡើង ក្នុងឱកាសលោកស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា (ក.អ.ក.) រួមជាមួយលោក Tassilo Bronzer ប្រធានសភាពាណិជ្ជកម្មអឺរ៉ុបប្រចាំកម្ពុជា (EuroCham) បានអញ្ជើញជាសហធិបតី ក្នុងសន្និសីទស្តីពី “ការជំរុញកំណើនសេដ្ឋកិច្ច តាមរយៈវិស័យភស្តុភារកម្ម” ក្រោមកិច្ចសហការរៀបចំដោយ ក.អ.ក. EuroCham និងគណៈកម្មាធិការដឹកជញ្ជូន និងភស្តុភារកម្ម។

សន្និសីទនេះមានការចូលរួមដោយផ្ទាល់ និងតាមប្រព័ន្ធអនឡា​ញពីសំណាក់សមភាគីក្នុងតំបន់ រួមមាន EuroCham ប្រចាំនៅប្រទេសវៀតណាម មីយ៉ាន់ម៉ា សិង្ហបុរី ម៉ាឡេស៊ី និងប្រទេសឡាវ ក្រុមប្រឹក្សាធុរកិច្ចអឺរ៉ុប-អាស៊ាន (EU-ABC) សមាជិកនៃគណៈកម្មាធិការដឹកជញ្ជូននិងភស្តុភារកម្ម ព្រមទាំងសមាជិកនៃគណៈកម្មាធិការពាក់ព័ន្ធផ្សេងទៀតផងដែរ។

សន្និសីទដ៏មានសារៈសំខាន់នេះ ត្រូវបានរៀបចំឡើងក្នុងគោលបំណងជាយុទ្ធសាស្ត្រចំនួន៤ រួមមាន ទី១. បង្ហាញពីវឌ្ឍនភាព និងសមិទ្ធផលដែលសម្រេចបាន តាមរយៈការសម្របសម្រួលនៃឯកសារទស្សនាទានគោលនយោបាយ របស់កំពង់ផែស្វយ័តក្រុងព្រះសីហនុ ។ ទី២. រំលេចនូវភាពជោគជ័យ នៃគម្រូកិច្ចសហការរវាងរាជរដ្ឋាភិបាល និងវិស័យឯកជន ក្នុងការអភិវឌ្ឍនិងធ្វើឱ្យប្រសើរឡើង នូវហេដ្ឋារចនាសម្ព័ន្ធ និងសេវាភស្តុភារកម្មរបស់កម្ពុជា។

ទី៣ បង្ហាញជូនសមភាគីក្នុងតំបន់អំពីការធ្វើទំនើបកម្ម និងកំណែទម្រង់ស៊ីជម្រៅ ក្នុងហេដ្ឋារចនាសម្ព័ន្ធដឹកជញ្ជូនរបស់កម្ពុជា ទី៤. ពង្រឹងភាពប្រកួតប្រជែង តាមរយៈការបង្កើនការយល់ដឹង និងភាពលេចធ្លោរបស់កម្ពុជាក្នុងនាមជា “មជ្ឈមណ្ឌលភស្តុភារកម្ម និងពាណិ​ជ្ជកម្ម” ប្រកបដោយសក្តានុពលក្នុងតំបន់។

លើសពីគោលបំណង ដូចដែលបានរៀបរាប់ខាងលើ សន្នីសីទក៏បានដាក់ចេញនូវទិសដៅ មួយចំនួនទៀតសម្រាប់កម្ពុជា សំដៅធ្វើឱ្យក្លាយទៅជាទីផ្សារ ដែលមានទស្សនវិស័យវែងឆ្ងាយ និងកំពុងធ្វើកំណែទម្រង់យ៉ាងសកម្ម ព្រមទាំងធ្វើទំនើបកម្មក្របខណ្ឌភស្តុភារកម្ម របស់ខ្លួនផងដែរ។

ការដាក់ចេញនូវទិសដៅទាំងនោះ ធ្វើឡើងក្នុងគោលបំណង៖ (១)ផ្តល់ព័ត៌មានបច្ចុប្បន្នភាព អំពីការកែលម្អហេដ្ឋារចនាសម្ព័ន្ធ របស់កំពង់ផែស្វយ័តក្រុងព្រះសីហនុ (PAS) ដែលជំរុញដោយកំណើននៃការនាំចេញ (២) បង្ហាញពីកំណែទម្រង់ក្នុងវិស័យភស្តុភារកម្មបែបបញ្ជូនរហ័ស (Express Logistics) និងកិច្ចសម្រួលផ្នែកគយ (៣)បង្ហាញពីឥទ្ធិពល នៃកិច្ចខិតខំប្រឹងប្រែងសម្របសម្រួល រវាងស្ថាប័នរដ្ឋ និងវិស័យឯកជន និង(៤) លើកទឹកចិត្តឱ្យមានការបន្តកិច្ចសន្ទនា និងកិច្ចសហប្រតិបត្តិការឆ្លងដែន ជាមួយភាគីពាក់ព័ន្ធក្នុងតំបន់។

ជាលទ្ធផលរំពឹងទុក តាមរយៈសន្និសីទនេះ នឹងក្លាយជាកាតាលីករយ៉ាងសំខាន់ ក្នុងការបង្កើនភាពលេចធ្លោ ក្នុងតំបន់អំពីវឌ្ឍនភាពនៃវិស័យភស្តុភារកម្មរបស់កម្ពុជា ពង្រឹងទំនុកចិត្តក្នុងចំណោមវិនិយោគិន និងដៃគូពាណិជ្ជកម្ម និងលើកកម្ពស់កិច្ចសហប្រតិបត្តិការ រវាងអាជ្ញាធរជាតិ ដៃគូអភិវឌ្ឍន៍ និងវិស័យឯកជន សំដៅរួមចំណែកដល់ការអភិ​វឌ្ឍសេដ្ឋកិច្ច-សង្គមកម្ពុជាឱ្យកាន់តែរីកចម្រើន និងមានភាពធន់ក្នុងបរិបទសកលភាវូបនីយកម្ម៕

ដោយ: សហសេវិក
អន្តរជាតិ: ទីផ្សារការិយាល័យលំដាប់ខ្ពស់របស់ប្រទេសសិង្ហបុរីបានបន្តកើនឡើងនៅក្នុងត្រីមាសទីមួយនៃឆ្នាំ២០២៦។ តម្លៃជួលការិយាល័យបានកើនឡើង ទោះបីជាភាពតានតឹងផ្នែកភូមិសាស្ត្រនយោបាយបានធ្វើឱ្យក្រុមហ៊ុនមួយចំនួនមានការប្រុងប្រយ័ត្នខ្ពស់ជាងមុនអំពីការជួលយ៉ាងណាក្តី។

អត្រាការិយាល័យទំនេរក៏បានធ្លាក់ចុះផងដែរ ដោយសារការផ្គត់ផ្គង់ការិយាល័យថ្មីមិនអាចបំពេញទាន់តម្រូវការពីបណ្តាក្រុមហ៊ុន។

យោងតាមរបាយការណ៍ពីក្រុមហ៊ុនប្រឹក្សាយោបល់អចលនទ្រព្យនានា ដូចជា ក្រុមហ៊ុន CBRE Colliers JLL និង Knight Frank បង្ហាញថា តម្លៃជួលការិយាល័យនៅចំកណ្តាលទីក្រុងសិង្ហបុរីមានទំហំទឹកប្រាក់ចន្លោះពី ១១,៥៧ ដុល្លារទៅ ១២,៤០ ដុល្លារសិង្ហបុរីក្នុងមួយហ្វីតការ៉េក្នុងមួយខែនៅក្នុងត្រីមាសទី១ ឆ្នាំ ២០២៦។

ការកើនឡើងនៃតម្លៃជួលការិយាល័យត្រូវបានជំរុញជាចម្បងដោយកំណើននៃតម្រូវការរបស់អ្នកជួល ខណៈក្រុមហ៊ុននានាបានផ្លាស់ប្តូរទៅអគារថ្មីៗ ដែលមានគុណភាពខ្ពស់ជាងមុន និងការផ្គត់ផ្គង់ការិយាល័យថ្មីនៅមានកំណត់។

ទោះបីជាភាពតានតឹងផ្នែកភូមិសាស្ត្រនយោបាយនៅមជ្ឈិមបូព៌ាបានធ្វើឱ្យម្ចាស់អគារការិយាល័យ និងអ្នកជួលមួយចំនួនមានការប្រុងប្រយ័ត្នជាងមុនយ៉ាងណាក្តី ក៏ប៉ុន្តែសកម្មភាពជួលនៅតែមានស្ថិរភាព។

តម្លៃជួលការិយាល័យ​កម្រិត A នៅ​តំបន់​ពាណិជ្ជកម្ម​កណ្តាល​ (CBD) របស់សិង្ហបុរីបាន​កើនឡើង០,៨ភាគរយដល់១២,៤ដុល្លារសិង្ហបុរីក្នុង​មួយ​ហ្វីត​ការ៉េ ដែល​ជា​
ការកើនឡើងរយៈពេល៥​ត្រីមាស​ជាប់ៗគ្នា៕ប្រភព: Edgeprop៕

ដោយៈ ម៉ាលីនណា

    រតនគិរីៈ អភិបាលនៃគណអភិបាលខេត្តរតនគិរី លោកញ៉ែម សំអឿន បាននិងកំពុងធ្វើកិច្ចការនៅមូលដ្ឋាន សម្រាប់ការសាងសង់ព្រ​លាន​នៅក្នុងខេត្ត ដើម្បីទាញការវិនិយោគ និងទេសចរណ៍ ដើម្បីជំរុញចរន្តកំណើនសេដ្ឋកិច្ច និងការរីកចម្រើន ការវិនិយោគនៅខេត្តភាគឦសាន ប្រទេសកម្ពុជា។

ដោយមានចម្ងាយផ្លូវដ៏ឆ្ងាយពីរាជធានីភ្នំពេញ ដែលត្រូវប្រើពេលធ្វើដំណើរពី៧ទៅ៨ម៉ោង គឺជាឧបសគ្គចម្បងរារាំង ដល់វិស័យទេស​ចរណ៍ និងការទាក់ទាញការវិនិយោគក្នុងខេត្តរតនគិរី។ ដើម្បីដោះស្រាយបញ្ហានេះ រដ្ឋបាលខេត្តរតនគិរី កំពុងខ្នះខ្នែងពន្លឿនគម្រោងសាងសង់ព្រលានយន្តហោះថ្មី សំដៅប្រែក្លាយខេត្តភូមិភាគឦសានមួយនេះ ឱ្យទៅជាប៉ូលសេដ្ឋកិច្ចដ៏មានសក្ដានុពល បង្កើតការងារ និងលើកកម្ពស់ជីវភាពពលរដ្ឋមូលដ្ឋានឱ្យកាន់តែប្រសើរឡើង ជាពិសេសទីតាំងដែលត្រូវបានជ្រើសរើស សម្រាប់ការសាងសង់ព្រលានយន្ដហោះថ្មីនេះ គឺជាទីតាំងយុទ្ធសាស្ត្រមួយ ដែលមិនត្រឹមតែបម្រើផលប្រយោជន៍ដល់ខេត្តរតនគិរីមួយប៉ុណ្ណោះទេ ប៉ុន្តែវាស្ថិតនៅចំណុចដែលអាចតភ្ជាប់ និងផ្តល់ភាពងាយស្រួល ដល់ខេត្តជិតខាងចំនួន៣ផ្សេងទៀត រួមមាន ខេត្តស្ទឹងត្រែង មណ្ឌលគិរី និងខេត្តក្រចេះផងដែរ។

ពាក់ព័ន្ធបញ្ហានេះ អភិបាលខេត្តបានស្នើសុំទៅកាន់រដ្ឋាភិបាល ដើម្បីសាងសង់អាកាសយានដ្ឋានថ្មី ដែលលោកចាត់ទុកថាជាគន្លឹះក្នុងការស្រូបទាញវិនិយោគិន និងទេសចរ សំដៅបង្កើតការងារ និងលើកកម្ពស់ជីវភាពពលរដ្ឋក្នុងខេត្តរតនគិរី។

ជាលទ្ធផល រដ្ឋាភិបាលបានសម្រេចបង្កកដីទំហំ១៩០៥ ហិកតា ស្ថិតក្នុងភូមិថ្មី ឃុំជ័យឧត្តម ស្រុកលំផាត់ សម្រាប់គម្រោងអភិវឌ្ឍន៍នេះ ខណៈការសិក្សាពីផលប៉ះពាល់ និងបច្ចេកទេសហោះហើរ ក៏ត្រូវបានបញ្ចប់ដោយជោគជ័យហើយ ដោយបច្ចុប្បន្នស្ថិតនៅក្នុងដំណាក់កាលជ្រើសរើសក្រុមហ៊ុន ទីប្រឹក្សាដើម្បីស្វែងរកដៃគូវិនិយោគ។

លោកបញ្ជាក់ថា “ប្រសិនបើភូមិភាគឦសាននេះ មិនមានព្រលានយន្តហោះ យើងអត់មានទេសចរណ៍ យើងអត់មានការវិនិយោគទេ”។ លោកបន្ថែមថា “កុំថាឡើយ អ្នកវិនិយោគក្រៅស្រុក សូម្បីតែអ្នកវិនិយោគក្នុងស្រុក ដែលខ្ញុំតែងតែសំពះសុំគេឱ្យមកវិនិយោគ ប៉ុន្តែគេថាឆ្ងាយពេក”។

លោកបន្តទៀតថា “រឿងនេះ ខ្ញុំដុតដៃដុតជើងណាស់ ព្រោះខ្ញុំចង់ឱ្យអាណត្តិទី២របស់ខ្ញុំនេះ មានព្រលានយន្តហោះ”។

ពាក់ព័ន្ធនឹងរយៈពេលនៃការសាងសង់ លោកញ៉ែម សំអឿន បានបញ្ជាក់ថា ព្រលានយន្តហោះនេះ អាចនឹងចំណាយពេលសាងសង់ក្នុងរង្វង់៣ ទៅ៤ឆ្នាំ ទើបអាចដាក់ឱ្យដំណើរការជាផ្លូវការបាន។ លោកបន្ថែមថា កាលពីដំបូង ខ្ញុំរំពឹងថាអាចចំណាយពេលត្រឹម២ឆ្នាំ ប៉ុន្ដែក្រោយពីធ្វើការគណនា លើលក្ខណៈបច្ចេកទេសលម្អិតរួចរាល់ យើងត្រូវការពេលរហូតដល់៣ឆ្នាំ ឬអាចឈានដល់៤ឆ្នាំ។

អ្នកនាំពាក្យ និងជាអនុរដ្ឋលេខាធិការរដ្ឋលេខាធិការដ្ឋានអាកាសចរណ៍ស៊ូវិល លោកស៊ីន ចាន់សេរីវុត្ថាបានមានប្រសាសន៍ឲ្យដឹងកាលពីពេលថ្មីៗនេះថា គំរោងនេះស្ថិតក្រោមដែមសមត្ថកិច្ចរបស់ក្រសួងសេដ្ឋកិច្ច និងហិរញ្ញវត្ថុ ដែលរហូតមកទល់ពេលនេះ យើងមិនទាន់ដឹងថា ការចំណាយវិនិយោគអស់ប៉ុន្មាននៅឡើយទេ វាអាស្រ័យលើការ​សិក្សាជាក់ស្តែង។

លោកបន្តថា “យ៉ាងណាក៏ដោយវាអាចត្រូវចំណាយពេល ដោយ​សាររដ្ឋាភិបាល ត្រូវការស្វែរកដៃគូវិនិយោគពីក្រុមហ៊ុនបរទេស”៕