ដោយៈ សុផារី

ភ្នំពេញ៖ អាផាតម៉ិនភាគច្រើន ពឹងផ្អែកទៅលើការជួលនៃជនបរទេស ដែលមកទស្សនា ឬអ្នកធុរជនបរទេស កន្លងមកដោយសារឧបសគ្គនៃការធ្វើដំណើរកំឡុងកូវីដ១៩ បានជះឥទ្ធិពលដល់ទីផ្សារមួយនេះ។

ប៉ុន្តែការសិក្សាថ្មីមួយបង្ហាញថា ទីផ្សារអាផាតម៉ិននៅកម្ពុជា បន្តមានសភាពទ្រឹង និងមានស្ថិរភាពនៅក្នុងរយៈពេល៣ឆ្នាំចុងក្រោយនេះ ដោយ​សារកត្តាចំនួន២។

យោងតាមការសិក្សារបស់ក្រុមហ៊ុន PropNex Cambodia បានឱ្យដឹងថា នៅក្នុងឆ្នាំ២០២២កន្លងមក ស្ថានភាពការជួល និងតម្លៃនៃការជួលអាផាតម៉ិនបន្តនៅទ្រឹង និងមានស្ថិរភាព បើប្រៀបធៀបទៅនឹងរយៈពេល៣ឆ្នាំចុងក្រោយ ដែលកម្ពុជាទទួលរងឥទ្ធិពលពីកូវីដ១៩ ប៉ុន្តែសញ្ញាចាប់ផ្តើមមានភាពប្រសើរឡើងវិញនៅឆ្នាំនេះ។

សម្រាប់ការផ្គត់ផ្គង់ អាផាតម៉ិនប្រភេទមួយបន្ទប់ មានចំណែកចំនួន៤៩ភាគរយ តាមពីក្រោយដោយអាផាតម៉ិនប្រភេទ២បន្ទប់ ដែលមានចំនួន៣៣ភាគរយ និងប្រភេទផ្សេងៗ១៨ភាគរយ។ យ៉ាងណាក្តី អាផាតម៉ិនប្រភេទ២បន្ទប់ មានតម្រូវការខ្ពស់ជាងគេក្នុងចំណោមអ្នកជួល តាមដោយប្រភេទអាផាតម៉ិន១បន្ទប់។

ការសិក្សាដដែលបានឱ្យដឹងទៀតថា ក្នុងចំណោមអាផាតម៉ិនទាំង អាផាតម៉ិនប្រភេទ A studio ជាប្រភេទ ដែលមានតម្លៃថ្លៃបំផុត ដោយអាចជួលខ្ពស់បានរហូត៣០ដុល្លារ ក្នុងមួយម៉ែត្រការ៉េ ដោយសារអាផាតម៉ិនប្រភេទនេះមានទំហំតូចល្មម ស្រាប់តម្រូវការជាក់ស្តែង។

អ្នកស្រី អាន សុធីតា អគ្គនាយិកានៃក្រុមហ៊ុន PropNex Cambodia បានមានប្រសាសន៍ថា នៅក្នុងឆ្នាំ២០២៣ PropNex Cambodia ព្យាករថា នឹងនៅបន្តនៅទ្រឹងទៀត ដោយសារតែការព្រួយបារម្ភ អំពីស្ថានភាពនៃការបោះឆ្នោតជ្រើសរើសតំណាងរាស្រ្ត និតិកាលទី៧ នៃរដ្ឋសភាកម្ពុជា។

ម្យ៉ាងទៀត លោកស្រីបានមានប្រសាសន៍ថា លំហូរនៃជនបរទេស និងក្រុមហ៊ុនវិនិយោគបរទេស ចូលមកកាន់ប្រទេសកម្ពុជា នៅមានកម្រិតតិចតួច ដែលនឹងធ្វើឱ្យជះឥទ្ធិពល ដល់ការជួលអាផាតម៉ិន នៅក្នុងប្រទេសកម្ពុជាបន្ដទៀត៕

ដោយ: គង់ លាងហួរ

អន្តរជាតិ: ប្រទេសឥណ្ឌាកំពុងស្វែងរកការតភ្ជាប់ ការដឹកជញ្ជូនជាមួ​យប្រទេសកម្ពុជា និងបណ្តាប្រទេសជាសមាជិកអាស៊ានផ្សេងៗទៀត ដើម្បីពង្រឹងទំនាក់ទំនងពាណិជ្ជកម្ម ការធ្វើដំណើរ និងការទំនាក់ទំនងរវាងប្រជាជន និងប្រជាជន។

ផ្លូវភ្នំពេញ-ដេលី ដែលត្រូវបានបង្កើតឡើង តាមរយៈការពង្រីកបន្ថែមនៃផ្លូវហាយវេត្រីភាគី ឥណ្ឌា-មីយ៉ាន់ម៉ា-ថៃ (IMT) ទៅកាន់ច្រករបៀងសេដ្ឋកិច្ចបូព៌ា-ខាងលិច នឹងជួយនាំប្រទេសកម្ពុជា និងប្រទេសនៅតំបន់ភាគអាគ្នេយ៍ផ្សេងទៀតខិតទៅជិតទីផ្សារឥណ្ឌាដ៏ធំមួយ។

គម្រោងផ្លូវប្រវែង៣.២០០គីឡូម៉ែត្រនេះ នឹងអនុញ្ញាតឱ្យប្រទេសកម្ពុជា មីយ៉ាន់ម៉ា ឡាវ ថៃ និងវៀតណាម កាន់តែមានលទ្ធភាពចូលទៅកាន់ទីផ្សារនៃតំបន់ភាគឦសាននៃប្រទេសឥណ្ឌា និងប្រទេសបង់ក្លាដែស។

ផ្លូវហាយវេត្រីភាគី IMT អាចត្រូវបានពង្រីកដល់ ច្រករបៀងសេដ្ឋកិច្ចបូព៌ា-ខាងលិច ដែលភ្ជាប់ខ្លួនវាបន្ថែមទៀតជាមួយ មហាអនុតំបន់មេគង្គ (GMS) នៅតំបន់អាស៊ីអាគ្នេយ៍។

យោងតាមការសិក្សារបស់វិទ្យាស្ថានស្រាវជ្រាវសេដ្ឋកិច្ច សម្រាប់អាស៊ាន និងអាស៊ីបូព៌ា (ERIA) ដែលត្រូវបានចាត់តាំងដោយប្រទេសឥណ្ឌាសម្រាប់ការសិក្សាលទ្ធភាព លើផ្នែកបន្ថែមរបស់ ផ្លូវហាយវេត្រីភាគី IMT បានឱ្យដឹងថា“លទ្ធភាពនៃការអភិវឌ្ឍផ្លូវភាគខាងត្បូង សម្រាប់ផ្នែកបន្ថែមមើលទៅមានលទ្ធភាពជាងផ្លូវភាគខាងជើង”។

ផ្លូវភាគខាងត្បូង អាចទៅដល់ទីក្រុងអារញ្ញប្រាថេត តាមព្រំដែនថៃ-កម្ពុជា បន្ទាប់ពីឈានទៅដល់ទីក្រុងមេសត និងបាងកក។

ផ្លូវ​តភ្ជាប់​ដែល​បាន​ស្នើ​ឡើង​ នឹង​ធ្វើ​ដំណើរ​កាត់​ទីក្រុង​សំខាន់ៗ​របស់​កម្ពុជា​ ដូច​ជា ​រាជធានី​ភ្នំពេញ​ ទៅ​កាន់ទីក្រុង​បាវិត​ ក្បែរ​ព្រំដែន​អន្តរជាតិ​ជាមួយ​ប្រទេស​វៀតណាម។

នៅប្រទេសវៀតណាម ច្រករបៀងនឹងតភ្ជាប់កំពង់ផែ Go Dau និងទីក្រុងហូជីមិញ និងទីក្រុង Vung Tau។

យោងតាមគម្រោងនេះ ផ្លូវភាគខាងជើងអាចឆ្លងកាត់រដ្ឋShan នៃប្រទេសមីយ៉ាន់ម៉ា និងស្ពានមិត្តភាពមីយ៉ាន់ម៉ា-ឡាវ រហូតដល់ Pang Hok ដែលជាច្រកព្រំដែនរវាងឡាវ និងវៀតណាម។

បន្ទាប់ពីចូលដល់ប្រទេសវៀតណាម តាមរយៈ Tay Trang ផ្លូវនេះអាចតភ្ជាប់ជាមួយទីក្រុង Dien Bien Phu Phong ទីក្រុងហាណូយ និងទីក្រុង Hai Phong។

ទន្ទឹមនឹងនេះ ឥណ្ឌាក៏កំពុងសាងសង់ផ្នែកពីរ នៃផ្លូវហាយវេត្រីភាគី IMT ក្នុងប្រទេសមីយ៉ាន់ម៉ា គឺផ្នែកផ្លូវ Kalewa-Yagyi ប្រវែង១២០,៧៤គីឡូម៉ែត្រ និងស្ពានចំនួន៦៩ខ្សែ រួមជាមួយនឹងផ្លូវទៅកាន់ផ្នែកផ្លូវTamu-Kyigone-Kalewa (TKK) ដែលមានប្រវែង១៤៩,៧គីឡូម៉ែត្រ៕

ដោយ: គង់ លាងហួរ

អន្តរជាតិ: គម្រោងសាងសង់ស្ពានអាកាសថ្មើរជើង ដែលផ្តល់មូលនិធិដោយប្រទេសជប៉ុន ដើម្បីឆ្លងកាត់ផ្លូវដ៏កកស្ទះ ក្នុងទីក្រុង Da Nang ប្រទេសវៀតណាម បានចាប់ផ្តើមហើយកាលពីចុងសប្តាហ៍កន្លងទៅ ដោយគម្រោងនេះនឹងបញ្ចប់ក្នុងខែឧសភា ខាងមុខនេះ។

ស្ពានអាកាសថ្មើរជើងនេះ មានតម្លៃ១,៧៨លានដុល្លារអាមេរិក ត្រូវបានផ្តល់មូលនិធិដោយប្រទេសជប៉ុន និងសាងសង់ដោយក្រុមហ៊ុន Mikazuki Hotel Group។

ស្ពានថ្មើរជើងនេះមានប្រវែង១៤០ម៉ែត្រ នឹងតភ្ជាប់កន្លែងកម្សាន្ត Da Nang Mikazuki ជាមួយឆ្នេរសមុទ្រឆ្លងកាត់ផ្លូវ Nguyen Tat Thanh នៅកណ្តាលទីក្រុង Da Nang ។

លោក Yakabe Yoshinori អគ្គកុងស៊ុលជប៉ុនប្រចាំនៅទីក្រុង Da Nang បានមានប្រសាសន៍ឲ្យដឹងថា ស្ពាននេះនឹងធ្វើជាអំណោយដល់ទីក្រុង Da Nang ដើម្បីអបអរសាទរខួបលើកទី៥០ នៃទំនាក់ទំនងការទូតរវាងប្រទេសវៀតណាម និងជប៉ុន ហើយស្ពាន​នេះ ​នឹង​ក្លាយ​ជា​និមិត្តរូប​នៃ​ចំណង​មិត្តភាព ​រវាងប្រទេស​យើងទាំង​២ផងដែរ។

អនុប្រធានគណៈកម្មាធិការប្រជាជនទីក្រុង Da Nang លោក Le Quang Nam បានមានប្រសាសន៍ឲ្យដឹងថា ទីក្រុង Da Nang សម្រេចបានលទ្ធផលវិជ្ជមានជាច្រើន ក្នុងសេដ្ឋកិច្ចសង្គមកាលពីឆ្នាំ២០២២។

ជាពិសេស GRDP របស់ទីក្រុងនេះ បានកើនឡើង១៤,០៥ភាគរយ ក្នុងឆ្នាំ២០២២ បើធៀបនឹងឆ្នាំ២០២១ ដែលទីក្រុងនេះជាប់ចំណាត់ថ្នាក់លេខ៣ នៅក្នុងប្រទេសវៀតណាមទាក់ទងនឹងកំណើនសេដ្ឋកិច្ច។

ប្រទេសជប៉ុន គឺជាប្រភពវិនិយោគិនបរទេសធំជាងគេ របស់ទីក្រុង Da Nang ជាមួយនឹងគម្រោងវិនិយោគចំនួន២២២ ដែលមានតម្លៃសរុបជាង១ពាន់លានដុល្លារ។

យោងតាមអ្នកអភិវឌ្ឍន៍គម្រោងនេះបានឱ្យដឹងថា ផ្លូវ ដែលនាំទៅដល់ស្ពានអាកាសតាមបែបជប៉ុន ត្រូវបានបង្ហាញជាចំណង នៅក្នុងសិល្បៈជប៉ុននៃការត្បាញខ្សែ ដែលបង្ហាញពីចំណងដ៏រឹងមាំ នៅក្នុងវប្បធម៌នៃប្រទេ​សវៀតណាម និងជប៉ុន៕

ដោយៈ លក្ខិណា

ភ្នំពេញៈ ក្នុងរយៈពេលចុងក្រោយនេះ ខេត្តស្វាយរៀងហាក់ទទួលបា​នគម្រោងវិនិយោគថ្មីៗជាបន្តបន្ទាប់ ជាពិសេសគម្រោងរោងចក្រឧស្សាហកម្មនៅក្នុងតំបន់សេដ្ឋកិច្ច។

ជាក់ស្ដែងយោងតាមសេចក្ដីប្រកាសព័ត៌មាន របស់ក្រុមប្រឹក្សាអភិវឌ្ឍន៍កម្ពុជានៅរសៀលថ្ងៃទី១៦ មករា ឆ្នាំ ២០២៣កន្លងមកនេះ ខេត្តស្វាយរៀងទទួលបានគម្រោងវិនិយោគថ្មី២ ដែលមានទឹកប្រាក់ចំនួន២០លានដុល្លារអាមេរិក។

យោងតាមសេចក្ដីប្រកាសព័ត៌មាន របស់ក្រុមប្រឹក្សាអភិវឌ្ឍន៍កម្ពុជាដដែលបានបង្ហាញ ពីគម្រោងថ្មីៗទាំងពីរ ដែលដាក់ទីតាំងនៅក្នុងខេត្តស្វាយរៀង ក្នុងនោះរួមមាន។

ទី១- ក្រុមហ៊ុន TECHNOMATE (CAMBODIA) TECHNOLOGY CO., LTD.” គម្រោងបង្កើតរោងចក្រផលិតអំពូលភ្លើងចល័ត អំពូលភ្លើងសូឡា សម្ភារៈប្លាស្ទិក និងសម្ភារៈបរិក្ខារជួសជុល (ដែកស្វាន វីស…) ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស ស្វាយរៀង ហ្គីហ្គា រីសស៍ ខេត្តស្វាយរៀង, ក្នុងទុនវិនិយោគចំនួន១០លានដុល្លារអាមេរិក និងអាចបង្កើតការងារបានចំនួនប្រមាណ ៧៥០កន្លែង។

ទី២-ក្រុមហ៊ុន TECHNOMATE (CAMBODIA) PRECISION METAL CO., LTD.” គម្រោងបង្កើតរោងចក្រផលិតអំពូល អំពូលភ្លើងសូឡា និងបរិក្ខារអគ្គិសនី ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស ស្វាយរៀង ហ្គីហ្គា រីសស៍ ខេត្តស្វាយរៀង ក្នុងទុនវិនិយោគចំនួន១០លានដុល្លារអាមេរិក និងអាចបង្កើតការងារបានចំនួនប្រមាណ ៧៥០កន្លែង ។

លោកថា ថេង ប្រធានសាខានៃក្រុមហ៊ុនអចលនទ្រព្យ Century 21 Zillion Holding ប្រចាំខេត្តស្វាយរៀងបានឱ្យដឹងថា ចាប់តាំងពីរដ្ឋាភិបាលប្រកាសសាងសង់ផ្លូវ ល្បឿនលឿនភ្នំពេញ បាវិតឃើញយើងសង្កេតឃើញថា ខេត្តបាវិតជាពិសេសនៅចាប់ផ្ដើម ទទួលបានគម្រោងវិនិយោគថ្មីៗជាបន្តបន្ទាប់ទាំងក្នុងតំបន់សេដ្ឋកិច្ច និងក្រៅតំបន់សេដ្ឋកិច្ច ។

លោកបន្តថា ថ្មីៗនេះក៏មានក្រុមហ៊ុន និងវិនិយោគិនក្នុងស្រុកជាច្រើនបានចុះទៅដល់ទឹកដី នៃខេត្តស្វាយរៀង ដើម្បីសិក្សាពីការវិនិយោគរបស់ខ្លួន និងមានក្រុមហ៊ុនវិនិយោគិន ក្នុងស្រុកជាច្រើនទៀត ដែលមិនទាន់មានដីធ្លីសម្រាប់វិនិយោគ ក៏ចាប់ផ្ដើមស្វែងរកដី ដើម្បីត្រៀមក្នុងការបណ្ដាក់ទុនវិនិយោគនៅពេលខាងមុខ ជាពិសេសនៅពេលផ្លូវល្បឿនលឿនភ្នំពេញ  បាវិតចាប់ផ្ដើមលេចរូបរាង៕

ដោយៈ ច្រាយ ចំណាន

       ភ្នំពេញៈ អ្នកអភិវឌ្ឍន៍ដីលំហែរ នៅតែមានសុទិដ្ឋិនិយមលើទីផ្សារដីបែបនេះ នឹងមានទីផ្សារទូលំទូលាយ និងបន្តរីកច្រើននាពេលអនាគត។

ជាអ្នកអភិវឌ្ឍន៍គំរោងដីលំហែរ ទទួលបានជោគជ័យមួយរូប លោកCooler Tanអគ្គនាយកក្រុមហ៊ុនYoungsia Real Estateបានមានប្រសាសន៍ឲ្យដឹងកាលពីសប្តាហ៍មុនថា ការកើនឡើងនៃជីវភាពរបស់ប្រជាពលរដ្ឋ នឹងធ្វើឲ្យពួកគាត់នឹកដល់ការលំហែរ ស្របពេលជីវភាពពួកគាត់ល្អ មានផ្ទះរួចហើយ ពួកគាត់ចាប់ផ្តើមគិតពីការលំហែរកាយ ដើម្បីកាត់បន្ថយសម្ពាធនៅក្នុងការងារប្រចាំថ្ងៃ។

លោកបន្តថា “ប៉ុន្តែអ្នកអភិវឌ្ឍន៍ត្រូវតែមានទុនច្រើន រៀបចំហេដ្ឋារច​នា​សម្ព័ន្ឋឲ្យស្អាត និងគិតដល់ការលំហែរកាយពិតប្រាកដ”។ លោកបន្តថា “ប្រសិនជាអ្នកអភិវឌ្ឍន៍មិនធ្វើអ្វី គ្រាន់តែឈូសផ្លូវចាក់ថ្មម៉ិច និងគ្រាន់តែបោះបង្គោល វានឹងសម្លាប់ទីផ្សារដីបែបនេះ ប៉ុន្តែសម្រាប់អ្នកធ្វើពិតប្រាកដ នឹងមិនបរាជ័យទេ”។

ជាក់ស្តែងក្រុមហ៊ុនYoungsia Real Estateបានបោះទុនវិនិយោគដីលំហែរបូកគោលែន១ បូកគោលែន២ បូកគោលែន៣ គំរោងឆ្នេរសមុទ្រកោងកាង និងគំរោងឋានសួគ៌លំហែរ សុទ្ឋតែទទួលបានជោគជ័យនិងការគាំទ្រពីអតិថិជន។

លោកCooler Tanបានបន្តថា ជាក់ស្តែងគំរោងឋានសួគ៌លំហែរ យយើងបាននិងកំពុងពន្លឿន ការសាងសង់ហេដ្ឋារចនាសម្ព័ន្ឋ ក្លោងទ្វារ និងត្រៀមដាំផ្កាលឿងរាជ២០០០ដើម ព្រមទាំងសួនច្បារ និងសួនទឹកកំសាន្ត ដែលតំបន់នេះស្ថិតនៅទីតាំងមួយ ដែលមានសក្តានុពលសម្រាប់ការលំហែរ ដោយសារទី១ មានជួរភ្នំវែងអន្លាយ ខៀវស្រងាត់ ទី២ ជាតំបន់ប្រជុំដោ​យ​រមណីយដ្ឋានលំហែរកាយដូចជាត្រីមាស កំពូលពេជ្រ ជាដើម ទី៣ យើងជាក្រុមហ៊ុនមានបទពិសោធន៍ លើការអភិវឌ្ឈន៍គំរោងធំៗ។

ទី៤ ក្រុមហ៊ុនបានចំណាយទុនច្រើន លើការអភិវឌ្ឍន៍ហេដ្ឋារចនាសម្ព័ន្ឋ និងទី៥ លក្ខខ័ណ្ឌបង់ប្រាក់ល្អ ដោយអតិថិជនបង់ត្រឹម៥០ដុល្លារប៉ុណ្ណោះក្នុងមួយខែ។

ជាមួយគ្នានេះ លោកឌិន សុមេធារិទ្ឋអ្នកអភិវឌ្ឍន៍ភូមិផ្កាត្រកួននៅរាជរាជធានីភ្នំពេញ និងស្រុកស្វាយអន្ទរ ក្នុងខេត្តព្រែវែង បានមើលឃើញទីផ្សារដី និងផ្ទះលំហែរនៅតែមានសក្តានុពល ដោយសារការរីកចម្រើននៃសេដ្ឋកិច្ចជាតិ និងការអភិវឌ្ឍន៍របស់វិស័យឯកជន ដែលបានរួមចំណែកជាមួយ   រដ្ឋាភិបាលក្នុងការផ្តល់ការងារដល់ប្រជាពលរដ្ឋ។

លោកបន្តថា “ក្នុងនាមជាអ្នកអភិវឌ្ឍន៍យើងបានធ្វើរហូត ទោះបីវិបត្តិកូវីដ១៩ក្តី ហើយយើងធ្វើក្នុងនាមជាអ្នកស្នេហាជាតិ ដែលផ្តល់ការងារដល់​ប្រជាពលរដ្ឋ”។ លោកបន្តថា “អ្វីដែលលោកអភិវឌ្ឍន៍ គឺចង់ផ្តល់កន្លែងលំហែរកំសាន្តស្តង់ដាមួយ មិនឲ្យចាញ់ប្រទេសជិតខាងរបស់យើង ដែលថា យើងគ្មានកន្លែងដើរកំសាន្ត និងផ្ទះលំហែរស្តង់ដា”៕

ដោយ: សុផារី

ភ្នំពេញ: ក្រុមហ៊ុន OCIC ដែលជាម្ចាស់នៃសណ្ឋាគារibis hotel ដំបូងគេបង្អស់នៅក្នុងប្រទេសកម្ពុជា បានប្រកាសពីផែនការក្នុងការបើកដំណើរការសណ្ឋាគារ តម្លៃសមរម្យលំដាប់ពិភពលោកនេះ នៅក្នុងត្រីមាសទី១ ឆ្នាំ២០២៣។

យោងតាមសារព័ត៌មាន Travel News Asia ចេញផ្សាយនៅក្នុងខែមករានេះបានឲ្យដឹងថា ក្រុមហ៊ុនAccor គឺជាក្រុមហ៊ុនមេនៃសណ្ឋាគារ Ibis Budget Phnom Penh Riverside ដោយសណ្ឋាគារ ibis នេះគឺជាស្លាកយីហោសណ្ឋាគារមានតម្លៃសមរម្យ ធំបំផុតរបស់ពិភពលោក ដែលមានចំនួន៦៣៥សាខាទូទាំង២០ប្រទេស ជុំវិញពិភពលោក។

សណ្ឋាគារនេះ មានទីតាំងស្ថិតនៅក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ និងមានចំនួន៣០៥បន្ទប់។

លោក ប៊ុន គានអ៊ាប តំណាងក្រុមហ៊ុន OCIC ទទួលបន្ទាប់ភាពជាដៃគូជាមួយ Accor បានមានប្រសាសន៍ថា ក្រុមហ៊ុនមានភាពរីករាយតែអាចឲ្យអ្នកធ្វើដំណើរ សម្រាប់អាជីវកម្ម និងលំហែរកាយ ទទួលបាននូវឱកាសក្នុងការច្រើសរើសសណ្ឋាគារ ដែលមានតម្លៃសមរម្យថ្មីមួយ នៅក្នុងរាជធានីភ្នំពេញ។

ក្រុមហ៊ុន Accor គឺជាក្រុមហ៊ុនអន្តរជាតិឈានមុខគេមួយ ដែលមានប្រតិបត្តិការនៅក្នុងប្រទេសកម្ពុជា ដោយមានស្លាកយីហោសណ្ឋាគារចំនួនប្រាំ រួមមាន Sofitel, Raffles, Sofitel, Tribe, និង ibis styles នៅក្នុងខេត្តសៀមរាប និងក្រុងភ្នំពេញ ព្រមទាំងមានគម្រោងចំនួន ៤ផ្សេងទៀតនៅទូទាំងប្រទេស៕