ដោយៈ សុផារី

ភ្នំពេញៈ គម្រោងអចលនទ្រព្យបៃតង ចាប់ផ្តើមទទួលបានការយកចិត្តទុកដាក់ និងឱ្យតម្លៃបន្ថែមទៀតនាពេលបច្ចុប្បន្ន។ ជាក់ស្តែងគម្រោងអចលនទ្រព្យបៃតង នៅក្នុងរាជធានីភ្នំពេញបានកើនឡើង គួរឱ្យកត់សម្គា​ល់ នៅក្នុងរយៈពេលប៉ុន្មានឆ្នាំចុងក្រោយនេះ។

យោងតាមរបាយការណ៍ប្រចាំឆ្នាំរបស់ក្រុមហ៊ុន CBRE Cambodia ចេញផ្សាយកាលពីសប្តាហ៍មុនបានឱ្យដឹងថា គម្រោងបៃតងបានកើនឡើងពីចំនួន២៥៨គម្រោង នៅក្នុងឆ្នាំ២០១៩ ដល់២៩០គម្រោង នៅក្នុងឆ្នាំ២០២២ ដោយកើនឡើង១២ភាគរយ។ នៅក្នុងនោះ គម្រោងចំនួន៧៩ភាគរយ កំពុងតែដំណើរការសកម្មភាព។

យោងតាមការសិក្សាដដែលបានឱ្យដឹងថា ក្នុងចំណោមនោះ ខណ្ឌបឹងកេងកង ជាខណ្ឌដែលមានគម្រោងបៃតងច្រើនជាងគេ រហូតដល់ទៅ៥៩គម្រោង រួមមាន គម្រោងលំនៅឋានចំនួន៣០ គម្រោងចម្រុះចំនួន១២ និងការិយាល័យចំនួន៩គម្រោង។

បន្ទាប់ពីខណ្ឌបឹងកេងកង ខណ្ឌចំការមន ក៏មានគម្រោងបៃតងចំនួន៤២គម្រោង រួមមាន គម្រោងលំនៅឋាន១៥ គម្រោងចម្រុះ៩ និងផ្សេងៗ ចំនួន១០។ ខណ្ឌសែនសុខ ក៏ទទួលបានគម្រោងបៃតងច្រើនផងដែរ ដោយមានចំនួន៤១គម្រោង រួមមាន លំនៅឋានចំនួន២៥ ការិយាល័យចំនួន៩ និងគម្រោងចម្រុះចំនួន២។

អ្នកជំនាញអចលនទ្រព្យបានណែនាំ ឲ្យអ្នកអភិវឌ្ឍន៍គិតគូរពីការបន្ថែ​មគុណតម្លៃនៃភាពបៃតង ទៅក្នុងគម្រោងអភិវឌ្ឍន៍របស់ខ្លួន ខណៈតម្រូ​វការការអភិវឌ្ឍបៃតង បានទទួលការពេញនិយមច្រើនឡើង នៅក្នុងពេលបច្ចុប្បន្ន៕

  ដោយៈ វឌ្ឈនៈ

ភ្នំពេញៈ ការវិនិយោគលើវិស័យអចលនទ្រព្យ នៅក្នុងប្រទេសកម្ពុជា រំពឹងថានឹងមានសន្ទុះងើបឡើងខ្លាំង និងខ្ពស់ជាងស្ថានភាពមុនវិបត្តិកូវីដ១៩ទៅទៀត បើសិនជាស្ថានភាពសេដ្ឋកិច្ចសកល និងការហូរចូលវិនិយោ​គិនបរទេសចូលមកម្ពុជាឡើងវិញនោះ។

មានកត្តាមួយចំនួនដែលយើងហ៊ានអះអាងថា វិស័យនេះនឹងងើបឡើងខ្លាំងជាងមុនវិបត្តិ១៩ បើសិនជាវិនិយោគិនបរទេស ហូរចូលមកវិញនោះ ជាក់ស្ដែងក្នុងវិបត្តិកូវីដ១៩ កម្ពុជាបានសម្រេចនូវសមិទ្ធផលជាច្រើន ដែលសមិទ្ធផលទាំងនោះហើយ ជាការទាក់ទាញនិងជាការចង់បានរបស់វិនិយោគិនទាំងក្នុងនិងបរទេស ។

ថ្ងៃនេះគេហទំព័រProperty Area នឹងលើកយកកត្តាមួយចំនួន ដែលយើងហ៊ាននិយាយថា ស្ថានភាពវិនិយោគលើអចលនទ្រព្យ នឹងផ្ទុះឡើងខ្លាំង

១.កត្តាថាមពលអគ្គិសនី

នៅមុនវិបត្តិកូវីដ១៩ កម្ពុជាបានជួបវិបត្តិថាមពលអគ្គិសនី ដោយអគ្គិសនីកម្ពុជា បានសម្រេចផ្ដាច់ការផ្គត់ផ្គង់តំបន់មួយ ទៅផ្គត់ផ្គង់តំបន់មួយផ្សេងទៀត និងផ្គត់ផ្គង់ឆ្លាស់វេនគ្នា។ ប៉ុន្តែមកដល់ពេលនេះ កម្ពុជាមានប្រភពថាមពលអគ្គិសនីបន្ថែម ដែលធ្វើថាមពលអគ្គិសនីផ្គត់ផ្គង់គ្រប់តាមតម្រូវការ និងសល់រហូតដល់ជិត២០០មេហ្គាវ៉ាត់ សម្រាប់លក់ចេញទៅក្រៅប្រទេសទៅទៀត ។ នេះបើតាមរបាយការណ៍របស់អជ្ញាធរអគ្គិសនីកម្ពុជាបានបង្ហាញនាពេលកន្លងមក ។ ដូច្នេះនៅពេលវិនិយោគិនចូលមកកម្ពុជា យើងនឹងលែងមានការខ្វះខាតថាមពល សម្រាប់ផ្ដល់ជូនវិនិយោគទៀតហើយ ។

២. ហេដ្ឋារចនាសម្ព័ន្ធថ្មីៗ

ក្នុងអំឡុងវិបត្តិកូវីដ១៩ រាជរដ្ឋាភិបាលបានចំណាយថវិកា សម្រាប់សាងសង់ ហេដ្ឋារចនាសម្ព័ន្ធថ្មីៗជាច្រើនជាពិសេស ហេដ្ឋារចនាសម្ព័ន្ធផ្លូវជាច្រើនខ្សែនៅខេត្តព្រះសីហនុ និងខេត្តសៀមរាប ដែលខេត្តទាំងពីរនេះសុទ្ធតែជាខេត្ត ដែលមានសក្ដានុពលក្នុងការទាក់ទាញ ការវិនិយោគពីសំ​ណាក់វិនិយោគិនក្នុងនិងក្រៅប្រទេស។

អ្វីដែលកម្ពុជាទើបតែទទួលបានថ្មីៗនោះ គឺផ្លូវល្បឿនលឿនភ្នំពេញ ក្រុងព្រះសីហនុ ដែលផ្លូវមួយនេះនឹងសម្រួល ដល់ការធ្វើដំណើររបស់វិនិយោគិន និងទេសចរទៅកាន់ក្រុងព្រះសីហនុ និងពីព្រះសីហនុមកកាន់រាជធានីភ្នំពេញ។

៣. ច្បាប់វិនិយោគថ្មីរបស់កម្ពុជា

ច្បាប់នេះក៏ទើបប្រកាសដាក់ឱ្យប្រើប្រាស់ ក្នុងអំឡុងពេលនៃវិបត្តិកូវីដ១៩ដែរ ដែលតាមរយៈច្បាប់ថ្មីនេះដែរ បានលើកទឹកចិត្តនិងសម្រួលដល់វិនិយោគិនច្រើន ជាពិសេសវិនិយោគិនមកពីបរទេស ដែលទាំងអ្នកវិនិយោគក្នុងស្រុកក៏ដូចជាមន្ត្រីរដ្ឋាភិបាលរំពឺងថា នឹងអាចទាក់ទាញការវិនិយោគច្រើនពីបរទេស ។

៤.ការត្រៀមខ្លួនរួចជាស្រេចរបស់វិនិយោគិនក្នុងស្រុក

វិនិយោគិនក្នុងវិស័យអចលនទ្រព្យ នៅកម្ពុជាជាច្រើនបានត្រៀមខ្លួនរួចជាស្រេចក្នុងការស្វាគមន៍ និងរង់ចាំទទួលវិនិយោគិនបរទេស ដើម្បីសហការគ្នាក្នុងការបណ្ដាក់រួមក្នុងវិស័យអចលនទ្រព្យ ដែលកត្តានេះនឹងជំរុញឱ្យមានការវិនិយោគកាន់តែច្រើននៅពេលខាងមុខ។

ផលចំណេញពីការវិនិយោគខ្ពស់ធៀបជាមួយប្រទេសក្នុងតំបន់

       អ្នកជំនាញជាតិ អន្តរជាតិ សុទ្ឋតែមើលឃើញថា កម្ពុជាជាប្រទេសដែលទទួលបានផលចំណេញខ្ពស់ពីការវិនិយោគ ធៀបជាមួយបណ្តាប្រទេ​សក្នុងតំបន់ ដោយសារកម្ពុជាមានមនុស្សវ័យក្មេងច្រើន ជាទីផ្សារថ្មី មានសេដ្ឋកិច្ចរីកចម្រើនលឿន និងស្ថេរភាពនយោបាយរ៉ឹងមាំ។

ការងើបឡើងនៃកំលាំងចលករសេដ្ឋកិច្ចសំខាន់ៗ

       កំលាំងចលករសេដ្ឋកិច្ចសំខាន់ៗរួមមាន វិស័យវាយភ័ណ្ឌ វិស័យទេ​សចរណ៍ វិស័យកសិកម្មបាន និងកំពុងមានសន្ទុះកំណើនខ្ពស់ ក្រោយ​រដ្ឋាភិបាលបានបើកចំហសេដ្ឋកិច្ចឡើងវិញ ដែលធ្វើឲ្យទំហំនៃការនាំចេញរបស់កម្ពុជាមានកំនើនខ្ពស់ ធៀបនឹងមុនវបត្តិ។

កំណើនខ្ពស់នៃលំហូរពាណិជ្ជកម្ម និងការវិនិយោគ ដោយសារកម្ពុជាបានធ្វើសមាហរណកម្មខ្លួនឯងចូលក្នុងឆាកអន្តរជាតិ និងពិភពលោក ពិសេ​សជាមួយបណ្តាប្រទេសជាដៃគូ ជាក់ស្តែងកម្ពុជាបានចុះកិច្ចព្រមព្រៀងពាណិជ្ជកម្មសេរី និងបានចូលជាធរមានជាមួយប្រទេសចិននៅខែមករា ឆ្នាំ២០២២កន្លងមកនេះ និងបានចូលជាសមាជិកនៃRCEP ដែលគ្របដណ្តប់លើមនុស្សប្រមាណ២០០០លាននាក់ និងទំហំពាណិជ្ជកម្មស្មើ៣០ភាគរយនៃពាណិជ្ជកម្មពិភពលោក កម្ពុជាក៏បានចុះហត្ថលេខា និងចូលជាធរមានលើកិច្ចព្រមព្រៀងពាណិជ្ជកម្មសេរីកម្ពុជា កូរ៉េ និងត្រៀមធ្វើការសហការនិងចុះកិច្ចព្រមព្រៀងពាណិជ្ជកម្មសេរី ជាមួយបណ្តាប្រទេសជាមិត្តជាច្រើនទៀត។

នៅមានកត្តាជាច្រើនទៀត ដែលយើងមិនបានលើកយកមកបង្ហាញ ពីការដែលរំពឹងថា កម្ពុជានឹងទទួលបានវិនិយោគច្រើនពីបរទេស និងក្នុងស្រុកលើវិស័យអចលនទ្រព្យ បើសិនជាស្ថានភាពល្អប្រសើរឡើងវិញ និងមានរំហូរវិនិយោគិនចូលមកម្ពុជា។

លោកឧកញ៉ាឃាង ពុទ្ធី ប្រធានក្រុមប្រឹក្សាភិបាលនៃសមាគមអ្នកជំនាញអចលវត្ថុកម្ពុជាបានលើកឡើងថា ស្ថានភាពអចលនទ្រព្យនៅក្នុងប្រទេសកម្ពុជា អាចនឹងដូចមុនវិបត្តិកូវីដ១៩ នៅក្នុងអំឡុងឆ្នាំ២០២៣ឬដើមឆ្នាំ២០២៤។

ជាមួយគ្នានេះ លោកខន គង្គាអគ្គនាយកក្រុមហ៊ុន ERA Cambodia ដែលជំនាញលើទីផ្សារខុនដូនោះថា ក្នុងឆ្នាំ២០២៣នេះទីផ្សារខុនដូនឹងងើបឡើងខ្លាំង អាចនឹងខ្លាំងជាងមុនវិបត្តិកូវីដ១៩ទៅទៀត។

អ្នកស្រីអាន សុធីតាអគ្គនាយិកាក្រុមហ៊ុនPropNex Cambodiaបានមានប្រសាសន៍ឲ្យដឹងផងដែរថា វិស័យអចលនទ្រព្យកម្ពុជា ចាប់ផ្តើមមានសញ្ញាល្អប្រសើរ ខណៈលំហូរទុនវិនិយោគពីបរទេស្ងប់ស្ងាត់ក្តី ប៉ុន្តែយើងនៅតែមានសង្ឃឹម ជាពិសេសផ្នែកនិងវិស័យដទៃទៀត នឹងមានការរីកចម្រើ​នលឿននាពេលអនាគតឆាប់ៗនេះផងដែរ ដូចជា វិស័យសណ្ឋាគារ និងបដិសណ្ឋារកិច្ច វិស័យកសិកម្ម វិស័យឧស្សាហកម្ម ការវិនិយោគលើអាគារការិយាល័យជាដើម។

ជាមួយគ្នាផងដែរ លោកឡោ វិចិត្រអនុប្រធានសមាគមពាណិជ្ជកម្មកម្ពុជា ចិន និងជាសមាជិកក្រុមប្រឹក្សាភិបាលសមាគមពាណិជ្ជកម្មម៉ាឡេស៊ី កម្ពុជាបានមើលឃើញកម្ពុជា នឹងក្លាយជាខ្លាសេដ្ឋកិច្ចមួយនៅក្នុងរយៈពេល៥ ទៅ១០ឆ្នាំខាងមុខ ដោយសារកត្តាជាច្រើន ដែលរួមមានកំនើនសេដ្ឋកិច្ច លំហូរទុនវិនិយោគពីក្រៅប្រទេស គោលនយោបាយរបស់រាជរដ្ឋា ភិបាល ដើម្បីលើកទឹកចិត្តវិនិយោគិនបរទេស បន្ទាប់ពីច្បាប់វិនិយោគថ្មីបាន​ដាក់ឲ្យដំណើរការ។

លោកបន្ថែមថា “ការដាក់ឲ្យដំណើរការតុលាការពាណិជ្ជកម្ម របស់កម្ពុជានៅឆ្នាំនេះ ក៏ជាផ្នែកមួយដ៏សំខាន់ដែលនឹងទាក់ទាញ ទំនុកចិត្តអ្នកវិនិយោគអន្តរជាតិសម្លឹងមកកាន់ទីនេះផងដែរ”។

បន្ថែមពីលើនេះ លោកបណ្ឌិតBen Liអគ្គនាយកនៃក្រុមហ៊ុនUrban Village ដែលជាវិនិយោគិនហុងកុង និងបានវិនិយោគគំរោងដ៏ធំនៅរាជធានីភ្នំពេញបានមានប្រសាសន៍ឲ្យដឹងនាពេលថ្មីៗនេះថា កម្ពុជាមានមូល ដ្ឋាននៃការរីកចម្រើនលឿន ដោយកំនើនសេដ្ឋកិច្ចរបស់ប្រទេសនេះមានកំនើនខ្ពស់ជាងគេលើពិភពលោក ស្របពេលតំបន់អាស៊ាន បាននិងកំពុងក្លាយជាតំបន់មួយ មានសន្ទុះរីកចម្រើនលឿនជាងគេក្នុងពិភពលោក។

លោកបន្តថា “កំណើនប្រជាជនវ័យក្មេង កំណើនប្រជាសាស្រ្តដែលមានអត្រា១,៤ភាគរយប្រចាំឆ្នាំ កម្ពុជាមានកំនើនមនុស្សលឿនជាងគេក្នុងតំបន់”។ លោកបន្ថែមថា “ប្រសិនជាអ្នកមានប្រាក់ សូមវិនិយោគលើអចល​ទ្រព្យនៅកម្ពុជា វានឹងមានឱកាសរីកចម្រើនខ្ពស់”៕

ដោយ: គង់ លាងហួរ

អន្តរជាតិ: ប្រទេសហ្វីលីពីនបានកំណត់ថវិកាចំនួន១៧,៧ពាន់លានប៉េសូ (ប្រហែល៣២២លានដុល្លារអាមេរិក) ក្នុងការផ្តល់មូលនិធិដល់ការសាងសង់ និងធ្វើឱ្យប្រសើរឡើងនូវផ្លូវថ្នល់ ដើម្បីធ្វើឱ្យកន្លែងទេសចរណ៍ផ្សេងៗកាន់តែងាយស្រួលសម្រាប់ភ្ញៀវទេសចរ។

លោក Marvin Rillo សមាជិកសភាតំណាងរាស្រ្តហ្វីលីពីន បានមានប្រសាសន៍ថា មូលនិធិនេះ នឹងត្រូវបានប្រើសម្រាប់កម្មវិធី ហេដ្ឋារចនាស  ម្ព័ន្ធផ្លូវទេសចរណ៍ របស់រដ្ឋាភិបាលនៅឆ្នាំ២០២៣នេះ។

លោក Marvin Rillo បានបន្តថា “យើងកំពុងពឹងផ្អែកលើការងើបឡើងវិញ នៃវិស័យទេសចរណ៍ពីជំងឺរាតត្បាត ដើម្បីបង្កើតការងារ និងឱកា​សចិញ្ចឹមជីវិតថ្មី សម្រាប់ប្រជាជនហ្វីលីពីន ជាពិសេសនៅតាមខេត្ត”។

លោក Rillo បានអះអាងថា ប្រទេសហ្វីលីពីនត្រូវអភិវឌ្ឍន៍ផ្លូវ និងស្ពានបន្ថែមទៀត ដើម្បីបើកគោលដៅដល់ភ្ញៀវទេសចរ នៅទូទាំងប្រជុំកោះ ដោយលោកបន្ថែមថា មន្ទីរទេសចរណ៍ និងសាធារណការ និងផ្លូវហាយវេ បានរួមគ្នាកំណត់គម្រោង ដែលនឹងទទួលបានមូលនិធិក្រោមកម្មវិធីហេដ្ឋារចនាសម្ព័ន្ធផ្លូវទេសចរណ៍របស់រដ្ឋាភិបាល។

កាលពីខែធ្នូ ឆ្នាំ២០២២ កន្លងទៅ សភាតំណាងរាស្រ្តបានអនុម័តលើការអានលើកទី៣ និងការអានលើកចុងក្រោយ នៃសេចក្តីព្រាងច្បាប់ចំនួន៣៤ ដែលកំណត់គោលដៅទេសចរណ៍ថ្មីនៅទូទាំងប្រទេស រួមទាំងទឹកជ្រោះធ្លាក់ ឧទ្យានជាតិ និងរូងភ្នំ។

ប្រទេសហ្វីលីពីន កំពុងកែលម្អការតភ្ជាប់ និងភាពងាយស្រួល ដើម្បីទាក់ទាញភ្ញៀវទេសចរកាន់តែច្រើន រួមទាំងការធ្វើឱ្យប្រសើរឡើងនូវហេដ្ឋារចនាសម្ព័ន្ធទេសចរណ៍ និងឌីជីថលនីយកម្មផងដែរ។

ជាពិសេស រដ្ឋាភិបាលហ្វីលីពីនគ្រោង នឹងអភិវឌ្ឍទេសចរណ៍តាមនាវា រៀបចំពិព័រណ៍ទេសចរណ៍ក្នុងតំបន់ អភិវឌ្ឍរង្វង់ទេសចរណ៍ និងបន្តរួប​រួមធ្វើការជាមួយភ្នាក់ងាររដ្ឋាភិបាល ដែលលើកកម្ពស់វិស័យទេសចរណ៍៕

ដោយ៖ សុផារី

ភ្នំពេញ៖ ការដ្ឋានសាងសង់ស្ពានបេតុងខ្សែកាបឫស្សីកែវឆ្លងកាត់ទន្លេសាបសម្រេចបាន ៩៣ភាគរយនៃគម្រោងទាំងមូលហើយ ហើយនឹងបើកដំណើរការនៅខែមេសា ឆ្នាំ២០២៣ខាងមុខ។

នេះបើយោងតាមមន្ទីរសាធារណការ និងដឹកជញ្ជូនរាជធានីភ្នំពេញ នៅព្រឹកថ្ងៃទី១៦ ខែមករា ឆ្នាំ២០២៣នេះ បានឱ្យដឹងថា ការដ្ឋានសាងសង់ស្ពាននេះបានសម្រេចលទ្ឋផលដល់ដំណាក់កាលនៃការតភ្ជាប់តួស្ពានទាំងមូលហើយ ធ្វើឡើងក្រោមអធិបតីភាព លោក ឃួង ស្រេង អភិបាលរាជធានីភ្នំពេញ និងអ្នកឧកញ៉ា ពុង ឃាវសែ។

មន្ទីរសាធារណការ និងដឹកជញ្ជូនបានឱ្យដឹងថា តាមផែនការ គម្រោងស្ពាន ដែលចំណាយចំណាយថវិកាប្រមាណ៣៥លានដុល្លារសហរដ្ឋអាមេរិកនេះ នឹងបញ្ចប់ការសាងសង់ទាំងស្រុង នៅក្នុងខែមេសា ឆ្នាំ២០២៣ខាងមុខ។

ស្ពានបេតុងខ្សែកាបថ្មីនេះ ឆ្លងកាត់ទន្លេសាបពីក្រុងរណបជ្រោយចង្វារ និងផ្លូវជាតិលេខ៦ មកកាន់ផ្លូវជាតិលេខ៥។ ស្ពានថ្មីនេះនឹងជួយសម្រួលឱ្យការដឹកជញ្ជូនទំនិញ និងការធ្វើដំណើរផ្សេងៗចេញពីខេត្តនានាមកកាន់រាជធានីភ្នំពេញ និងពីរាជធានីភ្នំពេញទៅកាន់ខេត្តនានា ដែលកំពុងមានកំណើនការធ្វើចរាចរណ៍ជាប្រចាំ។

គម្រោងស្ពានខ្សែកាបឫស្សីកែវនេះ មានរចនាបទទំនើប ដែលមានសរសរធំចំនួន៤បង្គោល មានកម្ពស់រហូតដល់៤០ម៉ែត្រ សម្រាប់ព្យួរខ្សែកាប។ ស្ពានបេតុងនេះ ស្ថាបនានៅអមជាមួយស្ពានបេឡេ មានប្រវែង៩២២ម៉ែត្រ មានទទឹង២០,៥ម៉ែត្រ ចិញ្ចើមស្ពានសម្រាប់ថ្មើរជើង មានទទឹង១,២៥ម៉ែត្រសងខាង។

កម្ពស់សរសរស្ពានសម្រាប់ព្យួរខ្សែកាបធៀបនឹងកម្រាលស្ពាន៣៤ម៉ែត្រ។ គន្លងខ្សែយានយន្តមានទទឹង៣,៧៥ម៉ែត្រ គន្លងធ្វើចរាចរណ៍២ខ្សែទៅ២ខ្សែមក។ កម្ពស់នាវាចរក្រោមស្ពានអតិបរមានៅរដូវវស្សា១០,៥ម៉ែត្រ។ កម្ពស់នាវាចរក្រោមស្ពានអប្បរមានៅរដូវប្រាំង ២០,៥ម៉ែត្រ ដោយមានបំពាក់បង្គោលភ្លើងបំភ្លឺ និងដាក់ស្លាកសញ្ញាចរាចរណ៍៕

  ដោយៈ វឌ្ឍនៈ

ភ្នំពេញៈ នៅតាមបណដោយផ្លូវជាតិសំខាន់ៗ ដែលមានទិសដៅចេញពីរាជធានីភ្នំពេញ បាននិងកំពុងទាក់ទាញការអភិវឌ្ឍ លើលំនៅឋានជាពិសេសបណ្ដុំលំនៅឋានជាបុរី ហើយយើងមើលឃើញថាផ្លូវជាតិសំខាន់ៗត្រូវបានអភិវឌ្ឍន៍ជាលំនៅឋាន សម្រាប់ផ្គត់ផ្គង់លើទីផ្សារស្របនឹងកំណើនប្រជាពលរដ្ឋរស់នៅភ្នំពេញកាន់តែកើនឡើង។

ជាការកត់សម្គាល់យើងសង្កេតឃើញថា ផ្លូវជាតិពីលេខ១ដល់លេខ៦ សុទ្ធតែមានគម្រោងអភិវឌ្ឍន៍លំនៅឋាន នៅតាមបណ្ដោយផ្លូវជាតិទាំងនោះគ្រាន់តែផ្លូវជាតិខ្លះ មានការអភិវឌ្ឍលំនៅឋានតម្លៃខ្ពស់ ផ្លូវជាតិខ្លះតម្លៃមធ្យម និងខ្លះទៀតតម្លៃសមរម្យ ។

ផ្លូវជាតិលេខ១ និងលេខ៦ ត្រូវបានមើលឃើញថា ជាតំបន់ដែលមានការទាក់ទាញ លើលំនៅឋានដែលមានតម្លៃមធ្យមឡើងទៅ ដោយក្រុមហ៊ុនខ្លះអភិវឌ្ឍន៍លំនៅឋានតម្លៃ រាប់ម៉ឺនដុល្លារនិងមានរហូត ដល់ខ្ទង់លានដុល្លារផងដែរ។

ផ្លូវជាតិលេខ២លេខ៣ និងលេខ៤ ក៏មានការអភិវឌ្ឍលើលំនៅឋានច្រើនគួរសមដែរ ប៉ុន្តែអ្នកអភិវឌ្ឍន៍ផ្ដោតលើលំនៅឋាន ដែលមានតម្លៃសមរម្យក្រោម១០ម៉ឺនដុល្លារអាមេរិក ហើយការរីកចម្រើននៃលំនៅឋានប្រភេទក៏កាន់តែរីកដុះដាលខ្លាំងឡើង ពីមួយឆ្នាំៗទៅមួយឆ្នាំ ស្របនឹងរដ្ឋាភិបាលក៏បានលើកទឹកចិត្ត ដល់បណ្ដាវិនិយោគិននានា បន្តអភិវឌ្ឍន៍លំនៅឋានតម្លៃសមរម្យ ដោយរដ្ឋាភិបាលបានបន្តលើកលែង ការយកពន្ធប្រថាប់ត្រាលើការផ្ទេរកម្មសិទ្ធិលំនៅឋាន ដែលមានតម្លៃក្រោម៧ម៉ឺនដុល្លារអាមេរិក ពីក្រុមហ៊ុនអភិវឌ្ឍន៍ ។

តាមរយៈការអភិវឌ្ឍលំនៅឋានតម្លៃសមរម្យនេះដែរ ក៏ជាចំណែកមួយដល់ការចូលរួម ដោះស្រាយបញ្ហាលំនៅឋាន របស់ប្រជាពលរដ្ឋរស់នៅរាជធានីភ្នំពេញ និងមានក្រុមហ៊ុនខ្លះ បានផ្ដល់លក្ខខ័ណ្ឌងាយស្រួលក្នុងការបង់ប្រាក់ទៀតផង ដោយក្រុមហ៊ុនមួយចំនួន បានផ្ដល់ឱកាសឱ្យអតិថិជនទិញផ្ទះពីគម្រោងរបស់ខ្លួនដោយបង់រំលស់ ។

យោងតាមរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់ប្រចាំឆ្នាំ២០២២ ក៏បានបង្ហាញផងដែរថា ក្នុងចំណោមគម្រោងសំណង់ ដែលក្រសួងបានចេញលិខិត អនុញ្ញាតឱ្យសាងសង់នោះ ឃើញថាគម្រោងអភិវឌ្ឍន៍ លំនៅឋានមានចំនួនច្រើនជាងគេ រួមទាំងទឹកប្រាក់វិនិយោគផងដែរ។ ការនេះបានបញ្ជាក់ពីតម្រូវការ លំនៅឋាននៅក្នុងប្រទេសកម្ពុជា នៅតែបន្តមានតម្រូវការខ្ពស់ ដែលធ្វើក្រុមហ៊ុនអភិវឌ្ឍន៍ត្រូវការស្នើសុំសាងសង់ផ្ទះបន្ថែមដើម្បីបំពេញតម្រូវការលើទីផ្សារ ។

លោកប៉ូ អ៊ាវគង់ អគ្គនាយកក្រុមហ៊ុនអចលនទ្រព្យAdvanceបានឱ្យដឹងថា ទីផ្សារលំនៅឋាននៅក្នុងប្រទេសកម្ពុជា នៅតែបន្តមានខ្ពស់ជាពិសេ​សនៅរាជធានីភ្នំពេញ និងតំបន់ជាយៗរាជធានីភ្នំពេញ ហើយវាក៏កាន់តែមានតម្រូវការខ្ពស់បន្ថែមទៀត នៅពេលអនាគតខាងមុខគ្រា ដែលផ្ទៃដីរាជធានីភ្នំពេញកាន់តែរីកធំជាបន្តបន្ទាប់៕