ដោយៈ គង់ សូរិយា

       ភ្នំពេញៈ អ្នកអភិវឌ្ឍន៍បានលើកឡើងថា ការវិនិយោគផ្ទះនៅតំបន់ក្រវ៉ាត់ក្រុងទី៣ ផ្តល់សក្តានុពលខ្ពស់លើប្រាក់ចំណេញ និងឱកាសអាជីវកម្មច្រើន។

លោកតាំង កៅគៀត នាយកប្រតិបត្តិនៃបុរីGB Residenceបានមានប្រសាសន៍ឲ្យដឹងកាលពីសប្តាហ៍មុនថា នាពេលអនាគត តំបន់ផ្លូវក្រវ៉ាត់ក្រុងទី៣ នឹងមានការរីកចម្រើនមិនចាញ់តំបន់ដទៃនោះទេ ដោយសា​រតំបន់នេះ ស្ថិតនៅកៀកនឹងព្រលានយន្តហោះអន្តរជាតិតេជោ ក្រុងតាខ្មៅ ដែលវានឹងធ្វើឲ្យមនុស្សកាន់តែច្រើនចូលមករស់នៅ និងប្រកបអាជីវកម្មនៅតំបន់នេះ។

លោកបន្តថា “ជាមួយនឹងការសាងសង់ហេដ្ឋារចនាសម្ព័ន្ឋធំទូលាយ និងផ្តោតលើសហគមន៍បៃតង បុរីGB Residenceនឹងទាក់ទាញមនុស្សមករស់នៅច្រើន និងប្រកបអាជីវកម្មបាន”។ លោកបន្តថា “ហេតុផលនៅត្រង់ថា មុខបុរីរបស់យើងមានផ្លូវបេតុងទំហំ៥០ម៉ែត្រ ដែលអនុញ្ញាត្តឲ្យសាធារណៈជន ពិសេសអ្នកដំណើរជាតិ អន្តរជាតិនឹងធ្វើដំណើរឆ្លងកាត់តំបន់នេះ ដើម្បីចេញ ចូលទៅកាន់ព្រលានយន្តហោះ”។

លោកតាំង កៅគៀតបានបន្តថា អ្នកវិនិយោគផ្ទះនៅទីនេះ មិនត្រឹមទទួលបានសំណង់មានគុណភាពនោះទេ ប៉ុន្តែរចនាបទផ្ទះនិមួយៗមានភាពស្រស់ស្អាត ដោយសរាក្រុមហ៊ុនបានចំណាយទុនយ៉ាងច្រើន ដើម្បីជួលស្ថាបត្យករជំនាញលំដាប់ពិភពលោក មកគូរប្លង់និងរចនាម៉ូតផ្ទះក្នុងគំរោងនេះ ដែលមើលកាន់តែយូរកាន់តែមានភាពស្រស់ស្អាត។

លើសពីនេះបុរីGB Residence ក៏បានសាងសង់សួនច្បារដ៏ស្រស់ស្អាតនៅក្នុងគំរោង ដែលអាចឲ្យអ្នកស្នាក់នៅប្រើប្រាស់ សំរាប់ការកំសាន្ត ការហាត់ប្រាណ និងជួបជុំក្រុមគ្រួសារផងដែរ។

កញ្ញាកាំង តារាវត្តី ប្រធានផ្នែកទីផ្សារនៃបុរីGB Residenceបានមានប្រសាសន៍ឲ្យដឹងផងដែរថា បុរីនេះបានផ្តោតលើ់គុណតម្លៃស្នូលធំៗ ដូចជា គុណភាព និងសោភ័ណភាពសំណង់ ហេដ្ឋារចនាសម្ព័ន្ឋធំទូលាយ ការកសាងសហគមន៍បែបបៃតង ដែលមានភាពស៊ីវិល័យ និងស្រស់ស្រាយ ពិសេសយើង មានលក្ខខ័ណ្ឌបង់ប្រាក់ងាយស្រួល និងបត់បែនយ៉ាងប្រសើរ។

កញ្ញាបន្តថា “ខ្ញុំគិតថាអ្នកទិញផ្ទះក្នុងបុរីនេះ នឹងមានផលចំណេញត្រលប់ខ្ពស់ នៅពេល៣ឆ្នាំខាងមុខ ក្រោយពេលអ្នកដំណើរចេញចូលព្រលានយន្តហោះឆ្លងកាត់តំបន់នេះកាន់តែច្រើន”៕

 ដោយៈគង់ សូរិយា

       ខេត្តកែបៈ ការអភិវឌ្ឍន៍ប្រកបដោយចីរភាព និងការទទួលខុសត្រូវក្នុងសង្គម ពិតជាមានសារៈសំខាន់ណាស់ ដើម្បីឲ្យគំរោងវិនិយោគមួយទទួល​បានជោគជ័យ។

ជាក់ស្តែង ការចំណាយលើហេដ្ឋារចនាសម្ព័ន្ឋ លើគំរោងដីលំហែរពិតជាមានសារៈសំខាន់ ដើម្បីបង្កើតក្តីសុបិនរបស់អ្នកចង់បានដី ដើម្បីសាងសង់ផ្ទះលំហែរកាយ។

“គំរោងឆ្នេរសមុទ្រកោងកាង” ដែលស្ថិតនៅខេត្តកែបបាននិងកំពុងដើរតួនាទីកាន់តែសំខាន់ ក្នុងការអភិវឌ្ឍន៍សហគមន៍ ដោយគំរោងនេះបាន​ផ្តល់គុណតម្លៃចំនួន៥ដល់អតិថិជន ដូចជា ទី១ គំរោងដែលមានទស្សនវិស័យ និងការអភិវឌ្ឍពិតប្រាកដ ទី២ គំរោងនេះ បានចូលរួមជាមួយរដ្ឋាភិបាល ក្នុងការលើកកំពស់កិត្យានុភាពខេត្តកែប ជាខេត្តដែលរាជរដ្ឋាភិបាលជ្រើសរើសជាតំបន់វិស្សមកាលកម្រិតខ្ពស់ ទី៣ ជាគំរោងដែលផ្តោតលើការលំហែរពិតប្រាកដ ដោយក្រុមហ៊ុនYoungsia Real Estateបាននិងកំពុងផ្តល់នូវការអភិវឌ្ឍពិតប្រាកដ។

ទី៤ គំរោងបានអភិវឌ្ឍន៍ហេដ្ឋារចនាសម្ព័ន្ឋ ដូចជាស្ពានជាប់ឆ្នេរមានប្រវែង១០០០ម៉ែត្រ ដើមកោងកាងខៀវស្រងាត់ ការរៀបចំហេដ្ឋារចនាសម្ព័​ន្ឋ​ពិតប្រាកដ និងពោរពេញដោយភាពទាក់ទាញ​ ជាមួយនឹងដើមដូងរាប់រយដើម ដែលបាននិងកំពុងចាប់ផ្តើមដាំនៅតំបន់នេះ និងទី៥ ជាគំរោងមានការគាំទ្រពីអាជ្ញាធរខេត្ត ពិសេសការអភិវឌ្ឍន៍ត្រូវបានផ្សារភ្ជាប់នឹងបរិស្ថាន និងគុណភាពទឹក ដើម្បីឲ្យអ្នកទិញដីលំហែរទទួលបាន អារម្មណ៍ស្រស់ស្រា​យពិតប្រាកដ។

លោកCooler Tanអគ្គនាយកក្រុមហ៊ុនYoungsia Real Estateដែលបានវិនិយោគគំរោងនេះ ជាមួយទុនប្រមាណ៧លានដុល្លារអាមេរិកបានមានប្រសាសន៍ថា យើងបាននិងកំពុងធ្វើការយ៉ាងសកម្ម ដើម្បីអភិវឌ្ឍ​ន៍គំរោងនេះ និងលើកស្ទួយផែនការអភិវឌ្ឍរបស់ខេត្ត ឲ្យកាន់តែមានភាពទាក់ទាញថែមទៀត។

លោកបន្តថា “ដោយសារយើងនិយាយពិត ធ្វើពិត បានធ្វើឲ្យគំរោងរបស់យើងនិមួយៗ ទទួលបានជោគជ័យ រាប់ចាប់តាំងពីបូកគោលែន១ ដល់ទី៣ និងគំរោងឆ្នេរសមុទ្រកោងកាង ដែលរហូតមកទល់ពេលនេះ យើងលក់អស់ជាង៦០ភាគរយហើយ”។ លោកបន្តថា “ការអភិវឌ្ឍរបស់យើងផ្តោតលើ់ហេដ្ឋារចនាសម្ព័ន្ឋ ដើម្បីឲ្យអ្នកទិញដីលំហែរ ទទួលបានដីលំហែរពិតប្រាកដ”៕

 ដោយៈ វឌ្ឍនៈ

ភ្នំពេញៈ ក្នុងឆ្នាំ២០២២នេះ គេឃើញថាសកម្មភាពនៃការសាងសង់នៅក្នុងវិស័យសំណង់ ក្នុងប្រទេសកម្ពុជា ហាក់មានកំណើនឡើងច្រើនធៀបនឹងឆ្នាំ២០២១។

យោងរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់បានបង្ហាញឃើញថា ចំនួនគម្រោង និងទឹកប្រាក់វិនិយោគបានធ្លាក់ចុះប្រមាណជិតពាក់កណ្ដាល បើសិនជាធៀបនឹងឆ្នាំ២០២១។

របាយការណ៍ដដែលបានបង្ហាញថា ក្នុងរយៈពេល១១ខែក្នុងឆ្នាំនេះទិន្នន័យសំណង់ទូទាំងប្រទេស មានចំនួន៣.៨២៧គម្រោង មានទំហំទឹកប្រាក់សរុបប្រមាណ២,៦៣ពាន់លានដុល្លារអាមេរិក ខណៈឆ្នាំ២០២១មាន៣.៩២៥គម្រោង មានទឹកប្រាក់១២,៨៦ពាន់លានដុល្លារអាមេរិក។ បើធ្វើការប្រៀបធៀបរវាងឆ្នាំ ២០២២ និង២០២១ ទិន្នន័យនេះបានបង្ហាញថា មានការថយចុះរហូតដល់៤៩,៤២ភាគរយ ។

អ្នកនាងគឹម គិនកេសា អ្នកគ្រប់គ្រងជាន់ខ្ពស់នៃក្រុមហ៊ុន CBRE Cambodia បានមានប្រសាសន៍តាមទូរសព្ទឱ្យដឹងថា យោងតាមរបាយការណ៍របស់ក្រសួង ក៏ដូចជា ស្ថានភាពជាក់ស្ដែង បានបង្ហាញពីភាពត្រឹមត្រូវ និងដូចអ្វីដែលក្រុមហ៊ុនបានស្រាវជ្រាវផងដែរ ។

អ្នកនាងបន្តថា ក្នុងឆ្នាំ២០២២នេះ ថ្វីត្បិតតែសកម្មភាពសំណង់ ហាក់មានកំណើនឡើងជាងឆ្នាំ២០២១ពិតមែន តែគម្រោងដែលសាងសង់នោះគឺជាគម្រោង ដែលបានផ្អាកដំណើរការកាល ពីអំឡុងពេលបិទខ្ទប់ក្នុងឆ្នាំ ២០២១និងឆ្នាំ២០២០កន្លងមក ។

អ្នកបន្ថែមថា តាមការសិក្សាស្រាវជ្រាវ របស់ក្រុមហ៊ុនបានបង្ហាញថាក្នុងឆ្នាំ២០២២នេះ មិនសូវមានគម្រោងថ្មី បានដាក់ពាក្យស្នើសុំសាងសង់នោះទេ ដូច្នេះទើបឃើញថាក្នុងឆ្នាំ២០២២ សកម្មភាពសំណង់បានកើនឡើងពិតមែន តែគម្រោងបានសាងសង់ពិតប្រាកដ បានថមថយធៀបនឹងឆ្នាំ២០២១៕

 ដោយៈគង់ សូរិយា

       ភ្នំពេញៈ ការប្រកាសបង្កើត “ទីក្រុងអរិយក្សត្រ” របស់ប្រមុខរដ្ឋាភិបាល បាននិងកំពុងធ្វើឲ្យតំបន់នេះ មានការរីកចម្រើន និងទាក់ទាញលំហូរទុនវិនិយោគកាន់តែច្រើន។

ជាមួយគ្នានឹងកំណើនប្រជាពលរដ្ឋ និងការធ្វើដំណើរកំសាន្តនៅតំបន់នេះមានកាន់តែច្រើន ផ្សារទំនើបបែបសហគមន៍ដំបូងគេមួយ AK Avenueនឹងបើកដំណើរការនាពេលឆាប់ៗខាងមុខនេះ។

កញ្ញាឈាវ គីមហ័ង្សប្រធានផ្នែកផ្សារ នៃគំរោងបុរីវីឡាទួលសង្កែអរិយក្សត្រ បានមានប្រសាសន៍ឲ្យដឹងកាលពីពេលថ្មីៗនេះថា ជាមួយនឹងការរៀប​ចំ និងកំណើននៃការជួលស្តង់នៅផ្សារទំនើបនេះ ក្រុមហ៊ុនបាននិងកំពុងរៀបចំផែនការបើកដំណើរការផ្សារនេះ នៅចុងត្រីមាសទី១ឬដើមត្រីមាសទី២ ឆ្នាំ២០២៣ខាងមុខនេះ។

កញ្ញាបន្តថា “ស្តង់ផ្សាររបស់យើង កំពុងទទួលបានការចាប់អារម្មណ៍ និងជួលច្រើនពីអតិថិជន ដែលរហូតមកទល់ពេលនេះ ស្តង់ទាំងមូលត្រូវបានជួលអស់ប្រមាណ៥០ភាគរយហើយ”។ កញ្ញាបានបន្តថា “លើសពីនេះ យើងកំពុងផ្តល់សេវាកម្មពិគ្រោះយោបល់ជូនអតិថិជន ដើម្បីជួយពួកគាត់រៀបចំស្តង់ និងការឌីសាញឲ្យមានភាពទាក់ទាញ ដើម្បីឲ្យអាជីវកម្មរបស់ពួកគេទទួលបានជោគជ័យផងដែរ”។

កញ្ញាឈាវ គីមហ័ង្សបានបន្តថា បច្ចុប្បន្នអ្នកមកជួលស្តង់ផ្សារនេះ មានអ្នកផ្តល់សេវាកម្ម ដូចជា ហាងលក់សម្លៀកបំពាក់ តែគុជ ហាងកាហ្វេ និងផលិតផលចាំបាច់ជាច្រើនទៀត ពិសេសផ្សារនេះក៏មានទីកន្លែងកំសាន្ត​សម្រាប់កុមារផងដែរ។

តំបន់ស្ថិតនៅទីក្រុងនេះ កំពុងមានការរីកចម្រើនលឿន និងទាក់ទាញអ្នកវិនិយោគដីធ្លី បន្ទាប់ពីរដ្ឋាភិបាលប្រកាសពីផែនការ សាងសង់ស្ពានពីផ្សារចាស់ទៅតំបន់ជ្រោយចង្វារ និងពីតំបន់ជ្រោយចង្វារទៅកាន់តំបន់អរិយក្សត្រ។

កញ្ញាឈាវ គីមហ័ង្សបានបន្តថា ការបើកដំណើរការផ្សារAK Avenueមិនត្រឹមតែជួយដល់អ្នករស់នៅក្នុងបុរី ឲ្យមានភាពងាយស្រួលរកសេវាកម្មចាំបាច់សម្រាប់ការរស់នៅប៉ុណ្ណោះទេ ប៉ុន្តែវាក៏ជួយលើកកំពស់វិស័យអច​លនទ្រព្យ និងអ្នកទិញផ្ទះនៅក្នុងបុរីនេះ ក៏ដូចជា ជួយផ្តល់ការលើកកំពស់ការរីកចម្រើនក្នុងតំបន់ ព្រមទាំងផ្តល់ការងារដល់ប្រជាពលរដ្ឋផងដែរ៕

 ដោយៈ ជេស៊ីកា

       ភ្នំពេញៈ ក្រុមហ៊ុនOCIC បានសម្រេចបោះទុនប្រមាណ៣៣០លានដុល្លារអាមេរិក ដើម្បីសាងសង់បញ្ចប់គំរោងDiamond Bay Garden (DBG)ដែលស្ថិតនៅកណ្តាលទីក្រុងកោះពេជ្រ។

ក្រុមហ៊ុនOCIC បានសម្រេចបង្កើតក្រុមហ៊ុនDBG ដើម្បីធ្វើកិច្ចការដ៏សំខាន់នៃគំរោងនេះ ដែលកាលពីដើមឡើយគំរោងនេះ ត្រូវបានដាក់ឈ្មោះD.I RIVIERA។

អ្នកស្រីរី ណាវីប្រធាននាយកដ្ឋានលក់ នៃក្រុមហ៊ុនOCICបានមានប្រសាសន៍ឲ្យដឹងកាលពីចុងសប្តាហ៍មុនថា អតីតគំរោងD.I RIVIERAបានសម្រេចប្តូរឈ្មោះហើយ ដោយគំរោងនេះបានប្តូរមកឈ្មោះមកជាDBGជំនួសវិញ ស្របពេលការសាងសង់គំរោងនេះ កំពុងពន្លឿនបញ្ចប់នៅពាក់កណ្តាលឆ្នាំ​២០២៤ ប៉ុន្តែបច្ចុប្បន្នមានតែអាគារA និងBប៉ុណ្ណោះ។ ចំណែកអាគារC សាងសង់ឬចាប់ផ្តើមលឿនឬយឺត អាស្រ័យលើស្ថានភាពសេដ្ឋកិច្ចកម្ពុជា។

អ្នកស្រីបន្តថា “គំរោងនេះមានកំពស់៣៩ជាន់ ដោយជាន់ដំបូលនៃគំរោងនេះ បានប្តូរពីអាងទឹកមានរាងជាទូក ទៅជាផ្លូវដើរលើអាកាសជំនួសវិញ”។ អ្នកស្រីបន្តថា “ការលក់របស់យើងកំពពុងដំណើរការល្អប្រសើរ ដោ​យខុនដូ បានដាក់លក់ក្នុងតម្លៃ២៩០០ដុល្លារក្នុងមួយម៉ែត្រការ៉េ”។

OCIC ជាក្រុមហ៊ុនអភិវឌ្ឍន៍ក្នុងស្រុកលំដាប់យក្សមួយ ដែលបាននិងកំពុងអភិវឌ្ឍន៍ទីក្រុងរណបជាច្រើនដូចជា ទីក្រុងរណបកោះពេជ្រ ទីក្រុងរណបកោះនរា និងទីក្រុងរណបជ្រោយចង្វារ ទីក្រុងនៃអនាគត។

អគ្គនាយករងក្រុមហ៊ុនOCIC លោកទូច សំណាងបានមានប្រសា​សន៍ឲ្យដឹងកាលពីសប្តាហ៍មុនថា ដំណើរការអភិវឌ្ឍន៍ទីក្រុងរណបទាំងនេះ កំពុងវិវត្តន៍ទៅមុខ ប៉ុន្តែមិនទាន់មានក្រុមហ៊ុនធំៗបោះទុនវិនិយោគលើគំរោងទាំងនេះនៅឡើយទេ ប៉ុន្តែអ្វីៗស្ថិតក្នុងសញ្ញាវិជ្ជមាន៕

ដោយៈ ស៊ីវ ម៉េង

ភ្នំពេញៈ វិស័យលំនៅដ្ឋាននៅតែមានភាពប្រសើរ នៅក្នុងឆ្នាំ២០២២ ដោយរដ្ឋាភិបាលបានអនុម័ត គម្រោងចំនួន៤.៣២១គម្រោង និងមានតម្លៃទុនវិនិយោគប្រមាណ១.៤១២លានដុល្លារអាមេរិក។

យោងតាមរបាយការណ៍ លទ្ធផលការងារការងាររបស់ក្រសួងរៀបចំដែនដី នគរូបនីយកម្ម និងសំណង់ សម្រាប់ឆ្នាំ២០២២បានបង្ហាញកាលពីថ្ងៃទី២៧ ធ្នូថា ក្នុងចំណោមគំរោងដែលបានអនុម័តដោយក្រសួង គឺសំណ​ង់ជាលក្ខណៈបុរី មានចំនួន៣៥គម្រោង ស្មើនឹង៩.៩១២ខ្នង មានតម្លៃវិនិយោគប្រមាណ៨២០លានដុល្លារ ប្រភេទផ្ទះល្វែង​មានចំនួន៦.៦០៩ល្វែង ក្នុងតម្លៃវិនិយោគប្រមាណ៥៥៤លានដុល្លារ និងអគារស្នាក់នៅរួម មានចំនួ​ន៥១គម្រោង ដែលមានតម្លៃទុន​វិនិយោគប្រមាណ២២២លានដុល្លារ។

របាយការណ៍ដដែលបានបង្ហាញថា សំណង់សណ្ឋាគារមានចំនួន២០គម្រោង មានតម្លៃទុនវិនិយោគប្រមាណ៧១លានដុល្លារ សំណង់អគារពាណិជ្ជកម្មមានចំនួន១៨៥គម្រោង មានតម្លៃទុនវិនិយោគប្រមាណ៤៣៦លានដុល្លារ សំណង់អគាររោងចក្រមានចំនួន១១៧គម្រោង មានតម្លៃទុនវិនិយោគប្រមាណ៥៣៣​លានដុល្លារ និងសំណង់អគារពហុមុខងារមានចំនួន៧គម្រោង ដែលមានតម្លៃទុនវិនិយោគប្រមាណ១៤៩លានដុល្លារ ក៏បានអនុម័តនៅឆ្នាំនេះផងដែរ៕