ដោយៈ គង់ សូរិយា

       ភ្នំពេញៈ គម្រោងពង្រីកកំណាត់ផ្លូវជាតិលេខ៦ ចាប់ពីចំណុចប្រសព្វ ផ្លូវជាតិលេខ៦ និងផ្លូវចូលព្រលានយន្តហោះថ្មីខេត្តសៀមរាប ទៅដល់ក្រុងសៀមរាប ត្រូវបានលើកយកមកពិនិត្យពិភាក្សា។

ការពង្រីកផ្លូវនេះ ដើម្បីត្រៀមទទួលកំណើនលំហូរចរាចរណ៍ ខណៈព្រលានយន្តហោះថ្មីនឹងបើកដំណើរការនៅឆ្នាំក្រោយ។

លោកលឹម ស៊ីដេនីន រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំពិនិត្យ និងពិភាក្សាលើការសិក្សាសមិទ្ធិលទ្ធភាពដំបូង នៃគម្រោងពង្រីកកំណាត់ផ្លូវជាតិលេខ៦ ចាប់ពីចំណុចប្រសព្វផ្លូវជាតិលេខ៦ និងផ្លូវចូលព្រលានយន្តហោះថ្មីខេត្តសៀមរាប ទៅដល់ក្រុងសៀមរាប ដោយមានការចូលរួមពីថ្នាក់ដឹកនាំក្រសួង ទទួលបន្ទុក តំណាងក្រុមហ៊ុនសំណង់សៀងហៃ និងមន្ត្រីជំនាញពាក់ព័ន្ធ។

តំណាងក្រុមហ៊ុនសំណង់សៀងហៃ បានធ្វើបទបង្ហាញអំពីលទ្ធផលនៃការសិក្សាសមិទ្ធិលទ្ធភាពដំបូងនៃគម្រោង ដោយបានបង្ហាញនូវចំណុចសំខាន់រួមមាន ទី១ របាយការណ៍លទ្ធផល នៃការសិក្សាសមិទ្ធិលទ្ធភាពជាមូលដ្ឋាន ទី២ លក្ខខណ្ឌបរិស្ថាននៃគម្រោង ទី៣ សក្កានុពលនៃទំហំចរាចរណ៍ ទី៤ បទដ្ឋានលក្ខណៈបច្ចេកទេសនៃការសាងសង់ ទី៥ គ្រោងការណ៍នៃការសាងសង់ត្រង់ កំណាត់ផ្លូវក្រៅក្រុងសៀមរាប។

ទី៦ គ្រោងការណ៍នៃការសាងសង់ ត្រង់កំណាត់ផ្លូវក្នុងក្រុងសៀមរាប ទី៧ ការប៉ាន់ស្មានតម្លៃនៃការវិនិយោគ និងហិរញ្ញប្បទាន និងទី៨ ការវាយតម្លៃផ្នែកសេដ្ឋកិច្ច។

លោកលឹម ស៊ីដេនីម បានសម្តែងការគាំទ្រលើការគិតគូរអំពីបរិស្ថានជុំវិញការអនុវត្តគម្រោងនេះ ជាពិសេសការរក្សាទុកដើមឈើធំៗ នៅអមសង​ខាងផ្លូវ ដោយយកដើមឈើទាំងនោះធ្វើ ជាសួនពុះចែកទ្រូងផ្លូវ និងសួនអមសងខាងផ្លូវ (ត្រង់ចំណុចខ្លះ) និងបានសំណូមពរឱ្យក្រុមហ៊ុនយកចិត្តទុកដាក់ខ្ពស់ លើបច្ចេកទេសនៃការសាងសង់ ដោយផ្តោតលើគុណភាពរឹងមាំជាចម្បង តាមអនុសាសន៍ ណែនាំដ៏ខ្ពង់ខ្ពស់របស់លោកទេសរដ្ឋមន្ត្រី ស៊ុន ចាន់ថុល និងធានាបានថាប្រព័ន្ធរំដោះទឹក អាចរំដោះចេញពីផ្លូវបានដោយប្រសិទ្ធភាព មិនបង្កជាការជន់លិច នាំឱ្យខូចដល់ស្រទាប់គ្រឹះផ្លូវនៅពេលខាងមុខ។

ជាមួយគ្នានោះដែរ លោកក៏បានស្នើឱ្យគ្រប់ភាគីពាក់ព័ន្ធទាំងអស់ ត្រូវពន្លឿនការសិក្សា នេះឱ្យបានចប់សព្វគ្រប់ ក៏ដូចជាការដោះស្រាយផលប៉ះពាល់ផងដែរ ដើម្បីឈានទៅបើកការដ្ឋានសាងសង់ ឱ្យបានឆាប់តាមដែលអាចធ្វើទៅបាន ដោយហេតុថាព្រលានយន្តហោះថ្មី ខេត្តសៀមរាបគ្រោងបញ្ចប់ ការសាងសង់ និងបើកឱ្យដំណើរការទទួលអ្នកដំណើរ ក្នុងឆ្នាំក្រោយនេះហើយ។

គម្រោងពង្រីកនេះ មានទីតាំងតាមកំណាត់ផ្លូវជាតិលេខ៦ ចាប់ពីចំណុចប្រសព្វ ផ្លូវជាតិលេខ៦ និងផ្លូវចូលព្រលានយន្តហោះថ្មីខេត្តសៀម​រាប ទៅដល់ក្រុងសៀមរាប មានប្រវែងសរុប១៩,៩៤គីឡូម៉ែត្រ ពោលគឺចាប់ពីចំណុចគីឡូម៉ែត្រលេខ២៩៣+៦៥០ រហូតដល់ចំណុចគីឡូម៉ែត្រលេខ៣១៣+៥៩០។

គម្រោងពង្រីកកំណាត់ផ្លូវនេះ នឹងជួយសម្រួលដល់លំហូរចរាចរណ៍ និងបង្កើនសមត្ថភាពដឹកជញ្ជូន ដែលនឹងមានការកើនឡើង ដោយសារការបើកដំណើរការព្រលានយន្តហោះ ថ្មីនៅពេលខាងមុខ៕

ដោយៈ សុផារី

ភ្នំពេញៈ លោកទេសរដ្ឋមន្រ្តី ស៊ុន ចាន់ថុល បានបង្ហើបឱ្យដឹងថា សាងសង់ស្ពានព្រែកតាឡុង (ចាក់អង្រែក្រោម-ព្រែកប្រា) បានសិក្សាបញ្ចប់រួចរាល់ហើយ ហើយកំពុងតែស្ថិតក្នុងដំណាក់កាលចរចារ ជាមួយក្រុមហ៊ុនចិន ដើម្បីបើកការដ្ឋានក្នុងពេលឆាប់ៗនេះ។

ថ្លែងក្នុងសន្និសីទសារព័ត៌មានស្ដីពី “សមិទ្ធផលសម្រេចបានរយៈពេល៥ឆ្នាំ កន្លងមករបស់ក្រសួងសាធារណការ និងដឹកជញ្ជូន” នាទីស្ដីការគណៈរដ្ឋមន្រ្ដី នៅព្រឹកថ្ងៃទី២៧ ខែតុលា ឆ្នាំ២០២២ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានឱ្យដឹងថាស្ពានព្រែកប្រា តភ្ជាប់មកកាន់ចាក់អង្រែក្រោម នឹងបើកការចរចារ ដោយ​សារមានការកកស្ទះខ្លាំងណាស់ នៅផ្លូវជាតិលេខ១ នៅទីតាំងស្ពានក្បាលថ្នល់។ ដូច្នេះ យើងនឹងបើកការដ្ឋានសាងសង់ស្ពានមួយទៀត ពីព្រែកប្រាមកចាក់អង្រែក្រោម។

លោកបន្តថា “ស្ពាននេះទទួលបានឯកភាពលើថវិកា រួចរាល់ហើយ ដោយជាថវិកាពីរាជរដ្ឋាភិបាលចិន មកកាន់រាជរដ្ឋាភិបាលកម្ពុជា ដើម្បីសាងសង់ស្ពានមួយនេះ”។

បើតាមលោក ស៊ុន ចាន់ថុល គម្រោងសាងសង់ស្ពានឆ្លងកាត់ទន្លេបាសាក់នៅចាក់អង្រែក្រោម ដើម្បីកាត់បន្ថយការកកស្ទះចរាចរណ៍ ឆ្លងកាត់ស្ពានព្រះមុនីវង្សសព្វថ្ងៃ ដែលទទួលការឯកភាព ពីសម្ដេចតេជោនាយករដ្ឋមន្ត្រីរួចហើយ។

គម្រោងស្ពាននេះ ត្រូវបានសិក្សាបញ្ចប់ដោយក្រុមហ៊ុនចិន Shanghai Construction Group Co.,Ltd. (SCG) ហើយទទួលបានថវិការពីរាជរដ្ឋាភិបាលចិន។ ស្ពាននឹងជួយកាត់បន្ថយការកកស្ទះចរាចរណ៍ធ្វើដំណើរឆ្លងកាត់ស្ពានព្រះមុនីវង្ស ឆ្លងកាត់ទន្លេបាសាក់ ភ្ជាប់ផ្លូវជាតិលេខ១ នៅច្បារអំពៅ ជួយពង្រឹងដល់ទំនាក់ទំនងសេដ្ឋកិច្ចសង្គម រវាងរាជធានីភ្នំពេញប៉ែកខាងត្បូង ព្រលានយន្តហោះអន្តរជាតិភ្នំពេញថ្មីទីក្រុងតាខ្មៅ៕

 ដោយៈ វឌ្ឍនៈ

ភ្នំពេញៈ នៅក្នុងវិបត្តិតែងតែមានឱកាស សម្រាប់អ្នកដែលចង់វិនិយោគពិតប្រា កដជាពិសេសទៅលើវិស័យដីធ្លី នៅក្នុងប្រទេសកម្ពុជា ខណៈអចលនទ្រព្យប្រភេទនេះ ត្រូវបានមើលឃើញថា នៅតែជាឱកាសសម្រា​ប់ស្វែងរកប្រាក់ចំនេញ។

អ្នកជំនាញនៃវិស័យមួយនេះ បានបង្ហាញពីគន្លឹះក្នុងការវិនិយោគដីធ្លីក្នុងវិបត្តិកូវីដ១៩ ដើម្បីទទួលបានផលចំណេញខ្ពស់និងឆាប់រហ័ស។

លោកជា សុផល នាយកប្រតិបត្តិនៃក្រុមហ៊ុនAsia Real Estate បានឱ្យដឹងតាមទូរស័ព្ទនាព្រឹកថ្ងៃទី២៨ តុលានេះថា ដីធ្លីជាប្រភេទ អចលនទ្រព្យដែលនៅតែមានសកម្មភាពទិញលក់ ជាហូរហែរក្នុងបរិបទនេះ ខណៈអចលនទ្រព្យប្រភេទផ្សេងៗទៀតឃើញថា មានការថមថយសកម្មភាព។

លោកបន្តថា “សម្រាប់អ្នកវិនិយោគ ដែលចង់បានការចំណេញពីការវិនិយោគលើដីធ្លី គួរសម្លឹងទៅមើលដីធ្លីណា ដែលមានការដាក់លក់ក្រោមតម្លៃទីផ្សារ”។ លោកបន្តថា “ដីធ្លីស្ថិតនៅក្នុងតំបន់អភិវឌ្ឍន៍ ដូចជានៅតំបន់កប់ស្រូវខាងជើង ឈៀងខាងលិចរាជធានីភ្នំពេញ ពីព្រោះថាតំបន់ជាតំបន់ ដែលមានគម្រោងអភិវឌ្ឍន៍ច្រើននៅពេលអនាគត ដូច្នេះអ្នកវិនិយោគទិញដីនៅតំបន់នោះ នឹងទទួលបានប្រាក់ចំណេញត្រលប់មកវិញនៅពេលតំបន់នោះចាប់ផ្ដើមអភិវឌ្ឍន៍កាន់តែខ្លាំង ហើយដីក៏នឹងឡើងថ្លៃកាន់តែខ្ពស់ផងដែរ”។

លោកបន្ថែមថា នៅក្នុងស្ថានភាពដែលមិនប្រាកដប្រជាបែបនេះ អ្នកលក់ដីខ្លះ គាត់ត្រូវការទុនបង្វិលបន្ទាន់ដូច្នេះ គាត់ក៏លក់ក្រោមទីផ្សារឬក៏តម្លៃទីផ្សារ តែយ៉ាងណា ដីប្រភេទនេះគឺមានភាពងាយស្រួល ក្នុងការចរចាជាងដី ដែលលក់ហើយមិនត្រូវការលុយបន្ទាន់នោះដែរ ។ ដូច្នេះអ្នកចង់ទិញដីធ្លីបានល្អៗ គេស្វែងរកម្ចាស់ទ្រព្យបែបនេះ ទើបមានប្រសិទ្ធភាព ចំណេញ និងមិនសូវខាតពេលក្នុងការចរចាឡើយ ។

ជាមួយគ្នានេះ លោកលុន បុរី ទីប្រឹក្សាសមាគមអ្នកវាយតម្លៃនិងភ្នាក់ងារអចលនវត្ថុកម្ពុជា ក៏បានលើកឡើងផងដែរថា គ្រប់បញ្ហាទាំងអស់សុទ្ធតែមានដំណោះស្រាយ ព្រោះគ្រប់ទីផ្សារទាំងអស់ សុទ្ធតែមានភាពចន្លោះប្រហោង ។ ការស្វែងរកភាពចន្លោះប្រហោង នៃទីផ្សារហើយបំពេញបន្ថែមឱ្យវាគឺជាឱកាសសម្រាប់អ្នកជំនួញ ។

លោកបន្តថា “នៅក្នុងវិស័យអចលនទ្រព្យក៏ដូចគ្នាដែរ ការស្វែងរកនូវភាពខ្វះខាត នៃទីផ្សារហើយបំពេញឱ្យវានោះ អ្នកវិនិយោគនឹងទទួលបានឱកាសស្វែងរកប្រាក់ចំណេញ និងរីកចម្រើនធំធាត់ជាជាងរង់ចាំឱ្យឱកាសកន្លងផុត និងរង់ចាំឱ្យអ្នកផ្សេងឆកឱកាសទៅបាត់” ។

លោកបន្ថែមថា អ្នកជំនួញតែងតែរិះរកគ្រប់វិធី ក្នុងការពង្រីកខ្លួនឱ្យ​ខ្លាំង ដើម្បីឈរជើងនៅលើទីផ្សារប្រកួតប្រជែង៕

 ដោយៈ ជេស៊ីកា

ភ្នំពេញៈ ក្រុមមន្រ្តីរដ្ឋាភិបាលនិងថ្នាក់ដឹកនាំនៃក្រុមហ៊ុនចិន បានបើកកិច្ចប្រជុំបន្តពិភាក្សា លើកិច្ចព្រមព្រៀងសម្បទានរវាងរដ្ឋ និងឯកជន ជាមួ​យក្រុមហ៊ុនសាជីវកម្មស្ពានថ្នល់ចិន(CRBC) លើគម្រោងសាងសង់ផ្លូវល្បឿនលឿនភ្នំពេញ-បាវិត។

កិច្ចប្រជុំនេះបានធ្វើឡើងកាលពីថ្ងៃទី២៨ ខែតុលា ឆ្នាំ២០២២ ដឹកនាំ​ដោយលោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន។

លោកស៊ុន ចាន់ថុលបានដឹកនាំកិច្ចប្រជុំពិភាក្សា ជាមួយថ្នាក់ដឹកនាំក្រុមហ៊ុនសាជីវកម្មស្ពានថ្នល់ចិន(CRBC) ទាក់ទងនឹងកិច្ចព្រមព្រៀងសម្ប​ទានសម្រាប់គម្រោងសាងសង់ ផ្លូវល្បឿនលឿនភ្នំពេញ-បាវិត ដោយមានការ អញ្ជើញចូលរួមពីលោក វង្សី វិស្សុត រដ្ឋមន្រ្តីប្រតិភូអមនាយករដ្ឋមន្រ្តី និងជារដ្ឋលេខាធិការប្រចាំការក្រសួងសេដ្ឋកិច្ច និងហិរញ្ញវត្ថុ ថ្នាក់ដឹកនាំក្រសួង សមាជិកសមាជិកាគណៈកម្មការអន្តរក្រសួង និងមន្ត្រីជំនាញពាក់ព័ន្ធជាច្រើនរូប។

កិច្ចប្រជុំនេះធ្វើឡើង ក្នុងគោលបំណងពិភាក្សារិះរក ដំណោះស្រាយធ្វើយ៉ាងណាឱ្យកិច្ចព្រមព្រៀងនេះ មានខ្លឹមសារគ្រប់ជ្រុងជ្រោយ អាចទទួលយកបាន និងអាចអនុវត្តដោយរលូននៅពេលអនាគត ប្រកដោយគុណភាព និងប្រសិទ្ធភាពការងារខ្ពស់ ជាពិសេសដើម្បីជំរុញឱ្យគម្រោងការងារនេះអាចសម្រេចបានតាម ផែនការដែលបានគ្រោងទុក។

អង្គប្រជុំបានពិភាក្សាយ៉ាងផុសផុល លើចំណុចសំខាន់ៗមួយចំនួនដែលមិនទាន់ទទួលបានការសម្រេចជាផ្លូវការ ជាពិសេសការវិភាគលើការព្យាករណ៍ទំហំចរាចរណ៍ ដែលនឹងអាចកើតមាននៅពេលអនាគត។

គម្រោងផ្លូវល្បឿនលឿនភ្នំពេញ-បាវិត នឹងក្លាយជាផ្លូវល្បឿនលឿនទីពីរ នៅក្នុងព្រះរាជាណាចក្រកម្ពុជា បន្ទាប់ពីផ្លូវល្បឿនលឿនភ្នំពេញ-ក្រុងព្រះសីហនុ។ ផ្លូវល្បឿនលឿនខ្សែទីពីរនេះ នឹងក្លាយជាខ្សែផ្លូវដ៏សំខាន់មួយទៀតសម្រាប់បម្រើឱ្យសកម្មភាពដឹកជញ្ជូន និងពាណិជ្ជកម្មឆ្លងកាត់ព្រំដែនរវាងកម្ពុជា និងវៀតណាមផងដែរ៕

ដោយៈ គង់ សូរិយា

ភ្នំពេញៈ ក្នុងគោលដៅរួមចំណែកអភិវឌ្ឈន៍សង្គម អ្នកអភិវឌ្ឍន៍បុរីGB Residencesបានចំណាយទឹកប្រាក់ រហូតដល់ជាង១លានដុល្លារ ដើម្បីសាងសង់ផ្លូវសាធារណៈ ដើម្បីប្រយោជន៍ដល់ការធ្វើដំណើរ របស់ប្រជាពលរដ្ឋ។

ផ្លូវដែលបានសាងសង់នេះ មានទំហំ៥០ម៉ែត្រ និងបណ្តោយប្រវែង៥០០ម៉ែត្រ ស្ថិតនៅក្នុងភូមិស្រុកធំ ឃុំជើងកើប ស្រុកកណ្តាលស្ទឹង ខេត្តកណ្តាល។

បុរីGB Residence មានចម្ងាយប្រមាណ៥គីឡូម៉ែត្រ ពីព្រលានយន្តហោះអន្តរជាតិភ្នំពេញថ្មី និងមានចម្ងាយប្រមាណ៥គីឡូម៉ែត្រ ពីផ្សារទំនើប AEON Mall៣ ជាគម្រោងមានគុណភាព ដោយមានការសិក្សាយ៉ាងច្បា ស់លាស់ ដោយមានការសាងសងតាមស្តង់ដា បច្ចេកទេសសំណង់ ប្រើប្រាស់សម្ភារៈមានគុណភាពល្អ និងធានាប្រើបានរយៈពេលយូរ និងផ្តល់នូវគេហដ្ឋានរចនាពោពេញដោយគុណភាព ប្រណិតភាព និងស៊ីវិល័យ។

អ្វីជាចំណុចពិសេសរបស់គម្រោងនេះររួមមាន ទី១ មានទីតាំងអាចប្រកបអាជីវកម្មបាន នាពេលអនាគតខាងមុខ ទី២ បុរីនេះត្រូវបានឌីសាញដោយស្ថាបត្យករ ជំនាញលំដាប់ពិភពលោក ដែលធ្លាប់ឈ្នះពានរង្វាន់ពីទីក្រុងដូបៃ ទី៣ ជាគំរោងដែលគិតពីផាសុខភាពដល់អ្នករស់់នៅ ដោយមានការសាងសង់សួនច្បារនៅចំកណ្តាលគម្រោង ដែលផ្តល់ឲ្យអ្នករស់នៅអាចប្រកដអាជីវកម្ម ហាត់ប្រាណ និងសំរាកលំហែរបាន។

អ្វីកាន់តែពិសេស ហេដ្ឋារចនាសម្ព័ន្ធក្នុងបុរី ផ្លូវថ្នល់ សួនច្បារ ប្រព័ន្ធទឹក ភ្លើង និងរុក្ខជាតិដើមឈើបៃតងខាងមុខផ្ទះ តាមបណ្តោយផ្លូវបុរី យ៉ាងស្រស់បំព្រងតាមបែបធម្មជាតិ។ ប្រព័ន្ធរំដោះទឹក ស្របតាមបទដ្ឋានបច្ចេក​ទេសត្រឹមត្រូវ ធ្វើអោយចរន្តទន្ទឹមនឹងនេះ បុរីក៏យកចិត្តទុកដាក់លើគ្រប់ចំណុ​ចនៃការសាងសង់ ចាប់ពីផ្នែកមូលដ្ធានគ្រឿងបង្គំ នៃសំណង់រហូតដល់ការងារដេកគ័រ បំពាក់គ្រឿងទាន់សម័យ និងសន្សំសំចៃភ្លើនិងគុណភាព ក៏ដូចជាសោភ័ណភាពដ៏ស្រស់ស្អាត នៃគម្រោងទាំងមូលដែរ។

លោកឧកញ៉ាតាំង គួងហាវអគ្គនាយកបុរីGB Residenceបានមានប្រសាសន៍ឲ្យដឹងកន្លងមកថា លោកសម្រេចចិត្តវិនិយោគបុរីនេះ ឡើង ដោយផ្តោតលើគុណភាព ប្រណិតភាព និងភាពស៊ីវិល័យ ដោយសារមើលឃើញសក្តានុពល និងភាពរីកចំរើនដ៏ឆាប់រហ័សនៅជុំវិញតំបន់នេះ ជាប់នឹងផ្លូវក្រវ៉ាត់ក្រុងទី៣ ហើយមិនឆ្ងាយពីព្រលានយន្តហោះអន្តរជាតិភ្នំពេញថ្មី និងការកើនឡើងនូវជីវភាពរបស់ប្រជាពលរដ្ឋ។

លោកឧកញ៉ាបានបន្តថា “ជាមួយនឹងការរចនាលំនៅដ្ឋាន មានម៉ូតផ្ទះស្អាត ប្លែក ប្រកបដោយស៊ីវិល័យ ពិសេសផ្តល់ជូនអ្នករស់នៅប្រកបដោ​យផាសុកភាព”។

ទំនាក់ទំនងលេខទូរសព្ទ៖ 077/070/066 363 005 សម្រាប់ការសាកសួរព័ត៌មានបន្ថែម និងការណាត់ជួប។ ទីតាំង: ស្ថិតនៅជិតនឹងផ្លូវក្រវ៉ាត់ក្រុងទី៣ មានចម្ងាយត្រឹមតែ២.៤គមប៉ុណ្ណោះពីរង្វង់មូលកួរស្រូវ៕

ដោយៈ សុផារី

ភ្នំពេញៈ រដ្ឋាភិបាលនៃប្រទេសថៃ បានអនុម័តកម្ចីចំនួន៩៨៣លានបាត ឬប្រមាណជាង២៧លានដុល្លារអាមេរិក ដល់រដ្ឋាភិបាលកម្ពុជា ដើម្បីសាងសង់ផ្លូវជាតិលេខ៦៧ថ្មីមួយខ្សែ តភ្ជាប់រវាងខេត្តសៀមរាប ទៅកាន់ខេត្តស៊ីសាកេតប្រទេសថៃ។

ថ្លែងក្នុងសន្និសីទសារព័ត៌មានស្ដីពី “សមិទ្ធផលសម្រេចបានរយៈពេល៥ឆ្នាំកន្លងមក របស់ក្រសួងសាធារណការ និងដឹកជញ្ជូន នៅថ្ងៃទី២៧ ខែតុលាម្សិលមិញ លោកទេសរដ្ឋមន្ត្រីស៊ុន ចាន់ថុល រដ្ឋមន្រ្តីក្រសួងសាធា​រណការ និងដឹកជញ្ជូនបានមានប្រសាសន៍ថា ផ្លូវជាតិលេខ៦៧នេះ នឹងស្នើសុំកម្ចីថវិកាពីរាជរដ្ឋាភិបាលថៃ ដើម្បីលើកកម្ពស់ជាផ្លូវ AC ។

លោកបញ្ជាក់ថា នៅក្នុងថ្ងៃទី៩ ខែវិច្ឆិកា ខាងមុននេះ ក្រសួងសេដ្ឋកិច្ច និងហិរញ្ញវត្ថុ តំណាងភាគីកម្ពុជា នឹងចុះហត្ថលេខាជាមួយភាគីថៃ លើគម្រោងលើកកម្រិតផ្លូវជាតិលេខ៦៧។ ផ្លូវជាតិលេខ៦៧ ជាផ្លូវដែលតភ្ជាប់ពីខេត្តសៀមរាប ឆ្លងកាត់ស្រុកអន្លង់វែង ខេត្តឧត្តរមានជ័យ រហូតទៅដល់ស៊ីសាកេតប្រទេសថៃ។

លោកស្រី Traisuree Taisaranakul អ្នកនាំពាក្យរងរដ្ឋាភិបាលថៃ បានបញ្ជាក់កាលពីពេលថ្មីៗនេះថា កម្ចីថវិការនេះ នឹងផ្តល់ជូនចំនួនពាក់កណ្តាលសិន ដែលស្មើនឹងប្រមាណ៤៩១,៥លានបាត ឬជាង១២លានដុល្លារ ដល់គម្រោងសម្រាប់អនុវត្តចាប់ពីឆ្នាំ២០២៤ ដល់២០២៦ ដែលជាថវិការដ្ឋាភិបាលថៃ ខណៈថវិកាដែលនៅសល់នឹងមកពីប្រភពមូលនិធិពីបរទេស។

អ្នកនាំពាក្យរូបនេះឱ្យដឹងទៀតថា ក្រោមកម្ចីនេះ ប្រទេសថៃបានដាក់លក្ខខណ្ឌតម្រូវឱ្យប្រទេសកម្ពុជា ត្រូវទិញសម្ភារសំណង់យ៉ាងតិច៥០ភាគរយ សម្រាប់គម្រោងពីប្រទេសថៃ និងជួលអ្នកម៉ៅការថៃផងដែរ៕