ដោយៈ គង់ សូរិយា

ភ្នំពេញៈ រដ្ឋាភិបាលកម្ពុជាបាននិងកំពុងគិតគូរយ៉ាងម៉ត់ចត់ លើ់ផែនកា​រអភិវឌ្ឈន៍ក្រុងព្រះសីហនុ “ជាទីក្រុងពហុបំណង” ជាផែនការមួយដែលនឹងនាំមកនូវវិបុលភាព និងការអភិវឌ្ឍប្រកបដោយនិរន្តរភាពនៅទីក្រុងនេះ។

យោងតាមរបាយការណ៍បឋម ដែលគេហទំព័រPropertyarea.asia ទទួលបានពីក្រុមមន្រ្តី ដែលបាននិងកំពុងរៀបចំការងាររៀបចំ ទីក្រុងព្រះសីហនុជាទីក្រុងពហុបំណង បានឲ្យដឹងកាលពីសប្តាហ៍មុនថា ខេត្តព្រះសីហនុ នឹងក្លាយទៅជាតំបន់សេដ្ឋកិច្ចពិសេសគំរូពហុបំណង នោះខេត្តនេះនឹងមានភាពទាក់ទាញដូចជា ទី១ នឹងក្លាយជាទីក្រុងទំនើបបៃតង និងឆ្លាតវៃដើម្បីទាក់ទាញការមកស្នាក់នៅ និងធ្វើធុរកិច្ច។

ទី២ នឹងមានរដ្ឋបាលខេត្ត ដែលមានសិទ្ធិអំណាចជាងមុនមានសមត្ថភាពហិរញ្ញវត្ថុ និងធនធានមនុស្សគ្រប់គ្រាន់ ក្នុងការអនុវត្តផែន​ការមេ, ផ្តល់សេវាសាធារណៈប្រកបដោយប្រសិទ្ធិភាពខ្ពស់ និងរៀបចំគោលនយោបាយទាក់ទាញ និងធ្វើការជាមួយវិនិយោគិន។

ទី៣ នឹងមានគោលនយោបាយទាក់ទាញធនធានមនុស្ស​ មកធ្វើការក្នុងខេត្តព្រះសីហនុ ជាពិសេសបុគ្គលិកដែលមានជំនាញ និងទី៤ នឹងមានការលើកទឹកចិត្តពន្ធ និងសេវាគាំទ្រធុរកិច្ចពិសេសដើម្បីទាក់ទាញឧស្សាហកម្មធំៗ។

ក្រុងព្រះសីហនុបាន និងកំពុងមានការអភិវឌ្ឍយ៉ាងសកម្ម ដោយរយៈពេល៧ឆ្នាំកន្លងមកនេះ ខេត្តនេះទទួលបានលំហូរទុនវិនិយោគ ពីបរទេសក្នុងទំហំទឹកប្រាក់ប្រមាណ៧០០០លានដុល្លារអាមេរិក ដែលទឹកប្រាក់នេះបានធ្វើឲ្យទីក្រុងនេះផ្លាស់ប្តូរមុខមាត់ទាំងស្រុង។

រាជរដ្ឋាភិបាល បានដាក់ចេញផែនការអភិវឌ្ឍន៍៍ ទីក្រុងព្រះសីហនុ ជាតំបន់អភិវឌ្ឍន៍វិស័យឧស្សាហកម្ម ក្នុងគោលនយោបាយអភិវឌ្ឍន៍វិស័យឧស្សាហកម្មឆ្នាំ២០១៥ ២០២៥៕

 ដោយៈ គង់ សូរិយា

       ភ្នំពេញៈ លោកទេសរដ្ឋមន្រ្តីស៊ុន ចាន់ថុលរដ្ឋមន្រ្តីក្រសួងសាធារណៈការ និងដឹកជញ្ជូនបានបង្ហើបឲ្យដឹងថា គំរោងតភ្ជាប់ផ្លូវជាតិពីក្រុងសៀមរាប ទៅកាន់ក្រុងបាត់ដំបងបានសិក្សាបញ្ចប់រួចហើយ។

លោកបានមានប្រសាសន៍ឲ្យដឹងកាលពីសប្តាហ៍មុន ក្នុងកម្មវិធីសមិ ទ្ឋិផលរយៈពេល៥ឆ្នាំ របស់ក្រសួងសាធារណៈការ និងដឹកជញ្ជូនថា សព្វថ្ងៃបើចង់ធ្វើដំណើរទៅកាន់ខេត្តបាត់ដំបង ទាល់តែធ្វើដំណើរពីសេរីសោភ័ណ ទើបទៅដល់ខេត្តសៀមរាប ប៉ុន្តែយើងបានសិក្សាផ្លូវកាត់តែម្តង គឺពីខេត្តបាត់​ដំបង ទៅកាន់ខេត្តសៀមរាប។

លោកបន្តថា “ផ្លូវថ្មីនេះមានភាពចំណេញ៨០គីឡូម៉ែត្រ ដែលផ្លូវនេះនឹងជួយសម្រួលការធ្វើដំណើរ និងកាត់បន្ថយថ្លៃចំណាយឡូជីស្ទិក”។លោក​បន្តថា “ផ្លួវនេះបានសិក្សាចប់រួចហើយ និងបានសិក្សាចប់រួចហើយលើការពង្រីកផ្លូវជាតិលេខ៦ ពីព្រលានយន្តហោះថ្មីទៅកាន់ក្រុងសៀមរាប”។

បើតាមលោកវ៉ាស៊ីម សូរិយាអនុរដ្ឋលេខាធិការ និងជាអ្នកនាំពាក្យក្រ​សួងសាធារណៈការ និងដឹកជញ្ជូនបានមានប្រសាសន៍ឲ្យដឹងថា ការសាងសង់ផ្លូវជាតិថ្មីនេះ មានសារៈសំខាន់ណាស់ ដើម្បីកាត់បន្ថយពេលវេលាក្នុងការធ្វើដំណើរ ពិសេសជាការរៀបចំខ្សែលំហូរភ្ញៀវទេសចរណ៍ ពីក្រុងសៀម​រាប ឲ្យបានសំរាក និងដើរកំសាន្តនៅក្រុងបាត់ដំបង និងកត្តាសំខាន់់មួយទៀត គឺការធ្វើសមាហរណកម្មផ្ទៃក្នុងរបស់កម្ពុជា ដោយកាត់បន្ថយការពឹងផ្អែកប្រទេសជិតខាង។

លោកបន្តថា “តាមផែនការឯកឧត្តមទេសរដ្ឋមន្រ្តី គ្រោងស្នើរដ្ឋាភិបាលសាងសង់ប៉មធំមួយ នៅកណ្តាលទន្លេរសាប ដើម្បីឲ្យភ្ញៀវទេសចរណ៍បានសំរាក និងគយគន់ទេសភាពបឹងទន្លេរសាបផងដែរ”៕

ដោយៈ វឌ្ឍនៈ

ភ្នំពេញៈ នៅក្នុងវិបត្តិតែងតែមានឱកាស សម្រាប់អ្នកដែលចង់វិនិយោគពិតប្រា កដជាពិសេសទៅលើវិស័យដីធ្លី នៅក្នុងប្រទេសកម្ពុជា ខណៈអចលនទ្រព្យប្រភេទនេះ ត្រូវបានមើលឃើញថា នៅតែជាឱកាសសម្រា​ប់ស្វែងរកប្រាក់ចំនេញ។

អ្នកជំនាញនៃវិស័យមួយនេះ បានបង្ហាញពីគន្លឹះក្នុងការវិនិយោគដីធ្លីក្នុងវិបត្តិកូវីដ១៩ ដើម្បីទទួលបានផលចំណេញខ្ពស់និងឆាប់រហ័ស។

លោកជា សុផល នាយកប្រតិបត្តិនៃក្រុមហ៊ុនAsia Real Estate បានឱ្យដឹងតាមទូរស័ព្ទនាព្រឹកថ្ងៃទី២៨ តុលានេះថា ដីធ្លីជាប្រភេទ អចលនទ្រព្យដែលនៅតែមានសកម្មភាពទិញលក់ ជាហូរហែរក្នុងបរិបទនេះ ខណៈអចលនទ្រព្យប្រភេទផ្សេងៗទៀតឃើញថា មានការថមថយសកម្មភាព។

លោកបន្តថា “សម្រាប់អ្នកវិនិយោគ ដែលចង់បានការចំណេញពីការវិនិយោគលើដីធ្លី គួរសម្លឹងទៅមើលដីធ្លីណា ដែលមានការដាក់លក់ក្រោមតម្លៃទីផ្សារ”។ លោកបន្តថា “ដីធ្លីស្ថិតនៅក្នុងតំបន់អភិវឌ្ឍន៍ ដូចជានៅតំបន់កប់ស្រូវខាងជើង ឈៀងខាងលិចរាជធានីភ្នំពេញ ពីព្រោះថាតំបន់ជាតំបន់ ដែលមានគម្រោងអភិវឌ្ឍន៍ច្រើននៅពេលអនាគត ដូច្នេះអ្នកវិនិយោគទិញដីនៅតំបន់នោះ នឹងទទួលបានប្រាក់ចំណេញត្រលប់មកវិញនៅពេលតំបន់នោះចាប់ផ្ដើមអភិវឌ្ឍន៍កាន់តែខ្លាំង ហើយដីក៏នឹងឡើងថ្លៃកាន់តែខ្ពស់ផងដែរ”។

លោកបន្ថែមថា នៅក្នុងស្ថានភាពដែលមិនប្រាកដប្រជាបែបនេះ អ្នកលក់ដីខ្លះ គាត់ត្រូវការទុនបង្វិលបន្ទាន់ដូច្នេះ គាត់ក៏លក់ក្រោមទីផ្សារឬក៏តម្លៃទីផ្សារ តែយ៉ាងណា ដីប្រភេទនេះគឺមានភាពងាយស្រួល ក្នុងការចរចាជាងដី ដែលលក់ហើយមិនត្រូវការលុយបន្ទាន់នោះដែរ ។ ដូច្នេះអ្នកចង់ទិញដីធ្លីបានល្អៗ គេស្វែងរកម្ចាស់ទ្រព្យបែបនេះ ទើបមានប្រសិទ្ធភាព ចំណេញ និងមិនសូវខាតពេលក្នុងការចរចាឡើយ ។

ជាមួយគ្នានេះ លោកលុន បុរី ទីប្រឹក្សាសមាគមអ្នកវាយតម្លៃនិងភ្នាក់ងារអចលនវត្ថុកម្ពុជា ក៏បានលើកឡើងផងដែរថា គ្រប់បញ្ហាទាំងអស់សុទ្ធតែមានដំណោះស្រាយ ព្រោះគ្រប់ទីផ្សារទាំងអស់ សុទ្ធតែមានភាពចន្លោះប្រហោង ។ ការស្វែងរកភាពចន្លោះប្រហោង នៃទីផ្សារហើយបំពេញបន្ថែមឱ្យវាគឺជាឱកាសសម្រាប់អ្នកជំនួញ ។

លោកបន្តថា “នៅក្នុងវិស័យអចលនទ្រព្យក៏ដូចគ្នាដែរ ការស្វែងរកនូវភាពខ្វះខាត នៃទីផ្សារហើយបំពេញឱ្យវានោះ អ្នកវិនិយោគនឹងទទួលបានឱកាសស្វែងរកប្រាក់ចំណេញ និងរីកចម្រើនធំធាត់ជាជាងរង់ចាំឱ្យឱកាសកន្លងផុត និងរង់ចាំឱ្យអ្នកផ្សេងឆកឱកាសទៅបាត់” ។

លោកបន្ថែមថា អ្នកជំនួញតែងតែរិះរកគ្រប់វិធី ក្នុងការពង្រីកខ្លួនឱ្យ​ខ្លាំង ដើម្បីឈរជើងនៅលើទីផ្សារប្រកួតប្រជែង៕

ដោយៈ សុខុម

ប៉េកាំង: ប្រធានាធិបតី Ferdinand Romualdez Marcos បានថ្លែងក្នុងពិធីបញ្ចុះបឋមសិលា បើកការដ្ឋានសាងសង់កាលពីថ្ងៃព្រហស្បតិ៍ ទី២៧ ខែតុលា ថា គម្រោងស្ពានមួយក្រោមហិរញ្ញប្បទាន ពីប្រទេសចិន ដែលតភ្ជាប់ Davao។

ដាវូសជាទីក្រុងធំទី៣របស់ហ្វីលីពីន និងកោះទេសចរណ៍មួយ នឹងជួយជំរុញកំណើនទេសចរណ៍ និងសេដ្ឋកិច្ចក្នុងតំបន់ភាគខាងត្បូងនៃប្រទេសនេះ។

គម្រោងស្ពាន Samal Island-Davao City Connector Bridge ប្រវែង៣,៨១គីឡូម៉ែត្រខាងលើនេះ នឹងជួយសម្រួលបានច្រើនដល់ការធ្វើដំណើររបស់ភ្ញៀវទេសចរពីក្រុង Davao ទៅកាន់កោះ Island Garden City of Samal។ ស្ពាននេះត្រូវបានខណ្ឌចែកជា២ ពោលគឺសម្រាប់ទៅ និងមក ហើយមានគន្លងផ្លូវសរុបចំនួន៤។

យោងតាមការចុះផ្សាយរបស់គេហទំព័រព័ត៌មាន Yugatech បានឱ្យដឹងថា គម្រោងស្ពាននេះ ចំណាយអស់ប្រមាណ៣៩៧លានដុល្លារអាមេរិក ហើយ៩០%ជាកម្ចីពីប្រទេសចិន។

ប្រធានាធិបតីហ្វីលីពីន លោក Marcos ថ្លែងថា “នៅពេលសាងសង់រួចរាល់ជាស្ថាពរ ស្ពាននេះនឹងជួយយើងអភិវឌ្ឍន៍ សក្តានុពលសេដ្ឋកិច្ចនៃទីក្រុង Davao និងកោះ Garden City of Samal ក៏ដូចជាលើកកម្ពស់ការរស់នៅរបស់ពលរដ្ឋមូលដ្ឋាន ឱ្យទទួលបានការងារ ការអប់រំ និងសេវាកម្មផ្សេងទៀតកាន់តែប្រសើរឡើងផងដែរ”។

កោះនេះគឺជាគោលដៅទេសចរណ៍ និងជាកន្លែងលម្ហែតំបន់ត្រូពិចដ៏ល្បីល្បាញសម្រាប់ភ្ញៀវទេសចរ ព្រោះវាមានឆ្នេរសមុទ្រ និងកន្លែងមុជទឹកមើលផ្កាថ្មយ៉ាងស្រស់ស្អាត។ បើគ្មានស្ពានទេ មធ្យោបាយតែមួយគត់ដែលភ្ញៀវទេសចរអាចទៅដល់កោះនេះ គឺត្រូវឆ្លងស្រឡាងពីទីក្រុង Davao។

លោក Marcos បានថ្លែងអំណរគុណយ៉ាងជ្រាលជ្រៅ ដល់រដ្ឋាភិបាលចិន ដែលបានក្លាយជា “ដៃគូដែលអាចទុកចិត្តបាន ក្នុងកម្មវិធីអភិវឌ្ឍន៍ហេដ្ឋារចនាសម្ព័ន្ធនេះ”។

លោកលើកឡើងថា “យើងមើលឃើញយ៉ាងច្បាស់ នូវអត្ថប្រយោជន៍ដែលគម្រោងទាំងនោះ នាំមកជូនប្រជាជនរបស់យើង សេដ្ឋកិច្ចរបស់យើង និងប្រទេសហ្វីលីពីន”។ លោកបានបន្ថែមថា គម្រោងស្ពានចុងក្រោយនេះគឺជា “សក្ខីភាពមួយបង្ហាញពីមូលដ្ឋានគ្រឹះដ៏រឹងមាំ និងភាពរីកចម្រើនឥតឈប់ឈរនៃទំនាក់ទំនងទ្វេភាគី និងកិច្ចសហប្រតិបត្តិការរវាងប្រទេសយើងទាំង២”។

លោក Marcos បានសង្កត់ធ្ងន់ថា លោកកំពុងទន្ទឹងរង់ចាំការបន្តពង្រឹងទំនាក់ទំនងទ្វេភាគីជាមួយមហាយក្សចិន។

តាមការរំពឹងទុក ស្ពាននេះគ្រោងនឹងសាងសង់បញ្ចប់ ជាស្ថាពរនៅឆ្នាំ២០២៧ ហើយអាចទទួលរថយន្តបានរហូត ដល់ទៅ២៥.០០០គ្រឿងក្នុងមួយថ្ងៃ ព្រមទាំងកាត់បន្ថយពេលវេលាធ្វើដំណើរ រវាងកោះ Samal និងក្រុង Davao បានយ៉ាងច្រើនពី៥០នាទី មកតិចជាង៥នាទី៕ Xinhua៕