ដោយៈ សុផារី

ភ្នំពេញៈ ថវិកាជាង៥១០០លានដុល្លារអាមេរិក ត្រូវបានរដ្ឋាភិបាលគ្រោងចំណាយសម្រាប់អភិវឌ្ឍន៍៍គំរោងចំនួន១៨៩ ក្នុងរយៈពេល៣ឆ្នាំ ដែលចាប់ផ្តើមពីឆ្នាំ២០២៣ ដល់ឆ្នាំ២០២៥ខាងមុខ។

ព៌តមាននេះ ត្រូវបានលើកឡើងដោយសម្ដេចអគ្គមហាសេនាបតីតេជោហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នៅព្រឹកថ្ងៃទី២៨ តុលា២០២២នេះ ដែលសម្តេចបានដឹកនាំកិច្ចប្រជុំពេញអង្គគណៈរដ្ឋមន្ត្រី និងបានបន្តពិភាក្សាលើរបៀបវរៈស្ដីពី សេចក្ដីព្រាងច្បាប់កម្មវិធីវិនិយោគសាធារណៈ៣ឆ្នាំរំកិល ២០២៣-២០២៥ ក្នុងនោះ ក៏មានការកិច្ចពិភាក្សាជាមួយក្រសួងសេដ្ឋកិច្ច និងហិរញ្ញវត្ថុដើម្បីពិនិត្យ និងកែសម្រួលឡើងវិញនូវការសន្យា ផ្ដល់ថវិកាជាតិពីកញ្ចប់ថវិកាជាតិ និងលទ្ធផលនៃកិច្ចពិភាក្សាផងដែរ។

លោកផៃ ស៊ីផាន ប្រធានអង្គភាពអ្នកនាំពាក្យរាជរដ្ឋាភិបាលកម្ពុជាបានបង្ហាញពីចំនួនគម្រោង ដែលត្រូវវិនិយោគក្នុងកម្មវិធីវិនិយោគសាធារណៈ៣ឆ្នាំរំកិល ដោយក្នុងចំណោមគម្រោង សរុបចំនួន៦៦៣គម្រោងនៃកម្មវិធីវិនិយោគសាធារណៈ៣ឆ្នាំរំកិល២០២៣ -២០២៥នេះមានចំនួន១៨៩គម្រោងជាគម្រោងកំពុងដំណើរការ ដែលត្រូវការទុនវិនិយោគចំនួន៥.១០៦លានដុល្លារអាមេរិក និងចំនួន៤៧៤គម្រោងជាគម្រោងសម្រាប់អនុវត្តក្នុងផែនការយុទ្ធសាស្ត្រអភិវឌ្ឍន៍ជាតិ ដែលត្រូវការទុនវិនិយោគ៤.១១៥លានដុល្លារអាមេរិក ។

លោកស៊ីផានបានសរសេរ ក្នុងគណនីហ្វេសប៊ុករបស់លោកនៅព្រឹកថ្ងៃទី២៨ តុលា២០២២នេះថា កម្មវិធីវិនិយោគសាធារណៈ ៣ឆ្នាំរំកិល២០២៣-២០២៥ទៅតាមវិស័យ ដូចបានកំណតនៅក្នុងផែនការយុទ្ធសាស្ត្រអភិវឌ្ឍន៍ជាតិ២០២៣-២០២៥ រួមមាន៖

-១៣,៤ភាគរយនៃតម្រូវការ ចំណាយវិនិយោគសាធារណៈសរុបសម្រាប់អនុវត្តគម្រោងក្នុងវិស័យសង្គម។

-៤៣,៦ភាគរយនៃតម្រូវការចំណាយ វិនិយោគសាធារណៈសរុបសម្រាប់អនុវត្តគម្រោងក្នុងវិស័យសេដ្ឋកិច្ច។

-៣៧,៤ភាគរយ នៃតម្រូវការចំណាយវិនិយោគសាធារណៈសរុប សម្រាប់អនុវត្តគម្រោងនោក្នុងវិស័យសេវានិងកម្មវិធីអន្តរវិស័យ។

-៥,៦ភាគរយនៃតម្រូវការចំណាយវិនិយោគ សាធារណៈសរុបសម្រាប់អនុវត្តគម្រោងក្នុងវិស័យសេវា និងកម្មវិធីអន្តរវិស័យសេចក្ដីសន្និដ្ឋាន ។

លោកផៃ ស៊ីផានបានឱ្យដឹងថា ដោយឈរលើក្របខណ្ឌទស្សនរួមមួយ ដែលកំណត់ពីតួនាទីដ៏សំខាន់មិនអាចខ្វះបាន នៃការវិនិយោគក្នុងការជំរុញកំណើនសេដ្ឋកិច្ច យើងអាចធ្វើសេចក្ដីសន្និដ្ឋានជារួមបានថា ការធានាឱ្យមាននូវកម្មវិធីវិនិយោគសាធារណៈមួយ ដែលត្រូវរួមចំណែកកក្នុងការធ្វើឱ្យមានកំណើនសេដ្ឋកិច្ចជាតិទាំងមូល ក៏ដូចជា ធ្វើជាឧបករណ៍ផ្នែកគោលនយោបាយ សម្រាប់ប្រែក្លាយគោលនយោបាយអាទិភាពជាតិ ឱ្យទៅជាការពិតជាក់ស្ដែងគឺប្រការចាំបាច់ នៅក្នុងដំណើរការនៃការរៀបចំគោលនយោ​បាយអភិវឌ្ឍន៍សង្គមសេដ្ឋកិច្ច៕

ដោយ: លាងហួរ

តូក្យូ: មូលនិធិរូបិយវត្ថុអន្តរជាតិ(IMF) បានបន្ទាបការព្យាករណ៍សេដ្ឋកិច្ចរបស់អាស៊ីនៅថ្ងៃសុក្រនេះ ដែលបណ្តាលមកពីការរឹតបន្តឹងរូបិយវត្ថុសកល អត្រាអតិផរណា និងការធ្លាក់ចុះយ៉ាងខ្លាំងនៃសេដ្ឋកិច្ចរបស់ប្រទេសចិន។

លោក Krishna Srinivasan ប្រធាននាយកដ្ឋានអាស៊ី និងប៉ាស៊ី  ហ្វិករបស់ IMF បាននិយាយថា ការ​ស្ទុះ​ងើប​ឡើង​វិញ​នៃសេដ្ឋកិច្ច​ដ៏​ខ្លាំង​របស់​អាស៊ី​នៅ​ដើម​ឆ្នាំ​នេះ ​កំពុង​បាត់​បង់​សន្ទុះ។

ការរឹតបន្តឹងបន្ថែមនៃគោលនយោបាយរូបិយវត្ថុ នឹងត្រូវបានទាមទារដើម្បីធានាថាអត្រាអតិផរណា នឹងធ្លាក់ចុះត្រឡប់ទៅដល់គោលដៅវិញ។

IMF បានបន្ទាបការព្យាករណ៍កំណើនសេដ្ឋកិច្ច របស់អាស៊ីមកត្រឹម៤ភាគរយនៅឆ្នាំនេះ និង៤,៣ភាគរយនៅឆ្នាំក្រោយ ពោលគឺធ្លាក់ចុះ០,៩ភាគរយ និង០,៨ភាគរយពីខែមេសារៀងគ្នា។

របាយការណ៍ដដែលនេះបានបង្ហាញថា ស្របពេលជំងឺរាតត្បាតកូវីដ១៩បានថមថយចុះ ពេលនេះតំបន់អាស៊ី កំពុងប្រឈមមុខនឹងបញ្ហានៃការរឹតបន្តឹងហិរញ្ញវត្ថុសកល និងការរំពឹងទុកនៃការធ្លាក់ចុះនៃតម្រូវការខាងក្រៅ។

មូលនិធិរូបិយវត្ថុអន្តរជាតិ IMF បានបង្ហាញថា ការធ្លាក់ចុះនៃសេដ្ឋកិច្ចយ៉ាងឆាប់រហ័សរបស់ប្រទេសចិន គឺជាបញ្ហាប្រឈមដ៏ធំបំផុតដែលជះផលប៉ះពាល់ដល់សេដ្ឋកិច្ចនៅតំបន់អាស៊ីផងដែរ៕

ដោយ៖ សុផារី

ភ្នំពេញ៖ កិច្ចប្រជុំពេញអង្គគណៈរដ្ឋមន្រ្តី បានសម្រេចអនុម័តទាំងស្រុង លើសេចក្តីព្រាងច្បាប់ ស្តីពី ហិរញ្ញវត្ថុសម្រាប់ការគ្រប់គ្រងឆ្នាំ ២០២៣។

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅព្រឹកថ្ងៃទី២៨ ខែតុលានេះ បានអញ្ជើញដឹកនាំកិច្ចប្រជុំពេញអង្គគណៈរដ្ឋមន្រ្តី ដោយបានចាប់ផ្តើមពិភាក្សាលើរបៀបវារៈលើ “សេចក្តីព្រាងច្បាប់ ស្តីពី ហិរញ្ញវត្ថុសម្រាប់ការគ្រប់គ្រងឆ្នាំ២០២៣”។

សេចក្តីព្រាងច្បាប់នេះ បង្ហាញពីការសម្រេចបាននូវសមិទ្ធផលការងារសំខាន់ៗក្នុងការអនុវត្តគោលនយោបាយ និងវិធានការពាក់ព័ន្ធនានា ក្នុងក្របខ័ណ្ឌម៉ាក្រូសេដ្ឋកិច្ច និងក្របខ័ណ្ឌថវិកាឆ្នាំ២០២១។

សេដ្ឋកិច្ចកម្ពុជា បានងើបឡើងវិញក្នុងអត្រា៣,០% ទាបជាងការព្យាករក្នុងក្របខ័ណ្ឌម៉ាក្រូសេដ្ឋកិច្ចនេះបន្តិច ដោយសារការផ្ទុះឡើងនៃ ព្រឹត្តិការណ៍សហគមន៍ ២០ កុម្ភៈ២០២១” គួបផ្សំនឹងការលេចចេញនូវវីរុសបំប្លែងខ្លួនប្រភេទថ្មី ដូចជា អូមីក្រុងជាដើម ទាំងក្នុងបរិការណ៍សកល តំបន់ និងក្នុងស្រុក ដែលធ្វើឱ្យប៉ះពាល់ជាពិសេសលើអនុវិស័យសណ្ឋាគារនិងភោជនីយដ្ឋាន និងវិស័យគាំទ្រទសចរណ៍ផ្សេងទៀត។

ទោះជាយ៉ាងណា កំណើនសេដ្ឋកិច្ចសម្រាប់ឆ្នាំ២០២១ ជារួម ត្រូវបានរួមចំណែកទ្រទ្រង់ដោយការងើបឡើងវិញនៃតម្រូវការសកល និងការកើនឡើងនៃថ្លៃកសិផលលើទីផ្សារអន្តរជាតិ។និន្នាការវិជ្ជមានទាំងនេះ បានផ្ដល់ភាពល្អប្រសើរ និងគាំទ្រដល់វិស័យ និងអនុវិស័យដែលពឹងផ្អែកលើការនាំចេញ រួមមាន អនុវិស័យកាត់ដេរ កម្មន្តសាលមិនមែនកាត់ដេរ និងវិស័យកសិកម្ម។ ការអនុវត្តតាមវិស័យនីមួយៗបង្ហាញថា វិស័យកសិកម្មជារួម សម្រេចបានកំណើនល្អប្រសើរក្នុងរង្វង់១,១% ក្នុងឆ្នាំ២០២១ ដោយសារកំណើនល្អប្រសើរនៃអនុវិស័យដំណាំ និងអនុវិស័យចិញ្ចឹមសត្វ ខណៈដែលអនុវិស័យនេសាទមានកំណើនអវិជ្ជមាន។

“ព្រឹត្តិការណ៍សហគមន៍២០ កុម្ភៈ ២០២១” បានរំខាន និងបន្ទច់បង្អាក់យ៉ាងខ្លាំងដល់សកម្មភាពសេដ្ឋកិច្ច ក្នុងស្រុក ព្រមទាំងបានបង្ហាញនូវបច្ច័យអវិជ្ជមានកាន់តែច្បាស់ តាមរយៈការធ្លាក់ចុះនៃលទ្ធផលនៃការប្រមូលចំណូលក្នុងស្រុកក្នុងឆ្នាំ២០២១ ធៀបនឹងចំណូលក្នុងស្រុកដែលប្រមូលបានក្នុងឆ្នាំ២០២០។

ទោះបីជាក្នុងឆ្នាំ២០២១ ការប្រមូលចំណូលក្នុងស្រុកជារួម សម្រេចបានទាបជាងលទ្ធផលក្នុងឆ្នាំ២០២០ លទ្ធផលនេះសម្រេចបានខ្ពស់ជាងការគ្រោងទុកក្នុងច្បាប់ហិរញ្ញវត្ថុប្រមាណ៦,៤% ដែលឆ្លុះបញ្ចាំងពីកិច្ចខិតខំប្រឹងប្រែងរបស់រដ្ឋបាលចំណូលសារពើពន្ធ និងចំណូលមិនមែនសារពើពន្ធ និងបានចូលរួមផ្ដល់លទ្ធភាពថវិកាក្នុងការបំពេញតម្រូវការនៃចំណាយសាធារណៈក្នុងការធ្វើអន្តរាគមន៍ និងឆ្លើយតបប្រកបដោយប្រសិទ្ធភាពខ្ពស់ និងទាន់ពេលវេលាក្នុងការគ្រប់គ្រងលើ “ព្រឹត្តិការណ៍សហគមន៍ ២០ កុម្ភៈ ២០២១” ព្រមទាំងបន្តរក្សាបាននូវចីរភាពនៃហិរញ្ញវត្ថុសាធារណៈ។

ចំណាយសរុបថវិការដ្ឋ ក្នុងឆ្នាំ២០២១ អនុវត្តបានប្រមាណ ស្មើនឹង៩៨,១%នៃច្បាប់ហិរញ្ញវត្ថុ និងកើនឡើង៩,៨% ធៀបនឹងឆ្នាំ២០២០។ កំណើនគួរឱ្យកត់សម្គាល់នៃចំណាយ ចំណាយ គឺដោយសារការកើនឡើងខ្ពស់នៃចំណាយអន្តរាគមន៍ទាំងផ្នែកសង្គម-សេដ្ឋកិច្ច ដែលមិនធ្លាប់មានពីមុនមក ដើម្បីរក្សាលំនឹងជីវភាពប្រជាជន ជាពិសេសសម្រាប់ប្រជាជនក្រីក្រ និងអ្នកបាត់បង់ការងារ និងការប្រយុទ្ធប្រឆាំងជំងឺកូវីដ-១៩ ក្នុងបរិការណ៍កម្ពុជាបានប្រឈមនូវការឆ្លងរាលដាលនៃជំងឺកូវីដ-១៩ ក្នុងសហគមន៍។

ថវិកាឆ្នាំ២០២១ ត្រូវបានគិតគូររៀបចំ និងអនុវត្តក្នុងបរិការណ៍នៃវិបត្តិនៃជំងឺកូវីដ-១៩ ដើម្បីតម្រង់ការប្រើប្រាស់ធនធាន សម្រាប់ទ្រទ្រង់ដល់និរន្តភាពនៃប្រតិបត្តិការរបស់រដ្ឋ និងសម្រាប់ការរក្សាលំនឹងសង្គម-សេដ្ឋកិច្ចកម្ពុជា និងជីវភាពរបស់ប្រជាជន ព្រមទាំងការស្តារ និងជំរុញការងើបឡើងវិញនូវកំណើនសេដ្ឋកិច្ច ក៏ដូចជាដើម្បីសម្រេចនូវគោលដៅសំខាន់ៗនកម្មវិធី នយោបាយយុទ្ធសាស្តចតុកោណ ដំណាក់កាលទី៤ និងផនការយុទ្ធសាស្ត្រ អភិវឌ្ឍន៍ជាតិឆ្នាំ២០១៩-២០២៣។

សរុបមក ថវិកាឆ្នាំ២០២១ ត្រូវសន្និដ្ឋានថា ជាគោលនយោបាយដ៏មានប្រសិទ្ធភាព ដែលអាចឆ្លើយតបទៅ នឹងបញ្ហាប្រឈម និងហានិភ័យផង ទាំងក្នុង និងក្រៅប្រទេស ហើយត្រូវបានប្រសិទ្ធនាមថាជា “ថវិកាប្រយុទ្ធការពារ អាយុជីវិតប្រជាជន រក្សាលំនឹងសង្គម សេដ្ឋកិច្ច និងជីវភាពរបស់ប្រជាជន ព្រមជាមួយនឹងការតម្រង់ធនធានឆ្ពោះ ទៅស្ដារ និងជំរុញកំណើនសេដ្ឋកិច្ចឡើងវិញ នៅក្រោយពេលស្រាកស្រាន្តពីវិបត្តិនៃជំងឺកូវីដ-១៩ តាមគន្លងប្រក្រតីថ្មី ដើម្បីធានាសុខសន្តិភាព ស្ថិរភាពសង្គម និងចីរភាពនៃកំណើនសេដ្ឋកិច្ច ព្រមទាំងភាពប្រកួតប្រជែងរបស់កម្ពុជា ជាមួយនឹងការបន្តលើកស្ទួយសុខុមាលភាពរបស់ប្រជាជន៕

ដោយ: លាងហួរ

ហុងកុង: ទិន្នន័យផ្លូវការបានបង្ហាញឱ្យដឹង នៅថ្ងៃព្រហស្បតិ៍នេះថា តម្លៃផ្ទះឯកជន ក្នុងទីក្រុងហុងកុងបានធ្លាក់ចុះ២,១ភាគរយ នៅក្នុងខែកញ្ញាដល់កម្រិតទាបបំផុត ចាប់តាំងពីខែមករា ឆ្នាំ២០១៩ ដែលបណ្តាលមកពីការកើនឡើងអត្រាការប្រាក់ និងទស្សនវិស័យសេដ្ឋកិច្ចដ៏អាប់អួរ។

ការ​ធ្លាក់​ចុះ​នៃតម្លៃ​ផ្ទះ​ នៅ​ក្នុង​ទីផ្សារ​លំនៅដ្ឋាន​ដ៏ថ្លៃបំផុត​មួយ​របស់​ពិភពលោក​ កាលពីខែកញ្ញាបានកើតឡើង ​បន្ទាប់​ពី​តម្លៃផ្ទះក្នុងខែសីហាបានធ្លាក់​ចុះ១,៩ភាគរយ​។

សន្ទស្សន៍តម្លៃអចលនទ្រព្យបានឈរនៅ ត្រឹម៣៦២,១ក្នុងខែកញ្ញា ពោលគឺធ្លាក់ចុះ៩ភាគរយ ពីកម្រិតខ្ពស់បំផុត៣៩៨,១ កាលពីខែកញ្ញាឆ្នាំ២០២១។

តម្លៃផ្ទះនៅក្នុងទីក្រុងហុងកុង បានធ្លាក់ចុះ៨,១ភាគរយ ក្នុងរយៈពេល៩ខែដំបូងនៃឆ្នាំ២០២២នេះ។

ការកើនឡើងនៃថ្លៃកម្ចីទិញផ្ទះ និងទស្សនវិស័យសេដ្ឋកិច្ចដ៏អាក្រក់បានធ្វើឱ្យមានភាពទុទិដ្ឋិនិយមយ៉ាងខ្លាំង ក្នុងចំណោមម្ចាស់ផ្ទះខណៈដែ​លតម្លៃផ្ទះពេញមួយឆ្នាំត្រូវបានគេរំពឹងថា នឹងធ្លាក់ចុះប្រហែល១០ភាគរយ ហើយនេះជាការធ្លាក់ចុះលើកដំបូង ចាប់តាំងពីឆ្នាំ២០០៨មក។

លោក Martin Wong នាយក និងជាប្រធានផ្នែកស្រាវជ្រាវ និងប្រឹក្សានៃតំបន់Greater China នៅទីភ្នាក់ងារអចលនទ្រព្យKnight Frankបាននិយាយថា តម្លៃផ្ទះនឹងបន្តធ្លាក់ចុះក្នុងរយៈពេលដ៏ខ្លី ដែលមួយផ្នែកបណ្តាលមកពីការធ្លាក់ចុះ ដល់កម្រិតទាបបំផុត មិនធ្លាប់មាននៃសន្ទស្សន៍ផ្សារហ៊ុនHang Seng៕

 ដោយៈ គង់ ម៉ាលីនណា

       បាងកកៈ  គណៈរដ្ឋមន្រ្តីនៃរដ្ឋាភិបាលថៃកាលពីថ្ងៃទី ២៥ តុលា កន្លង បានសម្រេចយល់ព្រម អនុញ្ញាតឱ្យជនបរទេសទិញផ្ទះ និងដី បាន ប្រសិ​នបើពួកគេវិនិយោគ យ៉ាងហោចណាស់៤០លានបាត ឬជាង១លានដុល្លារអាមេរិក។

សេចក្ដីសម្រចនេះ នឹងចូលជាធរមានឆាប់ៗ ដោយនឹងមានសុពលភាព ៥ ឆ្នាំ។ នេះបើយោងតាមសារពត៌មាន The Nation។

សំណើនេះ ត្រូវបានក្រសួងមហាផ្ទៃ លើកឡើងកាលពីខែឧសភា ក្នុងគោលបំណងទាញយកការវិនិយោគពីបរទេស និងនាំជនបរទេសដែលមានជំនាញពិសេសមកប្រទេសថៃ។

ដើម្បីមានសិទ្ធិទទួលបាន ជនបរទេសនឹងតម្រូវឱ្យបញ្ជាក់ថា ពួកគេបានវិនិយោគ ទឹកប្រាក់យ៉ាងតិច៤០លានបាតនៅក្នុងប្រទេសថៃ ហើយរក្សាការវិនិយោគនោះ ក្នុងរយៈពេលយ៉ាងតិច៣ឆ្នាំ ដោយចាប់ផ្តើមពីថ្ងៃដែលពួកគេដាក់ពាក្យស្នើសុំទិញ។

ការវិនិយោគអាចធ្វើឡើងច្រើនរូបភាព ដូចជា មូលបត្របំណុលរបស់រដ្ឋ ឬស្ថាប័នពាក់ព័ន្ធ ភាគហ៊ុននៃមូលនិធិអចលនទ្រព្យ និ ភាគហ៊ុននៃនីតិបុគ្គល ដែលទទួលបានសិទ្ធិជាក្រុមប្រឹក្សាវិនិយោគជាដើម។

ជនបរទេសដែលស្នើសុំទិញដី និង/ឬផ្ទះ ត្រូវតែផលិតវិញ្ញាបនបត្របញ្ជាក់ពីការវិនិយោគរបស់ពួកគេ។

ជនបរទេសអាចទិញដី និង/ឬផ្ទះ នៅទីក្រុងបាងកក ប៉ាតាយ៉ា និងតំបន់ក្រុង ឬតំបន់ផ្សេងទៀតដែលត្រូវបានសម្គាល់ ជាតំបន់លំនៅដ្ឋាននៅក្នុងខេត្ត៕

ដោយៈគង់ សូរិយា

       ភ្នំពេញៈ សម្ដេចតេជោហ៊ុន សែន នាយករដ្ឋមន្ត្រីនៃកម្ពុជានឹងអញ្ជើញដឹកនាំកិច្ចប្រជុំពេញអង្គគណ:រដ្ឋមន្ត្រី នៅវិមានសន្តិភាពនាព្រឹកថ្ងៃទី២៨ តុលានេះ ដោយសម្តេចនឹងពិនិត្យសេចក្តីព្រាងច្បាប់ និងពិធីសារមួយចំនួន។

សម្រាប់របៀបវារៈនៃកិច្ចប្រជុំមានដូចជា ទី១ សេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៣។ ទី២ សេចក្តីព្រាងច្បាប់ស្តីពីការទូទាត់ថវិកាទូទៅរបស់រដ្ឋ សម្រាប់ការគ្រប់គ្រងឆ្នាំ២០២១ ទី៣ សេចក្តីព្រាងកម្មវិធីវិនិយោគសាធារណៈ៣ឆ្នាំរំកិល ២០២៣-២០២៥។

៤៖ បញ្ហាផ្សេងៗ សំណើសុំការយល់ព្រមពីគណៈរដ្ឋមន្រ្តី ដើម្បីសុំការអនុម័តពីស្ថាប័ននីតិបញ្ញត្តិលើ សេចក្តីព្រាងច្បាប់ស្តីពីការអនុម័តយល់ព្រមលើ

៤.១៖ ពិធីសារទាក់ទងនឹងការធ្វើវិសោធនកម្ម នៃអនុសញ្ញាស្តីពីអាកា​សចរស៊ីវិលអន្តរជាតិ ដោយបន្ថែមមាត្រា៣ស្ទួន។

៤.២៖ ពិធីសារទាក់ទងនឹងការធ្វើវិសោធនកម្ម មាត្រា៥០(ក)នៃអនុសញ្ញាស្តីពីអាកាសចរស៊ីវិលអន្តរជាតិ។

៤.៣៖ ពិធីសារទាក់ទងនឹងការធ្វើវិសោធនកម្ម មាត្រា៥៦នៃអនុសញ្ញាស្តីពីអាកាសចរស៊ីវិលអន្តរជាតិ៕