ដោយ:លាងហួរ

ប៉េកាំង: ប្រធានាធិបតីចិន លោកស៊ី ជីនពីង បានមានប្រសាសន៍ថា ប្រទេសចិន និងសហរដ្ឋអាមេរិកត្រូវតែ ស្វែងរកមធ្យោបាយចុះសម្រុងគ្នាដើម្បីការពារសន្តិភាព និងការអភិវឌ្ឍន៍ពិភពលោក។ នេះបើយោងតាមប្រព័ន្ធផ្សព្វផ្សាយរដ្ឋចិន បានរាយការណ៍នៅថ្ងៃព្រហស្បតិ៍នេះ ក្រោយពីលោកស៊ី នឹងកាន់អំណាចនៅអាណត្តិទី៣បន្ត។

ប្រទេសចិន និងសហរដ្ឋអាមេរិក មានទំនាស់នឹងគ្នាក្នុងរយៈពេលប៉ុន្មានឆ្នាំថ្មីៗនេះលើបញ្ហាជាច្រើន ដូចជា បញ្ហាកោះតៃវ៉ាន់ និងការចោទប្រកាន់របស់អាមេរិក ទៅលើចិនជុំវិញការរំលោភបំពានសិទ្ធិមនុស្ស នៅតំបន់ស៊ីនជាំង និងបញ្ហាហុងកុងផងដែរ។

ទីក្រុងវ៉ាស៊ីនតោន ក៏បានចោទប្រកាន់ទីក្រុងប៉េកាំងថា បានគាំទ្រផ្នែកការទូតដល់ការលុកលុយរបស់ប្រទេសរុស្ស៊ី លើអ៊ុយក្រែនផងដែរ។

លោកស៊ី ជីនពីងបានថ្លែងប្រាប់អង្គការមិនរកប្រាក់ចំណេញ ដែលមានមូលដ្ឋាននៅទីក្រុងញូវយ៉កថា ក្នុងនាមជាប្រទេសមហាអំណាចធំៗ ការពង្រឹងទំនាក់ទំនង និងកិច្ចសហប្រតិបត្តិការរវាងប្រទេសចិន និងសហរដ្ឋអាមេរិក នឹងជួយបង្កើនស្ថិរភាព និងភាពប្រាកដប្រជារបស់ពិភពលោក និងលើកកម្ពស់សន្តិភាព និងការអភិវឌ្ឍន៍ពិភពលោក។

លោកស៊ី ជីនពីងបានបន្ថែមថា ប្រទេសចិន មានឆន្ទៈក្នុងការធ្វើការជាមួយសហរដ្ឋអាមេរិក ដើម្បីផ្តល់ការគោរពគ្នាទៅវិញទៅមក រួមរស់ដោយសន្តិភាព និងស្វែងរកមធ្យោបាយដើម្បីចុះសម្រុងគ្នាក្នុងយុគសម័យថ្មីនេះ។

លោកស៊ីបានសរសេរថា “ការធ្វើដូច្នេះ នឹងមិនត្រឹមតែផ្តល់ផលល្អសម្រាប់ប្រទេសទាំងពីរប៉ុណ្ណោះទេ ប៉ុន្តែថែមទាំងផ្តល់ផលប្រយោជន៍ដល់ពិភពលោកផងដែរ”។

រដ្ឋបាលសហរដ្ឋអាមេរិក ក្រោមការដឹកនាំរបស់លោកចូ បៃដិនបានប្រកាសនៅក្នុងខែតុលានេះថា ប្រទេសចិនគឺជាដៃគូប្រកួតប្រជែងតែមួយគត់របស់សហរដ្ឋអាមេរិក ដោយទីក្រុងប៉េកាំងមានចេតនា ក្នុងការកែប្រែសណ្តាប់ធ្នាប់អន្តរជាតិ ហើយប្រទេសចិនមានអំណាចផ្នែកសេដ្ឋកិច្ច ការទូត យោធា និងបច្ចេកវិទ្យាកាន់តែខ្លាំងឡើង៕

ដោយ៖ សុផារី

ភ្នំពេញ៖ ​ក្រសួង​សាធារណការ​ និង​ដឹក​ជញ្ជូន ​បាននិង​កំពុង​សិក្សា​ក្នុង​ការ​ប្រើប្រាស់​បច្ចេកវិទ្យា​ ដែល​អាច​ស្កេន​លើ​ស្លាក​លេខ​រថយន្ត​ ពេល​ធ្វើ​ដំណើរ​លើ​ផ្លូវ​ល្បឿនលឿន​ទៅ​ខេត្តព្រះសីហនុ ដោយ​មិន​បាច់​ឈប់​បង់​លុយ ​ដែលនាំ​ឱ្យកក​​ស្ទះ​ខាត​ពេល​ដូច​មុន​ទៀត​ទេ។

ថ្លែងក្នុងសន្និសីទសារព័ត៌មាន ស្ដីពី “សមិទ្ធផលសម្រេចបានរយៈពេល ៥ឆ្នាំកន្លងមករបស់ក្រសួងសាធារណការ និងដឹកជញ្ជូន” នាទីស្ដីការគណៈរដ្ឋមន្រ្ដី នៅព្រឹកថ្ងៃទី២៧ ខែតុលា ឆ្នាំ២០២២ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានឱ្យដឹង ក្រសួង​សាធារណការ ​និង​ដឹកជញ្ជូន បាននិងកំពុងតែ​ប្រឹង​ប្រែង​ ដើម្បី​សម្រួល​នីតិវិធី​កាន់​តែងាយស្រួល ដោយសារ​កន្លងទៅ​កើត​មានការ​កកស្ទះ​នៅ​ពេល​រថយន្ត​ច្រើន​ធ្វើ​ដំណើរព្រមគ្នា​នៅ​បញ្ជរ​បង់​លុយ​។

លោក ស៊ុន ចាន់ថុល មានប្រសាសន៍ថា “ពេល​រថយន្ត​ឆ្លង​កាត់ ​កាមេរ៉ានឹង​ចាប់​​ស្កេន​លេខ​រថយន្តហើយ​ឆែក​ដឹង​មានលុយ ​ឬ​អត់លុយ ​ចឹង​ទេ​មិន​បាច់​ឈប់​ចាំបង់លុយ​​ទៀត​ទេ”។

លោក​ថា តាមរយៈ​បច្ចេកវិទ្យានេះ រាល់​រថយន្តដែលធ្វើ​ដំណើរ​ឆ្លង​កាត់​កន្លែង​បង់​លុយ​អាច​ស្កេន​លើ​ស្លាក​រថយន្ត​ ដោយនឹង​​កាត់​យកទឹកប្រាក់​ដោយ​ស្វ័យ​ប្រវត្តិ។

លោករដ្ឋមន្ត្រីបញ្ជាក់ថា ការ​ប្រើប្រាស់​ផ្លូវ​ល្បឿនលឿន​ទៅ​ខេត្ត​ព្រះសីហនុ បច្ចុប្បន្ន​​អ្នកប្រើប្រាស់​អាច​ទិញ​កាត​អេឡិចត្រូនិក​ ETC ​សម្រាប់​ទូទាត់​​ជួយ​ឱ្យ​ចំណេញ​ពេលវេលា ​ដោយ​មិនចាំបាច់​ឈប់​ពេល​ដល់​កន្លែង​បញ្ជរ​បង់​ប្រាក់។ ពេល​ចាក​ចេញ​នៅ​កន្លែង​ប្ដូរ​ទិស ​ម៉ាស៊ីន​​នៅ​តាម​បញ្ជរ​បង់ប្រាក់​នឹង​គិត​តម្លៃ​ធ្វើ​ដំណើរ​ដោយ​ស្វ័យ​ប្រវត្តិ។

ក្នុង​ករណី​គ្មាន​កាត​អេឡិច​ត្រូនិក ​ETC ​បុគ្គលិក​នៅ​តាម​ច្រកចូលនឹង​ផ្តល់​កាត​១ឱ្យ​ម្ចាស់​យាន​យន្ត។ ពេល​ធ្វើដំណើរ​ចាក​ចេញ​ច្រកណា​មួយ ​បុគ្គលិក​នៅ​តាម​បញ្ជរ​នឹង​យក​កាត​នោះ​ទៅ​ឆូត​តាម​កុំព្យូទ័រ ​និង​បង្ហាញ​ពី​តម្លៃ​ត្រូវ​ទូ​ទាត់។ អ្នក​ធ្វើដំណើរ​អាច​ទិញ​កាត​អេឡិចត្រូនិក ETC​ ​នៅតាម​ធនាគារ​ដៃគូរបស់​ក្រុមហ៊ុន​សាង​សង់៕

ដោយ: សូរិយា

ភ្នំពេញ៖ ជាដំណឹងល្អ ដែលផ្លែមៀនស្រស់កម្ពុជាត្រូវបានរៀបចំពិធីសម្ភោធការនាំចេញទៅកាន់ទីផ្សារប្រទេសចិន នៅថ្ងៃទី២៧ ខែតុលា ឆ្នាំ២០២២នេះ  ដែលប្រព្រឹត្តទៅក្រោមអធិបតីភាពលោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងលោក Wang Wentian ឯកអគ្គរដ្ឋទូតសាធារណរដ្ឋប្រជាមានិតចិនប្រចាំនៅកម្ពុជា។

កម្មវិធីនេះដែរ មានការអញ្ញើញចូលរួមពីមន្រ្តីក្រោមឱវាទក្រសួងកសិកម្ម រុក្ខាប្រមាញ់ និងនេសាទ តំណាងក្រសួង ស្ថាប័នពាក់ព័ន្ធ មន្ទីរកសិកម្មខេត្តចំនួន៤ មកពីខេត្តកណ្តាល ប៉ៃលិន បន្ទាយមានជ័យ និងខេត្តបាត់ដំបង សហគមន៍កសិកម្មមៀន ព្រមទាំងភ្ញៀវកិត្តិយសជាច្រើននាក់ផ្សេងទៀត។

លោករដ្ឋមន្រ្តី ឌិត ទីណា បានមានប្រសាសន៍ថា ឆ្នាំ២០២២នេះ គឺជាឆ្នាំទី១២ហើយ ដែលទំនាក់ទំនងការទូតនៃប្រទេសទាំងពីរ កម្ពុជា-ចិន ត្រូវបានដំឡើងដល់កម្រិតកិច្ចសហប្រតិបត្តិការភាពជាដៃគូយុទ្ធសាស្រ្តគ្រប់ជ្រុងជ្រោយ ជាមួយនឹងការពង្រឹងនិងពង្រីកទំនាក់ទំនងលើគ្រប់វិស័យជាលំដាប់ រួមទាំងផ្នែកពាណិជ្ជកម្ម ធុរកិច្ច និងវិនិយោគ។

លោកបានបន្តថា ជាមួយការសម្រេចបានសិទ្ធិនាំចេញផ្លែមៀនស្រស់ផ្លូវការ ទៅកាន់ប្រទេសនាពេលនេះ ជាការបោះជំហានទៅមុខយ៉ាងវែងសម្រាប់កម្ពុជា។ នៅពេលកម្ពុជានឹងបើកការចចារ ដើម្បីបើកទីផ្សារប្រទេសចិន សម្រាប់ការនាំចេញកសិផលកម្ពុជាផ្សេងទៀត ដូចជា ម្រេច ដូងក្រអូប ទុរេន ម្នាស់ ខ្នូរ គ្រាប់ឈូក និងផលិតផលសម្បុកត្រចៀកកាំជាដើម។ល។

នៅក្នុងពិធីនាឱកាសនោះ លោកឯកអគ្គរដ្ឋទូតចិនប្រចាំនៅកម្ពុជា បានមានប្រសាសន៍ថា ផ្លែមៀនស្រស់របស់កម្ពុជា គឺជាកសិផលប្រភេទទី៣ ដែលត្រូវបានអនុម័តនាំចេញទៅប្រទេសចិន បន្ទាប់ពីត្រីប្រា និងពោតនៅឆ្នាំនេះ ហើយក៏ជាផ្លែឈើប្រភេទទី៣ដែរ ដែលត្រូវបានអនុម័តនាមចេញរបស់កម្ពុជាទៅប្រទេសចិន។

លោកបានបន្តថា ការប្រារព្ធពិធីក្នុងថ្ងៃនេះ ដើម្បីធ្វើជាសាក្សី នៃការនាំចេញផ្លែមៀនរបស់កម្ពុជាទៅកាន់ប្រទេសចិនដោយជោគជ័យ នេះជាសមិទ្ធផលសំខាន់មួយទៀត នៃកិច្ចសហប្រតិបត្តិការកសិកម្មរវាងប្រទេសទាំងពីរ ក្រោមការរីករាលដាលនៃកូវីដ១៩។ វានឹងនាំមកនូវផលប្រយោជន៍ជាក់ស្តែងដល់ប្រជាជនទាំងពីរ និងជំរុញការអភិវឌ្ឍន៍បន្ថែមទៀត នៃទំនាក់ទំនងមិត្តភាពរវាងចិន និងកម្ពុជា។

ជុំវិញការសម្រេចបានលទ្ធផលខាងលើនេះ គឺបន្ទាប់ពីរាជរដ្ឋាភិបាលកម្ពុជាបានបើកការចរចាលក្ខខណ្ឌតម្រូវភូតគាមអនាម័យបើកទីផ្សារ អស់រយៈពេលជាង៣ឆ្នាំ ទើបរដ្ឋបាលគយនៃសាធារណរដ្ឋប្រជាជិតចិន (GACC) បានអនុម័តចុះបញ្ជីជាផ្លូវការនូវចម្ការមៀនចំនួន៧៤ និងក្រុមហ៊ុនវេចខ្ចប់ចំនួន៨ សម្រាប់នាំចេញផ្លែមៀនស្រស់កម្ពុជាទៅកាន់ប្រទេសចិន។

យោងតាមរបាយការណ៍របស់ឯកអគ្គរដ្ឋទូតសាធារណរដ្ឋប្រជាមានិតចិនប្រចាំនៅកម្ពុជា បានឲ្យដឹងថា គិតចាប់ពីឆ្នាំ២០១៩ ដល់បំណាច់ខែមិថុនា ឆ្នាំ២០២២ កម្ពុជាបាននាំចេញកសិផលសរុបចំនួនប្រមាណ២លាន៤សែនតោន ទៅកាន់ប្រទេសចិន ដែលមានតម្លៃនាំចេញសរុបប្រមាណ១.៩៤២លានដុល្លារ។

ដោយឡែក គិតត្រឹមរយៈពេល៩ខែ ឆ្នាំ២០២២នេះ ការនាំចេញកសិផលពីកម្ពុជាទៅប្រទេសចិនសម្រេចបានជាង៥៨ម៉ឺនតោន គិតជាទឹកប្រាក់ប្រមាណជាង៤៩១លានដុល្លារ៕

ដោយ៖ សុផារី

ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅថ្ងៃទី២៧ ខែតុលា ឆ្នាំ២០២២នេះ បានបញ្ជាក់ថា បើមិនមានអ្វីប្រែប្រួលទេនោះ សម្ដេចនឹងជួបជាមួយ ប្រធានាធិបតីអ៊ុយក្រែន តាមទូរស័ព្ទនៅប៉ុន្មានថ្ងៃខាងមុខនេះ។

តាមរយៈបណ្ដាញសង្គមហ្វេសប៊ុក សម្ដេចតេជោ ហ៊ុន សែន បានប្រកាសប្រាប់ជនរួមជាតិ អំពីការបញ្ចប់បេសកកម្មជួយប្រជាជនដែលរងគ្រោះដោយជំនន់ទឹកភ្លៀងវគ្គទីមួយ កាលពីម្សិលមិញ ប៉ុន្តែសម្ដេចក៏បានបង្ហាញអំពីកិច្ចការមមាញឹកមួយចំនួនទៀតផងដែរ។

សម្ដេចតេជោហ៊ុនសែនបានសរសេថា “ការងារទាក់ទងនឹងការប្រជុំអាស៊ាន ក្នុងឋានៈជាប្រធានប្តូរវេនឆ្នាំ២០២២ បូកជាមួយនឹងការចូលរួមប្រជុំ G20 និងការចូលរួមប្រជុំ APEC ត្រូវបានដោះស្រាយ មួយភាគធំ”។

សម្តេចតេជោ បានបញ្ជាក់ថា “ប្រសិនគ្មានការប្រែប្រួល និងការសម្របសម្រួលពេលវេលាតាមផ្លូវការទូតដែលកំពុងធ្វើនោះទេ ខ្ញុំនឹងជួបប្រធានាធិបតីអ៊ុយក្រែន តាមទូរស័ព្ទនៅប៉ុន្មានថ្ងៃខាងមុខនេះ”៕

ដោយ៖ សុផារី

ភ្នំពេញ៖ លោកទេសរដ្ឋមន្រ្តី ស៊ុន ចាន់ថុល បានបង្ហើបឱ្យដឹងថា គម្រោងសាងសង់ផ្លូវល្បឿនលឿនទី២ ភ្ជាប់ពីភ្នំពេញ ទៅកាន់ក្រុងបាវិត គ្រោងចាប់ផ្តើមបើកការដ្ឋានសាងសង់នៅក្នុងខែមិថុនា ឆ្នាំ២០២៣ខាងមុខនេះហើយ ប្រសិនបើការចរចារសម្បទានពីរដ្ឋាភិបាលចិនទទួលបានជោគជ័យ។

ថ្លែងក្នុងសន្និសីទសារព័ត៌មាន ស្ដីពី “សមិទ្ធផលសម្រេចបានរយៈពេល ៥ឆ្នាំកន្លងមករបស់ក្រសួងសាធារណការ និងដឹកជញ្ជូន” នាទីស្ដីការគណៈរដ្ឋមន្រ្ដី នៅព្រឹកថ្ងៃទី២៧ ខែតុលា ឆ្នាំ២០២២ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានឱ្យដឹង គណៈកម្មការអន្តរក្រសួង កំពុងពិនិត្យជំរុញការចរចា កិច្ចសន្យាភាពជាដៃគូរវាងរដ្ឋ និងឯកជន សម្រាប់គម្រោងផ្លូវល្បឿនលឿនភ្នំពេញ-ក្រុងបាវិត ឱ្យបានចប់ក្នុងពេលឆាប់ៗខាងមុខនេះ ដើម្បីឈានទៅបើកការដ្ឋានសាងសង់ហេដ្ឋារចនាសម្ព័ន្ធផ្លូវល្បឿនលឿនតភ្ជាប់ ពីរាជធានីភ្នំពេញទៅក្រុងបាវិត។

លោក​រដ្ឋមន្រ្តី​បាន​បញ្ជាក់ថា ក្រសួង​កំពុង​ប្រញាប់ប្រញាល់​បញ្ចប់​នីតិវិធី​ ហើយការ​មក​ដល់​មេដឹកនាំ​ចិន​មកប្រជុំ​អាស៊ាននៅ​រាជធានីភ្នំពេញ អាច​នឹង​ឈាន​ទៅ​ការ​ចុះកិច្ច​ព្រមព្រៀង​លើ​គម្រោង​សាងសង់​ផ្លូវ​មួយនេះ។

លោកមានប្រសាសន៍ថា “កិច្ចព្រមព្រៀងក្របខណ្ឌ  Framework agreement យើងបានធ្វើចប់សព្វគ្រប់ហើយ ឥឡូវនេះ ប៉ុន្មានថ្ងៃទៀតនេះយើងខ្ញុំកំពុងតែដុតដៃដុតជើង គណៈកម្មការអន្តរក្រសួងកំពុងចរវារឲ្យបានខិតខំប្រឹងប្រែងចរចាកិច្ចព្រមព្រៀងសម្បទាន ដើម្បីចុះហត្ថលេខានៅថ្ងៃទី៩ ខែ១១ខាងមុខ ពីនាយករដ្ឋមន្ត្រី លីឃឺឈាង នៅពេលលោកធ្វើទស្សនកិច្ច និងចូលរួមកិច្ចប្រជុំកំពូលអាស៊ាន”។

លោកទេសរដ្ឋមន្រ្តី ស៊ុន ចាន់ថុល បានឱ្យដឹងថា សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានផ្តល់អនុសាសន៍ដល់គណៈកម្មការអន្តរក្រសួង ឲ្យខិតខំប្រឹងប្រែង ធ្វើយ៉ាងណាចរចាបញ្ចប់ ដើម្បីឈានទៅកាន់ការបើកការដ្ឋានសាងសង់ នៅក្នុងខែ០៦ ឆ្នាំ២០២៣ បើយោងតាមការប៉ាន់ស្មានរបស់ក្រុមហ៊ុន។

គម្រោងផ្លូវល្បឿនលឿនភ្នំពេញ-បាវិត (Phnom Penh-Bavet Expressway) មានប្រវែងសរុបប្រហែល ១៣៥គ.ម ដោយចេញពីរាជធានីភ្នំពេញ ឆ្លងកាត់ខេត្តកណ្តាល ព្រៃវែង និងស្វាយរៀង ឆ្ពោះទៅទីក្រុងបាវិត ព្រំដែនកម្ពុជា-វៀតណាម៕

 ដោយៈគង់ សូរិយា

       ព្រះសីហនុៈ ទីក្រុងកោះរ៉ុង ខេត្តព្រះសីហនុមានសហគមន៍ទេសច​រណ៍ថ្មីមួយ ដែលនឹងលើកកំពស់វិស័យទេសចរណ៍ខេត្តនេះ ឲ្យកាន់តែមានភាពទាក់ទាញបន្ថែមទៀត។

នៅព្រឹកថ្ងៃទី២៦ ខែតុលា ឆ្នាំ២០២២ លោកវង្ស ផាណាត ប្រធានក្រុមប្រឹក្សាខេត្ត និងលោកគួច ចំរើន អភិបាល នៃគណៈអភិបាលខេត្តព្រះសីហនុ អញ្ជើញចុះពិនិត្យមើលសហគមន៍អេកូទេសចរណ៍ “ព្រែកកោងកាង” ដែលមានទីតាំង ស្ថិតនៅភូមិដើមថ្កូវ សង្កាត់កោះរ៉ុង ក្រុងកោះរ៉ុង ខេត្តព្រះសីហនុ ដោយមានការចូលរួមពីលោកអភិបាលរងខេត្ត នាយករដ្ឋបាលខេត្ត អភិបាលក្រុងកោះរ៉ុង ប្រធានមន្ទីរ មន្រ្តីរាជការ និងកងកម្លាំងប្រដាប់អាវុធ។

តំបន់សហគមន៍អេកូទេសចរណ៍ព្រែកកោងកាង ដែលមានផ្ទៃដីទំហំជាង ២០ហិកតា កំពុងត្រូវបានធ្វើការអភិវឌ្ឍទាក់ទាញជាតំបន់ទេសចរណ៍ធម្មជាតិដ៏ស្រស់ត្រកាលតំបន់កោះរ៉ុង នៃខេត្តព្រះសីហនុ ភ្ញៀវទេសចរជាតិ អន្តរជាតិដែលមកលេងកម្សាន្តតំបន់កោះ មិនភ្លេចសហគមន៍អេកូទេសចរ​ណ៍ព្រែកកោងកាង ដែលកំពុងមានការអភិវឌ្ឍរីកចម្រើន ប្រកបដោយផាសុខភាពសម្រាប់ភ្ញៀវទេសចរ ព្រមទាំងមានបរិស្ថាន អនាម័យ ខ្យល់បរិសុទ្ធល្អថែមទៀតផង។

លោកគួច ចំរើនបានធ្វើការណែនាំឱ្យលោកប្រធានសហគមន៍អេកូទេសចរណ៍ព្រែកកោងកាង ត្រូវខិតខំយកចិត្តទុកដាក់កែច្នៃតំបន់នេះ ឱ្យក្លាយជាតំបន់អេកូទេសចរណ៍ទាក់ទាញ ព្រោះទីតាំងនេះសម្បូរទៅដោយព្រៃកោងកាង មានរុក្ខជាតិចម្រុះ និងជីវចម្រុះជាច្រើនប្រភេទតាមបែបធម្មជាតិ ដូច្នេះយើងត្រូវចេះកែច្នៃតំបន់ព្រៃកោងកាង ជាកន្លែងកម្សាន្តសម្រាប់ភ្ញៀវទេសចរជាតិ និងទេសចរបរទេស ទន្ទឹមនឹងការចូលរួមការពារថែរក្សា អភិរក្ស យើងត្រូវរួមគ្នាធ្វើការដាំដុះកូនកោងកាងបន្ថែមទៀត ឱ្យកាន់តែមានភាពស្រស់ស្អាត និងកាន់តែមានភាពទាក់ទាញ។

លោកបានបញ្ជាក់ថា តំបន់សហគមន៍អេកូទេសចរណ៍ព្រែកកោងកាង (សហគមន៍​ គ្មានផ្លាស្ទីក) នៅពេលខាងមុខប្រែមុខមាត់ថ្មី អាចជួយបង្កើនការងារជូនប្រជាពលរដ្ឋរស់នៅ តំបន់កោះឱ្យមានជីវភាពកាន់តែល្អប្រសើរឡើង ទន្ទឹមនោះយើងត្រូវរួមគ្នាចូលរួមថែរក្សាអនាសម័យ បរិស្ថាន ពិសេសរួមគ្នាអភិរក្សព្រៃកោងកាង ប្រកបដោយចីរភាព ដែលជាតម្រូវការចាំបាច់សម្រាប់ភ្ញៀវទេសចរ និងជីវចម្រុះគ្រប់ប្រភេទ ពិសេសភ្ញៀវទេសចរមកលេងកម្សាន្តនៅតាមបណ្តាកោះ មិនភ្លេចសហគមន៍អេកូទេសចរណ៍ព្រែកកោងកាង ក្នុងភូមិសាស្ត្រក្រុងកោះរ៉ុងរបស់យើងកាន់តែច្រើនបន្ថែមទៀតនាពេលខាងមុខ៕

ដោយ៖ សុផារី

ភ្នំពេញ៖ លោកទេសរដ្ឋមន្រ្តី ស៊ុន ចាន់ថុល បានសម្តែងការមិនសប្បាយចិត្តខ្លាំង ចំពោះការពន្យារពេលម្តងហើយម្តងទៀត របស់ក្រុមហ៊ុនសាងសង់ហាន់ស៊ីនរបស់កូរ៉េ ដែលបានស្នើសុំពន្យារពេលម្តងទៀតគម្រោងផ្លូវជាតិលេខ២ និង២២ ដល់ខែ៥ ឆ្នាំ២០២៣។

ថ្លែង​ក្នុងសន្និសីទសារព័ត៌មាន ស្ដីពី “សមិទ្ធផលសម្រេចបានរយៈពេល ៥ឆ្នាំ​កន្លង​មក​របស់​ក្រសួង​សាធារណការ​ និងដឹកជញ្ជូន” នាទីស្ដីការគណៈរដ្ឋមន្រ្ដី នៅព្រឹកថ្ងៃទី២៧​ ខែតុលា ឆ្នាំ​២០២២ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បាន​ឱ្យ​ដឹង​ថា ផ្លូវ​ជាតិ​លេខ២ និង២២ ដែល​សាងសង់​ដោយ​ក្រុមហ៊ុន​ហាន់ស៊ីន​របស់​កូរ៉េ ត្រូវ​ពន្យារ​ពេល​ម្តង​ទៀត ខណៈ​ក្រុមហ៊ុន​ស្នើ​សុំ​បញ្ចប់​រហូត​ដល់​ខែ៥ ឆ្នាំ២០២៣។

លោក​ទេសរដ្ឋមន្រ្តី ស៊ុន ចាន់ថុល បាន​ថ្លែង​ទាំង​មិន​សប្បាយ​ចិត្ត​ចំពោះ​ការ​ពន្យារ​ពេល​ម្តង​ហើយ​ម្តង​ទៀត របស់​ក្រុមហ៊ុន​សាងសង់​មួយ​នេះ។

លោកបានមានប្រសាសន៍ថា “ក្រុមហ៊ុន​យឺតយ៉ាវ ដំបូង​សន្យា​នឹង​បញ្ចប់​នៅ​ខែ៨ ឆ្នាំ ២០២២ រហូត​ថ្ងៃ២៧ ខែតុលា ឆ្នាំ២០២២ នៅ​មិន​ទាន់​ចប់​នៅ​ឡើយ។ ក្រុមហ៊ុន​ស្នើ​សុំ​ម្តង​ទៀត​រហូត​ដល់​ខែ៥ ឆ្នាំ ២០២៣។ ក្រសួង​កំពុង​ពិនិត្យ​ពិចារណា តើ​ការពន្យា​រពេល​នេះ​សមស្រប​តាម​បច្ចេកទេស​ឬ​ទេ?”។

កន្លងមក កាលពីថ្ងៃទី០៦ ខែតុលា ឆ្នាំ២០២២ ក្រោមវត្តមានលោក ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន បានជួបប្រជុំជាមួយលោក Park Heung-Kyeong ឯកអគ្គរដ្ឋទូតសាធារណរដ្ឋកូរ៉េប្រចាំកម្ពុជា ដើម្បីដោះស្រាយបញ្ហាការងារសាងសង់ផ្លូវជាតិទាំងពីរនេះ។ ក្នុងជំនួបនោះ លោកទេសរដ្ឋមន្ត្រីបានជំរុញដល់ក្រុមហ៊ុនសាងសង់​ត្រូវពន្លឿនអនុវត្តគម្រោងឱ្យសម្រេចបានជោគជ័យប្រកបដោយគុណភាព និងត្រឹមត្រូវតាមបទដ្ឋានបច្ចេកទេសសាងសង់ដែលបានកំណត់នៅក្នុងសៀវភៅបន្ទុកការងារ។

ផ្លូវជាតិលេខ២ មានប្រវែងសរុបចំនួន៦២,៥៦គីឡូម៉ែត្រ គិតចាប់ពីរង្វង់មូលតាខ្មៅ ដល់រង្វង់មូលក្រុងដូនកែវ ខេត្តតាកែវ ខណៈផ្លូវជាតិលេខ២២មានប្រវែងសរុបចំនួន៩,៦១គីឡូម៉ែត្រ ចាប់គិតពីរង្វង់មូលក្រុងដូនកែវ ដល់អង្គតាសោមផ្លូវជាតិលេខ៣។ គម្រោងនេះ គ្រោងចំណាយថវិកាសាងសង់សរុបប្រមាណ៥៦លានដុល្លារ ដែលជាហិរញ្ញប្បទានពីរដ្ឋាភិបាលសាធារណរដ្ឋកូរ៉េ រួមជាមួយថវិកាបដិភាគរបស់រាជរដ្ឋាភិបាលកម្ពុជា។

ផ្លូវជាតិទាំងពីរខ្សែនេះ សាងសង់ដោយក្រុមហ៊ុន Hanshin Engineering & Construction Co., Ltd. ត្រូតពិនិត្យលក្ខណៈបច្ចេកទេសដោយក្រុមហ៊ុនទីប្រឹក្សាបច្ចេកទេស Joint Venture of Dasan Consultants Co., Ltd, ក្រុមហ៊ុន Dong II Engineering Consultants Co., Ltd. និងក្រុមហ៊ុន Seoyoung Engineering Co., Ltd. ៕

ដោយ៖ សុផារី

ភ្នំពេញ ៖ ការស្ថាបនាផ្លូវក្រវាត់ក្រុងទី៣ សម្រេចបាន៧៧% រួមទាំងស្ពានឆ្លងកាត់ទន្លបាសាក់ ឆ្លង​កាត់​ផ្លូវជាតិលេខ២ និងផ្លូវជាតិលេខ២២ សម្រេចបាន៨៨% ។

ថ្លែង​ក្នុងសន្និសីទសារព័ត៌មាន ស្ដីពី “សមិទ្ធផលសម្រេចបានរយៈពេល ៥ឆ្នាំ​កន្លង​មក​របស់​ក្រសួង​សាធារណការ​ និងដឹកជញ្ជូន” នាទីស្ដីការគណៈរដ្ឋមន្រ្ដី នៅព្រឹកថ្ងៃទី២៧​ ខែតុលា ឆ្នាំ​២០២២ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បាន​ឱ្យ​ដឹង​ថា ផ្លូវក្រវាត់ក្រុងទី៣ សម្រេចបាន៧៧% រួមទាំងស្ពានឆ្លងកាត់ទន្លបាសាក់ ឆ្លង​កាត់​ផ្លូវ​ជាតិ​លេខ២ និងផ្លូវជាតិលេខ២២ សម្រេចបាន៨៨% ។

ផ្លូវក្រវាត់ក្រុងមួយខ្សែនេះ ចាប់ផ្តើមពីផ្លូវជាតិលេខ៤ ត្រង់ចំណុចគីឡូម៉ែត្រលេខ ១៤+១០៥ ស្ថិតក្នុងភូមិជម្ពូវ័ន្ត សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ ភ្ជាប់​ទៅ​កាន់​ផ្លូវទំនប់កប់ស្រូវ ផ្លូវជាតិលេខ៥ ស្ពានឈ្នះឈ្នះ មហាវិថីឈ្នះឈ្នះ និងផ្លូវជាតិលេខ៦ ហើយ​នឹង​ប្រែក្លាយ​ទៅជាផ្លូវក្រវាត់ក្រុងដ៏ធំ និងទំនើបថ្មីមួយ​សម្រាប់​បម្រើ​ឱ្យ​វិស័យ​ដឹក​ជញ្ជូន​រវាង​រាជ​ធានី​ភ្នំពេញ តភ្ជាប់ទៅកាន់ផ្លូវជាតិលេខ៦ លេខ៥ លេខ៤ លេខ៣ លេខ២ និងផ្លូវជាតិលេខ២១ ដោយ​ឆ្លងកាត់ទន្លេបាសាក់ និងកោះអន្លង់ចិន មកបញ្ចប់ត្រឹមផ្លូវជាតិលេខ១ ត្រង់​ចំណុច​គីឡូ​ម៉ែត្រ​លេខ២៤+៨៤០ ស្ថិតក្នុងភូមិស្តៅកន្លែង ឃុំដីឥដ្ឋ ស្រុកកៀនស្វាយ ខេត្តកណ្តាល។

ពិសេស​ជាង​នេះទៅទៀត ខ្សែផ្លូវនេះក៏បានភ្ជាប់ទៅចំណតផែកុងតឺន័រថ្មី របស់​កំពង់ផែ​ស្វ័យត​ភ្នំពេញ នៅក្នុងស្រុកកៀនស្វាយ ក៏ដូចជាបំពេញឱ្យការតភ្ជាប់ផ្លូវអាស៊ានហាយវ៉េយ និង​ផ្លូវ​របៀង​សំខាន់​ៗ ជារបៀងកណ្តាល និងរបៀងសេដ្ឋកិច្ចភាគខាងត្បូង របស់​មហា​អនុ​តំបន់​មេគង្គ​ផង​ដែរ។

គម្រោងផ្លូវក្រវាត់ក្រុងទី៣នេះ ត្រូវបានប្រារព្ធពិធីបើកការដ្ឋានសាងសង់ កាល​ពី​ថ្ងៃ​ទី​១៤ ខែមករា ឆ្នាំ២០១៩ ដែលអនុវត្តការងារសាងសង់ដោយក្រុមហ៊ុន Shanghai Construction Group Co., Ltd. ក្នុងតម្លៃជាង២៦៧លានដុល្លារអាមេរិក និង​អនុវត្ត​ការងារ​ត្រួត​ពិនិត្យ​គម្រោងដោយក្រុមហ៊ុន Guangzhou Wanan Construction Supervision Co., Ltd. ក្នុងតម្លៃជាង៥លានដុល្លារអាមេរិកក្រោមហិរញ្ញប្បទានសម្បទានពីរដ្ឋាភិបាលនៃសាធារណរដ្ឋប្រជាមានិតចិន និងថវិកាបដិភាគរបស់រាជរដ្ឋាភិបាលកម្ពុជាសម្រាប់ការដោះស្រាយផលប៉ះពាល់ ការបោសសម្អាតមីន និងយុទ្ធភ័ណ្ឌមិនទាន់ផ្ទុះ៕