ដោយ: លាងហួរ

រីយ៉ាដ: រាជទាយាទអារ៉ាប៊ីសាអូឌីត Mohammed bin Salman bin Abdulaziz Al Saud បានដាក់ចេញនូវគំនិតផ្តួចផ្តើមនៃខ្សែសង្វាក់ផ្គត់ផ្គង់សកល កាលពីថ្ងៃអាទិត្យម្សិលមិញនេះ។

ទីភ្នាក់ងារសារព័ត៌មានអារ៉ាប៊ីសាអូឌីតបានរាយការណ៍ថា គំនិតផ្តួច ផ្តើមនេះ មានគោលបំណងធ្វើឱ្យប្រទេសអារ៉ាប៊ីសាអូឌីត ក្លាយជាទីតាំងដ៏ជាទីពេញចិត្ត សម្រាប់ក្រុមហ៊ុនឧស្សាហកម្មឈានមុខគេ នៅលើពិភពលោក និងដើម្បីទាក់ទាញទំហំទឹកប្រាក់ ចំនួន៤០ពាន់លានដុល្លារអារ៉ាប៊ីសាអូឌីត(១០,៦៤ពាន់លានដុល្លារ) ពីការវិនិយោគគុណភាព ឧស្សាហកម្ម និងសេវាកម្មនៅក្នុងខ្សែសង្វាក់ផ្គត់ផ្គង់ពិភពលោក។

យោងតាមរបាយការណ៍នេះបានឱ្យដឹងថា នៅក្រោមគំនិតផ្តួចផ្តើមនេះ ការលើកទឹកចិត្តផ្នែកហិរញ្ញវត្ថុ និងមិនមែនហិរញ្ញវត្ថុក្នុងទំហំទឹកប្រាក់១០ពាន់លានriyl អារ៉ាប៊ីសាអូឌីត នឹងគាំទ្រអ្នកវិនិយោគទូទាំងពិភពលោកដែលចាប់អារម្មណ៍ ក្នុងការបញ្ចូលអារ៉ាប៊ីសាអូឌីត ទៅក្នុងខ្សែសង្វាក់ផ្គត់ផ្គង់របស់ពួកគេ។

ព្រះអង្គម្ចាស់មានបន្ទូលថា គំនិតផ្តួចផ្តើមនេះ រួមជាមួយនឹងគំនិតផ្តួចផ្តើមអភិវឌ្ឍន៍ផ្សេងទៀត ដែលបានចាប់ផ្តើមក្នុងប៉ុន្មានឆ្នាំចុងក្រោយនេះ នឹងជួយដល់អ្នកវិនិយោគ មកពីគ្រប់វិស័យទទួលបានអត្ថប្រយោជន៍ពីធនធាន និងសមត្ថភាពរបស់អារ៉ាប៊ីសាអូឌីតព្រមទាំងគាំទ្រ និងអភិវឌ្ឍខ្សែសង្វាក់តម្លៃទាំងនេះ។

គំនិតផ្តួចផ្តើមនេះត្រូវបានគេរំពឹងថា នឹងនាំប្រទេសអារ៉ាប៊ីសាអូឌីតខិត ទៅជិតការក្លាយជាប្រទេស ដែលមានសេដ្ឋកិច្ចកំពូលទាំង១៥ លើពិភពលោកទាំងនៅឆ្នាំ២០៣០ ហើយបន្សល់ទុកនូវមរតកដ៏សប្បុរសសម្រាប់មនុស្សជំនាន់ក្រោយ៕

ដោយៈជេស៊ីកា

       ភ្នំពេញៈ ក្រុមហ៊ុនដ៏ល្បីរបស់ចក្រភពអង់គ្លេសFoster &Partnersរបស់ចក្រភពអង់គ្លេស បានបញ្ចប់ការគូប្លងស្ថាបត្យកម្ម អាគារកំពស់កប់ពពក ដែលគ្រោងសាងសង់នៅទីក្រុងកោះនរាហើយ។

អគ្គនាយករងក្រុមហ៊ុនOCICលោកទូច សំណាងមានមានប្រសាសន៍ឲ្យដឹងកាលពីចុងសប្តាហ៍មុនថា គំរោងនេះបានបញ្ចប់ការឌីសាញរួចហើយ ដើម្បីត្រៀមរៀបចំសាងសង់ឡើងនៅទីក្រុងកោះនរា ប៉ុន្តែដំណើរការសាងសង់នាពេលណានោះ យើងមិនទាន់ច្បាស់នៅឡើយទេ។

លោកបន្តថា “ក្នុងស្ថានភាពសេដ្ឋកិច្ចមានសភាពបែបនេះ យើងប្រ​ហែលជាត្រូវចំណាយពេលវេលាបន្ថែមទៀត ដើម្បីសាងសង់អាគារកប់ពព​កនេះ”។លោកបន្តថា “ការសាងសង់អាគារនេះលឿនឬយឺត អាស្រ័យលើស្ថានភាពសេដ្ឋកិច្ចកម្ពុជា និងពិភពលោក”។

ក្រុមហ៊ុនFoster& Partnersជាក្រុមហ៊ុនស្ថាបត្យកម្មលំដាប់ពិភពលោកដ៏ល្បីល្បាញ ដោយក្រុមហ៊ុននេះបានគូរប្លង់អាគារល្បីៗ ព្រលាន​យន្ត​ហោះលំដាប់ពិភពលោកជាច្រើន ពិសេសព្រលានយន្តហោះអន្តរជាតិតេជោក្រុងតាខ្មៅ ក៏ត្រូវបានគូដោយក្រុមហ៊ុននេះផងដែរ។

ទីក្រុងកោះនរា មានទំហំ១២៥ហិកតា ដែលបច្ចុប្បន្នការរៀបចំហេដ្ឋា​រចនាសម្ព័ន្ឋនានាបានបញ្ចប់មួយចំនួន និងមួយចំនួនទៀតមិនទាន់បញ្ចប់នៅឡើយទេ៕

ដោយៈ គង់ សូរិយា

       ភ្នំពេញៈ លោកបណ្ឌិត ហ៊ុន ម៉ាណែត សមាជិកគណៈអចិន្ត្រៃយ៍នៃគណៈកម្មាធិការកណ្ដាល និងជាប្រធានយុវជនគណបក្សថ្នាក់កណ្ដាល បានផ្ញើសារលិខិតសម្តែងការអបអរសាទរជូន លោកប្រធានាធិបតី ស៊ី ជិនពីង ដែលបានជាប់ឆ្នោតជាថ្មី ជាអគ្គលេខាធិការគណបក្សកុម្មុយនីស្តចិន។

ក្នុងសារលិខិតនេះ លោក ហ៊ុន ម៉ាណែតបានលើកឡើងថា “ខ្ញុំពិតជាមានក្តីសោមនស្សរីករាយក្រៃលែង ដោយឯកឧត្តម ត្រូវបានជាប់ឆ្នោតសារជាថ្មីម្តងទៀត ជាអគ្គលេខាធិការគណបក្សកុម្មុយនីស្តចិន (CPC) នៅក្នុងសមាជជាតិរបស់គណបក្សកុម្មុយនីស្តចិន លើកទី២០ កាលពីពេលថ្មីៗនេះ”។ សារលិខិតដដែលបានបន្តថា “ក្នុងឱកាសដ៏វិសេសវិសាលនេះ តាងនាមឱ្យយុវជន ថ្នាក់កណ្តាលគណបក្សប្រជា ជនកម្ពុជា (CYCPP) ខ្ញុំសូមសំដែងនូវការអបអរសាទរ និងជូនពរដោយស្មោះស្ម័គ្រជូនចំពោះ ឯកឧត្តម”។

លោកបានបន្តថា “ខ្ញុំក៏សូមឆ្លៀតឱកាសនេះផងដែរ ដើម្បីអបអរការបិទបញ្ចប់ដោយជោគជ័យ សមាជជាតិលើកទី២០ នៃគណបក្សកុម្មុយនីស្តចិន។ សមិទ្ធផលរបស់សមាជជាតិជាប្រវត្តិសាស្ត្រនេះ នឹងពិតជារួមចំណែកដល់ការបន្ត កសាងរបស់ប្រទេសចិន ឆ្ពោះទៅរកភាពទំនើប និងពង្រឹងការកសាងសង្គមនិយម កាន់តែជឿនលឿនតាមចរិត លក្ខណៈពិសេសរបស់ចិន។

លោកបណ្ឌិតហ៊ុន ម៉ាណែតបានសម្តែងសុទិដ្ឋិនិយមថា ក្រោមការដឹកនាំរបស់គណបក្សកុម្មុយនីស្តចិន សហគមន៍អន្តរជាតិបានកោតសរសើរចំពោះ ជោគជ័យដ៏ធំធេងរបស់ប្រទេសចិន លើការកាត់បន្ថយភាពក្រីក្រ វឌ្ឍនភាពផ្នែកវិទ្យាសាស្ត្រ បច្ចេកវិទ្យា និងនវានុវត្តន៍។ អព្ភូតវេហតុអភិវឌ្ឍន៍របស់ប្រទេសចិន ក៏បានជំរុញកំណើនសកល ជាពិសេសក្នុងប្រទេស កំពុងអភិវឌ្ឍន៍។

លោកបន្តថា លើសពីនោះទៅទៀត ភាពបុរសកម្មរបស់គណបក្សកុ  ម្មុយនីស្តចិន ក្នុងការកសាង “សហគមន៍នៃអនាគតរួមគ្នា សម្រាប់មនុស្សជាតិ” បានផ្តល់អត្ថប្រយោជន៍យ៉ាងសំខាន់ដល់មនុស្សជាតិទាំងមូល។

លោកមានជំនឿយ៉ាងមុតមាំថា ជាមួយនឹងគតិបណ្ឌិត និងភាពជាអ្នកដឹកនាំពោរពេញដោយសមត្ថភាព របស់ លោកហ្ស៊ី ជិនពីង គណបក្សកុម្មុយនីស្តចិន នឹងបន្តកសាងសមិទ្ធផលជាប្រវត្តិសាស្ត្របន្ថែមទៀត សម្រាប់ ប្រជាជនចិន និងពិភពលោកទាំងមូល។

ចំពោះទំនាក់ទំនងទ្វេភាគីកម្ពុជា-ចិនវិញ លោកបណ្ឌិតបញ្ជាក់ថា មិត្តភាពជាប្រពៃណី និងកិច្ចសហប្រតិបត្តិការ ជិតស្និទ្ធគ្រប់ ជ្រុងជ្រោយរបស់ប្រទេសទាំងពីរ បានវិវត្តកាន់តែរីកចម្រើន ដោយសារជំនឿទុកចិត្ត និងទំនាក់ទំនងដ៏ស្អិត រមួលរវាងថ្នាក់ដឹកនាំ នៃគណបក្សប្រជាជនកម្ពុជា និងគណបក្សកុម្មុយនីស្តចិន។ ប៉ុន្មានឆ្នាំមកនេះ គណបក្ស នៃប្រទេសទាំងពីរ បានពង្រឹងមិត្តភាពដែកថែប ដោយផ្អែកលើការគោរពគ្នា ការយោគយល់គ្ន និងផល ប្រយោជន៍ទៅវិញទៅមក។ ជាការពិត មិត្តភាពនេះ បានក្លាយជាគម្រូមួយនៅក្នុងទំនាក់ទំនងអន្តរជាតិ។

ក្នុងនាមយុវជនគណបក្សប្រជាជនកម្ពុជាថ្នាក់កណ្តាល លោក ហ៊ុន ម៉ាណែត ប្តេជ្ញាយ៉ាងពេញលេញ ក្នុងការបន្តជម្រុញបន្ថែមនូវមិត្តភាពជាប្រពៃណី រវាងយុវជននៃគណបក្សប្រជាជនកម្ពុជា និងយុវជនរបស់គណបក្សកុម្មុយនីស្តចិន ដែលស្ថិតក្រោមការដឹកនាំផ្ទាល់របស់ប្រមុខគណបក្សទាំងពីរ កម្ពុជា-ចិន ព្រមទាំងបង្កើនភាពជាដៃគូយុទ្ធសាស្ត្រគ្រប់ជ្រុងជ្រោយរវាងកម្ពុជា-ចិន ដើម្បីជាប្រយោជន៍ដល់ប្រជាជនយើង៕

ដោយ: លាងហួរ

ប៉េកាំង: សេដ្ឋកិច្ចរបស់ប្រទេសចិន បានស្ទុះងើបឡើងវិញក្នុងល្បឿនលឿនជាងការរំពឹងទុកនៅក្នុងត្រីមាសទី៣ ស្របពេលទីក្រុងប៉េកាំងកំពុងប្រឈមការទប់ស្កាត់ជំងឺកូវីដ វិបត្តិអចលនទ្រព្យ និងហានិភ័យវិបត្តិសេដ្ឋកិច្ចសកលសម្រាប់ឆ្នាំ២០២៣។

ទិន្នន័យផ្លូវការបានបង្ហាញនៅថ្ងៃចន្ទនេះថា ផលិតផលក្នុងស្រុកសរុប (GDP) ក្នុងប្រទេសចិនកើនឡើង៣,៩ភាគរយ នៅក្នុងខែកក្កដាដល់ខែកញ្ញាពីមួយឆ្នាំទៅមួយឆ្នាំ លើសការព្យាករណ៍៣,៤ភាគរយនៅក្នុងការស្ទង់មតិរបស់Reuters។

ទិន្នន័យនេះ ដំបូងឡើយគ្រោងនឹងចេញផ្សាយនៅថ្ងៃទី១៨ ខែតុលា ប៉ុន្តែត្រូវបានពន្យារពេល រហូតដល់សមាជបក្សកុម្មុយនិស្ត ដែលបានធ្វើឡើងកាលពីសប្តាហ៍មុនត្រូវបានបញ្ចប់។

ទោះបីជាមានការស្ទុះងើបឡើងវិញក៏ដោយ ក៏សេដ្ឋកិច្ចចិនកំពុងប្រ​ឈមមុខនឹងបញ្ហាជាច្រើនក្នុងប្រទេស និងក្រៅប្រទេស ខណៈវិស័យអច​ល​នទ្រព្យចិន បានរងសម្ពាធខាងក្រៅ កាន់តែខ្លាំងឡើងពីវិបត្តិអ៊ុយក្រែន និងការធ្លាក់ចុះសេដ្ឋកិច្ចជាសកល ដោយសារការដំឡើងអត្រាការប្រាក់ ដើម្បីទប់ស្កាត់អតិផរណា។

ផ្អែកលើមូលដ្ឋានប្រចាំត្រីមាសបានបង្ហាញថា GDP របស់ប្រទេសចិនបានកើនឡើង៣,៩ភាគរយ នៅក្នុងត្រីមាសទី៣ ធៀបនឹងការព្យាករណ៍៣,៥ភាគរយ និងការធ្លាក់ចុះ២,៦ភាគរយនៅក្នុងត្រីមាសមុន។

ក្រុមអ្នកបង្កើតគោលនយោបាយ បានដាក់ចេញនូវវិធានការគាំទ្រសេដ្ឋកិច្ចជាង៥០ចំណុច ចាប់តាំងពីចុងខែឧសភា ក្នុងការជំរុញសេដ្ឋកិច្ចដើម្បីបន្ធូរបន្ថយសម្ពាធការងារ បើទោះបីជាពួកគេបានបង្ហាញ ពីសារៈសំខា​ន់នៃការសម្រេចគោលដៅកំណើន ដែលត្រូវបានកំណត់នៅក្នុងខែមីនាក៏ដោយ៕

ដោយៈ គង់ សូរិយា

       ភ្នំពេញៈ សមាគមវិនិយោគិនខ្មែរ-អន្តរជាតិ បានរៀបចំកម្មវិធីជួបជុំសមាជិក សមាជិកា ម្ចាស់អាជីវកម្ម និង វិនិយោគិន ដើម្បីស្វែងយល់អោយកាន់តែច្បាស់អំពីចក្ខុវិស័យ និងបេសកកម្មរបស់សមាគម និងបង្កើនទំនាក់ទំនងគ្នា ។

ក្រោមការដឹកនាំរបស់ លោកឧកញ៉ា ប៊ី សុក្របណ្ឌិត ប្រធានសមាគមវិនិយោគិនខ្មែរ-អន្តរជាតិ និងមានការចូលរួមគាំទ្រដោយ លោក លោកជំទាវ ឧកញ៉ា លោក លោកស្រី ជាម្ចាស់អាជីវកម្ម និងវិនិយោគិន សមាគមមានការរីកចម្រើនគួរអោយកត់សម្គាល់។

លោកឧកញ៉ាប៊ី សុខបណ្ឌិត បានមានប្រសាសន៍ឲ្យដឹងកាលពីថ្ងៃទី២២ តុលាកន្លងមកថា ក្នុងរយៈពេលត្រឹមតែ១០ខែដំបូងនៃឆ្នាំនេះ សមា​គមមានសមាជិកចូលរួមចំនួន៦៧រូប ក្នុងនោះមានសមាសភាពជាមន្ត្រីរដ្ឋាភិបាល អ្នកជំនួញពាណិជ្ជកម្ម និងវិនិយោគិន ដែលសុទ្ធសឹងជាធនធានប្រ​ក​បដោយសក្តានុពល ក្នុងការជំរុញនិងអភវឌ្ឍន៍សង្គម និងសេដ្ឋកិច្ចជាតិ ។

លោកឧកញ៉ាបានបន្តថា កម្មវិធីជួបជុំនាពេលនេះ ជាការពង្រីកនិងពង្រឹងមិត្តភាព កិច្ចសហប្រតិបត្តិការ និងការស្វែងរកឱកាសវិនិយោគរួមគ្នារវាងសមាជិកសមាគមទាំងជាតិ និងអន្តរជាតិ ដែលពួកគាត់សុទ្ឋតែជាម្ចាស់អាជីវកម្ម និងស្វែងរកដៃគូអាជីវកម្ម និងពង្រីកឱកាសជំនួញជាច្រើននៅកម្ពុជា។

លោកឧកញ៉ាបានបន្តថា ស្របពេលសេដ្ឋកិច្ចកម្ពុជា មានកំនើនក្នុង​រង្វង់៥ភាគរយនៅឆ្នាំនេះ បានធ្វើឲ្យសកម្មភាពអាជីវកម្មនៅកម្ពុជាកាន់តែមានការរីកចម្រើន ដែលកម្ពុជាបាន និងកំពុងស្ថិតក្រោមក្រសែភ្នែកអ្នកវិនិយោគអន្តរជាតិ ក្នុងការស្វែងរកឱកាសវិនិយោគនៅកម្ពុជា កាន់តែច្រើនថែមទៀតនាពេលអនាគត ហេតុនេះការពង្រឹងស្តង់ដាអាជីវកម្មឲ្យមានលក្ខណៈអន្តរជាតិ ពិតជាមានសារៈសំខាន់ណាស់ ដើម្បីឲ្យម្ចាស់អាជីវកម្មនោះអាចចាប់ដៃសហការជាមួយក្រុមហ៊ុនអ​ន្តរជាតិបាន៕

ដោយ: លាងហួរ

ហាណូយ: ក្រុមហ៊ុនផលិតរថយន្តអគ្គិសនីរបស់វៀតណាម VinFast បានប្រកាសនៅថ្ងៃចន្ទនេះថា ខ្លួនបានទទួលកញ្ចប់ហិរញ្ញប្បទានចំនួន១៣៥លានដុល្លារ ពីធនាគារអភិវឌ្ឍន៍អាស៊ី (ADB)។

VinFast ដែលជាក្រុមហ៊ុនរថយន្តរបស់ក្រុមហ៊ុន Vingroup JSC ដ៏ធំរបស់ប្រទេសវៀតណាម បានប្រកាសកាលពីឆ្នាំមុនថា ខ្លួនគ្រោងនឹងស្វែងរកថវិកាឱ្យបានយ៉ាងហោចណាស់៤០០លានដុល្លារ តាមរយៈកម្ចីបៃតងដំបូងរបស់ខ្លួន ដើម្បីផ្តល់មូលនិធិដល់ការផលិតរថយន្តអគ្គិសនី។

ជំនួយនេះ រួមមាន ការផ្តល់ហិរញ្ញប្បទានរយៈពេល៧ឆ្នាំ រួមទាំងប្រាក់កម្ចី២០លានដុល្លារ ដែលផ្តល់មូលនិធិដោយ ADB និង ប្រាក់កម្ចីចំនួន៨៧លានដុល្លារ ដែលសម្របសម្រួលដោយ ADB និងហិរញ្ញប្បទានសម្បទានរហូតដល់២៨លានដុល្លារ។

ក្រុមហ៊ុន VinFast បានចាប់ផ្តើមប្រតិបត្តិការនៅឆ្នាំ២០១៩ និងបានបញ្ឈប់ការផលិតរថយន្តដែលដំណើរការដោយម៉ាស៊ីនចំហេះនៅក្នុងខែសីហា ហើយក្រុមហ៊ុនកំពុងកំណត់គោលដៅលក់រថយន្តអគ្គិសនីទូទាំងពិភពលោកចំនួន៧៥ម៉ឺនគ្រឿង ក្នុងមួយឆ្នាំត្រឹមឆ្នាំ២០២៦ ហើយក្រុមហ៊ុនក៏កំពុងត្រៀមពង្រីកខ្លួន នៅក្នុងទីផ្សារសហរដ្ឋអាមេរិកផងដែរ។

យោងតាមទិន្នន័យផ្លូវការបានឱ្យដឹងថា វិស័យដឹកជញ្ជូនរបស់វៀតណាមមានចំនួន១៨ភាគរយនៃការបំភាយឧស្ម័នផ្ទះកញ្ចក់ របស់ប្រទេសវៀតណាម។

យោងតាមធនាគារADBបានឱ្យដឹងថា មូលនិធិនេះក៏នឹងគាំទ្រដល់កិច្ចខិតខំប្រឹងប្រែងរបស់វៀតណាមក្នុងការសម្រេចបាននូវការបំភាយឧស្ម័នផ្ទះកញ្ចក់សូន្យត្រឹមឆ្នាំ២០៥០៕