ដោយ៖ វឌ្ឍនៈ

ភ្នំពេញ ៖ ក្រោយប្រទេសចិនប្រកាសបើកប្រទេសឡើងវិញ អាជីវករ និងអ្នកអភិវឌ្ឍន៍អចលនទ្រព្យនៅកម្ពុជាមិនតិចទេកំពុងរង់ចាំនូវឱកាស និងវត្តមានរបស់ប្រជាជនចិនវិលមកកម្ពុជាវិញ។ តើវត្តមាននៃជនជាតិចិនទាំងនោះមានសារៈសំខាន់យ៉ាងណាចំពោះសកម្មភាពសេដ្ឋកិច្ចកម្ពុជា?

ហេតុផលទី១ អាជីវករជាច្រើនបានឱ្យដឹងថា ជនជាតិចិនភាគច្រើន គឺជាអ្នកដែលចាយលុយច្រើនជាងទេសចរជនជាតិដទៃទៀត។ ជាក់ស្ដែង ការហូបចុករបស់ជនជាតិចិនក៏ឃើញស្រាប់ ពួកគេហូបម្ដងៗមិនអស់តិចនោះទេ ខណៈបរទេសផ្សេងទៀតមានការសន្សំសំចៃ។ ជនជាតិចិនខ្លះទៀត មិនរិះថាំ លើការចាយវាយលើសេវាកម្មដែលគេប្រើ តែសម្រាប់ជនជាតិដទៃទៀត គេមានលុយចាយដូចគ្នា តែការចាយវាយមានភាពភាពខុសគ្នា។

បើក្រលេកនៅប្រទេសថៃ ការសិក្សាបានបង្ហាញថា អំឡុងពេលស្នាក់នៅក្នុងប្រទេសថៃ ជនជាតិចិនម្នាក់ចំណាយដល់ទៅជិត៥ម៉ឺនបាត ឬប្រមាណជាង១.៥០០ដុល្លារអាមេរិក តែចិនខ្លះទៀតបានចំណាយលើសនេះទៅទៀត។ នៅកម្ពុជា ជនជាតិ ចិនខ្លះគ្នា៤នាក់ចាយមួយយប់អស់១ពាន់ដុល្លារអាមេរិកក៏មានដែរ ខណៈជនជាតិអឺរ៉ុបមួយយប់ចាយត្រឹម១ដុល្លារដោយញ៉ាំស្រាបៀរ១កំប៉ុងប៉ុណ្ណោះ។

កត្តាទាំងនេះហើយដែលអាជីករ អ្នកអភិវឌ្ឍន៍មួយចំនួនចង់ឃើញវត្តមានជនជាតិចិននៅកម្ពុជាច្រើនឡើងវិញ ដូចកាលមុនពេលមានវិបត្តិកូវីដ១៩។ ជាការកត់សម្គាល់ និងមិនអាចប្រកែកបាននោះ វត្តមានជនជាតិចិន នៅក្នុងក្រុងព្រះសីហនុបានធ្វើឱ្យអគាររាប់រយរាប់ពាន់រីកដុះដាលខ្លាំង ហើយប្រជាពលរដ្ឋនៅក្នុងខេត្តព្រះសីហនុភាគច្រើនក៏មានជីវភាពប្រសើររកប្រាក់ចំណូលបានច្រើនជាងមុនខ្លាំង។

ប៉ុន្តែក្រោយជនជាតិចិនចាកចេញពីប្រទេសកម្ពុជា ធ្វើឱ្យអាជីវករនិងអ្នកធ្លាប់ទទួលបានផលប្រយោជន៍ពីវត្តមានជនជាតិចិននោះក៏បាត់បង់ចំណូលច្រើន ដូច្នេះហើយពួកគាត់ក៏កំពុងទន្ទឹងរង់ចាំការវិលត្រលប់មកវិញនៃជនជាតិចិនមកកម្ពុជា។

អ្នកនាង គឹម គិនកេសា អ្នកគ្រប់គ្រងជាន់ខ្ពស់នៃក្រុមហ៊ុន CBRE Cambodia បានប្រាប់គេហទំព័រ Property Area ឱ្យដឹងកាលពីពេលថ្មីៗនេះថា ការវិលត្រលប់មកវិញនៃជនជាតិចិនមកកម្ពុជានឹងអាចផ្ដល់ប្រយោជន៍ដល់កម្ពុជា ជាពិសេស នឹងជំរុញការវិនិយោគពីខាងក្រៅប្រទេសចូលមកកម្ពុជា ប៉ុន្តែភ្លាមៗប្រហែលមិនទាន់មានច្រើននោះទេ។

ក្នុងឆ្នាំ២០២៣នេះ កម្ពុជាមិនមែនរំពឹងថា មានតែជនជាតិចិនមួយប៉ុណ្ណោះទេ ដែលនឹងចូលមកកម្ពុជាឡើងវិញ ប៉ុន្តែវិនិយោគិនបរទេស ទាំងក្នុងតំបន់អាស៊ាន និងក្នុងតំបន់អាស៊ី ក៏ដូចជា ពិភពលោកទាំងមូល នឹងចូលមកកម្ពុជាឡើងវិញ ក្រោយពីស្ថានភាពកូវីដ១៩បានស្ងប់ស្ងាត់ ជាពិសេសស្ថានភាពសេដ្ឋកិច្ចពិភពលោកបានប្រសើរឡើងវិញ។ នៅចុងឆ្នាំ២០២៣ឬដើមឆ្នាំ២០២៤ខាងមុខនេះ អ្នកជំនាញអចលនទ្រព្យនៅកម្ពុជាមួយចំនួនក៏រំពឹងថា ស្ថានភាពអចលនទ្រព្យនៅកម្ពុជានឹងអាចវិលទៅរកស្ថានភាពដូចមុនកូវីដ១៩បណ្ដើរៗឡើងវិញ៕

ដោយ៖ វឌ្ឍនៈ

ភ្នំពេញ ៖ ក្នុងរយៈពេល៣ឆ្នាំជាប់គ្នានេះកន្លងមក ប្រទេសកម្ពុជាមានមោទកភាពក្រៃលែង ដោយបានផ្សព្វផ្សាយកិត្យានុភាពលើឆាកអន្តរជាតិ ក្នុងនាមជាម្ចាស់ផ្ទះនៃព្រឹត្តិការណ៍អន្តរជាតិចំនួន៣។

សម្ដេចតេជោ ហ៊ុន សែន នាយករដ្ឋមន្ត្រី នៃកម្ពុជា បានថ្លែងនៅថ្ងៃទី២៣ ខែមករា ឆ្នាំ២០២៣ថា នៅក្នុងឆ្នាំ២០២១ កម្ពុជាបានធ្វើជាម្ចាស់ផ្ទះ នៃកិច្ចប្រជុំកំពូលអាស៊ីអឺរ៉ុប ប៉ុន្តែដោយសារតែអំឡុងពេលនោះកម្ពុជា និងពិភពលោកបានជួបប្រទះនឹងវិបត្តិនៃជំងឺកូវីដ១៩ ដែលធ្វើឱ្យកិច្ចប្រជុំនោះរៀបចំឡើងតាមប្រព័ន្ធអនឡាញជំនួសវិញ។ សម្តេចតេជោលើកឡើងថា ប្រសិនបើមិនមានកូវីដ១៩នោះទេ កិច្ចប្រជុំនេះនឹងនាំមកនូវថ្នាក់ដឹកនាំពិភពលោក និងវិនិយោគិនចូលមកកម្ពុជាកាន់តែច្រើនបន្ថែមទៀត ។

សម្ដេចបន្តថា នៅក្នុងឆ្នាំ២០២២កន្លងទៅ កម្ពុជាក៏បានធ្វើជាម្ចាស់ផ្ទះនៃកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធ ហើយកិច្ចប្រជុំនេះដែរក៏ទទួលបានលទ្ធផលផ្លែផ្កាគួរជាទីមោទនផងដែរ។ កិច្ចប្រជុំនេះដែរក៏មានវត្តមានមេដឹកនាំអាស៊ាន និងមេដឹកនាំពិភពលោកជាច្រើនរូបទៀតអញ្ជើញចូលរួមផងដែរ។

សម្ដេចបន្តទៀតថាក្នុងឆ្នាំ២០២៣នេះ ក៏ជាឆ្នាំប្រវត្តិសាស្ត្រដែលកម្ពុជាបានធ្វើជាម្ចាស់ផ្ទះនៃព្រឹត្តិការណ៍កីឡាស៊ីហ្គេម ហើយនៅថ្ងៃទី២៥ ខែមករាខាងមុខនេះ យើងនឹងរៀបចំពិធីរាប់ថយក្រោយ១០០ថ្ងៃ សម្រាប់ការរង់ចាំអស់រយៈពេល៦០ឆ្នាំកន្លង។ សម្ដេចក៏បានសុំការយោគយល់ចំពោះប្រទេសអាស៊ាន នានាដែលកម្ពុជាមិនបានទទួលយកនូវព្រឹត្តិការណ៍កីឡាស៊ីហ្គេមមករៀបចំ ដោយសារតែកម្ពុជាត្រូវការថវិកាសម្រាប់អភិវឌ្ឍន៍ប្រទេស ដូចជា សាលារៀន វត្តអារាម និងហេដ្ឋារចនាសម្ព័ន្ធនានា។

អ្នកជំនាញអចលនទ្រព្យ ក៏បានបង្ហាញពីសុទិដ្ឋិនិយមចំពោះការធ្វើជាម្ចាសផ្ទះនៃព្រឹត្តិការណ៍អន្តរជាតិសំខាន់ទាំងនោះផងដែរ។ នៅពេលស្ថានភាពកូវីដ១៩ និងសេដ្ឋកិច្ចមានភាពប្រសើរឡើងវិញ កម្ពុជារំពឹងថានឹងអាចទទួលបាននូវវិនិយោគិនថ្មីៗបន្ថែមទៀត។

លោកស្រី ហ្គ្រេស រចនី អគ្គនាយិកាក្រុមហ៊ុន Century 21 Cambodia បានលើកឡើង ថា នៅពេលខាងមុខ កម្ពុជានឹងទទួលបានការវិនិយោគពីប្រទេសក្រៅបន្ថែមទៀត ស្របពេលដែលកម្ពុជាបានបង្ហាញវត្តមានលើឆាកអន្តរជាតិ និងមានអ្នកស្គាល់ពីកម្ពុជាកាន់តែច្រើនក្នុងរយៈពេលប៉ុន្មានឆ្នាំនេះ។

លោកស្រីបន្តថា សម្រាប់ព្រឹត្តិការណ៍ស៊ីហ្គេម ដែលនឹងរៀបចំក្នុងឆ្នាំ២០២៣ក៏ជាព្រឹត្តិការណ៍មួយ នាំភ្ញៀវទេសចរ និងវិនិយោគិនអន្តរជាតិចូលមកកម្ពុជាបន្ថែមទៀតផងដែរ។ ពេលនោះជាឱកាសសម្រាប់កម្ពុជា ក្នុងការបង្ហាញពីសក្ដានុពលវិនិយោគនានា ដល់បណ្ដាវិនិយោគិន ដែលជាទេសចរទស្សនាការប្រកួតកីឡានៅពេលនោះ៕

ដោយ៖ សុធីតា

សៀមរាប៖ ក្រសួង​សេដ្ឋកិច្ច និង​ហិរញ្ញវត្ថុ បាន​សម្រេច​ផ្តល់​ថវិកា​ប្រមាណ២​លាន​ដុល្លារ សម្រាប់​ជួយ​កែ​លម្អ​ផ្លូវ​ប្រវែង​៦៨​គីឡូ​ម៉ែត្រ ពី​ខេត្ត​សៀមរាប ទៅកាន់​ខេត្ត​ឧត្តរ​មានជ័យ ដើម្បី​ជួយ​សម្រួល​ដល់​ការធ្វើ​ដំណើរ និង​ការដឹក​ជញ្ជូន​កសិផល​រវាង​ភូមិសាស្រ្ត​ទាំងពីរ​ផងដែរ​។

នេះបើតាម​កិច្ចប្រជុំ​ពិភាក្សា​លើ​ការអនុវត្ត​គម្រោង​កែ​លម្អ​ផ្លូវ​ប្រវែង​៦៨​គីឡូ​ម៉ែត្រ ពី​ស្រុក​ស្វាយលើ​ខេត្ត​សៀមរាប ទៅ​ស្រុក​ត្រពាំង​ប្រាសាទ ខេត្ត​ឧត្តរ​មានជ័យ កាលពីចុងសប្តាហ៍កន្លងមក​។

លោក ប៉ែន កុសល្យ អភិបាល​នៃ​គណៈ​អភិបាល​ខេត្ត​ឧត្តរ​មានជ័យ បាន​ឱ្យ​ដឹង​ថា ផ្លូវ​មួយ​ខ្សែ​ប្រវែង ៦៨​គីឡូ​ម៉ែត្រ​នេះ គឺ​ឆ្លងកាត់​ភូមិសាស្ត្រ​ខេត្ត​សៀមរាប និង​ខេត្ត​ឧត្តរ​មានជ័យ ដែល​ក្នុងនោះ​មាន​គម្រោង​ស្ថាបនា​ផ្លូវ​ DBST ឆ្លង​កាត់​ភូមិ​អង្កាញ់ ឃុំ​ស្វាយលើ ទៅ​ភូមិ​អភិវឌ្ឍន៍​ ឃុំ​កន្ទួត ស្រុក​ស្វាយលើ​ខេត្ត​សៀមរាប មាន​ប្រវែង៤១​គីឡូ​ម៉ែត្រ និង​ភូមិ​ទំនប់ថ្មី ទៅ​ភូមិ​ត្រពាំង​ប្រាសាទ ឃុំ​និង​ស្រុក​ត្រពាំង​ប្រាសាទ ខេត្ត​ឧត្តរ​មានជ័យ មាន​ប្រវែង២៧​គីឡូ​ម៉ែត្រ។

លោក​បាន​ឱ្យដឹង​​ថា ចំពោះ​ផ្លូវ​ប្រវែង​២៧​គីឡូ​ម៉ែត្រ ដែល​ស្ថិតនៅ​ចាប់ពី​ភូមិ​ទំនប់ថ្មី ទៅ​ភូមិ​ត្រពាំង​ប្រាសាទ ឃុំ​និង​ស្រុក​ត្រពាំង​ប្រាសាទ ខេត្ត​ឧត្តរ​មានជ័យ កន្លង​មក​បាន​ស្ថាបនា​ដោយ​ក្រុមហ៊ុន លី ឈួន ត្រូវ​បាន​រាជ​រដ្ឋាភិបាល​បាន​ឱ្យ​ផ្អាក​មួយ​រយៈ ហើយ​ការមាន​ការរិះគន់​ពី​ប្រព័ន្ធ​បណ្តាញ​សង្គម​ទៀត​ផង។

លោក​បាន​បញ្ជាក់​ដែរ​ថា ផ្លូវ​មួយ​ខ្សែ​នេះ កន្លង​មក​បាន​ផ្តល់​អត្ថ​ប្រយោជន៍​ដល់​ខេត្ត​សៀមរាប និង​ខេត្តឧត្តរ​មានជ័យ ក្នុង​ការដឹក​ជញ្ជូន​កសិផល​របស់​ប្រជា​កសិករ​ទៅកាន់​ទីផ្សារ និង​ប្រើ​ពេលវេលា​ខ្លី​ឆ្ពោះ​ទៅកាន់​ច្រក​ព្រំដែន​ទៀត​ផង។ ម៉្យាងទៀត​ផ្លូវនេះ​ដែរ គឺជា​ផ្លូវ​យុទ្ធសាស្ត្រ​របស់​កងទ័ព និង​ជួយ​សម្រួល​នូវ​ភាព​ងាយ​ស្រួល​របស់​ប្រជា​ពលរដ្ឋ​ក្នុង​ភូមិ​សាស្ត្រ​នៃ​ខេត្ត​ទាំងពីរ​ផងដែរ​។

លោក ទៀ សីហា ក៏​បាន​លើក​ឡើង​ដែរ​ថា សក្តានុពល​របស់​ខេត្ត​មាន​វិស័យ​កសិកម្ម វិស័យ​ទេសចរណ៍ ដែល​ជា​វិស័យ​សេដ្ឋកិច្ច​មួយ​មិន​ចេះ​រីង​ស្ងួត​របស់​កម្ពុជា ដោយ​កត្តានេះ​ហើយ ទោះបី​ប្រទេស​កម្ពុជា​បាន​ជួប​នូវ​វិបត្តិ​ជំងឺ​កូវីដ១៩ ប្រមុខ​រាជ​រដ្ឋាភិបាល​បាន​ផ្តល់​ថវិកា ក្នុង​ការស្ថាបនា​ផ្លូវ ក្នុង​គោលដៅ​លើក​កម្ពស់​វិស័យ​ទេសចរណ៍​ឱ្យ​កាន់តែ​មាន​ភាព​ប្រសើរ​ឡើងវិញ​។ លោក​បញ្ជាក់​ថា គម្រោង​ស្ថាបនា​ផ្លូវ​ថ្នល់​នេះ នឹង​ជួយ​ជំរុញ​សេដ្ឋកិច្ច​ប្រទេស​ជាតិ និង​ប្រជា​ពលរដ្ឋ​ផង​ដែរ។

​រដ្ឋបាល​ខេត្ត​សៀមរាប បាន​ឱ្យ​ដឹង​ថា ក្រសួង​សេដ្ឋកិច្ច​និង​ហិរញ្ញវត្ថុ ​បាន​ផ្តល់​ថវិកា​ចំនួន​ ២លាន​ដុល្លារ សម្រាប់​ធ្វើ​ការសម្រួល​ផ្លូវ​ឡើងវិញ​ក្នុង​ភូមិសាស្ត្រ​ខេត្ត​ទាំងពីរ​នេះ និង​ក្នុង​នោះ​ក៏មាន​ធ្វើ​សំណង់​សិល្បៈការ្យ​ ក្នុង​ភូមិ​សាស្ត្រ​ខេត្ត​សៀមរាប និង​ធ្វើ​ស្ពាន ៣០​កន្លែង​ក្នុង​ភូមិ​សាស្ត្រ​ស្រុក​ត្រពាំង​ប្រាសាទ។

ប្រភព​ដដែល​បន្ត​ថា តំណាង​ក្រសួង​សាធារណការ​ និង​ដឹកជញ្ជូន ក៏បាន​បញ្ជាក់​ដែរ​ថា គម្រោង​ផ្លូវមួយ​ខ្សែ​នេះ គឺ​ត្រូវ​បាន​ប្រគល់​ឱ្យ​កង​វិស្វកម្ម​កងទ័ព​ស្ថាបនា​បន្ត ​នៅ​ក្នុង​ភូមិ​សាស្ត្រ​ខេត្ត​សៀមរាប ប្រវែង​៤១ គីឡូ​ម៉ែត្រ ​និង​ប្រវែង​២៧​គីឡូ​ម៉ែត្រ ក្នុង​ភូមិសាស្ត្រ​ខេត្ត​ឧត្តរ​មានជ័យ ត្រូវ​បាន​ប្រគល់​ឱ្យ​មន្ទីរ​សាធារណការ​និង​ដឹកជញ្ជូន​ខេត្ត​ឧត្តរ​មានជ័យ​ជា​អ្នក​ស្ថាបនា ក្នុង​គម្រោង​ផែនការ​ ៣ ឆ្នាំ​រំកិល​របស់​ក្រសួង ដែល​នឹង​ធើ្វ​ឱ្យ​រួច​រាល់​នៅ​ឆ្នាំ​២០២៤៕​

ដោយ៖ សុផារី

ភ្នំពេញ៖ អ្នក​ជំនាញ​អចលនទ្រព្យ​នៅ​ក្នុង​ប្រទេស​ម្ពុជា​ ដែល​មាន​ជំនឿ​នៅ​ក្នុង​ការ​​ប្រើប្រាស់​ក្បួន​ហុងស៊ុយ​ក្នុង​ការ​ទិញ ​លក់ និង​អភិវឌ្ឍ​អចលនទ្រព្យ​​បាន​ចែក​រំលែក​នូវ​វិធី​សាស្ត្រ​ក្នុង​ក្បួន​ហុងស៊ុយ​សំខាន់ៗ មុន​នឹង​សម្រេច​ចិត្ត​ទិញ​ លក់​ ឬ​សាងសង់​នូវ​អចលនទ្រព្យ​ប្រភេទ​ណាមួយ​។​

លោក​ឧកញ៉ា​បណ្ឌិត គីម​ ហ៊ាង ប្រធាន​ KW Cambodia ដែល​ជា​អ្នក​អភិវឌ្ឍ​អចលនទ្រព្យ​ជាច្រើន​គម្រោង​នៅ​ក្នុង​ប្រទេស​កម្ពុជា បាន​ចែក​រំលែក​ថា បើ​តាម​ក្បួន​ហុងស៊ុយ​ ដែល​លោក​បណ្ឌិត​ធ្លាប់​ប្រើប្រាស់​កន្លង​មក មាន​​ហុង​ស៊ុយ​មួយ​ចំនួន​​ ដែល​គួរ​ពិចារណា​មុន​នឹង​ទិញ​ដីធ្លី​ឬ លំនៅឋាន​ ​ដោយ​ត្រូវ​មើលទីតាំង និង​តំបន់។​

នៅពេល​ទិញ​ត្រូវ​ប្រាកដចិត្ត​ថា ទីតាំង​ដែលទិញ​អាចលក់ចេញ​បាន​ សម្រាប់​ទីតាំង ទី​១ គឺ​គួរ​ជៀសវាង​ទីតាំង​ផ្លូវទាល់ ទី២ គួរ​ជៀសវាង​​អចលនទ្រព្យ​ ដែល​បែរមុខទៅ​ទិសខាង​លិច។

លោក​ឧកញ៉ា​បណ្ឌិត មាន​ប្រសាសន៍ថា “មានទីតាំងមួយចំនួនដែលបងប្អូនគួរពិចារណា ទី១ ដីទាំងឡាយណានៅចុងគេផ្លូវទាល់ មិនគួរទិញ ព្រោះជាទីតាំងដែលលក់មិនងាយចេញទេ”។

ឧកញ៉ា​បណ្ឌិតបន្តថា ហុងស៊ុយទី២ ដីដែលបែរមុខទៅទិញខាងលិចគួរ​ជៀសវៀង ដោយទិសដែលល្អបំផុតទី១ គឺ ទិសខាងកើត ទី២ ខាងជើង ទី២ ខាងត្បូងទី៤ ខាងលិច ចុងក្រោយគឺផ្លូវទាល់។ មូលហេតុ​ដែល​ទិស​ខាង​កើត​ជា​ទីតាំង​ល្អ ព្រោះ ទិសខាងកើតជាទិសនៃពន្លឺពេលព្រឹក ដែលជាទិសនៃពន្លឺស្រស់ស្រាយ ចំណែកទិសខាងលិចគឺជាទិសនៃពន្លឺនាពេលល្ងាចជាពន្លឺមិនសូវល្អ។

ចំណុច​សំខាន់់ទី២ លោកបណ្ឌិត​បញ្ជាក់ថា គួរ​មើល​លើ​​ហ្សូន ឬ​តំបន់​នៃ​ដីធ្លី​នៃ​អចលនទ្រព្យ​នោះ គួរទិញ​ប្រភេទដីលំនៅឋាន ជាប្រភេទអចលនទ្រព្យដែលមិនងាយជាប់គាំង ហើយប្រសិនបើប្រភេទដីលំនៅឋានដែលមានទីតាំងក្បែរផ្សារទៀតនោះកាន់តែល្អប្រសើរបំផុត ព្រោះវាជាទីតាំងតម្រូវការខ្ពស់។ ប៉ុន្តែ ដីប្រភេទកសិកម្ម ជាប្រភេទដីដែលមិនងាយឡើងថ្លៃ  និងមានផលចំណេញមិនសូវខ្ពស់ឡើង។

លោកបណ្ឌិតបញ្ជាក់ថា ” ហាមទិញផ្លូវទាល់ បែរមុខទៅទិញខាងលិច។ ដីដែលគួរទិញបែរទៅទិសខាងកើត ឬខាងជើង ហើយនៅក្បែរផ្សារជាដីលំនៅឋាន”៕