ដោយៈ ជេស៊ីកា

       ភ្នំពេញៈ ក្រុមហ៊ុនក្នុងស្រុកធំមួយ គ្រោងនឹងបើកដំណើរការផ្សារទំនើ​បបែបសហគមន៍ ជាលើកតំបូងនៅតំបន់អរិយក្សត្រ ស្របពេលតំបន់នេះកំពុ​ងមានការរីកចម្រើន និងទាក់ទាញគំរោងអភិវឌ្ឍន៍ជាច្រើន។

ផ្សារទំនើបបែបសហគមន៍នេះ បានដាក់ឈ្មោះAK Avenue បានសាងសង់លើផ្ទៃដីទំហំ៧០០០ម៉ែត្រការ៉េ ដែលបច្ចុប្បន្នការរៀបចំដំណើរការបាននិងកំពុងប្រព្រឹត្តទៅដោយរលូន និងគ្រោងបើកដំណើរការនៅខែធ្នូខាងមុខនេះឬដើមឆ្នាំ២០២៣ខាងមុខនេះ។

អ្នកនាងឈាវ គីមហ័ង្ស អ្នកគ្រប់គ្រងនិងចាត់ការទូទៅនៃផ្សារAK Avenue នៃបុរីវីឡាទួលសង្កែ អរិយក្សត្រ បានមានប្រសាសន៍ឲ្យដឹងកាលពីចុងសប្តាហ៍មុនថា បច្ចុប្បន្នមានអ្នកជួលស្តង់ផ្សារចន្លោះពី៥០ ទៅ៦០ភាគរយ នៃទំហំស្តង់សរុបរបស់ផ្សារហើ​យ ដែលពួកគាត់មានលក់សម្លៀកបំពាក់ ហាងថែរក្សាសម្ឆស្ស ហាងលក់​  ម្ហូបអាហារ ហាងតែគុជ ហាងកាហ្វេ បន្លែ ផ្លែឈើ ដែលភ្ញៀវក្នុងនិងក្រៅបុរីអាចចូលទិញ និងប្រើប្រាស់សេវាកម្មរបស់ផ្សារនេះ។

អ្នកនាងបន្តថា “រហូតមកទល់ពេលនេះ យើងដំណើរការរៀបចំបាន៩០ភាគរយហើយ ចំណុចនៅសល់គឺការរៀបចំសួនច្បារ និងការរៀបចំខ្លោងទ្វារ កន្លែងក្មេងលេងជាដើម”។ អ្នកនាងបន្តថា “អតិថិជនដែលបាន​និងកំពុងជួលស្តង់នៅក្នុងផ្សារនេះ នឹងបើកដំណើរការនៅខែវិច្ឆិកាខាងមុខនេះ ហើយដំណើរការបើកសម្ភោធផ្សារជាផ្លូវការ គ្រោងនឹងរៀបចំនៅខែធ្នូចុងឆ្នាំនេះឬដើមឆ្នាំ២០២៣ខាងមុខ”។

អ្នកនាងឈាវ គឹងហ័ង្សបានបន្តថា ចំណុចពិសេសមួយទៀត អតិថិជន ដែលចង់ជួលស្តង់ផ្សាររបស់យើង នឹងទទួលបានការប្រឹក្សាយោបល់លើការជ្រើសរើសមុខទំនិញ របៀបនៃការរៀបចំហាង ឬធ្វើសេវាកម្មអ្វីនៅក្នុងផ្សារនេះដោយឥតគិតថ្លៃផងដែរ ពិសេសក្រុមហ៊ុនមានតារាងសម្រាប់បង្ហាញអតិថិជន ក៏ដូចជា យើងនឹងមានការបង្ហាញពីការឌីសាញ និងការរៀបចំស្តង់បែបណា ដើម្បីទាក់ទាញអតិថិជនផងដែរ។

ផ្សារទំនើបសហគមន៍AK Avenueមានទីតាំងស្ថិតក្នុងគំរោងបុរីវីឡាទួលសង្កែអរិយក្សត្រ ដែលជាគំរោងអភិវឌ្ឍន៍ដ៏ធំមួយ ស្ថិតនៅលើផ្ទៃដីជាង៦០ហិកតា នៅក្នុងតំបន់អរិយក្សត្រ ដែលរាជរដ្ឋាភិបាលបាន និងកំពុងសិក្សាបង្កើតទីក្រុងថ្មីមួយនៅតំបន់នេះ។

បុរីវីឡាទួលសង្កែ ជាបុរីថ្មីមួយដែលបាន និងកំពុងអភិវឌ្ឍន៍បែបបៃតង​និងការរស់នៅបែបសហគមន៍ ដោយបុរីនេះបាននិងកំពុងរៀបចំហេដ្ឋារចនាសម្ព័ន្ឋធំទូលាយ និងមានផ្ទះជាច្រើនប្រភេទ ដែលទទួលបានផលចំណេញពីការវិនិយោគនាពេលអនាគតដ៏ខ្លីខាងមុខនេះ។

អតិថិជនចាប់អារម្មណ៍ជួលស្តង់ក្នុងផ្សារនេះ អាចទំនាក់ទំនងតាមរយៈលេខទូរស័ព្ទ 096 301 60 85៕

ដោយ៖ សុផារី

កោះកុង៖ ក្រុមហ៊ុនវិនិយោគចិន China Matrix Technology Group-Horche Intelligent Automobile បានចាប់អារម្មណ៍ និងមានគោលបំណងបោះទុនវិនិយោគលើវិស័យបច្ចេកវិទ្យាឧស្សាហកម្ម ដោយនឹងបង្កើតរោងចក្រ និងដំឡើងរថយន្តអគ្គិសនីក្នុងភូមិសាស្ត្រខេត្តកោះកុងកម្ពុជា។

ក្នុងកិច្ចប្រជុំជាមួយគណៈប្រតិភូវិនិយោគចិនស្តីពី “សក្តានុពលវិយោគលើវិស័យបច្ចេកវិទ្យា ឧស្សាហកម្ម និងគោលបំណងរបស់ក្រុមហ៊ុនចិន ក្នុងការបង្កើតរោងចក្រដំឡើងរថយន្តអគ្គីសនី ក្នុងខេត្តកោះកុង”លោកស្រី មិថុនា ភូថង អភិបាលខេត្តកោះកុង បានសម្តែងសោមនស្សរីករាយក្រៃលែង និងមានមោទនភាព ដែលក្រុមហ៊ុននេះចាប់អារម្មណ៍បោះទុនវិនិយោគនៅក្នុងខេត្តកោះកុង។

លោកស្រីអភិបាលលើកឡើងថា វិស័យរ៉ែ និងថាមពល បានផ្ដល់ភាពទូលំទូលាយ ដល់អ្នកវិនិយោគទាំងឡាយ ដើម្បីអភិវឌ្ឍវារីអគ្គិសនីខ្នាតតូច និងជំរុញការអភិវឌ្ឍបច្ចេកវិទ្យាប្រកបដោយគុណភាពខ្ពស់ស្របតាមស្តង់ដាអន្តរជាតិមានតម្លៃថោកសមរម្យ និងមានសេវាកម្មទំនើបគ្របដណ្តប់ទូទាំងខេត្ត ដូចជា វារីអគ្គិសនី ស្ទឹងឫស្សីជ្រុំក្រោម វារីអគ្គិសនីគិរីរម្យ៣ វារីអគ្គិសនីស្ទឹងតាត។

លោកស្រីឱ្យដឹងថា ក្នុងឆ្នាំ២០២១ ខេត្តមានឧស្សាហកម្មធុនធំចំនួន០៧រោងចក្រ ដែលក្នុងនោះមានរោងចក្រតំឡើងរថយន្ត បង្គុំខ្សែភ្លើង គ្រឿងអេឡិចត្រូនិច វាយនភ័ណ្ឌកាត់ដេរ សំលៀកបំពាក់ សម្ភារកីឡា។ល។ សហគ្រាសធុនតូច មធ្យម និងសិប្បកម្ម ដែលមានចំនួន ៧៥៥ មូលដ្ឋាន។

កោះកុងជាខេត្តដែលស្ថិតនៅបែកនិរតីនៃប្រទេសកម្ពុជា មានចំងាយប្រមាណ ២៩០គីឡូម៉ែត ពីរាជធានីភ្នំពេញ ដោយមានខ្សែផ្លូវជាតិដ៏សំខាន់ចំនួន២ ក្នុងការតភ្ជាប់គឺផ្លូវជាតិលេខ៤ និងផ្លូវជាតិលេខ៤៨ ក្នុងនោះខេត្តកោះកុងក៏មានព្រលានយន្តហោះខ្នាតអន្តរជាតិចំនួន០១ គឺព្រលានយន្តហោះតារាសាគរ ស្ថិតក្នុងតំបន់វិស្សមកាលតារាសាគរ នៃក្រុមហ៊ុនយូញៀន ក្នុងស្រុកគិរីសាគរ។

ក្រៅពីផ្លូវ គោក និងផ្លូវអាកាស ខេត្តកោះកុង ក៏កំពុងត្រូវបានសាងសង់កំពង់ផែទឹកជ្រៅ និងផ្លូវនាវាចរ និងហេដ្ឋារចនាសម្ព័ន្ធសំខាន់ៗដទៃទៀតផងដែរ ក្នុងនោះច្រកទ្វារព្រំដែនអន្តរជាតិចាំយាម កម្ពុជា-ថៃ ក៏ជាច្រកព្រំដែនដ៏សំខាន់មួយក្នុងនោះការដោះដូរទំនិញ កសិកម្ម ការវិនិយោគ និងពាណិជ្ជកម្មចម្រុះ។ ខេត្តបាននិងកំពុងធ្វើការទំនាក់ទំនង និងបន្តកិច្ចសហប្រតិបត្តិការជាមួយខេត្តត្រាត ប្រទេសថៃ ក្នុងការបង្កើនបរិយាកាសកក់ក្ដៅសម្រាប់ការធ្វើអាជីវកម្ម រវាងប្រទេសទាំងពីរ៕

ដោយ: លាងហួរ

សេអ៊ូល: រដ្ឋាភិបាលកូរ៉េខាងត្បូង គ្រោងនឹងពង្រីកកម្មវិធីទិញមូលបត្របំណុលសាជីវកម្មរបស់ខ្លួន ក្នុងចំណោមវិធានការផ្គត់ផ្គង់សាច់ប្រាក់ ងាយស្រួលផ្សេងទៀត ចំពេលមានការព្រួយបារម្ភកាន់តែខ្លាំងឡើង អំពីវិបត្តិឥណទាន នៅក្នុងទីផ្សារមូលបត្របំណុល និងទីផ្សាររូបិយវត្ថុរយៈពេលខ្លី។

រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក Choo Kyung-ho បានមានប្រសាសន៍ឱ្យដឹងនៅថ្ងៃអាទិត្យនេះថា រដ្ឋាភិបាលក៏នឹងបង្កើនជាកម្រិតអតិបរមា ក្នុងការទិញមូលបត្របំណុលសាជីវកម្ម ដោយធនាគាររដ្ឋ ដូចជា ធនាគារអភិវឌ្ឍន៍កូរ៉េ និងធនាគារឧស្សាហកម្ម នៃប្រទេសកូរ៉េដល់១៦ពាន់ពាន់លានវ៉ុន ដែលចំនួននៃការទិញនេះ បានកើនឡើងមួយទ្វេជាពីរ។

លោក Choo បានបញ្ជាក់ឱ្យដឹង បន្ទាប់ពីកិច្ចប្រជុំជាមួយមន្ត្រីហិរញ្ញវត្ថុកំពូល រួមទាំងអភិបាលធនាគារកណ្តាល និងប្រធានផ្នែកនិយតកម្មថា វិធានការនេះមានគោលបំណងបន្ធូរបន្ថយ ការប្រែប្រួល និងក្តីបារម្ភនៃសាច់ប្រាក់ងាយស្រួល ក្នុងទីផ្សារមូលបត្របំណុលសាជីវកម្ម និងទីផ្សាររូបិយវត្ថុរយៈពេលខ្លី។

លោកបានបន្តថា ផលបត្រឬប័ណ្ណពាណិជ្ជកម្ម ដែលបោះពុម្ពដោយក្រុមហ៊ុនមូលបត្រ នឹងត្រូវបានបញ្ចូលក្នុងបញ្ជីទិញរបស់គ្រឹះស្ថាន ខណៈសាច់ប្រាក់ងាយស្រួលបន្ថែមទៀត ចំនួន៣ពាន់ពាន់លានវ៉ុននឹងត្រូវបានផ្គត់ផ្គង់ ដោយក្រុមហ៊ុន Korea Securities Finance Corp សម្រាប់ក្រុមហ៊ុនមូលបត្រ ដែលជួបប្រទះការខ្វះខាតសាច់ប្រាក់ងាយស្រួល៕

ដោយ៖ សូរិយា

ប៉េកាំង៖ នៅទីបំផុតទៅដូចការរំពឹងទុក ប្រធានាធិបតីចិន លោក ស៊ី ជិនពីង ត្រូវបានតែងតាំងជាអគ្គលេខាធិការ និងជាប្រធានគណៈកម្មការយោធាមជ្ឈិម នៃគណបក្សកុម្មុយនិស្ដចិន សម្រាប់អាណត្តិទី៣ នៅថ្ងៃអាទិត្យនេះ។

នេះជាការត្រួសត្រាយផ្លូវឱ្យលោកកាន់តំណែងជាប្រធានាធិបតីរយៈពេល៥ឆ្នាំបន្តទៀត និងជាប្រធានាធិបតីដ៏មានឥទ្ធិពលធំបំផុត ចាប់តាំងពីសម័យលោក ម៉ៅ សេទុង មក។

នេះបើតាមការចេញផ្សាយដោយទីភ្នាក់ងារ សារព័ត៌មាន AFP នៅថ្ងៃអាទិត្យ ទី២៣ ខែតុលា ឆ្នាំ២០២២។

ប្រភពខាងលើបានឱ្យដឹងថា គណបក្សកុម្មុយនិស្តចិនបានបិទបញ្ចប់សមាជបក្សលើកទី២០ របស់ខ្លួនកាលពីថ្ងៃសៅរ៍ចុងសប្ដាហ៍នេះ បន្ទាប់ពីប្រតិភូបក្សជាង២.៣០០នាក់មកពីទូទាំងប្រទេស ជួបប្រជុំគ្នាដើម្បីបោះឆ្នោតជ្រើសរើសថ្នាក់ដឹកនាំកំពូលៗរបស់បក្ស ចាយពេលជាងមួយសប្ដាហ៍។

ក្រៅតែពីការប្រកាសតែងតាំងលោក ស៊ី ជិនពីង ជាអគ្គលេខាធិការ បក្ស ក៏មានការបោះឆ្នោតជ្រើសរើសសមាជិកគណៈកម្មាធិការមជ្ឈិមបក្ស ចំនួន២០៥នាក់ផងដែរ ដែលនឹងដឹកនាំគណបក្សរយៈពេល៥ឆ្នាំបន្ត និងសុទ្ធសឹងតែ ជាមនុស្សស្មោះស្ម័គ្រជាមួយលោក ស៊ី ជិនពីង។

ការបន្តកាន់តំណែងជាអគ្គលេខាធិការរបស់លោក ស៊ី ជិនពីង មានន័យថាលោកក៏នឹងត្រូវបន្តកាន់តំណែងជាប្រធានាធិបតីចិន សម្រាប់អណត្តិទី៣ ឬអស់មួយជីវិត ក្រោយការលុបចោលការកំណត់អណត្តិប្រធានាធិបតីត្រឹម២អាណត្តិ។ ការប្រកាសជាផ្លូវការនេះទៀតសោត នឹងត្រូវធ្វើឡើងនៅក្នុងសម័យប្រជុំសភាប្រជាជនចិន នៅខែមីនា ឆ្នាំ២០២៣ឯណោះ៕

ដោយ៖ សុផារី

ភ្នំពេញ៖ គេហទំព័រ Nikkei តាមរយៈ COVID-19 Recovery Index បានចាត់ចំណាត់ថ្នាក់ប្រទេសកម្ពុជានៅលំដាប់លេខ៤ ក្នុងសន្ទស្សន៍នៃការងើបឡើងវិញពីវិបត្តិកូវីដ១៩។

សន្ទស្សន៍ Nikkei COVID-19 Recovery Index នេះបានធ្វើការវាយតម្លៃប្រទេស និងតំបន់ចំនួន១២១ លើពិភពលោក លើការគ្រប់គ្រងការឆ្លងវីរុស ការចាក់វ៉ាក់សាំង និងការចល័តទីនៅក្នុងសង្គម។ ប្រសិនបើសន្ទស្សន៍នេះ មានពិន្ទុកាន់តែខ្ពស់មានន័យថា ប្រទេស ឬតំបន់នោះបានងើបឡើងវិញរួចផុត ពីការចំលងនៃវីរុសកូវីដ១៩ បានល្អប្រសើរ ដោយសារករណីឆ្លងថ្មី មានចំនួនតិចជាងមុន អត្រានៃការចាក់វ៉ាក់សាំងកាន់តែច្រើន និងវិធានការរក្សាគម្លាត សង្គមធូរស្រាលជាងមុន។

ក្នុងបួនខែជាប់ៗគ្នាចុងក្រោយនេះ ប្រទេសកម្ពុជា បានទទួលចំណាត់ថ្នាក់ជាប្រទេសងើបឡើងវិញល្អ ក្នុងចំណោម ប្រទេសដែលមានចំណាត់ថ្នាក់ល្អជាងគេទាំងដប់នៅលើពិភពលោក។ ជ័យជំនះនេះកើតឡើងមកពីកម្ពុជា បានបន្តជំរុញយុទ្ធនាការចាក់ វ៉ាក់សាំង របស់ខ្លួនបានទូលំទូលាយ និងឆាប់រហ័ស និង ជាលទ្ធផលកម្ពុជា បានបើកប្រទេសទាំងស្រុង ទទួលទេសចរណ៍ពីគ្រប់ទិសទីលើពិភពលោក។

គិតត្រឹមថ្ងៃទី២២ ខែតុលា ឆ្នាំ២០២២ កម្ពុជាបានចាក់ចាក់វ៉ាក់សាំងកូវីដ១៩ ជូនប្រជាពលរដ្ឋបានចំនួន ១៥,២លាននាក់ ស្មើនឹង៩៥,០៨ភាគរយនៃចំនួនប្រជាជន១៦លាននាក់៕